Mika 3 - ŊMALƐ KRƆŊKRƆŊ LƐ

Mika wie shi Israelbii ahiɛnyiɛlɔi lɛ

¹ Nyɛ Israel onukpai ni ji Israel nɔyelɔi, nyɛboa toi! Ani jeee nyɛgbɛnaa ji akɛ nyɛaale nɔ ni ja?

² Shi nyɛnyɛɔ ekpakpa, ni nyɛsumɔɔ efɔŋ. Nyɛkpɔɔ mimaŋbii lɛ ahe wolo yɛ amɛhe be mli ni amɛhiɛ kã; ni nyɛjieɔ amɛheloo yɛ amɛwui ahe.

³ Nyɛyeɔ mimaŋbii lɛ aloo. Nyɛkpɔɔ amɛhe wolo yɛ amɛhe; nyɛkumɔɔ amɛwui, ni nyɛdukuɔ mli tamɔ loo ni akɛyaawo kukwɛi wulu mli.

⁴ Nakai be lɛ mli lɛ nyɛaablɔ nyɛtsɛ Yehowa, shi efoŋ nyɛdaaŋ; shi moŋ ekɛ ehiɛ aaatee nyɛ yɛ efɔŋ ni nyɛfee lɛ hewɔ.

⁵ Gbalɔi lɛ lakaa mimaŋ lɛ. Mɛi ni hãa gbalɔi nɛɛ nɔ ko lɛ, gbalɔi lɛ shiɛɔ tsɔ̃ɔ amɛ akɛ hejɔlɛ miiba; shi mɛi ni hãaa amɛ nɔ ko lɛ, amɛwoɔ amɛhe gbeyei akɛ ta baaba abatua amɛ. Yehowa miikɛɛ gbalɔi nɛɛ akɛ,

⁶ “Gbalɔi, eshwɛ fioo kɛkɛ ni nyɛbe baaho. Hulu aaanyɔ shi yɛ nyɛnɔ. Akɛni nyɛhã mimaŋ lɛ du gbɛ hewɔ lɛ, nyɛnaŋ ninaa ko dɔŋŋ, ni nyɛnyɛŋ gbalɛ ko hu nyɛgba dɔŋŋ.”

⁷ Mɛi ni gbaa nɔ ni baaba wɔsɛɛ ko lɛ ahiɛ aaashwie shi, ni klamɔfoi lɛ hu ahiɛ aaagboi. Amɛ fɛɛ amɛhiɛ aaagboi ni amɛaamu shi kɔ̃i, ejaakɛ Nyɔŋmɔ hereee amɛ nɔ.

⁸ Shi mi lɛ, Yehowa kɛ emumɔ kɛ ehewalɛ lɛ woɔ mimli obɔ̃, ni ehãa mileɔ nɔ ni ji jalɛ, ni ehãa mi ekãa ni akɛkɛɔ Israelbii lɛ nɔ ni hi kɛ nɔ ni ji eshai ni amɛfeɔ lɛ.

⁹ Nyɛ Yakob we onukpai, nyɛ Israel nɔyelɔi, nyɛ mɛi ni nyɛhiɔ jalɛ, ni nyɛhãa jalɛ tsɔ̃ɔ nɔ ni ejaaa, nyɛboa toi koo!

¹⁰ Nyɛmiima Nyɔŋmɔ maŋ wulu ni ji Yerusalɛm lɛ, nyɛmiima lashishwiemɔ kɛ kutumpɔo.

¹¹ Maŋ onukpai lɛ, nyɔɔŋnii amɛheɔ dani amɛbuaa sane he; osɔfoi lɛ, nyɔmɔwoo hewɔ amɛtsɔ̃ɔ Nyɔŋmɔ Mla lɛ, ni gbalɔi lɛ shika hewɔ amɛgbaa nɔ ni ajie atsɔ̃ɔ amɛ. Kɛ̃lɛ amɛkɛ amɛhe kpasaa Yehowa ni amɛkɛɔ akɛ, “Yehowa kɛ wɔ yɛ; nɔ fɔŋ ko nɔ fɔŋ ko baŋ wɔnɔ.”

¹² No hewɔ lɛ, yɛ nyɛhewɔ lɛ, aaatsa Zion ashwie shi tamɔ atsaa ŋa akɛfeɔ ŋmɔ. Yerusalɛm aaatsɔ̃ tsu koi ni bua shi tamɔ gɔŋ, ni Sɔlemɔ we lɛ gɔŋ lɛ nɔ aaatsa atsɔ̃ koo hayii.