Nehemia 10 - ŊMALƐ KRƆŊKRƆŊ LƐ

¹ Mɔ klɛŋklɛŋ ni sɔo naa lɛ ji Nehemia, amralo lɛ, ni ji Hakalia bi lɛ, ni lɛ esɛɛ lɛ Zedekia. Mɛi komɛi hu ni kɛ amɛnine wo shishi nɛ: osɔfoi

² Seraia, Azaria, Yeremia,

³ Pashur, Amaria, Malkia,

⁴ Hatush, Shebania, Maluk,

⁵ Harim, Meremot, Obadia,

⁶ Daniel, Gineton, Baruk,

⁷ Meshulam, Abia, Miyamin

⁸ Maazia, Bilgai, kɛ Shemaia.

⁹ Levibii lɛ ji: Yeshua, Azania bi lɛ, Binui ni jɛ Henadad tsɛmɛi awe lɛ, Kadmiel,

¹⁰ Shebania, Hodia, Kelita, Pelaia, Hanan

¹¹ Mika, Rehob, Hashabia

¹² Zakur, Sherebia, Shebania

¹³ Hodia, Bani kɛ Beninu. Mɛnɛɛmɛi ji Levibii kɛ amɛnyɛmimɛi lɛ.

Hiɛnyiɛlɔi

¹⁴ Parosh, Pahat-Moab,

¹⁵ Elam, Zatu, Bani, Bunui, Azgad, Bebai,

¹⁶ Adonia, Bigewai, Adin,

¹⁷ Ater, Hezekia, Azur

¹⁸ Hodia, Hashum, Bezai,

¹⁹ Harif, Anatot, Nebai,

²⁰ Magpiash, Meshulam, Hezir

²¹ Meshezabel, Zadok, Yadua,

²² Pelatia, Hanan, Anaia,

²³ Hoshea, Hanania, Hashub,

²⁴ Halohesh, Pilha, Shobek,

²⁵ Rehum, Hashabna, Maseia,

²⁶ Ahia, Hanan, Anan,

²⁷ Maluk, Harim kɛ Baana.

Kpãŋmɔ lɛ

²⁸ Wɔ, Israelbii, osɔfoi kɛ Levibii kɛ agbonaakwɛlɔi kɛ lalatsɛmɛi kɛ Sɔlemɔ we sɔ̃ɔlɔi kɛ mɛi fɛɛ hu ni yɛ Nyɔŋmɔ Mla lɛ toiboo naa lɛ amɛtse amɛhe yɛ shikpɔji lɛ anɔ bii lɛ ahe lɛ, wɔ kɛ wɔŋamɛi kɛ wɔbii hii kɛ yei ni hiɛ efã,

²⁹ wɔ kɛ wɔnyɛmimɛi ni ji wɔhiɛnyiɛlɔi lɛ efee ekome kɛmiikã kitã. Kɛ wɔku mli lɛ, efee loomɔ ehã wɔ. Wɔmiikã kitã akɛ wɔbaaye Nyɔŋmɔ mla lɛ ni atsɔ̃ Nyɔŋmɔ tsulɔ Mose nine nɔ awo lɛ nɔ. Wɔbaajwɛŋ nɔ ni wɔye Yehowa, wɔNuŋtsɔ lɛ, kitãi kɛ emlai kɛ ekpɔi lɛ fɛɛ anɔ.

³⁰ Wɔkɛ wɔbiyei haŋ shikpɔŋ lɛ nɔ bii lɛ gbãlã, ni asaŋ wɔŋɔŋ amɛbiyei wɔhaŋ wɔbihii.

³¹ Kɛji shikpɔŋ lɛ nɔ bii lɛ kɛ guɔnii loo abele ba hɔ̃ɔmɔ yɛ hejɔɔmɔ gbi lɛ nɔ loo gbi krɔŋkrɔŋ lɛ eko nɔ lɛ wɔheŋ. Asaŋ daa afi nɔ ni ji kpawo lɛ nɔ lɛ, wɔhuŋ wɔŋmɔji lɛ, ni nyɔmɔ fɛɛ nyɔmɔ ni ahiɛ wɔ lɛ wɔkɛbaake.

³² Asaŋ wɔmiikã kitã akɛ daa afi lɛ, wɔɔhã jwiɛtɛi talenta kome mlijaa etɛ̃ mli ekome yɛ sɔ̃ɔmɔ ni asɔ̃mɔɔ yɛ wɔNyɔŋmɔ lɛ we lɛ kɛ nibii krokomɛi hu hewɔ.

³³ Nibii nɛɛ ji aboloo ni akɛmaa Nyɔŋmɔ hiɛ daa gbi lɛ, kɛ shãa afɔle lɛ kɛ hejɔɔmɔ gbii lɛ anɔ nii lɛ kɛ nyɔji hei anɔ afɔlei lɛ kɛ gbii juji ni ato lɛ anɔ nii lɛ kɛ nii krɔŋkrɔŋi lɛ kɛ esha afɔlei lɛ ni akɛkpãtã ahãa Israel lɛ. Wɔbaahã kɛhã wɔNyɔŋmɔ lɛ nitsumɔi lɛ fɛɛ.

³⁴ Wɔ ni ji osɔfoi kɛ Levibii kɛ maŋbii lɛ, wɔfɔ̃fɔ̃ɔ oshiki yɛ laihamɔ hewɔ, koni ato naa akɛba wɔNyɔŋmɔ lɛ we lɛ yɛ wɔtsɛmɛi awei lɛ anaa, yɛ bei ni ato lɛ amli daa afi, koni ashã yɛ Yehowa, wɔNyɔŋmɔ lɛ afɔleshãa latɛ lɛ nɔ, tamɔ bɔ ni aŋmã yɛ mla lɛ mli lɛ.

³⁵ Asaŋ wɔkɛ wɔŋmɔshi klɛŋklɛŋ nibaanii kɛ tso fɛɛ tso nɔ klɛŋklɛŋ yibii aaaba Yehowa we lɛ daa afi.

³⁶ Tamɔ bɔ ni aŋmã yɛ Mla lɛ mli lɛ, wɔkɛ wɔkromɔbihii kɛ wɔkooloi akromɔbii hu kɛ wɔtsinai akromɔbii kɛ wɔtoi akromɔbii aaaba wɔNyɔŋmɔ lɛ we lɛ wɔkɛbahã osɔfoi lɛ ni sɔ̃mɔɔ yɛ jɛi lɛ.

³⁷ Wɔkɛ mã ni ana yɛ abele ni akpa klɛŋklɛŋ lɛ mli kɛ tso fɛɛ tso klɛŋklɛŋ yibii, kɛ klɛŋklɛŋ wain kɛ klɛŋklɛŋ mu aaaba abahã osɔfoi lɛ koni akɛwo wɔNyɔŋmɔ lɛ we lɛ nitoohe lɛ mli. Wɔkɛ wɔŋmɔshi nibaanii amlijai nyɔŋma mli ekome kome baahã Levibii lɛ, ejaakɛ amɛ ji mɛi ni baŋɔɔ nibaanii amlijaa nyɔŋma mli ekome kome lɛ yɛ akrowai ni wɔhuɔ yɛ mli lɛ fɛɛ mli lɛ.

³⁸ Kɛ Levibii lɛ miihe nibii amlijaa nyɔŋma mli ekomekome lɛ, osɔfoi lɛ ni ji Aaron bii lɛ afata amɛhe. Levibii lɛ kɛ mlijaa nyɔŋma mli ekomekome lɛ hu mlijaa nyɔŋma mli ekome aba wɔNyɔŋmɔ lɛ we lɛ ni akɛwo nitoohe lɛ mli.

³⁹ Ejaakɛ esa akɛ Israelbii lɛ kɛ Levibii lɛ kɛ abele kɛ wain hee kɛ mu lɛ aya ayawo nitoohe lɛ mli he ni he krɔŋkrɔŋ lɛ nibii lɛ kɛ osɔfoi lɛ ni sɔ̃mɔɔ lɛ kɛ agbonaakwɛlɔi lɛ kɛ lalatsɛmɛi lɛ yɔɔ lɛ. Wɔŋmɛŋ wɔNyɔŋmɔ lɛ we lɛ he nitsumɔ lɛ he wɔfɔŋ shi dɔŋŋ.