Mika 4 - ŊMALƐ KRƆŊKRƆŊ LƐ

Yehowa hejɔlɛ maŋtsɛyeli lɛ

¹ Wɔsɛɛ ko lɛ Sɔlemɔ We lɛ gɔŋ lɛ aaakwɔ fe gɔŋkpɔi lɛ fɛɛ, ni eeeta gɔŋkpɔi lɛ fɛɛ anɔ. Majimaji aaabu kɛaaba enɔ.

² Ni maji amli bii pii aaaba abakɛɛ akɛ, “Nyɛbaa ni nyɛhãa wɔyakwɔa Yehowa gɔŋ lɛ, kɛya Israel Nyɔŋmɔ lɛ Sɔlemɔ we lɛ; ejaakɛ eeetsɔ̃ɔ wɔ nɔ ni etaoɔ ni wɔfee; koni wɔnyiɛ egbɛi lɛ anɔ. Ejaakɛ Yehowa Mla lɛ, Yerusalɛm ebaajɛ; ekɛ emaŋ lɛ wieɔ kɛjɛɔ Zion.”

³ Eeekojo maji pii ateŋ, eeebua maji wuji ni bɛŋkɛ kɛ nii ni yɔɔ shɔŋŋ fɛɛ anaa. Amɛkɛ amɛklantei aaasɔ̃ kɔii, ni amɛkɛ amɛkpɔlɔi lɛ hu aaasɔ̃ kaklai adɔi ni akɛkpɔlɔɔ tso he. Maŋ ko woŋ klante nɔ yɛ maŋ ko nɔ ni amɛsaŋ amɛhe amɛhaŋ tawuu dɔŋŋ.

⁴ Mɔ fɛɛ mɔ aaata lɛ diɛŋtsɛ ewaintsei kɛ lɛ diɛŋtsɛ egbãmitsei ashishi yɛ hejɔlɛ mli. Yehowa, Taiatsɛ lɛ ni kɛɛ enɛ.

⁵ Maŋ fɛɛ maŋ jaa, ni eboɔ enyɔŋmɔ toi; shi wɔ lɛ wɔɔja ni wɔɔbo Yehowa, wɔNyɔŋmɔ lɛ toi kɛaatee naanɔ.

Israelbii lɛ aaajɛ nomŋɔɔ mli aba

⁶ “Be miiba,” Yehowa kɛɛ, “Ni mabua obubuafoi ni egbɔjɔ kɛ mɛi ni ashwie amɛ, mɛi ni migbala amɛtoi lɛ fɛɛ anaa kɛaaba.

⁷ Ni mikɛ akpaketsɛmɛi ni yɔɔ maŋsɛɛ shɔŋŋ, kɛ maŋ, mɛi ni eshwɛ lɛ baaje shishi, ni mafee amɛ maŋ ni da agbo. Ni Yehowa aaaye amɛnɔ maŋtsɛ yɛ Zion Gɔŋ lɛ nɔ kɛaajɛ nakai be lɛ kɛaatee naanɔ fɛɛ.”

⁸ Ni bo, Yerusalɛm, tooku lɛ mɔɔ ni kwɔ, Zion biyoo lɛ gɔŋkpɔ, oootsɔ̃ maŋtsɛmaŋ ekoŋŋ tamɔ bɔ ni oyɔɔ tsutsu lɛ.

⁹ Mɛɛba obolɔɔ? Mɛɛba okɛ̃mɔɔ tamɔ yoo ni baafɔ? Maŋtsɛ ni obɛ hewɔ ni, aloo oŋaawolɔ ni egbo hewɔ ni?

¹⁰ Yerusalɛmbii, nyɛkɛ̃mɔa, ni nyɛkɔ̃mɔa tamɔ yoo ni fɔmɔ eta ehe; ejaakɛ nyɛbaashi maŋ lɛ mli ni nyɛaayahi ŋa lɛ nɔ; nyɛbaaya Babilon tɔ̃ɔ. Shi jɛi lɛ Yehowa aaahere nyɛ yɛ nyɛhenyɛlɔi lɛ adɛŋ.

¹¹ Maji pii ekpe ewo nyɛhe, ni amɛkɛɔ akɛ, “Afite Yerusalɛm koni wɔna ni ejwere shi koikoi.”

¹² Shi maji nɛɛ leee Yehowa jwɛŋmɔ lɛ, amɛyooo eyiŋtoo lɛ sɛɛ hu akɛ Yehowa ebua amɛnaa tamɔ abuaa ŋmãakei anaa yɛ ŋmãagbeemɔhe.

¹³ Yehowa kɛɛ, “Yerusalɛmbii, nyɛtea shi; ni nyɛgbea nyɛhenyɛlɔi lɛ tamɔ agbeɔ ŋmãa! Mahã nyɛhe awa tamɔ tsinanuu kɛ eklontoi ni wa tamɔ dade kɛ ekoklotoi hu ni wa tamɔ akɔɔble. Nyɛaaye maji pii anɔ kunim; ni nyɛaajɔɔ haanii ni amɛshɔ̃ aklanaŋ naa lɛ nɔ nyɛhã mi, mi ni ji je lɛ fɛɛ Nuŋtsɔ lɛ.”