Nehemia 2 - ŊMALƐ KRƆŊKRƆŊ LƐ

Nehemia tee Yerusalɛm

¹ Gbi ko yɛ Nisan nyɔŋ lɛ nɔ yɛ Maŋtsɛ Artashasta yinɔ afi ni ji nyɔŋmai enyɔ lɛ nɔ lɛ, maŋtsɛ lɛ miiye nii, ni wain ma ehiɛ. Miwo wain lɛ, ni mikɛhã lɛ. Enako mi ni mifee mɔbɔmɔbɔ yɛ ehiɛ pɛŋ.

² Ebi mi akɛ, “Mɛɛ hewɔ ni ohiɛ efee mɔbɔmɔbɔ nɛkɛ nɛɛ, ni jeee akɛ ohe hu ni yeɔ lɛ? Jeee nɔ ko nɔ ko ni fe akɛ ooye awerɛhoo yɛ otsui mli.” Mihɛle shi amrɔ nɛkɛ,

³ ni mikɛɛ, “Maŋtsɛ yi ana wala kɛya naanɔ! Nii, mɛɛba ni esaaa akɛ mihiɛ afee mɔbɔmɔbɔ be ni maŋ ni ji he ni mitsɛmɛi asaŋi yɔɔ lɛ etsɔ̃ amaŋfɔ̃, ni ashã ehe agboi lɛ?”

⁴ Kɛkɛ ni maŋtsɛ lɛ bi mi akɛ, “Mɛni ji nɔ ni otaoɔ?” No hewɔ lɛ, misɔle mikpa ŋwɛi Nyɔŋmɔ lɛ fai,

⁵ ni mikɛɛ maŋtsɛ lɛ akɛ, “Kɛji esa maŋtsɛ hiɛ, ni kɛji otsulɔ hiɛ eba nyam yɛ ohiɛ lɛ, no lɛ hã maya Yuda yɛ maŋ ni afu mitsɛmɛi yɛ mli lɛ mli, koni mayasaa mama maŋ lɛ ekoŋŋ.”

⁶ Nɛkɛ be nɛɛ mli lɛ, Maŋnyɛ lɛ ta maŋtsɛ lɛ masɛi, ni maŋtsɛ lɛ bi mi akɛ, “Gbii enyiɛ oyaaye, ni mɛɛbe oooku osɛɛ oba ekoŋŋ?” Esa maŋtsɛ lɛ hiɛ akɛ eŋmɛ mi gbɛ ni maya; ni mito lɛ be.

⁷ Asaŋ mikɛɛ maŋtsɛ lɛ akɛ kɛji eesumɔ lɛ, no lɛ ehã mi woji ni mikɛyahã amralofoi ni yɔɔ Eufrate Faa lɛ anaigbɛ lɛ, koni amɛŋmɛ mi gbɛ ni mafo mli kɛya Yuda.

⁸ Asaŋ mibi wolo ko hu ni mikɛyahã Asaf, mɔ ni kwɛɔ maŋtsɛ koo lɛ nɔ lɛ, koni ehã mi tsumaa tsei. Tsei nɛɛ mikɛbaakpɛ mɔɔ agboi mawo Sɔlemɔ we lɛ he, kɛ maŋ lɛ he gbogbo lɛ kɛ shĩa ni miyahi mli lɛ he. Akɛni miNyɔŋmɔ lɛ kɛ mi yɛ hewɔ lɛ, maŋtsɛ lɛ fee nɔ ni mitaoɔ lɛ fɛɛ ehã mi.

⁹ Maŋtsɛ lɛ famɔ asafoiatsɛmɛi kɛ okpɔŋɔnɔtalɔi eto mihe. Miyashɛ amralofoi ni yɔɔ Eufrate Faa lɛ anaigbɛ lɛ aŋɔɔ; ni mikɛ maŋtsɛ lɛ woji lɛ hã amɛ.

¹⁰ Shi be ni Sanbalat, Horonnyo lɛ, kɛ Tobia, Amonnyo ni ji nyɔŋ lɛ nu lɛ, edɔ amɛ naakpa akɛ nuu ko eba ni ebatao Israelbii lɛ ejurɔyeli.

¹¹ Mibashɛ Yerusalɛm, ni miye gbii etɛ̃ yɛ jɛi.

¹² Ni mite shi nyɔɔŋ, mi kɛ hii fioo ko ni fata mihe lɛ. Shi migbako mɔ ko mɔ ko nɔ ni miNyɔŋmɔ lɛ kɛwo mitsui mli akɛ miyafee mihã Yerusalɛm lɛ. Asaŋ mihiɛɛɛ kooloo ko kooloo ko hu akɛ ja kooloo ni mita nɔ lɛ pɛ kɛkɛ.

¹³ Mitsɔ̃ jɔɔ lɛ mli agbo lɛ naa nyɔɔŋ kɛje kpo kɛtsɔ̃ Drako Nubu lɛ he kɛtee Tumo Agbo lɛ naa. Misra Yerusalɛm gbogboi lɛ mikwɛ bɔ ni amɛkumɔ amɛshwie shi, kɛ enaa agboi ni ashã lɛ.

¹⁴ Kɛkɛ ni mifoŋ kɛtee Nubu Agbo lɛ naa kɛ Maŋtsɛ Kpaakpo lɛ hu naa; shi kooloo ni mita nɔ lɛ naaa he ko etsɔ̃ yɛ nikikiŋkoi lɛ amli kɛho.

¹⁵ No hewɔ lɛ, nyɔɔŋ mli lɛ mitsɔ̃ faa lɛ jɔɔ lɛ mli kɛtee miyakwɛ gbogbo lɛ; ni miku misɛɛ kɛtsɔ̃ jɔɔ lɛ mli agbo lɛ naa kɛtee maŋ lɛ mli.

¹⁶ Shi nɔyelɔi lɛ leee he ni mitee kɛ nɔ ni miyafee. Yudafoi lɛ kɛ osɔfoi lɛ kɛ abladei lɛ kɛ nɔyelɔi lɛ kɛ mɛi ni eshwɛ ni ji mɛi ni baatsu nii lɛ hu, migbako amɛ.

¹⁷ Shi agbɛnɛ mikɛɛ amɛ akɛ, “Nyɛ diɛŋtsɛ nyɛmiina nɔ amane mli ni wɔyɔɔ, bɔ ni Yerusalɛm ekumɔ kɛbua shi, ni ehe agboi lɛ hu ashã. Nyɛbaa ni nyɛhãa wɔtswaa Yerusalɛm gbogbo lɛ koni wɔhiɛshishwiemɔ nɛɛ sɛɛ afo.”

¹⁸ Ni migba amɛ akɛ miNyɔŋmɔ lɛ kɛ mi yɛ. Migba amɛ maŋtsɛ lɛ wiemɔ ni ekɛ mi wie lɛ hu. Amɛhere nɔ amɛkɛɛ, “Nyɛhãa wɔbɔia gbogbo lɛ tswaa! Ni amɛsaa amɛhe amɛhã nitsumɔ kpakpa lɛ.”

¹⁹ Shi be ni Sanbalat, Horonnyo lɛ, kɛ Tobia, Amonnyo ni ji nyɔŋ lɛ kɛ Geshem, Arabianyo lɛ, nu lɛ, amɛŋmɔ wɔ, ni amɛye wɔhe fɛo amɛkɛɛ, “Mɛɛ sane nyɛyeɔ nɛɛ? Aso nyɛmitse Maŋtsɛ lɛ hiɛ atua?”

²⁰ Mito he akɛ, “Ŋwɛi Nyɔŋmɔ lɛ, lɛ eeehã wɔnyɛ wɔfee. No hewɔ lɛ, wɔ, ni ji etsuji lɛ, wɔbaawo gbogbo lɛ tswaa nɔ; shi nyɛ lɛ nyɛbɛ gbɛfaŋ nɔ ko loo hegbɛ ko loo kaimɔ nɔ ko yɛ Yerusalɛm.”