Kpojiemɔ 11 - ŊMALƐ KRƆŊKRƆŊ LƐ

Odasefoi enyɔ lɛ

¹ Ni ahã mi glã ko ni tamɔ nisusumɔ tso, ni ekɛɛ, “Tee shi ni oyasusu Nyɔŋmɔ Sɔlemɔtsu lɛ kɛ afɔleshãa latɛ lɛ, ni okane mɛi ni jaa Nyɔŋmɔ yɛ mli lɛ.

² Ni kpo ni yɔɔ Sɔlemɔtsu lɛ agbo lɛ naa lɛ, shi no sɛɛ ni okasusu no, ejaakɛ akɛhã jeŋmaji lɛ, ni amɛaanaanaa maŋ krɔŋkrɔŋ lɛ nɔ nyɔji nyɔŋmai ejwɛ kɛ enyɔ.

³ Ni mahã midasefoi enyɔ lɛ hegbɛ ni amɛgba gbii akpe kɛ ohai enyɔ kɛ nyɔŋmai ekpaa ni amɛwo kpekpe.”

⁴ Mɛnɛɛmɛi ji mutsei enyɔ lɛ kɛ kanetsei enyɔ lɛ ni damɔ shikpɔŋ lɛ nɔ Nuŋtsɔ lɛ hiɛ lɛ.

⁵ Ni kɛ mɔ ko miitao afee amɛ efɔŋ lɛ, la jeɔ amɛdaaŋ ni ekpãtãa amɛhenyɛlɔi lɛ ahiɛ; ni kɛ mɔ ko miitao akɛ efee amɛ efɔŋ lɛ, nɛkɛ gbɛ nɔ atsɔ̃ɔ nɔŋŋ agbeɔ lɛ.

⁶ Mɛnɛɛmɛi yɛ hegbɛ akɛ amɛŋaa ŋwɛi naa, koni nu akanɛ yɛ amɛgbalɛ bei lɛ amli; ni amɛyɛ hegbɛ hu yɛ nui lɛ anɔ akɛ amɛhãa etsɔ̃ɔ lá, ni amɛkɛ haomɔ fɛɛ haomɔ haoɔ shikpɔŋ lɛ shii abɔ ni amɛsumɔɔ.

⁷ Ni kɛ amɛgbe amɛdaseyeli lɛ naa lɛ, kooloo lɛ ni jɛ bu kwɔŋkwɔŋ lɛ mli lɛ kɛ amɛ baawu ta, ni eeeye amɛnɔ kunim, ni eeegbe amɛ;

⁸ ni amɛgbohii lɛ aaajwere maŋ kpeteŋkple lɛ blohu lɛ mli, maŋ ni atsɛɔ lɛ yɛ mumɔ mli akɛ Sodom kɛ Ijipt lɛ, he ni asɛŋ amɛNuŋtsɔ lɛ yɛ lɛ.

⁹ Ni mɛi komɛi ni jɛ maji lɛ kɛ akutsei lɛ kɛ maji anɔ wiemɔi lɛ kɛ jeŋmaji lɛ amli lɛ aaakwɛ amɛgbohii lɛ gbii etɛ̃ kɛ fã, ni amɛkpɛlɛ̃ŋ ni afu amɛ.

¹⁰ Ni mɛi ni yɔɔ shikpɔŋ lɛ nɔ lɛ aaanya yɛ amɛnɔ ni amɛmli aaafli amɛ, ni amɛ aaamajemajee amɛhe keenii, ejaakɛ nɛkɛ gbalɔi enyɔ nɛɛ piŋ mɛi ni yɔɔ shikpɔŋ lɛ nɔ lɛ.

¹¹ Ni gbii etɛ̃ kɛ fã lɛ sɛɛ lɛ wala mumɔ jɛ Nyɔŋmɔ ŋɔɔ ba amɛmli, ni amɛte shi amɛdamɔ amɛnaji anɔ, ni gbeyei kpeteŋkple mɔmɔ mɛi ni na amɛ lɛ.

¹² Ni amɛnu gbee waa ko jɛ ŋwɛi miikɛɛ amɛ akɛ, “Nyɛkwɔa kɛbaa biɛ nɛɛ!” Ni amɛkwɔ kɛtee ŋwɛi yɛ atatu mli, ni amɛhenyɛlɔi lɛ na amɛ.

¹³ Ni nakai ŋmɛlɛtswaa lɛ nɔ nɔŋŋ lɛ shikpɔŋ hoso waa, ni maŋ lɛ mlijai nyɔŋma mli ekome wule, ni shikpɔŋ hosomɔ lɛ mli lɛ agbe gbɔmɛi akpei kpawo, ni mɛi ni shwɛ lɛ she gbeyei, ni amɛkɛ anunyam hã ŋwɛi Nyɔŋmɔ lɛ.

¹⁴ Kpoo ni ji enyɔ lɛ eho; naa, kpoo ni ji etɛ̃ lɛ miiba oya.

Tɛtɛrɛmantɛrɛ ni ji kpawo lɛ

¹⁵ Ni bɔfo ni ji kpawo lɛ kpã etɛtrɛmantrɛ lɛ, ni anu gbei wuji yɛ ŋwɛi miikɛɛ akɛ, “Je nɛɛ mli maŋtsɛyeli lɛ etsɔ̃ wɔNuŋtsɔ lɛ kɛ eKristo lɛ nɔ, ni eeeye maŋtsɛ kɛaatee naanɔi anaanɔ!”

¹⁶ Ni onukpai nyɔŋmai enyɔ kɛ ejwɛ ni tara amɛmaŋtsɛ sɛ̃ii anɔ yɛ Nyɔŋmɔ hiɛ lɛ kɛ amɛhiɛ bumɔ shi, ni amɛja Nyɔŋmɔ

¹⁷ amɛkɛɛ, “Wɔmiida bo shi, bo Nuŋtsɔ Nyɔŋmɔ Ofe lɛ, bo mɔ ni oyɔɔ ni oyɛ ni obaaba lɛ, akɛ oŋɔ ohewalɛ kpeteŋkple lɛ ni oye maŋtsɛ!

¹⁸ Ni jeŋmaji lɛ amli efu. Ni omlifu be lɛ eshɛ kɛ be ni abaakojo gbohii lɛ. Ni abaawo otsuji ni ji gbalɔi lɛ kɛ krɔŋkrɔŋbii lɛ kɛ mɛi ni sheɔ ogbɛi lɛ gbeyei, mɛi bibii kɛ mɛi wuji lɛ anyɔmɔ. Ni abaafite mɛi ni fiteɔ shikpɔŋ lɛ!”

¹⁹ Ni agbele Nyɔŋmɔ Sɔlemɔtsu lɛ naa yɛ ŋwɛi, ni ana ekpãŋmɔ adeka lɛ yɛ eSɔlemɔtsu lɛ mli, ni srawai gbala kɛ gbɛɛmɔ ni nyɔŋmɔ shimɔ ni shikpɔŋ hoso ni nyɔŋmɔŋtɛi babaoo nɛ.