Nahum 3 - ŊMALƐ KRƆŊKRƆŊ LƐ

¹ Kpoo hã maŋ ni shwieɔ lá shi ni eyi obɔ̃ kɛ amale kɛ yiwalɛ kɛ mɛi anii ni ayaha.

² Bo toi! Okpɔŋɔ gwaomɔ kpãa miigbɛɛ, tayaa shwiilii anaji miigbɛɛ; okpɔŋɔi esha foi, ni tayaa shwiilii miihɛlɛ shi!

³ Okpɔŋɔnɔtalɔi ewo foi kɛmiiba, klante miikpɛlɛ nyramnyram, ni akplɔ miikpɛlɛ tamɔ srawa! Gbohii bua shi tsãa; mɛi ni enyɔnyɔɔ lɛ, babaoo, amɛyi fa fe nine, mɛi miitɛrɛtrɛɛ amɛ!

⁴ Fɛɛ jɛ Nineve ajwamãŋbɔɔ. Ehe yɛ fɛo bɔ ni ekɛ ehe fɛo duɔ maji kɛ gbɔmɛi ni ekɛyeɔ amɛ nyɔŋ.

⁵ Yehowa, Tatsɛ lɛ, kɛɛmɔ ji, “Naa, Nineve, mi kɛ bo ena! Mibawo ohiɛ mama nɔ, ni mahã maji ana oyayaiaŋ; amɛbaana ohiɛshishwiemɔ.

⁶ Mibanyaŋe bo, ni matsi muji mashwie onɔ, ni mɛi aaakwɛ bo gãa.

⁷ Mɛi fɛɛ ni baana bo baasu amɛhe kɛya sɛɛ. Amɛbaakɛɛ akɛ, ‘Nineve etsɔ̃ amaŋfɔ̃! Namɔ yeɔ lɛ ŋkɔmɔ koo! Nɛgbɛ mana mɛi aaajɛ abashɛje emii?’ ”

⁸ Nineve, ani ohi fe Tebes, Nilo Faa lɛ toi maŋ lɛ ni nu efo ehe sa kɛbɔle lɛ kɛkpe, ni ŋshɔ ewaje lɛ kɛfo ehe, ni nu etsɔ̃ gbogbo ehã lɛ lɛ lo?

⁹ Tebes na hewalɛ kɛjɛ Kush kɛ Ijipt fɛɛ dɛŋ, nakai ehewalɛ lɛ anyɛɛɛ naa adamɔ. Putbii kɛ Libiabii fɛɛ ye bua lɛ.

¹⁰ Kɛ̃lɛ ana aŋɔ lɛ nom hu, ni akɛ emli bii abifabii tswiatswia shi, ni agbɛgbɛɛ amɛ ashwãshwãa gbɛjegbɛi lɛ atoii fɛɛ. Emli hiɛnaanɔmɛi lɛ, amɛhenyɛlɔi lɛ fɔ̃ amɛnɔ oshiki kɛja amɛ hã amɛhe, ni awo amɛ gboklɛ, ni akpala amɛ kɛtee nomŋɔɔ mli.

¹¹ Nineve, nakai bo hu obaatɔ dãa, ni ohiɛ baaha; ni obaatao abobaahe kɛjo ohenyɛlɔ lɛ naa foi.

¹² Omɔji lɛ, naa, amɛbaatsɔ̃mɔ agbãmitsei ni amɛklɛŋklɛŋ yibii etsu yɛ amɛnɔ. Hosomɔ nɛkɛ ni aaahoso tsei lɛ, yibii lɛ baakpala ashwie yelɔ lɛ daaŋ.

¹³ Naa, otabilɔi lɛ yei sɔŋŋ ji amɛ. Oshikpɔŋ lɛ nɔ maji lɛ anaa agboi lɛ anaa kãmɔ hã ohenyɛlɔi lɛ. La baashã ogboi nɛɛ asɛɛ adabaŋi lɛ.

¹⁴ Nyɛyɛa numɔ nu nyɛtoa be ni abaasa nyɛmaŋ lɛ yi lɛ; nyɛwajeɔ nyɛmɔji lɛ; nyɛnaa su ni akɛfoɔ brikisi lɛ, ni asaa brikisifoo adeka lɛ ato.

¹⁵ Bɔ fɛɛ bɔ ni fee lɛ nyɛbaanyɔnyɔɔ, kɛjeee yɛ la mli lɛ no lɛ yɛ ta mli. Abaaplene nyɛ tamɔ baalabii kpãtãa ŋmɔshinii ahiɛ. Nyɛhãa nyɛyi afaa tamɔ baalabii, nyɛyi afaa tamɔ otukpɛi.

¹⁶ Nyɛhã nyɛteiaŋ jarayelɔi ayi efa fe ŋwɛi ŋulamii tete! Shi bɛ ŋmɛnɛ lɛ amɛnɔ egbɔ tamɔ baalabii ni bayeɔ nii ni amɛflikiɔ kɛyaa lɛ?

¹⁷ Nyɛlumɛi lɛ tamɔ agãi, ni nyɛtsɛmɛi lɛ tamɔ baalabii ni basɔ̃mɔɔ afabaŋi ahe gbi nɔ ni fɛi miiye. Kɛji hulu lɛ te shi pɛ amɛfliki kɛtee, ni aleee he ni amɛyaa.

¹⁸ Ao! Asiria Maŋtsɛ, omraloi lɛ egboi; ni wɔ enyɔ ohiɛnaanɔbii lɛ anɔ. Agbɛ owebii lɛ ashwã gɔji lɛ anɔ, ni mɔ ko kwraa bɛ ni buaa amɛnaa.

¹⁹ Pilamɔ ni opila lɛ bɛ tsabaa; ni ofaji lɛ ehiŋ tsamɔ. Mɛi fɛɛ ni nuɔ ohiɛkpãtãmɔ lɛ he lɛ tswaa amɛdɛ̃ amɛshwieɔ onɔ kɛ nyamɔ; ejaakɛ namɔ po ni yɔɔ ni oyeko lɛ sane fɔŋ dã?