Nehemia 8 - ŊMALƐ KRƆŊKRƆŊ LƐ

Ezra kane Mla lɛ hã maŋ lɛ

¹ Be ni shɛɔ nyɔŋ ni ji kpawo lɛ nɔ lɛ, Israelbii lɛ yɛ amɛmaji lɛ amli. Maŋ lɛ bluublu bakpe yɛ blohu ko ni yɔɔ Nu Agbo lɛ hiɛ lɛ mli. Amɛkɛɛ Ezra, osɔfo kɛ woloŋmalɔ lɛ, akɛ eyakɔ wolo ni Mose Mla ni Yehowa wo Israel lɛ yɔɔ mli lɛ kɛba.

² No hewɔ lɛ, nyɔŋ ni ji kpawo lɛ nɔ klɛŋklɛŋ gbi lɛ nɔ lɛ, Osɔfo Ezra kɛ Mla lɛ ba asafo lɛ hiɛ. Hii kɛ yei kɛ mɛi fɛɛ ni kɛji amɛnu wiemɔi lɛ ni amɛaanu shishi lɛ yɛ jɛi.

³ Ekane yɛ blohu ni yɔɔ Nu Agbo lɛ hiɛ lɛ mli, kɛjɛ leebi kɛyashi shwane fintiŋŋ yɛ hii kɛ yei kɛ mɛi fɛɛ ni aaanyɛ shishi anu lɛ hiɛ. Maŋ muu lɛ fɛɛ miibo Mla Wolo lɛ mli wiemɔi lɛ toi.

⁴ Ezra, woloŋmalɔ lɛ, damɔ nɔ ko ni kwɔ ni akɛ tso fee nɔ. Afee yɛ Mla lɛ kanemɔ lɛ hewɔ. Matitia kɛ Shema kɛ Anaia kɛ Uria kɛ Hilkia kɛ Maaseia damɔ emasɛi yɛ eninejurɔ, ni Pedaia kɛ Mishael kɛ Malkiya kɛ Hashum kɛ Hash-Badana kɛ Zakaria kɛ Meshulam damɔ ebɛku.

⁵ Ezra gbele wolo lɛ mli yɛ maŋ muu lɛ fɛɛ hiɛ. He ni edamɔ lɛ kwɔ fe he ni maŋ lɛ damɔ lɛ. Be ni egbele wolo lɛ mli lɛ, maŋ muu lɛ fɛɛ te shi damɔ shi.

⁶ Kɛkɛ ni Ezra jie Yehowa, Nyɔŋmɔ kpeteŋkple lɛ, yi. Maŋ muu lɛ fɛɛ here nɔ amɛkɛɛ, “Amen! Amen!” Amɛhole amɛniji anɔ. No sɛɛ lɛ, amɛmamɔ amɛyi shi, ni amɛkɛ amɛhiɛ bumɔ shi, ni amɛja Yehowa.

⁷ Yeshua kɛ Bani kɛ Sherebia kɛ Yamin kɛ Akub kɛ Shabetai kɛ Hodia kɛ Maaseia kɛ Kelita kɛ Azaria kɛ Yozabad kɛ Hanan kɛ Pelaia kɛ Levibii lɛ ji mɛi ni tsɔ̃ɔ maŋ lɛ Mla lɛ shishi. Be ni amɛtsɔ̃ɔ Mla lɛ shishi lɛ, belɛ maŋ lɛ damɔ amɛdaamɔhe lɛ.

⁸ Mɛi ni kaneɔ wolo lɛ ni ji Nyɔŋmɔ Mla lɛ, kane lɛ faŋŋ, ni amɛtsɔ̃ɔ shishi koni anu nɔ ni akaneɔ lɛ shishi faŋŋ.

⁹ Kɛkɛ ni Nehemia ni ji amralo lɛ kɛ Osɔfo Ezra ni ji woloŋmalɔ lɛ kɛ Levibii ni tsɔ̃ɔ maŋ lɛ nii lɛ kɛɛ maŋ muu lɛ fɛɛ akɛ, “Ŋmɛnɛ gbi nɛɛ gbi krɔŋkrɔŋ ni hã Yehowa, nyɛNyɔŋmɔ lɛ. No hewɔ lɛ, nyɛkayea ŋkɔmɔ, ni nyɛkafoa hu!” Amɛkɛɛ maŋ lɛ nɛkɛ, ejaakɛ be ni maŋ lɛ nu Mla lɛ mli wiemɔi lɛ, amɛ fɛɛ amɛfo.

¹⁰ Ezra kɛɛ amɛ akɛ, “Nyɛyaa ni nyɛyayea nii ni hi naakpa, ni nyɛnua wain ni ŋɔɔ dɔkɔdɔkɔ. Ni nyɛkɛ eko amajea mɛi ni afeko nɔ ko atoko amɛ lɛ, ejaakɛ ŋmɛnɛ gbi nɛɛ lɛ gbi krɔŋkrɔŋ ni hã wɔNuŋtsɔ lɛ. No hewɔ hu lɛ nyɛwerɛ akahoa nyɛhe, ejaakɛ Yehowa he nyamɔ lɛ ji nɔ ni baawo nyɛ hewalɛ.”

¹¹ Levibii lɛ shɛje maŋ lɛ fɛɛ mii amɛkɛɛ, “Nyɛfɔa ŋkɔmɔyeli, ejaakɛ ŋmɛnɛ gbi nɛɛ gbi krɔŋkrɔŋ ni, hewɔ lɛ nyɛwerɛ akahoa nyɛhe.”

¹² No hewɔ lɛ, maŋ muu lɛ fɛɛ yiŋ amɛtee, ni amɛyaye nii, ni amɛnu nɔ ko. Amɛkɛ eko maje, ni amɛna miishɛɛ babaoo; ejaakɛ wiemɔi ni akane atsɔ̃ɔ amɛ lɛ, amɛnu shishi faŋŋ.

Asesei Agbijurɔ

¹³ Enɔ jetsɛremɔ lɛ tsɛmɛi awei lɛ amli onukpai ni yɔɔ maŋ muu lɛ fɛɛ mli lɛ kɛ osɔfoi lɛ kɛ Levibii lɛ babua amɛhe naa yɛ Ezra, woloŋmalɔ lɛ, ŋɔɔ koni amɛbabo Mla Wolo lɛ mli wiemɔi lɛ toi.

¹⁴ Amɛna akɛ aŋma yɛ Mla ni Yehowa tsɔ Mose nine nɔ ewo lɛ mli, akɛ Israelbii lɛ ahi asesei amli yɛ nyɔŋ ni ji kpawo lɛ nɔ, be ni ayeɔ Asesei Agbijurɔ lɛ.

¹⁵ Amɛna akɛ aŋma hu akɛ amɛjaje, ni amɛshiɛ yɛ maji lɛ fɛɛ amli kɛ Yerusalɛm hu akɛ, “Nyɛjea kpo nyɛyaa gɔŋ lɛ nɔ ni nyɛyaŋɔa mutsei aniji kɛ ŋkutsei aniji kɛ merto tsei aniji kɛ blɛoi kɛ tsei kusukusui aniji koni nyɛkɛbafee asesei, tamɔ bɔ ni aŋma lɛ.”

¹⁶ Kɛkɛ ni maŋ lɛ je kpo amɛtee, ni amɛyaŋɔ tsei aniji lɛ kɛba, ni amɛkɛbafee asesei amɛhã amɛhe, mɔ fɛɛ mɔ lɛ yɛ etsu yiteŋ. Amɛfee asesei yɛ amɛkpoi anɔ kɛ Nyɔŋmɔ We lɛ kpoi lɛ anɔ kɛ Nu Agbo lɛ naa blohu lɛ mli kɛ Efraim Agbo lɛ naa blohu lɛ mli.

¹⁷ Mɛi abɔ fɛɛ ni ku amɛsɛɛ kɛjɛ nomŋɔɔ lɛ mli kɛba lɛ fee asesei, ni amɛhi mli. Israelbii lɛ efeko nakai nɔ ko dã kɛjɛ Yoshua, Nun bi lɛ, yinɔ aahu kɛbashi nakai gbi lɛ nɔ. Amɛmii shɛ amɛhe naakpa.

¹⁸ Gbi fɛɛ gbi, kɛjɛ klɛŋklɛŋ gbi lɛ nɔ kɛyashi naagbee gbi lɛ nɔ lɛ, akaneɔ Nyɔŋmɔ Mla Wolo lɛ. Amɛye gbijurɔ lɛ gbii kpawo, ni gbi ni ji kpaanyɔ lɛ nɔ lɛ amɛkpe naagbee kpee, tamɔ bɔ ni ato lɛ.