Kpojiemɔ 15 - ŊMALƐ KRƆŊKRƆŊ LƐ

Bɔfoi ni hiɛ haomɔi kpawo lɛ

¹ Ni mina naakpɛɛ okadi kroko yɛ ŋwɛi, eda ni eyɛ naakpɛɛ: bɔfoi kpawo ni hiɛ haomɔi kpawo ni ji naagbeenii lɛ, ejaakɛ nomɛi akɛgbeɔ Nyɔŋmɔ mlila lɛ naa.

² Ni mina nɔ ko tamɔ ashwishwɛ ŋshɔ ni akɛ lá efutu mli, ni mɛi ni eye kooloo lɛ kɛ emãgã lɛ kɛ ekadi lɛ kɛ egbɛi lɛ yibɔ lɛ nɔ kunim lɛ damɔ ashwishwɛ ŋshɔ lɛ naa, ni amɛhiɛ Nyɔŋmɔ saŋkui lɛ.

³ Ni amɛla Nyɔŋmɔ tsulɔ Mose lala lɛ kɛ Toobi lɛ lala lɛ amɛkɛɛ, “Onitsumɔi lɛ dara ni amɛyɛ naakpɛɛ, Nuŋtsɔ Nyɔŋmɔ Ofe! Ogbɛi lɛ ja ni anɔkwale ni, bo jeŋmaji lɛ aMaŋtsɛ!

⁴ Namɔ po sheŋ bo gbeyei, Nuŋtsɔ, ni ewoŋ ogbɛ́i lɛ hiɛ nyam? Ejaakɛ bo okometoo ji Mɔ krɔŋkrɔŋ; ejaakɛ jeŋmaji lɛ fɛɛ aaaba ni amɛbaja yɛ ohiɛ, ejaakɛ ajie ojalɛ nitsumɔi lɛ ashi faŋŋ.”

⁵ Ni nii nɛɛ asɛɛ lɛ mikwɛ, ni agbele Odase Buu lɛ Sɔlemɔtsu lɛ naa yɛ ŋwɛi,

⁶ ni bɔfoi kpawo lɛ ni hiɛ haomɔi kpawo lɛ je kpo kɛjɛ Sɔlemɔtsu lɛ mli, ni amɛwo klala ni he tse ni kpɛlɛɔ kaŋkaŋ, ni amɛfimɔ amɛtsitsii kɛ shika mlifiinii.

⁷ Ni hiɛkãalɔi ejwɛ lɛ ateŋ mɔ kome kɛ shika tɔi kpawo ni eyimɔ obɔ̃bɔ̃ kɛ Nyɔŋmɔ ni hiɛ kã kɛyaa naanɔi anaanɔ lɛ mlila lɛ hã bɔfoi kpawo lɛ.

⁸ Ni Sɔlemɔtsu lɛ yi obɔ̃ kɛ lasu ni jɛ Nyɔŋmɔ anunyam lɛ kɛ ehewalɛ lɛ mli lɛ, ni mɔ ko nyɛ̃ɛɛ Sɔlemɔtsu lɛ mli abote kɛyashi beyinɔ ni aaagbe bɔfoi kpawo lɛ ahaomɔi kpawo lɛ anaa.