Kpojiemɔ 10 - ŊMALƐ KRƆŊKRƆŊ LƐ

Bɔfo lɛ kɛ wolo bibioo lɛ

¹ Ni mina bɔfo hewalɔ kroko jɛ ŋwɛi miikpeleke shi, ni eha atatu, ni kwaabuɛtɛ yɛ eyiteŋ, ni ehiɛ tamɔ hulu, ni enaji tamɔ la akulashiŋi.

² Ni ehiɛ wolo bibioo ko ni agbele naa yɛ edɛŋ; ni ekɛ enanejurɔ ma ŋshɔ nɔ, ni ekɛ enane abɛku hu ma shikpɔŋ nɔ.

³ Ni ebo kɛ gbee ni wa, tamɔ jata huuɔ; ni be ni eboɔ lɛ, nyɔŋmɔshiimɔi kpawo lɛ wo amɛgbei.

⁴ Ni be ni nyɔŋmɔ shiimɔi kpawo lɛ wo amɛgbei lɛ, kulɛ miiŋma; ni minu gbee ko jɛ ŋwɛi miikɛɛ akɛ, “Sɔomɔ nii ni nyɔŋmɔshiimɔi kpawo lɛ wie lɛ anaa oto, ni oka ŋma.”

⁵ Ni bɔfo lɛ ni mina akɛ edamɔ ŋshɔ lɛ nɔ kɛ shikpɔŋ lɛ nɔ lɛ wó eninejurɔ nɔ kɛtee ŋwɛi,

⁶ ni etsɛ mɔ ni hiɛ kã kɛyaa naanɔi anaanɔ ni bɔ ŋwɛi kɛ nii ni yɔɔ mli lɛ kɛ shikpɔŋ kɛ nii ni yɔɔ mli lɛ kɛ ŋshɔ kɛ nii ni yɔɔ mli lɛ gbɛi ekɛkã kitã akɛ, “Be ko be ko bɛ dɔŋŋ,

⁷ shi moŋ be mli ni aaanu bɔfo ni ji kpawo lɛ gbee be ni eehé ekpã etɛtrɛmantrɛ lɛ, no lɛ agbe Nyɔŋmɔ teemɔ sane lɛ hu naa, bɔ ni ejaje etsɔ̃ɔ lɛ diɛŋtsɛ etsuji ni ji gbalɔi lɛ.”

⁸ Ni gbee ni minu kɛjɛ ŋwɛi lɛ kɛ mi wie ekoŋŋ ni ekɛɛ, “Yaa ni oyahe wolo lɛ ni agbele naa lɛ yɛ bɔfo ni damɔ ŋshɔ lɛ nɔ kɛ shikpɔŋ lɛ nɔ lɛ dɛŋ.”

⁹ Ni mitee bɔfo lɛ ŋɔɔ ni miyakɛɛ lɛ akɛ, “Kɛ wolo bibioo lɛ ahã mi.” Ni ekɛɛ mi akɛ, “Hemɔ ni oye, ni eeejoo yɛ omusuŋ, shi odaaŋ moŋ lɛ eeeŋɔɔ dɔkɔdɔkɔ tamɔ wo.”

¹⁰ Ni mihe wolo bibioo lɛ yɛ bɔfo lɛ dɛŋ ni miye ni eŋɔɔ dɔkɔdɔkɔ yɛ midaaŋ tamɔ wo, shi be ni miye lɛ, ejoo yɛ mimusu mli.

¹¹ Ni akɛɛ mi akɛ, “Esa akɛ ogba gbalɛ ni kɔɔ maji kɛ jeŋmaji kɛ majianɔ wiemɔi kɛ maŋtsɛmɛi pii ahe ekoŋŋ.”