Mika 7 - ŊMALƐ KRƆŊKRƆŊ LƐ

Fitemɔ ni Israel efite

¹ Kpoo hã mi! Mitsɔ̃ tamɔ mɔ ko ni hɔmɔ miiye lɛ ni eetao tsoyibii loo wainyibii ko eye, ejaakɛ akpa wainyibii kɛ agbãmii ni ŋɔɔ lɛ fɛɛ atã, ni shao ko bɛ ni aaana aye; agbãmi hee ni mitsui shweɔ lɛ eko bɛ.

² Gbɔmɔ Nyɔŋmɔ gbeyeishelɔ ko bɛ shikpɔŋ lɛ nɔ dɔŋŋ; mɔ ko bɛ ni yeɔ Nyɔŋmɔ anɔkwa. Mɔ fɛɛ mɔ miitao akɛ ena hegbɛ ni eshwie lá shi. Mɔ fɛɛ mɔ miigbɔbi enaanyo.

³ Amɛhe esa kɛ efɔŋfeemɔ, ni amɛfeɔ lɛ kɛ ŋaa. Lumɛi kɛ kojolɔi lɛ heɔ nyɔɔŋnii. Nɔ fɔŋ ni yɔɔ hiɛnaanɔ gbɔmɔ tsuiŋ lɛ, ejeɔ enaa; kɛkɛ lɛ amɛ fɛɛ amɛkpãŋ amɛto.

⁴ Mɔ ni kɛɛ ehi fe fɛɛ yɛ amɛteŋ lɛ, etamɔ kpitikpiti ŋmei, ni mɔ ni kɛɛ anɔkwafo ji lɛ fe fɛɛ lɛ, ŋmei afabaŋ po hi fe lɛ. Shi gbi ni Nyɔŋmɔ baagbala amɛtoi lɛ eshɛ taakɛ ebɔ amɛ kɔkɔ kɛtsɔ̃ egbalɔi lɛ anɔ lɛ, agbɛnɛ amɛ jijaa.

⁵ Kaahe onaanyo oye; ni kɛ ohiɛ akafɔ̃ oshieŋtsɛ nɔ. Yoo ni kãa osɛɛ tete po lɛ, jwɛŋmɔ he jogbaŋŋ dani okɛɛ lɛ nɔ ko.

⁶ Ejaakɛ binuu ebuuu etsɛ, biyoo teɔ shi woɔ enyɛ; ni shaayoo teɔ shi woɔ eshaayoo. Gbɔmɔ henyɛlɔi ji lɛ diɛŋtsɛ eshĩa teŋ bii.

⁷ Shi mi lɛ, makwɛ Yehowa gbɛ; mamɛ miyiwalaheremɔ Nyɔŋmɔ lɛ; ni miNyɔŋmɔ lɛ aaabo mi toi.

Yehowa kɛ Yiwalaheremɔ eba

⁸ Ao mihenyɛlɔ, kaaye mi yɔɔ. Kɛ migbee shi lɛ, mibate shi ekoŋŋ; kɛ duŋ wo mi lɛ, Yehowa aaatsɔ̃ la ahã mi.

⁹ Makplɛ̃ Yehowa mli ni efu mi lɛ nɔ, ejaakɛ mifee esha mishi lɛ; mamɛ kɛyashi eeefã mihe, ni eeebu mi bem. Eeejie mi kɛaaba la hiɛ ni mana ekpɔmɔ lɛ.

¹⁰ Kɛkɛ lɛ mihenyɛlɔ mɔ ni ebi mi akɛ, “Nɛgbɛ Yehowa, oNyɔŋmɔ lɛ yɔɔ” lɛ? Aaana, ni ehiɛ aaagbo kpɔtɔɔ. Mihiŋmɛi aaana lɛ; agbɛnɛ aaanaanaa enɔ tamɔ blohuŋ ŋmɔtɔ.

¹¹ Yerusalɛmbii, be miiba ni aaasaa maŋ lɛ gbogboi lɛ atswa ni aaalɛɛ ehusui amli kɛaatee sɛɛ.

¹² Nakai be lɛ mli lɛ nyɛmimɛi lɛ aaaku amɛsɛɛ kɛaaba. Aaajɛ Asiria ni yɔɔ bokã lɛ kɛ Ijipt ni yɔɔ wuoyigbɛ lɛ kɛaaba. Amɛaajɛ Eufrate Faa lɛ he kɛ ŋshɔi anaa kɛ gɔji anɔ kɛaaba.

¹³ Shi shikpɔŋ lɛ aaatsɔ̃ shiaŋa yɛ enɔ bii lɛ anifɔ̃ɔjianii ni amɛfeɔ lɛ ahewɔ.

Yehowa aaana Israel mɔbɔ

¹⁴ Yehowa, feemɔ tookwɛlɔ ohã omaŋ lɛ, ni olɛ amɛ, maŋ ni bo diɛŋtsɛ ohala lɛ. Amɛyɛ ŋa kplanaa nɔ banee yɛ Gɔŋ Karmel lɛ yiteŋ, tsɛbelɛ shikpɔŋ ni baa nii bɔle amɛ kɛkpe. Hã ni amɛhi Bashan kɛ Gilead shikpɔŋ frɔ̃frɔ̃ lɛ nɔ; ni amɛye enɔ nii tamɔ blema ko lɛ.

¹⁵ Mafee naakpɛɛnii matsɔ̃ɔ amɛ tamɔ be ni mijie amɛ kɛjɛ Ijipt shikpɔŋ lɛ nɔ lɛ.

¹⁶ Maji lɛ aaana, ni yɛ amɛhewalɛ lɛ fɛɛ sɛɛ lɛ, amɛnijiaŋ aaaje wui. Amɛkɛ amɛnine aaato amɛnaabu ni amɛaatsimɔ amɛtoii.

¹⁷ Amɛaalɛmɔ shikpɔŋ su, ni amɛaawamɔ yɛ shikpɔŋ nɔ tamɔ onufu. Amɛaajɛ amɛmɔji lɛ amli amɛaaba kɛ hekpokpomɔ. Yehowa wɔNyɔŋmɔ lɛ he ŋmiŋmi aaamɔmɔ amɛ, ni amɛaashe bo gbeyei.

¹⁸ Nyɔŋmɔ ko bɛ ni kɛ esha faa tamɔ bo. Okuɔ ohiɛ ofɔ̃ɔ omaŋbii ni eshwɛ lɛ amlatɔ̃mɔ nɔ. Ohiɛɛɛ mlifu mli kɛyaaa naanɔ, ejaakɛ onaa mɔbɔnalɛ he tsui.

¹⁹ Oooku sɛɛ omusuŋ atsɔ̃ bo yɛ wɔhe. Okɛ onane aaashwishwia wɔnishaianii lɛ anɔ ni osherɛ oshwie ŋshɔ shishi bu kwɔŋkwɔŋ lɛ mli.

²⁰ Obaajie onɔkwayeli kɛ osuɔmɔ ni tsakeee lɛ kpo otsɔ̃ɔ omaŋ lɛ, ni ji Abraham kɛ Yakob shwiei lɛ tamɔ bɔ ni owo wɔtsɛmɛi lɛ ashi blema bei lɛ amli beebe lɛ.