Kpojiemɔ 14 - ŊMALƐ KRƆŊKRƆŊ LƐ

Toobi lɛ kɛ mɛi ni akpɔ̃ amɛ lɛ

¹ Ni mikwɛ, ni naa, Toobi lɛ damɔ Zion Gɔŋ lɛ nɔ, ni mɛi akpei oha kɛ nyɔŋmai ejwɛ kɛ ejwɛ ni aŋma egbɛi kɛ eTsɛ gbɛi yɛ amɛhiɛŋtsei anɔ fata ehe.

² Ni minu gbee ko kɛjɛ ŋwɛi tamɔ nui pii agbɛɛmɔ, ni asaŋ etamɔ nyɔŋmɔshimɔ kpeteŋkple gbɛɛmɔ; ni gbee ni minu lɛ tamɔ saŋkutswalɔi ni miitswa amɛsaŋkui agbee.

³ Ni amɛlaa lala hee ko yɛ maŋtsɛ sɛ̃i lɛ hiɛ kɛ hiɛkãalɔi ejwɛ lɛ kɛ onukpai lɛ ahiɛ; ni mɔ ko nyɛɛɛ lala lɛ akase, akɛ ja mɛi akpei oha kɛ nyɔŋmai ejwɛ kɛ ejwɛ lɛ ni akpɔ̃ kɛjɛ shikpɔŋ lɛ nɔ lɛ kɛkɛ.

⁴ Mɛnɛɛmɛi ji mɛi ni kɛ yei buleko amɛhe, ejaakɛ oblahii ni he tse ji amɛ, ni amɛnyiɛɔ Toobi lɛ sɛɛ kɛyaa he fɛɛ he ni eyaa lɛ. Mɛnɛɛmɛi ji mɛi ni akpɔ̃ kɛjɛ gbɔmɛi ateŋ akɛ klɛŋklɛŋ yibii kɛhã Nyɔŋmɔ kɛ Toobi lɛ.

⁵ Ni anaaa amale ko yɛ amɛdaaŋ ejaakɛ kpa ko bɛ amɛhe.

⁶ Ni mina bɔfo kroko miifiliki yɛ ŋwɛi teŋ, ni ehiɛ naanɔ Sanekpakpa ni eyaajaje etsɔ̃ɔ mɛi ni yɔɔ shikpɔŋ lɛ nɔ kɛjɛ jeŋmaŋ fɛɛ jeŋmaŋ kɛ akutso fɛɛ akutso kɛ maji anɔ wiemɔi fɛɛ kɛ maŋ fɛɛ maŋ mli.

⁷ Ni ekɛ gbee ni wa kɛɛ, “Nyɛshea Nyɔŋmɔ gbeyei ni nyɛkɛ anunyam ahãa lɛ ejaakɛ ekojomɔ ŋmɛlɛtswaa lɛ eshɛ; ni nyɛjaa mɔ ni fee ŋwɛi kɛ shikpɔŋ kɛ ŋshɔ kɛ nuhiŋmɛii lɛ!”

⁸ Ni bɔfo kroko ni ji enyɔ nyiɛ klɛŋklɛŋ bɔfo lɛ sɛɛ ni ekɛɛ, “Egbee shi, Babilon maŋ kpeteŋkple lɛ egbee shi, ejaakɛ ehã jeŋmaji fɛɛ enu ejwamaŋbɔɔ ni naa wa lɛ dãa lɛ eko.”

⁹ Ni bɔfo kroko ni ji etɛ̃ nyiɛ amɛsɛɛ, ni ekɛ gbee wulu kɛɛ, “Kɛji mɔ ko ja kooloo lɛ kɛ emãgã lɛ, ni ehe ekadi lɛ yɛ ehiɛŋtso nɔ loo enine nɔ lɛ,

¹⁰ lɛ hu eeenu Nyɔŋmɔ mlifu dãa ŋmiiŋmi ni akɛwo emlifu kpulu lɛ mli lɛ eko, ni aaapiŋ lɛ yɛ la kɛ swɔɔ mli yɛ bɔfoi krɔŋkrɔŋi lɛ ahiɛ kɛ Toobi lɛ hiɛ.

¹¹ Ni amɛpiŋmɔ lɛ lasu lɛ teɔ shi kɛyaa naanɔi anaanɔ. Ni mɛi ni jaa kooloo lɛ kɛ emãgã lɛ, kɛ mɔ fɛɛ mɔ ni eŋɔ egbɛi okadi lɛ, nãaa hejɔɔmɔ nyɔɔŋ kɛ shwane.”

¹² Biɛ krɔŋkrɔŋbii lɛ ni hiɛ Nyɔŋmɔ kitãi lɛ kɛ Yesu nɔ hemɔkɛyeli lɛ mli lɛ ahiɛmiamɔ lɛ he ehia yɛ.

¹³ Ni minu gbee jɛ ŋwɛi miikɛɛ mi akɛ, “Ŋmaa: Ajɔɔ gbohii lɛ ni gboiɔ yɛ Nuŋtsɔ lɛ mli lɛ kɛjɛ ŋmɛnɛ nɔ kɛyaa nɛɛ. Hɛɛ, Mumɔ lɛ kɛɛ, koni amɛjɔɔ amɛhe kɛjɛ amɛdeŋmegbomɔi lɛ amli ejaakɛ amɛnitsumɔi lɛ nyiɛɔ amɛsɛɛ.”

Shikpɔŋ lɛ nɔ nikpamɔ lɛ

¹⁴ Ni mikwɛ, ni naa, atatu yɛŋ, ni mɔ ko ta nɔ tamɔ gbɔmɔ bi, ni shika akekre fi eyitso, ni ehiɛ nikpamɔ kakla ni naa ba yɛ edɛŋ.

¹⁵ Ni bɔfo kroko je kpo kɛjɛ Sɔlemɔtsu lɛ mli ni ebolɔ kɛ gbee ni wa ekɛɛ mɔ ni ta atatu lɛ nɔ lɛ akɛ, “Okɛ onikpamɔ kakla lɛ awo mli ni okpa nii, ejaakɛ nikpamɔ ŋmɛlɛtswaa lɛ eshɛ, ni shikpɔŋ lɛ nɔ nikpamɔnii lɛ etsu.”

¹⁶ Ni mɔ ni ta atatu lɛ nɔ lɛ shɛ enikpamɔ kakla lɛ efɔ̃ shikpɔŋ lɛ nɔ, ni akpa shikpɔŋ lɛ nɔ nii lɛ.

¹⁷ Ni bɔfo kroko je kpo kɛjɛ Sɔlemɔtsu lɛ ni yɔɔ ŋwɛi lɛ mli, ni lɛ hu ehiɛ nikpamɔ kakla ni naa ba.

¹⁸ Ni bɔfo kroko ni yɔɔ la nɔ hewalɛ je kpo kɛjɛ afɔleshãa latɛ lɛ mli, ni ebo etsɛ mɔ ni hiɛ nikpamɔ kakla ni naa ba lɛ kɛ gbee ni wa akɛ, “Okɛ okakla ni naa ba lɛ awo mli ni okpa shikpɔŋ lɛ nɔ waintso yibii lɛ ejaakɛ ewaintso yibii lɛ etsu!”

¹⁹ Ni bɔfo lɛ shɛ ekakla lɛ efɔ̃ shikpɔŋ lɛ nɔ, ni ekpa shikpɔŋ lɛ nɔ waintso yibii lɛ, ni ekɛwo Nyɔŋmɔ mlila lɛ wainŋaanɔ kpeteŋkple lɛ mli.

²⁰ Ni anaanaa wainŋaanɔ lɛ nɔ yɛ maŋ lɛ ŋmaŋmasha lɛ, ni lá ho kɛjɛ wainŋaanɔ lɛ mli ni ekɛlɛ ji shitoi ohai enyɔ.