Nehemia 12 - ŊMALƐ KRƆŊKRƆŊ LƐ

Osɔfoi kɛ Levibii agbɛii

¹ Osɔfoi kɛ Levibii ni kɛ Zerubabel, Shealtiel bi lɛ, kɛ Yeshua jɛ nomŋɔɔ mli ba lɛ agbɛii nɛ: Seraia kɛ Yeremia kɛ Ezra

Osɔfoi

² kɛ Amaria kɛ Maluk kɛ Hatush,

³ Shekania kɛ Rehum kɛ Meremot,

⁴ Ido kɛ Ginetoi kɛ Abia,

⁵ Miyamin kɛ Maadia kɛ Bilga,

⁶ Shemia kɛ Yoiarib kɛ Yedaia

⁷ Salu kɛ Amok kɛ Hilkia kɛ Yedaia. Mɛnɛɛmɛi ji osɔfoi lɛ kɛ amɛnyɛmimɛi lɛ ateŋ onukpai yɛ Yoshua be lɛ mli.

Levibii

⁸ Levibii lɛ ji Yeshua kɛ Binui kɛ Kadmiel kɛ Sherebia kɛ Yuda kɛ Matania. Matania ji lalɔi akui lɛ atsɛ,

⁹ ni ekɛ enyɛmimɛi ni ji Levibii: Bakbukia kɛ Uno damɔɔ shi ni mɛnɛɛmɛi miikwɛ mɛnɛɛmɛi ahiɛ, ni amɛhereɔ lala lɛ nɔ lɛ.

Osɔfonukpa Yoshua shwiei

¹⁰ Yeshua fɔ Yoiakim, ni Yoiakim fɔ Eliashib, ni Eliashib fɔ Yoiada.

¹¹ Yoiada fɔ Yonatan, ni Yonatan fɔ Yadua.

Osɔfoi awei lɛ ayitsei

¹² Be ni Yehoiakim yeɔ osɔfonukpa lɛ, osɔfoi atsɛmɛi awei lɛ ayitsei nɛ: Seraiatsɛ we lɛ yitso ji Meraiatsɛ we; Yeremia lɛ yitso ji Hanania.

¹³ Ezratsɛ we lɛ yitso ji Meshulam, Amariatsɛ we lɛ yitso ji Yehohanan.

¹⁴ Melukitsɛ we lɛ yitso ji Yonatan; Shebaniatsɛ we lɛ yitso ji Yosef.

¹⁵ Harimtsɛ we lɛ yitso ji Adna; Meraiottsɛ we lɛ yitso ji Helkai.

¹⁶ Idotsɛ we lɛ yitso ji Zakaria; Ginetontsɛ we lɛ yitso ji Meshulam.

¹⁷ Abiatsɛ we lɛ yitso ji Zikri; Miniamin ni ji Moadiatsɛ we lɛ yitso ji Piltai.

¹⁸ Bilgatsɛ we lɛ yitso ji Shamuatsɛ we; Shemaia lɛ yitso ji Yehonatan.

¹⁹ Yoairibtsɛ we lɛ yitso ji Matenai; Yedaiatsɛ we lɛ yitso ji Uzi.

²⁰ Salaitsɛ we lɛ yitso ji Kalai; Amoktsɛ we lɛ yitso ji Eber.

²¹ Hilkiatsɛ we lɛ yitso ji Hashabia; Yedaiatsɛ we lɛ yitso ji Netanel.

Aŋmã osɔfoi awei kɛ Levibii awei ayitsei agbɛii

²² Osɔfonukpai ni ji Eliashib kɛ Yoiada kɛ Yohanan kɛ Yadua yinɔ lɛ, aŋmã Levibii lɛ atsɛmɛi awei lɛ ayitsei lɛ kɛ osɔfoi lɛ agbɛii. Agbe gbɛiŋmaa nɛɛ naa yɛ Dario, Persianyo lɛ maŋtsɛyeli be lɛ mli.

²³ Shi Levibii ni ji tsɛmɛi awei lɛ amɛyitsei lɛ, aŋmã amɛgbɛii yɛ wolo ni Yinɔi Anɔ Saji yɔɔ mli lɛ mli. Aŋmã Levibii awei lɛ ayitsei lɛ agbɛii nɛɛ kɛyashi Yohanan, Eliashib nabi lɛ, yinɔ.

Aja Sɔlemɔtsu lɛ mli nitsumɔi lɛ

²⁴ Levibii lɛ atsɛmɛi awei lɛ ayitsei ni ji Hashibia kɛ Sherebia kɛ Yeshua, Kadmiel bi lɛ, to gbɛjianɔ. Afee kui enyɔ; ku kome miijie Nyɔŋmɔ yi, ni amɛmiida lɛ shi; belɛ ku ni ji enyɔ ni yɔɔ amɛhiɛ lɛ miihere nɔ. Amɛ jie Nyɔŋmɔ yi, ni amɛda lɛ shi tamɔ bɔ ni Nyɔŋmɔ gbɔmɔ David ewo kitã lɛ.

²⁵ Matania kɛ Bakbukia kɛ Obadia kɛ Meshulam kɛ Talmon kɛ Akub ji agbonaakwɛlɔi. Amɛ amɛbuɔ agboi lɛ anaa nitoohei lɛ ahe.

²⁶ Mɛnɛɛmɛi hi shi yɛ Yoakim, Yozadak bi Yeshua bi lɛ, kɛ Amralo Nehemia kɛ Osɔfo Ezra ni ji woloŋmalɔ lɛ yinɔ.

Nehemia fee Yerusalɛm Gbogbo lɛ Krɔŋkrɔŋ

²⁷ Be ni abaajɔɔ Yerusalɛm gbogbo lɛ nɔ afee lɛ krɔŋkrɔŋ lɛ, ayatao Levibii yɛ hei ni amɛyɔɔ lɛ fɛɛ, ni akɛ amɛ ba Yerusalɛm koni amɛbaye hetsuumɔ gbijurɔ lɛ kɛ nyamɔ kɛ shidaa lalai kɛ ŋoŋoi kɛ kpãa saŋkui.

²⁸ Levibii Lalɔi awekui lɛ babua amɛhe naa. Mɛi ni jɛ Yerusalɛm niiaŋ kɛ mɛi ni jɛ Netofat akrowai lɛ akpokpai anɔ fɛɛ ba.

²⁹ Mɛi komɛi hu jɛ Bet-Gilgal kɛ Geba koi asɛɛ kɛ Azmavet, ejaakɛ lalɔi nɛɛ etotoo akrowai kɛbɔle Yerusalɛm.

³⁰ Osɔfoi lɛ kɛ Levibii lɛ tsuu amɛhe. Asaŋ amɛtsuu maŋ lɛ kɛ agboi lɛ kɛ gbogbo lɛ hu ahe.

³¹ Kɛkɛ ni mihã Yuda onukpai lɛ kwɔ kɛba gbogbo lɛ nɔ. Mifee lalɔi akui kpelekplei enyɔ koni amɛto kɛnyiɛ gbogbo lɛ nɔ kɛ shidaa lalai. Ku kome tsɔ̃ ninejurɔgbɛ yɛ gbogbo lɛ nɔ kɛmiiya Tumo Agbo lɛ naa gbɛ.

³² Hoshaia kɛ Yuda onukpai lɛ ateŋ mɛi fã nyiɛ amɛsɛɛ.

³³ Mɛi ni fata he ji Azaria kɛ Ezra kɛ Meshulam kɛ

³⁴ Yuda kɛ Benyamin kɛ Shemaia kɛ Yeremia.

³⁵ Be ni ayaa lɛ belɛ osɔfoi lɛ ateŋ mɛi komɛi miikpã tɛtɛrɛmantɛrɛi. Amɛteŋ mɔ kome ji Zakaria, Yonatan bi lɛ. Enii kɛ ekaŋsowai ji Shemaia kɛ Matania kɛ Mikaia kɛ Zakur kɛ Asaf.

³⁶ Ewekumɛi ji Shemaia kɛ Azarel Malalai kɛ Gilalai kɛ Maai kɛ Netanel kɛ Yuda kɛ Hanani. Amɛ hu amɛnyiɛ sɛɛ, ni amɛhiɛ Nyɔŋmɔ gbɔmɔ David nibii ni akɛtswaa lalai aloo akɛkpãa lalai lɛ. Ezra, woloŋmalɔ kpanaa lɛ nyiɛ ku nɛɛ hiɛ.

³⁷ Amɛtsɔ̃ Nubu Agbo lɛ he; ni amɛtee amɛhiɛ tɛ̃ɛ kɛyakwɔ atrakpoi ni akwɔɔ kɛyaa David maŋ lɛ mli lɛ. Amɛkwɔ yɛ kwɔɔhe lɛ, ni amɛtsɔ̃ David we lɛ he kɛtee Nu Agbo lɛ he yɛ bokãgbɛ.

³⁸ Lalɔi ni daa Nyɔŋmɔ shi lɛ aku ni ji enyɔ lɛ tsɔ̃ abɛkugbɛ. Mi kɛ maŋ lɛ fã nyiɛ amɛsɛɛ yɛ gbogbo lɛ nɔ kɛtsɔ̃ Flɔɔnɔi Amɔ̃ɔ lɛ yiteŋ aahu kɛyashi Gbogbo Lɛkɛtɛɛ lɛ he.

³⁹ Wɔtse mli kɛtsɔ̃ Efraim Agbo lɛ kɛ Agbo Momo lɛ kɛ Loi Agbo lɛ he. Wɔyawa wɔdamɔ shi yɛ Bulɔi Agbo lɛ naa.

⁴⁰ No hewɔ lɛ, lalɔi akui enyɔ lɛ fɛɛ ni daa Nyɔŋmɔ shi lɛ kɛ hiɛnyiɛlɔi lɛ ateŋ mɛi fã ni fata mihe lɛ yashɛ Nyɔŋmɔ We lɛ.

⁴¹ Osɔfoi ni fata he ji Eliakim kɛ Maaseia kɛ Miniamin kɛ Mikaia kɛ Elioenai kɛ Zakaria kɛ Hanania ni amɛhiɛ tɛtɛrɛmantɛrɛi.

⁴² Mɛi ni nyiɛ amɛsɛɛ ji Maaseia kɛ Shemaia kɛ Eleazar kɛ Uzi kɛ Yohanan kɛ Malia kɛ Elam kɛ Ezer. Yezrahia kɛ elalɔi aku lɛ la waa diɛŋtsɛ.

⁴³ Nakai gbi lɛ amɛshã shãa afɔlei babaoo, ni amɛnyã, ejaakɛ Nyɔŋmɔ ehã amɛmii eshɛ amɛhe waa naakpa. Yei kɛ gbekɛbii lɛ hu nyãnyãa waa bɔ ni anu nyamɔ ni anyãa yɛ Yerusalɛm lɛ he yɛ shɔŋŋ tete.

Ato gbɛjianɔ ahã jamɔ yɛ Sɔlemɔ we lɛ

⁴⁴ Nakai gbi lɛ nɔ nɔŋŋ lɛ, afamɔ hii komɛi ato nitoohei lɛ anɔ: nitoohei nɛɛ ji hei ni akɛ nɔwomɔ afɔlei kɛ klɛŋklɛŋ yibii afɔlei lɛ kɛ nibii amlijai nyɔŋma mli ekomekome lɛ toɔ. Afamɔ hii nɛɛ koni amɛbua ŋmɔji ni yɔɔ maji lɛ ahe lɛ amli nii lɛ amlijai nyɔŋma ni mla lɛ to lɛ naa amɛwo nitoohei lɛ amli amɛhã osɔfoi lɛ kɛ Levibii lɛ. Yuda shikpɔŋ lɛ nɔ bii na osɔfoi lɛ kɛ Levibii ni damɔɔ shi sɔmɔɔ lɛ ahe miishɛɛ;

⁴⁵ ejaakɛ osɔfoi lɛ kɛ Levibii lɛ ye hetsuumɔ mlai lɛ kɛ gbɛnai krokomɛi ni amɛNyɔŋmɔ lɛ to lɛ anɔ. Nakai nɔŋŋ lalɔi lɛ kɛ agbonaakwɛlɔi lɛ tsu amɛgbɛnaanii tamɔ bɔ ni Maŋtsɛ David kɛ ebi Solomon wo kitã ni afee lɛ.

⁴⁶ Ejaakɛ Maŋtsɛ David kɛ Lalatsɛ Asaf yinɔ beebe ato lalɔi lɛ ahiɛnyiɛlɔ; ni amɛla yijiemɔ kɛ shidaa lalai amɛhã Nyɔŋmɔ.

⁴⁷ Zerubabel yinɔ kɛ Nehemia yinɔ lɛ, Israelbii fɛɛ hãa nikeenii daa gbi, ni akɛkwɛɔ lalɔi lɛ kɛ agbonaakwɛlɔi lɛ. Maŋ lɛ jieɔ Levibii lɛ agbɛfaŋnɔ amɛfɔ̃ɔ shi; ni Levibii lɛ hu jieɔ nɔ ni ji Aaronbii lɛ agbɛfaŋnɔ amɛfɔ̃ɔ shi amɛhãa amɛ.