Nehemia 13 - ŊMALƐ KRƆŊKRƆŊ LƐ

Israel maŋ lɛ tse amɛhe yɛ maŋsɛɛbii ahe

¹ Nakai gbi lɛ be ni akaneɔ Mose Mla lɛ yɛ maŋbii lɛ atoiŋ lɛ, ana ni aŋmã yɛ mli akɛ Amonnyo loo Moabnyo akaba Nyɔŋmɔ maŋbii lɛ ahenaabuamɔ lɛ mli kɔkɔɔkɔ;

² ejaakɛ amɛkɛ aboloo kɛ nu ebakpeee Israelbii lɛ, shi moŋ amɛyabɔ Bileam apaa akɛ ebalomɔ amɛ; shi wɔNyɔŋmɔ lɛ hã loomɔ lɛ moŋ tsɔ̃ jɔɔmɔ.

³ Be ni Israelbii lɛ nu mla lɛ, amɛ jie mɛi fɛɛ ni ji futufutu gbɔmɛi lɛ yɛ amɛteŋ.

Nehemia tsake nibii komɛi

⁴ Shi dani abaafee enɛ lɛ, osɔfoi Eliashib ni akɛ lɛ eto nitoohei ni yɔɔ wɔNyɔŋmɔ lɛ we lɛ anɔ lɛ, kɛ Tobia efee ekome kɛto gbɛjianɔ.

⁵ Eliashib saa tsu kpeteŋkple ko ehã Tobia ni ehi mli. Tsu nɛɛ, sa lɛ akɛ nibii komɛi toɔ mli. Nibii nɛɛ ji niyenii afɔlei kɛ krɔbɔo kɛ Sɔlemɔ we tsɛnsii kɛ ŋmɔshinii ni ji abele kɛ wain kɛ mu mlijai nyɔŋma mli ekomekome lɛ, ni awo he kitã akɛ akɛhã Levibii lɛ kɛ Sɔlemɔ we lalɔi lɛ kɛ agbonaakwɛlɔi lɛ. Nɔ ni fata nibii ni akɛtoɔ tsu nɛɛ mli lɛ he ji afɔlei ni akɛhãa osɔfoi lɛ.

⁶ Shi nɛkɛ be nɛɛ mli fɛɛ lɛ mibɛ Yerusalɛm, ejaakɛ Babilon maŋtsɛ Artashasta yinɔ afi ni ji nyɔŋmai etɛ̃ kɛ enyɔ lɛ nɔ lɛ mitee eŋɔɔ. Be kplaŋŋ sɛɛ lɛ, mibi maŋtsɛ lɛ gbɛ,

⁷ ni miku misɛɛ kɛba Yerusalɛm. Mibana sane gbonyo ni Eliashib eye akɛ esaa tsu ehã Tobia yɛ Nyɔŋmɔ We lɛ kpoi lɛ anɔ.

⁸ Mimli wo la naakpa, ni mijie Tobia nibii fɛɛ yɛ tsu lɛ mli mishwie.

⁹ Kɛkɛ ni mifã akɛ asha nitoohei lɛ amli koni akɛtsuu amɛmli: ni mihã akɛ Nyɔŋmɔ We lɛ mli nibii lɛ kɛ niyenii afɔlei lɛ kɛ krɔbɔo lɛ ku sɛɛ akɛbato jɛi ekoŋŋ.

¹⁰ Minu hu akɛ Levibii lɛ kɛ Sɔlemɔ we lalɔi lɛ ni amɛ kɛ Levibii lɛ fɛɛ tsuɔ amɛgbɛnaa nitsumɔi lɛ ateŋ mɔ fɛɛ mɔ ejo foi etee eŋmɔ mli, ejaakɛ ahãaa amɛ amɛgbɛnaa niyenii lɛ.

¹¹ No hewɔ lɛ, mihiɛ dɔ wo hiɛnyiɛlɔi lɛ, ni mibi amɛ akɛ, “Mɛɛ hewɔ ajo foi ashi Nyɔŋmɔ We lɛ?” Mibua Levibii lɛ kɛ Sɔlemɔ we lɛ mli lalɔi lɛ anaa kɛba, ni mikɛ amɛ yato amɛgbɛhe.

¹² Kɛkɛ ni Yuda maŋ muu lɛ fɛɛ bɔ̃i abele kɛ wain kɛ mu mlijai nyɔŋma mli ekomekome lɛ kɛ nitoohei lɛ amli woo ekoŋŋ.

¹³ Mito nitoohe lɛ nɔkwɛlɔi: amɛ ji Osɔfoi Shelemia kɛ Zadok, woloŋmalɔ lɛ, kɛ Pedaia ni jɛ Levibii lɛ ateŋ lɛ. Amɛsɛɛmɔ ji Hanan, Matania bi Zakur bi lɛ. Mito gbɔmɛi nɛɛ, ejaakɛ abuɔ amɛ anɔkwafoi. Amɛnitsumɔ ji akɛ amɛja nii lɛ amɛhã amɛnyɛmimɛi nitsulɔi lɛ.

¹⁴ MiNyɔŋmɔ, kaimɔ mi yɛ enɛ hewɔ, ni ohiɛ akakpa nitsumɔi kpakpai ni mitsu yɛ owe lɛ kɛ emli sɔ̃ɔmɔ ahe lɛ anɔ.

¹⁵ Nakai be lɛ mli mina akɛ mɛi ŋaa wainyibii yɛ hejɔɔmɔ gbi lɛ nɔ yɛ Yuda. Mina akɛ akɛ abele kɛ wain kɛ wainyibii kɛ agbãmi jatsui kɛ jatsui srɔtoi fɛɛ tereɔ tejii kɛbaa Yerusalɛm yɛ hejɔɔmɔ gbi lɛ nɔ. Migbɛ miwo amɛ yɛ gbi nɔ ni amɛhɔ̃ɔ nii lɛ hewɔ.

¹⁶ Tirobii komɛi ni yɔɔ Yerusalɛm lɛ kɛ loo kɛ guɔnii srɔtoi fɛɛ baa amɛbahɔ̃ɔ amɛhãa Yudabii lɛ yɛ hejɔɔmɔ gbi lɛ nɔ tete yɛ Yerusalɛm.

¹⁷ Mikã Yuda abladei lɛ ahiɛ, ni mikɛɛ amɛ akɛ, “Mɛɛ sane fɔŋ nyɛyeɔ ni nyɛkɛbuleɔ hejɔɔmɔ gbi lɛ nɛɛ?

¹⁸ Ani jeee nɛkɛ nyɛtsɛmɛi lɛ fee ni wɔNyɔŋmɔ lɛ hã efɔŋ nɛɛ fɛɛ ba wɔ kɛ maŋ nɛɛ nɔ lɛ? Kɛ̃lɛ nyɛkɛ bulemɔ ni nyɛbuleɔ hejɔɔmɔ gbi lɛ miitsɛ mlifu kɛba Israel nɔ nyɛfata he.”

¹⁹ No hewɔ lɛ, dani aaaje hejɔɔmɔ gbi lɛ shishi lɛ, kɛji hiɛ bɔ̃i tuutuu feemɔ yɛ Yerusalɛm agboi lɛ amli pɛ, kɛkɛ lɛ mifãa ni aŋamɔ agboi lɛ, ni miwoɔ kitã akɛ akagbele, ja hejɔɔmɔ gbi lɛ eho dã. Asaŋ mifamɔ mitsuji lɛ ekomɛi mito agboi lɛ anaa koni akɛ jatsu ko akaba maŋ lɛ mli yɛ hejɔɔmɔ gbi lɛ nɔ.

²⁰ Jarayelɔi lɛ kɛ guɔyelɔi ni hɔ̃ɔ nibii srɔtoi fɛɛ lɛ bato agboi lɛ asɛɛ shi kome loo shii enyɔ.

²¹ Mibɔ amɛ kɔkɔ ni mikɛɛ amɛ akɛ, “Mɛɛ hewɔ nyɛbatoɔ gbogbo lɛ sɛɛ lɛ? Kɛ nyɛfee nakai ekoŋŋ lɛ, mibamɔmɔ nyɛ.” Kɛjɛ nakai gbi lɛ nɔ lɛ, amɛbaaa hejɔɔmɔ gbi lɛ nɔ dɔŋŋ.

²² Kɛkɛ ni mifã Levibii lɛ akɛ amɛtsuu amɛhe koni amɛba amɛbabu agboi lɛ anaa, bɔ ni afee ni afee hejɔɔmɔ gbi lɛ krɔŋkrɔŋ. MiNyɔŋmɔ, kaimɔ mi yɛ enɛ hu hewɔ koni okɛ mihe eshai afa mi yɛ osuɔmɔ ni fa lɛ hewɔ.

²³ Nakai bei lɛ amli lɛ mina akɛ Yudafoi pii eŋɔ Ashdodyei kɛ Amonyei kɛ Moabyei.

²⁴ Amɛbii lɛ wieɔ Ashdod wiemɔ lɛ loo wiemɔ kroko fã kɛ fã, ni amɛnyɛɛɛ Yudafoi awiemɔ lɛ amɛwie.

²⁵ Mihiɛ dɔ wo amɛ, ni milomɔ amɛ. Miyi amɛteŋ mɛi komɛi, ni mifamɔ amɛyiteŋ tsɔi. Mihã amɛkã Nyɔŋmɔ kitã akɛ amɛkɛ amɛbiyei lɛ haŋ maŋsɛɛbii abihii gbãlã, ni amɛŋɔŋ maŋsɛɛbii abiyei amɛhaŋ amɛbihii lɛ. Asaŋ amɛ diɛŋtsɛ hu amɛkɛ maŋsɛɛbii ehiŋ shi.

²⁶ Mikɛ amɛ wie ni mikɛɛ, “Ani jeee yei tamɔ Mɛnɛɛmɛi nɔŋŋ hã Israel Maŋtsɛ Solomon fee esha, tsɛ maŋtsɛ ko maŋtsɛ ko bɛ je nɛɛŋ maji babaoo lɛ eko nɔ ni tamɔ lɛ? Nyɔŋmɔ sumɔɔ lɛ, ni Nyɔŋmɔ wo lɛ maŋtsɛ ni eye Israel maŋ muu lɛ fɛɛ nɔ. Kɛ̃lɛ Solomon po maŋsɛɛ yei hã efee esha.

²⁷ Aso wɔɔkɔ nyɛnane ni wɔfee nɛkɛ efɔŋ kpeteŋkple nɛɛ? Aso wɔɔŋɔ maŋsɛɛ yei ni wɔje wɔNyɔŋmɔ lɛ sɛɛ?”

²⁸ Osɔfonukpa Eliashib bi ji Yoiada. Yoiada bii lɛ ateŋ mɔ kome yaŋɔ Sanbalat Horonnyo lɛ biyoo, ni ekɛ Sanbalat fee shaanuu. No hewɔ lɛ, mishwie Yoiada bi lɛ yɛ mihe.

²⁹ MiNyɔŋmɔ, kaimɔ bɔ ni gbɔmɛi nɛɛ wo osɔfoyeli he muji ni amɛfite kpãŋmɔ ni okɛ osɔfoi lɛ kɛ Levibii lɛ ekpãŋ lɛ.

³⁰ Nɛkɛ gbɛ nɔ mitsɔ̃ mijie maŋ lɛ kɛjɛ maŋsɛɛ nɔ fɛɛ nɔ ni buleɔ mɔ mli. Mito osɔfoi lɛ kɛ Levibii lɛ asɔ̃ɔmɔ lɛ gbɛjianɔ, bɔ ni afee ni mɔ fɛɛ mɔ ale enitsumɔ ni akɛhã lɛ lɛ.

³¹ Ni mito gbɛjianɔ mihã be ni akɛ afɔleshãa lai kɛ klɛŋklɛŋ yelitso yibii aba. MiNyɔŋmɔ, kaimɔ mi ni ahi ahã mi.