Kpojiemɔ 12 - ŊMALƐ KRƆŊKRƆŊ LƐ

Yoo lɛ kɛ Drako lɛ

¹ Ni ana naakpɛɛ okadi kpeteŋkple ko yɛ ŋwɛi: yoo ko ni hulu ha ehe, ni nyɔɔŋtsere yɛ enajiaŋshi, ni ŋulamii nyɔŋma kɛ enyɔ akekre fi eyitso.

² Ehiɛ musu ni fɔmɔ kɔ̃ɔmɔ kɛ nɔnaa ehã eebolɔ.

³ Ni ana naakpɛɛ okadi kroko yɛ ŋwɛi, ni naa, drako tsuru kpeteŋkple ni yɔɔ yitsei kpawo kɛ akloŋtoi nyɔŋma, ni maŋtsɛ faii kpawo bumɔ eyitsei lɛ.

⁴ Ni elei miigbala ŋwɛi ŋulamii amlijai etɛ̃ mli ekome; ni etsirɛ amɛ eshwie shikpɔŋ lɛ nɔ. Ni drako lɛ badamɔ yoo ni baafɔ lɛ hiɛ, koni kɛ efɔ lɛ, ni emi ebi lɛ.

⁵ Ni yoo lɛ fɔ binuu ni kɛ dadetso baakpala jeŋmaji lɛ fɛɛ lɛ; ni asha ebi lɛ kɛtee Nyɔŋmɔ ŋɔɔ yɛ emaŋtsɛ sɛ̃i lɛ masɛi.

⁶ Ni yoo lɛ jo foi kɛtee ŋa nɔ he ko, he ni Nyɔŋmɔ esaa eto ehã lɛ lɛ, koni ayalɛ lɛ yɛ jɛi gbii akpe kɛ ohai enyɔ kɛ nyɔŋmai ekpaa.

⁷ Ni ta te shi yɛ ŋwɛi, Mikael kɛ ebɔfoi lɛ fã drako lɛ nɔ ta. Ni drako lɛ bɔfoi fata ehe kɛwu,

⁸ ni aye drako kɛ ebɔfoi lɛ anɔ, ni asaŋ amɛnaaa gbɛ dɔŋŋ yɛ ŋwɛi.

⁹ Ni ashɛ drako kpeteŋkple lɛ ni ji blema onufu lɛ ni atsɛɔ lɛ Abonsam loo Satan lɛ ni shishiuɔ jeŋ muu lɛ fɛɛ lɛ afɔ̃ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe.

¹⁰ Ni minu gbee wulu ko yɛ ŋwɛi miikɛɛ, “Agbɛnɛ yiwalaheremɔ lɛ kɛ hewalɛ lɛ kɛ maŋtsɛyeli lɛ etsɔ̃ wɔNyɔŋmɔ lɛ nɔ, ni hegbɛ lɛ etsɔ̃ eKristo lɛ nɔ, ejaakɛ ashɛ wɔnyɛmimɛi lɛ anaaflɔlɔ lɛ ni folɔɔ amɛnaa yɛ wɔNyɔŋmɔ lɛ hiɛ nyɔɔŋ kɛ shwane lɛ afɔ̃.

¹¹ Ni amɛ lɛ, amɛkɛ Toobi lɛ lá lɛ kɛ amɛ diɛŋtsɛ amɛdaseyeli wiemɔ lɛ eye enɔ kunim, ni amɛdɔɔɔ amɛwala he kɛyashi gbele mli tete.

¹² No hewɔ lɛ, nyɛ ŋwɛii kɛ nyɛ mɛi fɛɛ ni nyɛyɔɔ jɛi, nyɛnaa tsuijurɔ! Shi kpoo hã shikpɔŋ lɛ kɛ ŋshɔ lɛ! Ejaakɛ abonsam lɛ ekpeleke shi kɛba nyɛŋɔɔ, egri naakpa, ejaakɛ ele akɛ be fioo kɛkɛ eyɔɔ.”

¹³ Ni be ni drako lɛ na akɛ ashɛ lɛ afɔ̃ shikpɔŋ lɛ, etiu yoo lɛ ni fɔ binuu lɛ.

¹⁴ Ni akɛ okropɔŋ kpeteŋkple lɛ fiji enyɔ lɛ hã yoo lɛ, koni efiliki ni eshi onufu lɛ kɛya ŋa lɛ nɔ yɛ egbɛhe lɛ, he ni alɛɔ lɛ yɛ afii etɛ̃ kɛ fã lɛ.

¹⁵ Ni onufu lɛ fɛ̃ nu ni tamɔ faa ko kɛjɛ edaaŋ eshwie yoo lɛ sɛɛ, koni nu lɛ asha lɛ kɛya.

¹⁶ Shi shikpɔŋ lɛ ye bua yoo lɛ, ni shikpɔŋ lɛ gbele edaaŋ ni emii faa lɛ ni drako lɛ fɛ̃ kɛjɛ edaaŋ eshwie lɛ.

¹⁷ Kɛkɛ ni drako lɛ mli fu yoo lɛ, ni eyiŋ etee ni ekɛ yoo lɛ shwiei ni eshwɛ ni yeɔ Nyɔŋmɔ kitãi lɛ anɔ ni amɛhiɛ Yesu Kristo odase lɛ mli lɛ ayawu.

¹⁸ Ni eyadamɔ ŋshɔ naa shia lɛ nɔ.