Nehemia 5 - ŊMALƐ KRƆŊKRƆŊ LƐ

Ohiafoi ayiwaa

¹ Maŋbii lɛ kɛ amɛŋamɛi lɛ wie amɛshi amɛnyɛmimɛi Yudafoi lɛ yɛ sane ni eŋɔɔɔ ni amɛnyɛmimɛi lɛ kɛyeɔ amɛ lɛ hewɔ.

² Maŋbii lɛ ateŋ mɛi komɛi kɛɔ akɛ, “Wɔ kɛ wɔbii lɛ, wɔyi fa yɛ wɔshĩai amli. Ahã wɔ abele bɔ ni sa ni wɔye koni wɔyi ana wala.”

³ Mɛi krokomɛi hu kɛɔ akɛ, “Hɔ̃mɔ lɛ hewɔ lɛ, wɔkɛ wɔŋmɔji kɛ wɔwain tromi kɛ wɔshĩai totoɔ awaba koni wɔna shika wɔkɛhe abele.”

⁴ Asaŋ mɛi komɛi hu kɛɔ akɛ, “Maŋtsɛ onia lɛ tsumɔ hewɔ lɛ wɔyafala shika, ni wɔkɛ wɔŋmɔji kɛ wɔwain tromi lɛ eto naa.

⁵ Wɔkɛ wɔnyɛmimɛi lɛ fɛɛ hiɛ hewolo kome, ni wɔbii lɛ tamɔ amɛbii lɛ, shi wɔtsiɔ wɔbii lɛ wɔwoɔ nyɔŋyeli mli, koni amɛtsɔmɔ nyɔji; ni wɔbiyei lɛ ateŋ mɛi komɛi lɛ, afee amɛ nyɔji momo. Wɔnyɛɛɛ enɛ he nɔ ko wɔfee; ni wɔŋmɔji kɛ wɔwain tromi yɛ mɛi krokomɛi adɛŋ.”

⁶ Be ni minu saji ni eŋɔɔɔ amɛnaa kɛ nɛkɛ wiemɔi nɛɛ lɛ, mimli wo la naakpa,

⁷ ni mito miyiŋ nɔ ni sa akɛ mafee. Saji ni ayɔɔ yɛ abladei lɛ kɛ nɔyelɔi lɛ ahe lɛ hewɔ lɛ, mikɛɛ amɛ akɛ, “Nyɛteŋ mɔ fɛɛ mɔ heɔ enyɛmi hekpa ni fe nine.” Mibɔ gwa kpeteŋkple miwo amɛ;

⁸ ni mikɛɛ amɛ akɛ, “Wɔ lɛ, wɔkpɔ̃ wɔnyɛmimɛi Yudafoi ni ahɔ̃ɔ ahã jeŋmaji lɛ bɔ ni wɔɔnyɛ, shi nyɛ lɛ nyɛmiihɔ̃ɔ nyɛ diɛŋtsɛ nyɛnyɛmimɛi lɛ? Nyɛmiihɔ̃ɔ amɛ nyɛhã wɔ!” Amɛhãaa hetoo; amɛnãaa nɔ ni amɛkɛɔ.

⁹ Kɛkɛ ni mitsa miwiemɔ lɛ nɔ, ni mikɛɛ, “Nɔ ni nyɛfeɔ lɛ ejaaa. Ani esaaa akɛ nyɛkɛ wɔNyɔŋmɔ lɛ he gbeyeishemɔ baa nyɛjeŋ koni wɔkɛku wɔhe fɛo ni jemajiaŋbii ni ji wɔhenyɛlɔi lɛ yeɔ lɛ naa lo?

¹⁰ Mi kɛ minyɛmimɛi lɛ kɛ miwebii lɛ hu, wɔfaa wɔnyɛmimɛi Yudafoi lɛ shika kɛ abele. Nyɛhãa wɔkɛ nɛkɛ hekpawoo nɛɛ akea.

¹¹ Nyɛkɛ amɛŋmɔji kɛ amɛwain tromi kɛ amɛmu tromi kɛ amɛshĩai lɛ akũa sɛɛ ahãa amɛ ŋmɛnɛ gbi nɛɛ nɔŋŋ. Nyɛkɛ shika kɛ abele kɛ wain kɛ mu mlijai oha mli ekome ni ji hekpa ni nyɛheɔ yɛ amɛdɛŋ lɛ hu akũa sɛɛ ahãa amɛ.”

¹² Kɛkɛ ni amɛkɛɛ, “Wɔkɛbaaku sɛɛ wɔhã amɛ ni wɔheŋ nɔ ko yɛ amɛdɛŋ. Wɔɔɔfee tamɔ bɔ ni okɛɛ lɛ.” Mitsɛ osɔfoi lɛ kɛba, ni mihã maŋhiɛnyiɛlɔi lɛ kamɔ kitã akɛ amɛaafee bɔ ni amɛwo shi nɛɛ.

¹³ Asaŋ mitswa mimlifiinɔ lɛ mli, ni mikɛɛ, “Mɔ fɛɛ mɔ ni yeee nɛkɛ shiwoo nɛɛ nɔ lɛ, bɔ ni Nyɔŋmɔ aaatswa emli kɛjie lɛ kɛjɛ ewe kɛ enitsumɔ mli nɛ; bɔ nɔŋŋ ni aaatswa emli ni afee lɛ shwɛm nɛ.” Asafo muu lɛ fɛɛ here nɔ amɛkɛɛ, “Amen!” Ni amɛ jie Yehowa yi. Maŋ lɛ ye amɛshiwoo nɛɛ nɔ.

Nehemia fooo ekome enɔ mli

¹⁴ Kɛjɛ gbi nɔ ni awo mi amralo ni kwɛɔ Yuda shikpɔŋ lɛ nɔ kɛjɛ Maŋtsɛ Artashasta yinɔ afi ni ji nyɔŋmai enyɔ lɛ nɔ kɛyashi afi ni ji nyɔŋmai etɛ̃ kɛ enyɔ lɛ nɔ, no ji afii nyɔŋma kɛ enyɔ sɔŋŋ nɛ lɛ, mi kɛ minyɛmimɛi lɛ wɔheko niyenii ni ahãa amralo fɛɛ amralo akɛ egbɛnaa niyenii lɛ eko.

¹⁵ Shi sa amraloi ni nyiɛ mihiɛ lɛ hã etɔ maŋ lɛ yɛ shika ni naa shiɔ jwiɛtɛi talentai nyɔŋmai ejwɛ ni amɛheɔ kɛshiɔ aboloo kɛ wain ni amɛheɔ yɛ maŋ lɛ dɛŋ lɛ nɔ lɛ hewɔ. Amraloi nɛɛ atsuji tete gbaa maŋ lɛ naa. Shi mi lɛ, gbeyei ni misheɔ Nyɔŋmɔ hewɔ lɛ, mifeee nakai.

¹⁶ Asaŋ mikɛ mihewalɛ fɛɛ wo gbogbo lɛ he nitsumɔ lɛ mli, ni mitaooo shikpɔŋ ko mihãaa mihe; ni miwebii lɛ fɛɛ bakpeɔ yɛ gbogbo lɛ he kɛhã nitsumɔ lɛ.

¹⁷ Asaŋ Yudafoi lɛ kɛ nɔyelɔi lɛ ateŋ mɛi oha kɛ nyɔŋmai enumɔ bayeɔ nii yɛ mikpɔlɔ̃ he; dani esoro mɛi ni jɛ jeŋmaji ni bɔle wɔ lɛ ateŋ ni baa wɔŋɔɔ hu.

¹⁸ Nii ni ahoɔ ahãa mi gbi kome ji tsinanuu kome kɛ toi ni eshwi ekpaa kɛ wuɔi; ni daa gbii nyɔŋma sɛɛ lɛ, akɛ wain srɔtoi fɛɛ hu babaoo baa, migbɛnaa niyenii lɛ, mibiii shi, ejaakɛ onia ni atsuɔ maŋ lɛ efee jatsu ehã maŋ lɛ.

¹⁹ MiNyɔŋmɔ, nibii fɛɛ ni mifee mihã nɛkɛ maŋ nɛɛ hewɔ lɛ, kaimɔ mi ni ahi ahã mi.