Nehemia 1 - ŊMALƐ KRƆŊKRƆŊ LƐ

Nehemia hao yɛ Yerusalɛm

¹ Nehemia, Hakalia bi lɛ, saji nɛ. Yɛ Kislev nyɔŋ lɛ nɔ yɛ afi ni ji nyɔŋmai enyɔ lɛ nɔ lɛ, miyɛ Susa, maŋtsɛmaŋ lɛ mli,

² ni Hanani ni ji minyɛmimɛi lɛ ateŋ mɔ kome lɛ kɛ hii komɛi jɛ Yuda ba. Mibi amɛ Yudafoi ni aŋɔ amɛ nom lɛ ateŋ mɛi ni hiɛ kã lolo lɛ ahe sane kɛ Yerusalɛm hu he sane.

³ Amɛto he akɛ, “Mɛi ni aŋɔ amɛ nom lɛ ateŋ mɛi ni hiɛ kã lolo ni yɔɔ shikpɔŋ lɛ nɔ lɛ miina amanehulu kpele, ni amɛhiɛ eshwie shi. Yerusalɛm gbogbo lɛ akumɔ ashwie shi, ni enaa agboi lɛ ashã.

⁴ Be ni minu wiemɔ nɛɛ miho mita shi, ni mifo. “Miye ŋkɔmɔ gbii abɔ, ni mihi ŋmãa. Misɔle mikpa Nyɔŋmɔ fai,

⁵ ni mikɛɛ, ‘Oo Yehowa, Naa Nyɔŋmɔ ni yɔɔ ŋwɛi, ni oda ni ohe yɔɔ gbeyei! Okɛ osuɔmɔ ni tsakeee yeɔ kpãŋmɔ ni okɛ mɛi ni sumɔɔ bo, ni amɛyeɔ okitãi lɛ anɔ lɛ kpãŋɔ lɛ nɔ, ni okɛtsɔ̃ɔ akɛ anɔkwafo ji bo.

⁶ Kwɛmɔ, ni oka otoi ohã fai ni mi, otsulɔ, mikpaa bo nyɔɔŋ kɛ shwane mihãa otsuji Israelbii lɛ. Miijaje akɛ wɔ, Israelbii, wɔfee esha wɔshi bo; ni mi kɛ mitsɛwe lɛ fɛɛ yeɔ fɔ yɛ enɛ mli.

⁷ Wɔfee efɔŋ ni naa wa naakpa wɔshi bo, ejaakɛ wɔyeko kitãi kɛ akpɔi kɛ mlai ni owo kɛtsɔ̃ otsulɔ Mose nɔ lɛ anɔ.’

⁸ Kaimɔ wiemɔ ni okɛ otsulɔ Mose wie akɛ, ‘Kɛji nyɛyeee mi anɔkwa lɛ, magbɛ nyɛ mashwã maji anɔ,

⁹ shi kɛji nyɛkpale kɛba miŋɔɔ, ni nyɛye mikitãi lɛ anɔ lɛ, kɛji mɛi ni agbɛ ashwã lɛ yaje jeŋ naagbeehe tete lɛ, mabua amɛnaa kɛaajɛ jɛi tɔ̃ɔ, ni makpala amɛ kɛaaba he ni mito ni aja mi yɛ lɛ.’

¹⁰ “Mɛnɛɛmɛi ji otsuji kɛ omaŋ ni okɛ ohewalɛ kpeteŋkple lɛ kɛ nyɛmɔ ekpɔ̃ lɛ.

¹¹ Oo Nuŋtsɔ, ka otoi ohã fai ni otsulɔ kpaa bo lɛ. Ka toi ohã fai ni otsuji ni sumɔɔ akɛ amɛshe bo gbeyei lɛ kpaa bo lɛ. Hã otsulɔ aye omanye ŋmɛnɛ gbi nɛɛ, ni hã maŋtsɛ lɛ ana mi mɔbɔ.” Nɛkɛ bei nɛɛ amli lɛ, maŋtsɛ lɛ dãawolɔ ji mi.