Nehemia 9 - ŊMALƐ KRƆŊKRƆŊ LƐ

Maŋ lɛ jaje amɛhe eshai

¹ Nakai nyɔŋ lɛ nɔ gbi ni ji nyɔŋmai enyɔ kɛ ejwɛ lɛ nɔ lɛ, Israelbii lɛ bakpe. Amɛhi ŋmãa; amɛbumɔ kpekpe, ni amɛkɛ mlu wo amɛyiteŋ.

² Mɛi ni ji Israel fɔmɔbii lɛ tse amɛhe yɛ mɛi kpɔji lɛ fɛɛ ahe; amɛho amɛdamɔ shi, ni amɛjaje amɛhe eshai lɛ kɛ amɛtsɛmɛi anifɔ̃ɔjianii ni amɛfee lɛ.

³ Amɛte shi amɛdamɔ shi, ni amɛkɛ ŋmɛlɛtswai etɛ̃ kane Yehowa, amɛNyɔŋmɔ lɛ, Mla Wolo lɛ. Amɛkɛ ŋmɛlɛtswai etɛ̃ hu jaje amɛhe eshai, ni amɛja Yehowa, amɛNyɔŋmɔ lɛ.

⁴ Yeshua kɛ Bani kɛ Kadmiel kɛ Shebania kɛ Buni kɛ Sherebia kɛ Bani kɛ Kenani ho damɔ Levibii lɛ akpoku lɛ nɔ, ni amɛsɔle waa amɛtsɛ Yehowa, amɛNyɔŋmɔ lɛ.

⁵ Kɛkɛ ni Yeshua kɛ Kadmiel kɛ Bani kɛ Hashabneia kɛ Sherebia kɛ Hodia kɛ Shebania kɛ Patahia ni amɛ fɛɛ lɛ Levibii ji amɛ lɛ, kɛɛ akɛ, “Nyɛtea shi ni nyɛjiea Yehowa, nyɛNyɔŋmɔ lɛ, yi; nyɛjiea eyi kɛjɛ naanɔ kɛyashi naanɔ! Aaajie egbɛi ni yɔɔ nyam lɛ yi, tsɛbelɛ bɔ fɛɛ bɔ ni ajieɔ egbɛi yi ni akafoɔ lɛ ahãa tete lɛ, eshɛɛɛ egbɛi lɛ dalɛ.”

⁶ “Bo okome too ji Yehowa, Bo obɔ ŋwɛi kɛ ŋwɛii amli ŋwɛi kɛ ŋwɛinii huhai abɔ lɛ fɛɛ. Bo obɔ shikpɔŋ kɛ nɔ fɛɛ nɔ ni yɔɔ nɔ, ŋshɔi kɛ nɔ fɛɛ nɔ ni yɔɔ amɛmli; ni bo nɔŋŋ ohãa amɛ fɛɛ kwa naa wala ni ŋwɛinii babaoo lɛ, bo nɔŋŋ amɛjaa.

⁷ Bo Nuŋtsɔ Nyɔŋmɔ oŋɔ Abram. Ojie lɛ kɛjɛ Ur yɛ Babilon, ni otsake egbɛi ofee lɛ Abraham.

⁸ Ona akɛ eyeɔ bo anɔkwa, ni okɛ lɛ kpãŋ akɛ okɛ Kanaanbii kɛ Hitbii kɛ Amorbii lɛ kɛ Perizbii kɛ Yebusbii kɛ Girgashbii ashikpɔŋ lɛ baahã eshwiei lɛ; ni oye oshiwoo lɛ nɔ, ejaakɛ jalɔ ji bo.

⁹ “Ona amanehulu ni wɔtsɛmɛi lɛ na yɛ Ijipt lɛ, ni obo amɛtsɛmɔ ni amɛtsɛ bo lɛ toi yɛ Ŋshɔ Tsuru lɛ naa.

¹⁰ Ofee okadii, ni otsu naakpɛɛnii yɛ Farao kɛ etsuji lɛ fɛɛ kɛ eshikpɔŋ lɛ nɔ bii lɛ fɛɛ ahiɛ, ejaakɛ ole akɛ Farao kɛ etsuji lɛ wo amɛhe amɛwo wɔtsɛmɛi lɛ; okɛ enɛ he gbɛi ohã ohe, tamɔ bɔ ni eyɔɔ ŋmɛnɛ nɛɛ.

¹¹ Ohã ŋshɔ lɛ mli gba yɛ amɛhiɛ, ni amɛnyiɛ shikpɔŋ gbiŋ nɔ kɛtsɔ̃ ŋshɔ lɛ teŋ. Shi mɛi ni tiuɔ amɛ lɛ oshɛrɛ amɛ oshwie ŋshɔ kwɔŋkwɔŋ lɛ mli ni amɛshiu tamɔ tɛ yɛ nu hamahama lɛ mli.

¹² Okɛ atatu ni ma shi kutuu tsɔ̃ɔ amɛ gbɛ shwane, ni nyɔɔŋ hu lɛ, okɛ la kutuu tsɔ̃ɔ amɛ gbɛ koni amɛna nii yɛ gbɛ ni amɛnyiɛ nɔ lɛ nɔ.

¹³ Okpeleke shi kɛba Sinai Gɔŋ lɛ nɔ, ni ojɛ ŋwɛi okɛ amɛ wie; ohã amɛ mlai kpakpai kɛ akpɔi kɛ kitãi kpakpai.

¹⁴ Ohejɔɔmɔ gbi krɔŋkrɔŋ lɛ, ohã amɛle, ni otsɔ̃ otsulɔ Mose nine nɔ owo amɛ kitãi kɛ akpɔi kɛ mlai.

¹⁵ “Be ni hɔmɔ ye amɛ lɛ, ohã amɛ aboloo ni jɛ ŋwɛi, ni be ni kumai ye amɛ hu, ohã nu jɛ tɛsaa mli ba, ni amɛkɛgbe amɛkumai. Okɛɛ amɛ akɛ amɛba ni amɛbaŋɔ shikpɔŋ lɛ ni okã he kitã akɛ okɛbaahã amɛ lɛ.

¹⁶ Shi amɛ kɛ wɔtsɛmɛi lɛ wo amɛhe; amɛfee amɛhe kuɛŋtilɔi, ni amɛyeee okitãi lɛ anɔ.

¹⁷ Amɛbooo bo toi, ni asaŋ amɛkaiii onaakpɛɛnii ni ofee yɛ amɛteŋ lɛ; shi moŋ amɛfee amɛhe kuɛŋtilɔi. Amɛtse atua, ni amɛto asafoiatsɛ ni ekɛ amɛ aku sɛɛ kɛya nyɔŋyeli mli ekoŋŋ yɛ Ijipt. Shi bo lɛ oji Nyɔŋmɔ ni kɛ eshai faa, durolɔ kɛ musuŋtsɔlɔ ni toɔ etsui shi ni emɔbɔnalɛ fa, hewɔ lɛ oshiii amɛ.

¹⁸ Amɛfee tsinabi ni ashwie amɛhã amɛhe, ni amɛkɛɛ no ji amɛnyɔŋmɔ ni jie amɛ kɛje Ijipt; amɛbɔ musu babaoo amɛshi bo.

¹⁹ Omɔbɔnalɛ babaoo lɛ hewɔ lɛ, oshiii amɛ yɛ ŋa lɛ nɔ; shwane lɛ atatu ni ma shi yɛ amɛhiɛ ni etsɔ̃ɔ amɛ gbɛ lɛ, ejeee amɛhiɛ; ni nyɔɔŋ hu la ni damɔ amɛhiɛ ni hãa amɛnaa nii yɛ gbɛ ni amɛnyiɛ nɔ lɛ nɔ lɛ, ejeee amɛhiɛ.

²⁰ Okɛ omumɔ kpakpa lɛ hã amɛ koni etsɔ̃ɔ amɛ nii; ohã amɛ mana amɛye, ni ohã amɛ nu amɛkɛgbe amɛkumai.

²¹ Afii nyɔŋmai ejwɛ sɔŋŋ okwɛ amɛ yɛ ŋa lɛ nɔ; nɔ ko nɔ ko he ehiaaa amɛ; amɛtadei suuu lɛ, amɛnaji hu efuuu.

²² “Ohã amɛye maji kɛ maŋtsɛyelii anɔ kunim. Amɛye shikpɔji ni bɛŋkɛ amɛ lɛ anɔ, kɛyashi amɛŋɔ Heshbon ni ji Maŋtsɛ Sihon shikpɔŋ lɛ, kɛ Bashan ni ji Maŋtsɛ Og shikpɔŋ lɛ.

²³ Ohã amɛbii lɛ hu ayi fa tamɔ ŋulamii, ni oŋɔ amɛ kɛba shikpɔŋ lɛ ni okɛɛ amɛtsɛmɛi akɛ amɛya amɛyaŋɔ lɛ nɔ.

²⁴ Kɛkɛ ni bii lɛ ba koni amɛbaye Kanaanbii lɛ kɛ amɛmaŋtsɛmɛi lɛ anɔ; amɛfee amɛ bɔ ni amɛsumɔɔ.

²⁵ Amɛyaye maji ni atswa gbogboi awo amɛhe kɛ shikpɔji ni baa nii anɔ kunim, ni amɛna shĩai ni eyimɔ obɔ̃bɔ̃ kɛ nibii kpakpai fɛɛ: nubui ni atsatsai, wain tromi kɛ mutso tromi kɛ yelitsei babaoo amɛye, ni amɛtɔrɔ, ni amɛshwishwii; ni amɛmii shɛ amɛhe yɛ omlihilɛ kpele lɛ hewɔ.

²⁶ “Shi enɛ moŋ sɛɛ lɛ amɛtoi gbo, ni amɛtse ohiɛ atua; amɛkɛ mla lɛ efeee nɔ ko nɔ ko; amɛgbe gbalɔi lɛ ni bɔ amɛ kɔkɔ lɛ, koni amɛkɛkpale amɛ kɛba oŋɔɔ; ni amɛfee musubɔɔ nibii wuji amɛshi bo.

²⁷ No hewɔ lɛ, oŋmɛɛ amɛhe ohã amɛhenyɛlɔi, ni amɛhenyɛlɔi lɛ hao amɛ. Amɛhaomɔ nɛɛ mli lɛ amɛfo amɛtsɛ bo, ni ohere amɛ nɔ kɛjɛ ŋwɛi. Omɔbɔnalɛ babaoo lɛ naa lɛ, ojie hiɛnyiɛlɔi ohã amɛ koni amɛhere amɛ yɛ amɛhenyɛlɔi lɛ adɛŋ.

²⁸ Shi kɛ amɛna hejɔlɛ pɛ lɛ, kɛkɛ lɛ amɛfeɔ efɔŋ amɛshiɔ bo, ni oŋmɛɔ amɛhe owoɔ amɛhenyɛlɔi lɛ adɛŋ; ni henyɛlɔi lɛ yeɔ amɛnɔ. Shi kɛ̃lɛ kɛ amɛtao osɛɛgbɛ ekoŋŋ, ni amɛfo amɛtsɛ bo lɛ, oboɔ amɛ toi yɛ ŋwɛi, ni omɔbɔnalɛ babaoo lɛ naa lɛ, ohereɔ amɛ shii abɔ yɛ amɛnɔnaa lɛ mli.

²⁹ Obɔ amɛ kɔkɔ koni amɛbɔ̃i omla lɛ nɔyeli ekoŋŋ; shi amɛwo amɛhe, ni amɛbooo okitãi lɛ atoi; amɛfee esha amɛshi omlai lɛ ni kɛji gbɔmɔ ye nɔ ni eyi naa wala lɛ. Amɛtsi amɛhe kɛje ohe; amɛfee amɛhe kuɛŋtilɔi, ni amɛbooo bo toi.

³⁰ Kɛ̃lɛ oto otsui shi ohã amɛ afii pii; okɛ omumɔ lɛ wo gbalɔi lɛ amli, ni otsɔ̃ amɛnɔ obɔ obii lɛ kɔkɔ; shi amɛbooo toi; No hewɔ lɛ, ohã shikpɔji lɛ anɔ bii lɛ ye amɛnɔ.

³¹ Shi kɛ̃lɛ omɔbɔnalɛ babaoo lɛ naa lɛ, oŋmɛɛɛ amɛhe, ni asaŋ okpãtãaa amɛhiɛ, ejaakɛ Nyɔŋmɔ ni musuŋ tsɔ̃ɔ lɛ ni enaa mɔbɔ ji bo.

³² “WɔNyɔŋmɔ, oje agbo! Ohe wa, ohe yɛ gbeyei, ni onaa mɔbɔ; kɛji okɛ mɔ ko kpãŋ ni owo shi lɛ, oyeɔ nɔ. Kɛjɛ Asiria maŋtsɛmɛi lɛ ayinɔ kɛbashi ŋmɛnɛ lɛ, kaahã amanehulu ni ba wɔ kɛ wɔmaŋtsɛmɛi kɛ wɔnukpai kɛ wɔsɔfoi kɛ wɔgbalɔi kɛ wɔtsɛmɛi lɛ kɛ omaŋ lɛ fɛɛ nɔ lɛ, miifee sane bibioo yɛ ohiɛ.

³³ Shi bo lɛ, saji ni eba wɔnɔ nɛɛ fɛɛ mli lɛ, onɔ ja, ejaakɛ bo lɛ oye anɔkwa, shi wɔ lɛ wɔfee efɔŋ.

³⁴ Wɔmaŋtsɛmɛi lɛ hu kɛ wɔnukpai lɛ kɛ wɔsɔfoi lɛ kɛ wɔtsɛmɛi lɛ yeko omla lɛ nɔ, ni asaŋ amɛboko okitãi kɛ kɔkɔ ni obɔ amɛ lɛ toi.

³⁵ Be mli tete ni ohã amɛmaŋtsɛyeli lɛ ma shi ni amɛyeɔ shikpɔŋ kplɛlɛɛ ni ewo fɔ nɔ nii lɛ, amɛsɔ̃mɔɔɔ bo, ni amɛfɔ̃ɔɔ amɛnifɔɔjianii lɛ feemɔ.

³⁶ Naa, ŋmɛnɛ wɔtsɔmɔ nyɔji. Shikpɔŋ lɛ ni okɛhã wɔtsɛmɛi lɛ akɛ amɛye enɔ yibii kɛ enɔ nii kpakpai lɛ, naa, wɔtsɔ̃mɔ nyɔji yɛ nɔ.

³⁷ Shikpɔŋ lɛ nɔ nibaanii babaoo lɛ yaa maŋtsɛmɛi ni akɛto wɔnɔ yɛ wɔhe eshai ahewɔ lɛ moŋ aŋɔɔ. Amɛyeɔ wɔ kɛ wɔkooloi anɔ bɔ ni amɛsumɔɔ: ni wɔyɛ haomɔ kpeteŋkple mli.”

Maŋbii lɛ kpãŋ kpãŋmɔ ko

³⁸ Enɛɛmɛi fɛɛ ahewɔ lɛ, wɔ Israelbii, wɔmiikpãŋ kpãŋmɔ ni mli wa, ni wɔmiiŋma; ni wɔnukpai lɛ kɛ wɔLevibii lɛ kɛ wɔsɔfoi lɛ kɛ amɛgbɛii miiwo shishi amɛkɛmiisɔo naa.