Mika 5 - ŊMALƐ KRƆŊKRƆŊ LƐ

¹ Yerusalɛmbii, nyɛbuaa nyɛtabilɔi anaa! Asa wɔyi! Atua Israelbii ahiɛnyiɛlɔ lɛ!

Nyɔŋmɔ wo nɔyelɔ ni baajɛ Betlehem he shi

² Yehowa kɛɛ, “Betlehem Efrata, maji bibii fe fɛɛ ni yɔɔ Yuda shikpɔŋ lɛ nɔ lɛ ateŋ ekome ji bo, shi omli majie Israel nɔyelɔ kɛaajɛ. Nɔyelɔ nɛɛ weku kpãa aaajɛ blema beebe.”

³ No hewɔ lɛ, Yehowa aaaŋmɛɛ emaŋ lɛ he ehã amɛhenyɛlɔi lɛ kɛyashi beyinɔ ni yoofɔyoo lɛ aaafɔ ebinuu lɛ, ni enyɛmimɛi lɛ ateŋ mɛi ni eshwɛ ni yɔɔ nomŋɔɔ mli lɛ aaaku amɛsɛɛ kɛaaba amɛnyɛmɛi Israelbii lɛ aŋɔɔ.

⁴ Kɛ nɔyelɔ lɛ ba lɛ, eeeye emaŋ lɛ nɔ, ni eeelɛ amɛ kɛ hewalɛ ni jɛ Yehowa dɛŋ; eeeye nɔ kɛ agbojee hu ni ji Yehowa, eNyɔŋmɔ lɛ diɛŋtsɛ agbojee. Nɔyelɔ lɛ kɛ maŋbii lɛ aaahi shi shweshweeshwe, ejaakɛ aaakpɛ̃lɛ nɔ akɛ eje agbo yɛ je lɛ mli he fɛɛ he;

⁵ ni ekɛ hejɔlɛ aaaba. Kɛji Asiriabii lɛ aaabatua wɔshikpɔŋ lɛ, kɛji amɛaafite wɔmɔji ni buɔ wɔhe lɛ ni amɛaatsɔ̃ mli kɛho lɛ, no lɛ wɔɔtee hiɛnyiɛlɔi kãkãlɔi babaoo shi wɔwo amɛ.

Jiemɔ kɛ Toigbalamɔ

⁶ Amɛkɛ klante aaaye Asiria shikpɔŋ lɛ nɔ, Nimrod Shikpɔŋ lɛ. Amɛaahere wɔ kɛaajɛ Asiriabii lɛ adɛŋ, kɛji amɛba amɛbashimɔshimɔɔ shi yɛ wɔshikpɔŋ lɛ nɔ lɛ.

⁷ Israelbii ni aaashwɛ lɛ aaatamɔ ŋwɛi bɔ ni Yehowa hãa enyɔɔ maji pii anɔ lɛ. Mɛi ni aaashwɛ lɛ aaatamɔ futufuli ni shwãa jwɛfɔ nɔ. Amɛkɛ amɛhe aaafɔ̃ Yehowa nɔ, shi jeee gbɔmɔ adesa ko nɔ.

⁸ Israelbii ni aaashwɛ yɛ maji lɛ ateŋ lɛ aaatamɔ jata yɛ kooŋ kooloi ateŋ, aloo tamɔ jata oblanyo yɛ tookui ateŋ. Kɛji eegbɔbi kɛbote kooloi lɛ ateŋ lɛ, ehuruɔ eyiɔ amɛnɔ, ni etserɛɔ amɛmli, ni jielɔ ko bɛ.

⁹ Israelbii lɛ aaaye amɛhenyɛlɔi lɛ anɔ kunim, ni amɛaakpãtã amɛ fɛɛ amɛhiɛ.

¹⁰ Yehowa kɛɛ, “Nakai be lɛ mli lɛ makpãtã okpɔŋɔi lɛ ahiɛ, ni mafite oshwiilii lɛ.

¹¹ Mafite maji ni yɔɔ oshikpɔŋ lɛ nɔ lɛ, ni makumɔ mɔji ni buɔ ohe lɛ mashwie shi.

¹² Makpãtã okunyaayelɔi lɛ ahiɛ, ni okɔmfo kome nɛkɛ eshwɛŋ haŋ bo.

¹³ Mafite omãgãi lɛ kɛ owɔŋtɛi lɛ, ni ojaŋ nibii ni okɛ oniji fee lɛ dɔŋŋ.

¹⁴ Wɔŋyoo Ashera wɔŋkoi ni yɔɔ shikpɔŋ lɛ nɔ lɛ, makwao mashwie shi, ni mafite omaji lɛ.

¹⁵ Mikɛ mlifu kpele kɛ mlila aaatɔ owele yɛ maji fɛɛ ni booo mi toi ni egbo minɔ toi lɛ anɔ.”