Nahum 1 - ŊMALƐ KRƆŊKRƆŊ LƐ

¹ Nineve shigbeemɔ he gbalɛ nɛɛ, ajie atsɔ̃ɔ Gbalɔ Nahum, Elkoshnyo lɛ.

Yehowa mli efu Nineve

² Yehowa lɛ Nyɔŋmɔ ni yeɔ awuŋã ni, ni asaŋ etɔɔ owele. Oweletɔlɔ ji Yehowa, ni emlifu naa wa. Yehowa tɔɔ owele yɛ mɛi ni kɛ lɛ tswaa anɔ, ni ekɛ emlifu shakãa ehenyɛlɔi anɔ.

³ Yehowa mli fuuu mra, ni ehewalɛ da kpele; ehãaa tɔ̃lɔ aŋɔ ehe aye. Ahum kɛ lasuogbele teɔ shi yɛ he ni Yehowa etsɔ̃ kɛho, ni enaneshi mlu ji atatui.

⁴ Eŋãa ŋshɔ yi, ni emiɔ; ehãa fai fɛɛ miɔ. Bashan kɛ Karmel gɔji lɛ anɔ ŋãlãa, ni Lebanon ŋã floŋŋ lɛ hu ŋãlãa.

⁵ Gɔji hosoɔ yɛ ehiɛ, gɔ̃ŋkpɔi lɛ sereɔ: Shikpɔŋ lɛ hiɛ kpãtãa yɛ ehiɛ, ni je lɛ kɛ emli bii fɛɛ hu ahiɛ kpãtãa.

⁶ Namɔ aaanyɛ emlila naa adamɔ? Namɔ aaanyɛ emlifu ni naa wa lɛ naa ekpee? Emlifu tsɛ̃ɔ kɛbaa tamɔ la, ni efɛlɛɔ tɛsai amli.

⁷ Yehowa hi, etsɔ̃ɔ teemɔhe yɛ amanehulu be mli, ni ebaa mɛi ni baa lɛ abo lɛ ayi.

⁸ Shi ebaa tamɔ faa ni eje ŋã, ni ebakpãtãa ehenyɛlɔi ahiɛ; etiuɔ ehenyɛlɔi kɛyashiɔ egbeɔ amɛ.

⁹ Mɛɛ shi nyɛte nyɛwo Yehowa lɛ? Ebaakpãtã nyɛhiɛ kwraa. Etɔɔɔ owele shii enyɔ.

¹⁰ Abaashã amɛ wɛɛ tamɔ ŋmei ni eloloo, loo gbetseli gbiŋ.

¹¹ Nineve, ani mɔ ko jɛɛɛ omli ni jwɛŋ Yehowa he efɔŋ, ni to ehe yiŋ fɔŋ?

¹² Israelbii, nɔ ni Yehowa kɛɔ nɛ, “Yɛ mli akɛ Asiriabii lɛ ayi fa po nɛ, shi amɛhiɛ baakpãtã; ni amɛsɛɛ baafo. Mipiŋ nyɛ kɛho; mipiŋŋ nyɛ dɔŋŋ.

¹³ Agbɛnɛ, apã lɛ ni Asiria kɛfɔ̃ nyɛkuɛ lɛ mibakumɔ mli; ni mibatserɛ kpãai ni fimɔ nyɛ lɛ amli.”

¹⁴ Kitã ni Yehowa ewo yɛ Asiria he ji enɛ, “Onaŋ shwiei ni baahã akai ogbɛi. Makumɔ sũ amãgãi kɛ dade amãgãi lɛ ni yɔɔ ojemawɔji lɛ awei lɛ amli lɛ. Masaa gbonyobu mato bo, Asiria ejaakɛ ohiii kwraa.”

¹⁵ Naa, bɔfo ko miiba yɛ gɔji lɛ anɔ kɛ sane kpakpa; eeba kɛ toiŋjɔlɛ sane. Yudabii, nyɛyea nyɛgbii juji lɛ; ni Nyɔŋmɔ gbɛfaŋnii ni nyɛwo he shi lɛ, nyɛkɛbahãa lɛ. Yitsoŋwalɔi lɛ baŋ abatuaŋ nyɛ dɔŋŋ; akpãtã amɛhiɛ butuu.