Kpojiemɔ 13 - ŊMALƐ KRƆŊKRƆŊ LƐ

Kooloi enyɔ lɛ

¹ Ni mina kooloo ko miije kpo kɛmiijɛ ŋshɔ lɛ mli kɛmiiba kɛ eklontoi nyɔŋma kɛ eyitsei kpawo, ni maŋtsɛ faii nyɔŋma bumɔ eklontoi lɛ, ni musubɔɔ gbɛi yɛ eyitsei lɛ ahe.

² Ni kooloo lɛ ni mina lɛ tamɔ mlaŋtswi, ni enaji tamɔ oshishibrishi naji, ni enaabu tamɔ jata naabu. Ni drako lɛ kɛ lɛ diɛŋtsɛ ehewalɛ lɛ kɛ emaŋtsɛ sɛ̃i lɛ kɛ hegbɛ kpeteŋkple hã lɛ.

³ Ni mina eyitsei lɛ ateŋ ekome tamɔ nɔ ni epila gbele pilamɔ, ni atsa egbele pilamɔ lɛ, ni shikpɔŋ muu lɛ fɛɛ nyiɛ kooloo lɛ sɛɛ ni amɛnaa ekpɛ amɛhe,

⁴ ni amɛja drako lɛ, ejaakɛ ekɛ hegbɛ lɛ ehã kooloo lɛ, ni amɛja kooloo lɛ hu amɛkɛɛ, “Namɔ tamɔ kooloo lɛ, ni namɔ aaanyɛ ekɛ lɛ awu?”

⁵ Ni ahã lɛ naabu ni wieɔ wiemɔi wuji kɛ musubɔɔ wiemɔi, ni ahã lɛ hegbɛ akɛ efee enɛ nyɔji nyɔŋmai ejwɛ kɛ enyɔ.

⁶ Ni egbele enaa ewie musubɔɔ wiemɔi eshi Nyɔŋmɔ, ni ewie egbɛi lɛ kɛ eshihilɛhe lɛ kɛ mɛi ni yɔɔ ŋwɛi lɛ ahe musubɔɔ wiemɔi.

⁷ Ni ahã lɛ hegbɛ ni ekɛ krɔŋkrɔŋbii lɛ awu ni eye amɛnɔ kunim; ni ahã lɛ hegbɛ yɛ akutso fɛɛ akutso kɛ maŋ fɛɛ maŋ kɛ maji anɔ wiemɔi fɛɛ kɛ jeŋmaŋ fɛɛ jeŋmaŋ nɔ.

⁸ Ni mɛi fɛɛ ni yɔɔ shikpɔŋ lɛ nɔ lɛ aaaja lɛ. Ja mɔ fɛɛ mɔ ni aŋma egbɛi kɛjɛ jeŋ shishijee yɛ Toobi ni agbe lɛ wala wolo lɛ mli lɛ kɛkɛ.

⁹ Kɛji mɔ ko yɛ toi ni akɛnuɔ nii lɛ, enu nii.

¹⁰ Kɛji ato akɛ aŋɔ mɔ ko nom lɛ, aaaŋɔ lɛ nom; ni kɛ ato akɛ akɛ klante agbe mɔ ko lɛ, klante akɛaagbe lɛ. Biɛ wɔnaa krɔŋkrɔŋbii lɛ ahiɛmiamɔ lɛ kɛ amɛhemɔkɛyeli lɛ yɛ.

¹¹ Ni mina kooloo kroko miije kpo kɛmiijɛ shikpɔŋ lɛ mli kɛ eklontoi enyɔ tamɔ toobi akloŋtoi, ni wieɔ tamɔ drako.

¹² Ni etsuɔ klɛŋklɛŋ kooloo lɛ hegbɛ lɛ fɛɛ he nii yɛ ehiɛ, ni ehãa shikpɔŋ lɛ kɛ mɛi ni yɔɔ enɔ lɛ jaa klɛŋklɛŋ kooloo lɛ ni atsa egbele pilamɔ lɛ.

¹³ Ni efeɔ okadii wuji, ni ehãa la po jɛɔ ŋwɛi baa shikpɔŋ yɛ gbɔmɛi ahiɛ.

¹⁴ Ni ekɛ okadii ni ahã lɛ hegbɛ akɛ efee yɛ kooloo lɛ hiɛ lɛ shishiuɔ mɛi ni yɔɔ shikpɔŋ lɛ nɔ lɛ, ni ekɛɔ mɛi ni yɔɔ shikpɔŋ lɛ nɔ lɛ akɛ amɛfee amãgã amɛhã kooloo lɛ ni klante naa pilamɔ yɔɔ ehe ni ehiɛ kã lɛ.

¹⁵ Ni ahã lɛ gbɛ ni ekɛ mumɔ ahã kooloo lɛ amãgã lɛ, koni kooloo lɛ amãgã lɛ awie tete, ni ehã agbe mɛi fɛɛ ni jaaa kooloo lɛ amãgã lɛ.

¹⁶ Ni ehã akadiɔ mɛi fɛɛ, mɛi bibii kɛ mɛi wuji, niiatsɛmɛi kɛ ohiafoi, odehei kɛ nyɔji yɛ amɛninejurɔ loo amɛhiɛŋtsei anɔ.

¹⁷ Koni mɔ ko nyɛŋ ehe nii aloo ehɔ̃ɔ nii, akɛ ja mɔ ni yɔɔ naakpɛɛ okadi lɛ yɛ ehe, ni ji kooloo lɛ gbɛi loo yibɔ ni damɔ shi hã egbɛi lɛ.

¹⁸ Biɛ nilee he ehia yɛ. Mɔ ni yɔɔ jwɛŋmɔ lɛ abu kooloo lɛ yibɔ lɛ he akɔntaa; ejaakɛ gbɔmɔ yibɔ ni; ni eyibɔ lɛ ji ohai ekpaa kɛ nyɔŋmai ekpaa kɛ ekpaa.