Nehemia 11 - ŊMALƐ KRƆŊKRƆŊ LƐ

Mɛi ni hi Yerusalɛm lɛ

¹ Maŋbii lɛ kɛ onukpai lɛ hi Yerusalɛm, ni maŋbii ni eshwɛ lɛ fɔ̃fɔ̃ɔ oshikii koni akɛtao mɔ kome yɛ mɛi nyɔŋma fɛɛ mɛi nyɔŋma ateŋ koni ebahi Yerusalɛm, maŋ krɔŋkrɔŋ lɛ mli, koni mɛi nɛɛhu ni eshwɛ lɛ ayahi maji krokomɛi lɛ amli.

² Maŋbii lɛ jie hii fɛɛ ni here amɛhe akɛ amɛaahi Yerusalɛm lɛ yi.

³ Yuda maji lɛ amli lɛ, mɔ fɛɛ mɔ hi lɛ diɛŋtsɛ emaŋ yɛ shikpɔŋ lɛ nɔ: Israelbii, kɛ osɔfoi kɛ Levibii kɛ Sɔlemɔ we sɔ̃ɔlɔi kɛ Solomon tsuji abii lɛ.

⁴ Yuda shikpɔŋ lɛ nɔ onukpai komɛi hi Yerusalɛm. Amɛteŋ mɛi komɛi lɛ Yudabii ji amɛ, ni mɛi komɛi hu Benyaminbii ni. Yudabii lɛ ateŋ mɛi komɛi ji Ataia ni ji Uzia bi, Zakaria bi lɛ. Eseshi mli mɛi krokomɛi ji Amaria kɛ Shefatia kɛ Mahalalel ni jɛ Perez weku lɛ mli lɛ.

⁵ Yudabii krokomɛi ji Maaseia, Baruk bi lɛ ni eji Kol-Hoze nabi lɛ. Eseshi mli bii krokomɛi ji Hazaia kɛ Adaia kɛ Yoiarib kɛ Zakaria, Yuda bi Shela shwie lɛ.

⁶ Perizbii fɛɛ ni hi Yerusalɛm lɛ ayibɔ feɔ mɛi ohai ejwɛ kɛ nyɔŋmai ekpaa kɛ kpaanyɔ; hii kãkãlɔi sɔŋŋ ji amɛ fɛɛ.

⁷ Benyaminbii lɛ ekomɛi ji Salu, Meshulam bi lɛ ni eji Yoed nabi lɛ. Eseshi lɛ mli mɛi krokomɛi hu ji Pedaia kɛ Kolaia kɛ Maaseia kɛ Itiel kɛ Yeshaia.

⁸ Salu seshi lɛ mli mɛi komɛi hu ji Gabai kɛ Salai. Benyaminbii ni hi Yerusalɛm lɛ fɛɛ naa shiɔ mɛi ohai nɛɛhu kɛ nyɔŋmai enyɔ kɛ kpaanyɔ.

⁹ Yoel, Zikri bi lɛ, ji amɛhiɛnyiɛlɔ; ni Yuda, Hasenua bi lɛ, ji esɛɛmɔ yɛ maŋ lɛ mli.

¹⁰ Osɔfoi lɛ ateŋ mɛi komɛi ji Yedaia, Yoiarib bi, kɛ Yakin.

¹¹ Kɛ Seraia, Hilkia bi ni ji Meshulam nabi lɛ. Eseshi lɛ mli mɛi komɛi ji Ahitub, mɔ ni ye Osɔfonukpa yɛ Nyɔŋmɔ We lɛ.

¹² Amɛnyɛmimɛi lɛ ayibɔ ohai kpaanyɔ kɛ nyɔŋmai enyɔ kɛ enyɔ sɔmɔ yɛ Sɔlemɔ we lɛ. Mɔ kroko hu ji Adaia, Yeroham bi lɛ ni ji Pelaia nabi lɛ. Eseshi lɛ mli mɛi komɛi ji Amzi kɛ Zakaria kɛ Pashur kɛ Malkiya.

¹³ Gbɔmɛi nɛɛ ateiaŋ mɛi ohai enyɔ kɛ nyɔŋmai ejwɛ kɛ enyɔ fee wei amli onukpai. Ekomɛi ji Amashsai Azarel bi ni eji Ahazia nabi lɛ. Eseshi lɛ emli mɛi komɛi ji Meshilemot kɛ Imer.

¹⁴ Enyɛmimɛi lɛ hii kãkãlɔi sɔŋŋ ni amɛyibɔ ji oha kɛ nyɔŋmai enyɔ kɛ kpaanyɔ. Mɔ ni kwɛɔ amɛnɔ ji Zabdiel, Gedolim bi lɛ.

¹⁵ Levibii lɛ ji Shemaia, Hashub ni ji, Azrikam nabi lɛ. Eseshi lɛ mli mɛi komɛi ji Hashabia Buni.

¹⁶ Shabetai kɛ Yozabad ji Levi onukpai lɛ ateŋ mɛi ni kwɛɔ Nyɔŋmɔ We lɛ kpo nɔ gbɛ nitsumɔ lɛ nɔ.

¹⁷ Mɛi komɛi hu ji Matania, Mika bi ni ji Zabdi nabi mɔ ni eji Asaf shwie lɛ. Lɛ enyiɛ lalɔi lɛ ahiɛ kɛlaa kɛdaa Nyɔŋmɔ shi lɛ. Mɔ ko hu ji Bakbukia ni ji Matania sɛɛmɔ kɛ Abda, Shamua bi lɛ ni ji Galai ni ji Yedutun nabi lɛ.

¹⁸ Levibii fɛɛ ni hi Yerusalɛm, Maŋ Krɔŋkrɔŋ lɛ mli lɛ ayibɔ ji ohai enyɔ kɛ nyɔŋmai kpaanyɔ kɛ ejwɛ.

¹⁹ Agbonaabulɔi lɛ ji Akub kɛ Talmon kɛ amɛnyɛmimɛi lɛ. Amɛyibɔ ji mɛi oha kɛ nyɔŋmai kpawo kɛ enyɔ.

²⁰ Israelbii ni eshwɛ lɛ kɛ osɔfoi lɛ kɛ Levibii lɛ hi Yuda maji lɛ fɛɛ amli, mɔ fɛɛ mɔ yɛ lɛ diɛŋtsɛ eshikpɔŋ nɔ.

²¹ Shi mɛi ni sɔ̃mɔɔ yɛ Sɔlemɔ we lɛ hi Ofel. Amɛnukpai ji Ziha kɛ Gishpa.

²² Mɔ ni kwɛ Levibii ni hi Yerusalɛm lɛ nɔ ji Uzi, Bani bi Hashabia bi Matania bi Mika bi lɛ. Ejɛ Asaf bii alalatsɛmɛi ni kwɛɔ Nyɔŋmɔ We lɛ nitsumɔ lɛ nɔ lɛ ateŋ.

²³ Ejaakɛ maŋtsɛ lɛ ewo kitã yɛ lalatsɛmɛi lɛ ahewɔ, ni ato amɛgbɛnaa afɔ̃ shi kɛhã gbi fɛɛ gbi nɔ nitsumɔ.

²⁴ Petahia, Meshezabel ni jɛ Zera tsɛmɛi awe lɛ kɛ Yuda weku lɛ mli lɛ bi lɛ ji Persia Maŋtsɛ lɛ ŋaawolɔ yɛ sane fɛɛ sane ni kɔɔ maŋ lɛ he lɛ mli.

Maji bibii kɛ ewuji krokomɛi lɛ amli bii

²⁵ Yɛ akrowai kɛ humɔhei amlihilɛ hewɔ lɛ, Yudabii lɛ ateŋ mɛi komɛi hi Kiriat-Arba kɛ ehe akrowai lɛ amli, kɛ Dibon kɛ ehe akrowai lɛ amli, kɛ Yekabzeel kɛ ehe akrowai lɛ amli.

²⁶ Amɛteŋ mɛi komɛi hu hi Yeshua, Molada, kɛ Bet-Pelet

²⁷ kɛ Hazar-Shual kɛ Beersheba kɛ ehe akrowai lɛ amli,

²⁸ kɛ Ziklag kɛ Mekona kɛ ehe akrowai lɛ amli.

²⁹ Mɛi komɛi hu hi En-Rimon kɛ Zora kɛ Yarmut

³⁰ kɛ Zanoa kɛ Adullam kɛ amɛhe akrowai lɛ amli. Amɛhi Lakish kɛ ehumɔhei lɛ kɛ Azeka kɛ ehe akrowai lɛ amli.

³¹ Benyaminbii lɛ hi Geba, Mikmash, Aia kɛ Betel kɛ ehe akrowai lɛ ni ji

³² Anatot kɛ Nob kɛ Anania amli.

³³ Mɛi komɛi hu hi Hazor kɛ Rama kɛ Gitaim

³⁴ kɛ Hadid kɛ Zeboim kɛ Nebalat,

³⁵ kɛ Lod kɛ Ono ni ji Ŋaalɔi Ajɔɔ lɛ mli.

³⁶ Levibii akui lɛ ekomɛi ni hi Yuda shikpɔŋ lɛ nɔ lɛ kɛ amɛhe yabɔ Benyaminbii lɛ ahe.