Obadia 1 - ŊMALƐ KRƆŊKRƆŊ LƐ

¹ Gbalɔ Obadia gbalɛ lɛ ni Nuŋtsɔ Yehowa kɛhã lɛ yɛ Edom shikpɔŋ lɛ he lɛ nɛ. Nuŋtsɔ Nyɔŋmɔ tsu bɔfo kɛtee majimaji lɛ aŋɔɔ, ni wɔnu wiemɔ ni ekɛtee lɛ akɛ, “Nyɛtea shi! Nyɛhãa wɔyaa wɔ kɛ Edom ayawua ta!”

Yehowa baagbala Edom toi

² Yehowa kɛɛ Edom akɛ, “Naa, mibaba ohewalɛ shi yɛ majimaji lɛ ateŋ, ni mɔ ko mɔ ko ebuŋ bo kwraa.

³ Ohenɔwomɔ lɛ elaka bo. Omaŋtsɛmaŋ lɛ ma shi shiŋŋ yɛ tɛsaa nɔ, ni oshihilɛhe lɛ yɛ gɔŋ grɔŋŋ nɔ; ni no hewɔ ni okɛɔ ohe akɛ, ‘Namɔ aaanyɛ mi shi aba?’

⁴ Kɛji oyato oshihilɛhe yɛ ŋwɛi shɔŋŋ tamɔ okropɔŋ tsu, ni shihilɛhe lɛ hɔ ŋulamii ateŋ tete, kɛ̃lɛ majie bo yɛ jɛi kɛyi shi.

⁵ “Kɛji julɔi ba bo juu nyɔɔŋ, loo ojotswalɔi bashwie onɔ nyɔɔŋ lɛ, te amɛaakpãtã onii ahiɛ tɛŋŋ? Ani julɔi lɛ ejuŋ onii bɔ pɛ ni aaashɛ amɛnaa? Kɛji wainyibii kpalɔi ni ba lɛ, ani amɛshiŋ yibii lɛ kpɛkpɛbii lo? Shi naa, bo lɛ ohenyɛlɔi lɛ ekpãtã ohiɛ butuu.

⁶ Esau shwiei, kwɛ bɔ ni aha nyɛ, kwɛ bɔ ni afãmɔ nyɛjwetrii ni akɛtee lɛ.

⁷ Nyɛhefatalɔi lɛ elaka nyɛ; amɛshwie nyɛ kɛtee husu lɛ nɔ tɔ̃ɔ; mɛi ni kɛ nyɛ yɔɔ gbee jurɔ lɛ hu eye nyɛnɔ kunim. Nanemɛi ni nyɛkɛye nii lɛ tsɔ̃ nyɛ tsɔne; nɔ ko ni anuuu shishi.

⁸ Ni Yehowa kɛɛ akɛ, “Nakai gbi lɛ magbala Edom toi, mibakpãtã enilelɔi lɛ ahiɛ, ni mahã amɛnilee hiɛ akpãtã.

⁹ Ŋmiŋmi baamɔmɔ Teman hii kãkãlɔi lɛ, ni Edom tabilɔi fɛɛ baanyɔnyɔi.”

Edom toigbalamɔ lɛ shishi

¹⁰ “Efɔŋ ni nyɛfee nyɛnyɛmimɛi ni ji Yakob shwiei lɛ hewɔ lɛ, ohe baafee hiɛgbele, ni aaakpãtã ohiɛ kɛaatee naanɔ.

¹¹ Odamɔ shi yɛ afã banee, gbi ni gbɔi baloo ejwetri kɛtee lɛ. Odamɔ afã ni gbɔi bote maŋ lɛ mli ni amɛfɔ̃ oshiki kɛja emlinii amɛhã amɛhe lɛ.

¹² Kulɛ esaaa akɛ bo hu oyi awa tamɔ amɛ nɔŋŋ. Oyeɔ onyɛmimɛi Yudabii lɛ ayɔɔ yɛ amanehulu ni banina amɛ lɛ hewɔ; ni ebɛ akɛ ooonya yɛ amɛhiɛkpãtãmɔ gbi lɛ nɔ; ni esaaa akɛ oshwãa yɛ haomɔ gbi lɛ nɔ.

¹³ Kulɛ esaaa akɛ oboteɔ miwebii lɛ amaŋ lɛ mli, yɛ amɛmanehulu gbi lɛ nɔ; ebɛ akɛ oyeɔ amɛ yɔɔ yɛ amɛmanehulu gbi lɛ nɔ; ni esaaa akɛ oyahaa amɛnii yɛ amɛmanehulu gbi lɛ nɔ.

¹⁴ Kulɛ esaaa akɛ nyɛdamɔɔ gbɛnta ni nyɛgbegbeɔ mɛi ni joɔ foi lɛ; ni esaaa akɛ nyɛkɛ gbɔmɛi hiɛkãalɔi lɛ hãa henyɛlɔi lɛ yɛ hejaramɔ gbi lɛ nɔ.”

Nyɔŋmɔ baakojo maji lɛ

¹⁵ “Ejaakɛ be lɛ eshɛ etã, be ni, mi, Yehowa mibakojo majimaji lɛ. Bɔ ni ofee lɛ, nakai aaafee bo, Esau. Onifeemɔnii lɛ baaku sɛɛ abawula oyiteŋ.

¹⁶ Ejaakɛ bɔ ni nyɛnunuu dãi yɛ migɔŋ krɔŋkrɔŋ lɛ nɔ lɛ, nakai majimaji ni bɔle nyɛ lɛ aaamiimii dãa, ni amɛaadidãa, ni amɛaatsɔ̃ tamɔ mɛi ni ebablako dã.”

Israel baaye kunim

¹⁷ “Shi mɛi ni aaaje mli lɛ, aaayato maŋ yɛ Zion Gɔŋ lɛ nɔ. Eeetsɔ̃ maŋ krɔŋkrɔŋ, ni Yakob shwiei lɛ anine aaashɛ amɛgbɛfaŋ shikpɔŋ lɛ nɔ ekoŋŋ.

¹⁸ Yakob shwiei lɛ aaatsɔ̃ là, ni Yosef shwiei lɛ aaatsɔ̃ là lilɛi, ni Esau shwiei lɛ aaatsɔ̃ gbetselii, ni aaashã amɛ ni aaakpãtã amɛhiɛ bɔ ni eshwɛŋ mɔ ko yɛ Esau we lɛ. Mi, Yehowa, mikɛɛ.

¹⁹ “Yuda wuoyigbɛbii lɛ aaabashɔ̃ Edom Gɔŋ shikpɔŋ lɛ; ni mɛi ni yɔɔ anaigbɛ gɔji lɛ ashishi lɛ baashɔ̃ Filistibii ashikpɔŋ lɛ. Amɛbaaŋɔ Efraim shikpɔŋ lɛ, kɛ Samaria hu; ni Benyamin baaŋɔ Gilead.

²⁰ Israelbii ni aŋɔ amɛ nom lɛ baaŋɔ Kanaanbii ashikpɔŋ lɛ, kɛjɛ Foinikia kɛyashi Zarefat; ni nomii ni jɛ Yerusalɛm ni akɛ amɛ etee Sarde lɛ baaŋɔ wuoyigbɛ maji lɛ.

²¹ Tabilɔi kunimyelɔi aaajɛ Yerusalɛm ayatua Edom, ni amɛaaye enɔ; ni Yehowa diɛŋtsɛ aaaye Maŋtsɛ.”