Nehemia 4 - ŊMALƐ KRƆŊKRƆŊ LƐ

Nehemia ye mɛi ni tsiɔ nitsumɔ lɛ naa lɛ anɔ kunim

¹ Be ni Sanbalat nu akɛ wɔ, Yudafoi lɛ, wɔmiitswa gbogbo lɛ, emli fu ni emli wo la naakpa. Eye wɔhe fɛo,

² ni ekɛɛ yɛ enyɛmimɛi lɛ kɛ Samaria tabilɔi lɛ ahiɛ akɛ, “Mɛni nɛkɛ Yudafoi wudɔwudɔi nɛɛ feɔ nɛɛ? Ani aŋmɛ amɛ gbɛ? Ani amɛsusuɔ akɛ kɛji amɛshã afɔlei lɛ amɛaanyɛ nitsumɔ lɛ naa amɛgbe gbi kome jenamɔ lo? Kolɛ amɛaanyɛ amɛ jie tɛi lɛ yɛ tsu koi ni ashã ni bua shi kuikui lɛ amli lo?”

³ Kɛkɛ ni Tobia, Amonnyo ni damɔ emasɛi lɛ, kɛɛ, “Tɛ gbogbo tete po ni amɛtswaa nɛɛ lɛ, kɛ osɔ tete tu eyi nɔ lɛ, eeekumɔ eshwie shi.”

⁴ Misɔle mikɛɛ, “Bo toi, wɔNyɔŋmɔ. Bo bɔ ni agbeɔ wɔhe guɔ toi. Hã ni ahora ni amɛbɔɔ wɔ lɛ aku sɛɛ abua amɛ diɛŋtsɛ amɛyiteŋ; hã aŋɔ amɛ nom, ni aha amɛnii.

⁵ Okɛ esha ni amɛfeɔ lɛ akafa amɛ, ni ohiɛ akakpa amɛhe eshai lɛ anɔ, ejaakɛ amɛbɔ wɔ ahora, ni amɛwo omli la yɛ wɔ mɛi ni wɔtswaa gbogbo lɛ ahiɛ.”

⁶ No hewɔ lɛ, wɔtswa gbogbo lɛ kɛkpe kɛyashi enɔkwɔlɛ lɛ mlijaa, ejaakɛ maŋ lɛ yɛ nitsumɔ lɛ he tsui.

⁷ Shi be ni Sanbalat kɛ Tobia kɛ Arabiabii kɛ Amonbii kɛ Ashdodbii lɛ nu akɛ atsara Yerusalɛm gbogboi lɛ kɛkpe, ni abɔ̃i fɔji lɛ tsiimɔ lɛ, amɛmli wo la naakpa.

⁸ Amɛ fɛɛ tswɛm amɛtee apam akɛ amɛmiiba ni amɛbatua Yerusalɛm ni amɛhã jɛi afee basabasa.

⁹ Shi wɔsɔle wɔkpa wɔNyɔŋmɔ lɛ fai, ni wɔto bulɔi wɔto amɛhe koni amɛbu nyɔɔŋ kɛ shwane.

¹⁰ Yudabii yɛ lala ko ni amɛlaa akɛ, “Wɔhewalɛ nɔ miigbɔ kɛ wɔjatsui ni wɔtere lɛ. Tsu gbogbo kukuji ni sa akɛ aloo lɛ fa tsɔ̃. Hewɔ lɛ wɔnyɛɛɛ gbogbo lɛ wɔtswa dɔŋŋ.”

¹¹ Wɔhenyɛlɔi lɛ susu akɛ wɔleŋ, ni asaŋ wɔnaŋ amɛ kɛyashi beyinɔ ni amɛaabote wɔteŋ ni amɛmiigbe wɔ koni nitsumɔ lɛ yi ahɛ shi.

¹² Shi Yudafoi ni kɛ amɛ yɔɔ lɛ ba shii abɔ amɛbatswa wɔ adafi akɛ wɔhenyɛlɔi lɛ baajɛ hei srɔtoi ni amɛyɔɔ lɛ amɛbatua wɔ.

¹³ No hewɔ lɛ, mikɛ mɛi to gbogbo lɛ sɛɛ hei ni kwɔɔɔ ni kã shi kplanaa lɛ. Mito maŋ lɛ yɛ amɛwekui anaa; amɛhiɛ amɛklantei kɛ amɛkpɔlɔi kɛ amɛgãii.

¹⁴ Kɛkɛ ni mikwɛ bɔ ni nibii yɔɔ hãa, ni mikɛɛ maŋ lɛ mli abladei lɛ kɛ nɔyelɔi lɛ kɛ mɛi ni eshwɛ lɛ fɛɛ akɛ, “Nyɛkashea henyɛlɔi lɛ agbeyei; shi moŋ nyɛkaia Nuŋtsɔ kpeteŋkple ni he yɔɔ gbeyei lɛ, ni nyɛwua nyɛhãa nyɛnyɛmimɛi kɛ nyɛbihii kɛ nyɛbiyei kɛ nyɛŋamɛi kɛ nyɛshĩaiaŋ lɛ.”

¹⁵ Be ni wɔhenyɛlɔi lɛ nu akɛ abatswa wɔ adafi, ni Nyɔŋmɔ ehã amɛ jina lɛ efee yaka lɛ, wɔ fɛɛ tswɛm wɔku wɔsɛɛ kɛba gbogbo lɛ he ekoŋŋ, ni mɔ fɛɛ mɔ tee enitsumɔhe.

¹⁶ Kɛjɛ nakai gbi lɛ nɔ lɛ, miwebii lɛ ateŋ mɛi fã tsuɔ nii lɛ, ni mɛi fã hiɛɔ akplɔi kɛ tsɛŋi kɛ gaii ni amɛwo damai. Onukpai lɛ fi Yudawe lɛ fɛɛ ni tswaa gbogbo lɛ sɛɛ.

¹⁷ Mɛi ni tswaa gbogbo lɛ kɛ mɛi ni tereɔ nibii ni akɛtswaa lɛ tete ateŋ mɔ fɛɛ mɔ kɛ enine kome miitsu nii, belɛ ekɛ ekome hiɛ tawuunii.

¹⁸ Mɛi ni tswaa gbogbo lɛ ateŋ mɔ fɛɛ mɔ klante ŋmɔ ehɛ, ni ekɛtswaa gbogbo lɛ; ni mɔ ni kpãa tɛtɛrɛmantɛrɛ lɛ yɛ mimasɛi.

¹⁹ Mikɛɛ maŋ lɛ mli abladei lɛ kɛ nɔyelɔi lɛ kɛ mɛi ni eshwɛ lɛ akɛ, “Nitsumɔ lɛ fa, ni egbɛ eshwã, ni wɔmli kã haŋŋhaŋŋ yɛ gbogbo lɛ nɔ, mɔ kɛ enaanyo teŋ jɛkɛ.

²⁰ No hewɔ lɛ, he fɛɛ he ni nyɛaanu tɛtɛrɛmantɛrɛ gbɛɛmɔ yɛ lɛ, nyɛbuaa nyɛhe naa kɛbaa wɔŋɔɔ yɛ jɛi; wɔNyɔŋmɔ lɛ aaawu ahã wɔ.”

²¹ No hewɔ lɛ, bɔ ni wɔtsu nii lɛ nɛ, mɛi lɛ fã hiɛɔ akplɔi kɛjɛɔ hulu shitee kɛyashiɔ beyinɔ ni ŋulamii pueɔ yɛ ŋwɛi.

²² Asaŋ nakai be lɛ mli nɔŋŋ lɛ, mikɛɛ maŋbii lɛ akɛ, “Mɔ fɛɛ mɔ kɛ ewebii awɔ Yerusalɛm koni amɛbu wɔhe nyɔɔŋ, ni shwane lɛ amɛtsu nii lɛ.

²³ No hewɔ lɛ, mi jio, minanemɛi nitsulɔi lɛ jio, miwebii lɛ kɛ mihebulɔi lɛ jio, wɔjieee wɔtadei; ni mɔ fɛɛ mɔ tawuunii yɛ emasɛi.”