Nehemia 6 - ŊMALƐ KRƆŊKRƆŊ LƐ

Akpãŋ Nehemia yi nɔ

¹ Sanbalat kɛ Tobia kɛ Geshem, Arabianyo lɛ, kɛ wɔhenyɛlɔi krokomɛi lɛ nu akɛ mitswa gbogbo lɛ, ni ehe ko ni ekumɔ bɛ dɔŋŋ; ni eshwɛ agboi lɛ anaa shinai lɛ pɛ ni matara.

² No hewɔ lɛ, Sanbalat kɛ Geshem tsu aba miŋɔɔ kɛ wiemɔ akɛ mikɛ lɛ abakpe yɛ Ono ŋa kplanaa lɛ nɔ akrowai lɛ eko mli. Shi efɔŋ amɛtaoɔ mi amɛfee.

³ Mitsu mɛi kɛtee amɛŋɔɔ koni ayakɛɛ amɛ akɛ, “Nitsumɔ ni mitsuɔ lɛ da, hewɔ lɛ minyɛŋ maba. Mɛɛ hewɔ ni esa akɛ mahã afɔ̃ɔ nitsumɔ lɛ ni mashi maba nyɛŋɔɔ?”

⁴ Amɛtsu kɛba miŋɔɔ shii ejwɛ sɔŋŋ kɛ nakai wiemɔ lɛ nɔŋŋ, ni mito he mihã amɛ nakai nɔŋŋ.

⁵ Kɛkɛ ni Sanbalat tsu miŋɔɔ nɔ ni ji shii enumɔ. Mɔ ni etsu lɛ hiɛ wolo ni asɔoko naa yɛ edɛŋ.

⁶ Wolo lɛ mli sane nɛ, “Aatã yɛ jeŋmaji lɛ amli, ni Geshem hu kɛɛ akɛ akɛɛ Yudafoi lɛ miitao atse atua, ni no hewɔ otswaa gbogbo lɛ. Asaŋ akɛɛ ootao maŋtsɛ oye.

⁷ Akɛɛ hu akɛ owo mɛi komɛi gbalɔi ni amɛshiɛ yɛ ohe yɛ Yerusalɛm akɛ, ‘Maŋtsɛ ko yɛ Yuda!’ Agbɛnɛ nɛkɛ wiemɔi nɛɛ baaya ayashɛ maŋtsɛ lɛ toiŋ. No hewɔ lɛ, ba ni wɔya he ajina.”

⁸ Kɛkɛ ni mitsu Sanbalat ŋɔɔ kɛ wiemɔ akɛ, “Nibii ni okɛɔ nɛɛ, afeko nakai nɔ ko; bo diɛŋtsɛ okɛ ojwɛŋmɔ fo otã.”

⁹ Amɛ fɛɛ lɛ, wɔhe gbeyei kɛkɛ amɛtaoɔ amɛwo, ni amɛsusuɔ akɛ wɔnijiaŋ baaje wui yɛ nitsumɔ lɛ he koni egɔ̃. Shi misɔle mikɛɛ, “Oo Nyɔŋmɔ, wo mi ekãa.”

¹⁰ Gbi ko lɛ mitee Shemaia ni ji Delaia bi ni asaŋ eji Mehetabel nabi lɛ shĩa; shi eŋa eyi, ni ekɛɛ, “Hã wɔyakpe yɛ Nyɔŋmɔ We lɛ, yɛ Sɔlemɔtsu lɛ mli, ni wɔŋamɔ Sɔlemɔtsu lɛ shinai lɛ, ejaakɛ amɛbaaba ni amɛbagbe bo. Amɛbaaba amɛbagbe bo nyɔɔŋ tete.”

¹¹ Shi mikɛɛ, “Aso nuu tamɔ mi baajo foi? Ani nuu tamɔ mi aaajo foi kɛya Sɔlemɔtsu lɛ mli, koni eyi ana wala? Miyaaa!”

¹² Miyoo akɛ jeee Nyɔŋmɔ ni tsu Shemaia, shi moŋ Tobia kɛ Sanbalat ni ebɔ lɛ apaa hewɔ ni egba nɛkɛ gbalɛ nɛɛ eshi mi lɛ.

¹³ Amɛbɔ lɛ apaa bɔ ni afee ni ewo mihe gbeyei ni mafee nɔ ni ekɛɛ lɛ koni mafee esha. Kɛkɛ lɛ amɛbaana sane fɔŋ ko yɛ mihe amɛyatã kɛbɔ mi ahora.

¹⁴ Misɔle mikɛɛ, “MiNyɔŋmɔ, kaimɔ ni okɛ Tobia kɛ Sanbalat aye kɛ joomɔ yɛ nibii ni amɛfee lɛ naa. Kaimɔ gbalɔyoo Noadia kɛ gbalɔi krokomɛi lɛ hu koni okɛ amɛ aye; amɛ amɛtaoɔ ni kulɛ amɛwo mihe gbeyei lɛ.”

Nitsumɔ lɛ naagbee

¹⁵ Gbii nyɔŋmai enumɔ kɛ enyɔ sɛɛ lɛ, agbe nitsumɔ lɛ naa. Agbe naa yɛ nyɔŋ ni ji Elul lɛ nɔ gbi ni ji nyɔŋmai enyɔ kɛ enumɔ lɛ nɔ.

¹⁶ Be ni wɔhenyɛlɔi lɛ fɛɛ nu lɛ, jeŋmaji ni bɔle wɔ lɛ fɛɛ she gbeyei, ni amɛhiɛ gboi wo amɛyitseiaŋ, ejaakɛ amɛyoo akɛ, nitsumɔ lɛ, Nyɔŋmɔ yelikɛbuamɔ naa ni anyɛ atsu.

¹⁷ Shi nɛkɛ bei amli fɛɛ lɛ, Yuda abladei lɛ miiŋmala woji pii amɛmiimaje Tobia, ni Tobia hu miiŋmala amɛ woji.

¹⁸ Ejaakɛ mɛi pii yɛ Yuda ni kɛ Tobia ji ekome, ejaakɛ Ara bi Shekania shaanuu ji lɛ, ni asaŋ, lɛ Tobia lɛ, ebinuu Yehohanan ebaŋɔ Meshulam biyoo ni ji Berekia nabi akɛ ŋa.

¹⁹ Mɛi bawieɔ Tobia he ekpakpa amɛhãa mi, ni amɛyagbaa lɛ nɔ ni mi hu mikɛɔ. Tobia ŋmalaa mi woji, ni ekɛwoɔ mihe gbeyei.