Mika 2 - ŊMALƐ KRƆŊKRƆŊ LƐ

Nɔ ni baaba mɛi ni waa ohiafoi ayi nɔ

¹ Kpoo hã mɛi ni toɔ efɔŋ he ŋaa yɛ amɛsai anɔ lɛ. Kɛji je tsɛre, ni amɛna hegbɛ lɛ, amɛfeɔ efɔŋ ni amɛto he ŋaa amɛfɔ shi lɛ ejaakɛ efɔŋ lɛ nɔ hewalɛ yɛ amɛdɛŋ.

² Amɛhiɛ kɔ̃ɔ ŋmɔji anɔ, ni amɛshɔ̃ɔ; amɛhiɛ kɔ̃ɔ shĩai anɔ, ni amɛŋɔɔ. Mɔ ko mɔ ko gboshinii kɛ ewe fɛɛ bɛ shweshweeshwe.

³ No hewɔ lɛ, bɔ ni Yehowa kɛɔ nɛ, “Mito ni mibahã sane fɔŋ aye nyɛ ni nyɛnyɛŋ enaa foi nyɛjo; amanehulu baaba nyɛnɔ, ni nyɛnyɛŋ nyɛnyiɛ kɛ nyɛhetsɔ̃ɔmɔ.

⁴ Kɛji nakai be lɛ shɛ lɛ, mɛi kɛ nyɛsane lɛ aaabu abɛ, ni amɛaala nijiaŋwujee lala amɛkɛɛ akɛ, ‘Wɔhiɛ ekpãtã kwrakwra! Yehowa ehe wɔshikpɔŋ lɛ yɛ wɔdɛŋ; ni ekɛhã mɛi ni ŋɔ wɔ nom lɛ, ni eja wɔŋmɔji ehã mɛi ni ŋɔ wɔ nom lɛ.’ ”

⁵ No hewɔ lɛ, kɛ be shɛ, ni akɛ shikpɔŋ lɛ miiku sɛɛ ahã Yehowa bii lɛ, kɛji afɔ̃ oshiki lɛ, nyɛteŋ mɔ ko naŋ eko.

⁶ Mɛi shiɛɔ ni amɛkɛɔ akɛ, “Kaashiɛ owo wɔ. Kaashiɛ enɛɛmɛi nɛɛ owo wɔ; hiɛgbele ko bɛ ni baaba wɔnɔ.

⁷ Ani osusuɔ akɛ alomɔ Israelbii? Ani Yehowa tsuishitoo lɛ etã? Ani ebaafee nibii ni tamɔ enɛɛmɛi? Mɛi ni feɔ nɔ ni ja lɛ, ani jeee hi miwiemɔ lɛ hi hã amɛ?”

⁸ Yehowa to he akɛ, “Nyɛteɔ shi nyɛwoɔ mimaŋ lɛ tamɔ ateɔ shi awoɔ henyɛlɔi. Mɛi kuɔ amɛsɛɛ kɛjɛɔ ta naa kɛbaa, ni amɛsusuɔ akɛ amɛfee shweshweeshwe yɛ shĩa. Shi naa nyɛ ni nyɛmiimɛ amɛ koni nyɛkpɔlɔ amɛtadei yɛ amɛhe.

⁹ Nyɛshwieɔ mimaŋ lɛ mli yei lɛ yɛ amɛshĩai ni amɛsumɔɔ lɛ; ni jɔɔmɔi ni mikɛjɔɔ amɛbii lɛ, nyɛshɔ̃ yɛ amɛdɛŋ kɛmiiya naanɔ.

¹⁰ Nyɛtea shi ni nyɛyaa. Biɛ bɛ shweshweeshwe dɔŋŋ yɛ nyɛhe eshai ni kɛ hiɛkpãtãmɔ baaba lɛ hewɔ.

¹¹ “Gbalɔ ni maŋ nɛɛ sumɔɔ ji gbalɔ ni nyiɛɔ ni ewieɔ fuu ni emaleɔ ni ekɛɔ akɛ, ‘Wain kɛ dãa ni wa baabu ahã nyɛ.’

¹² “Shi bɔ fɛɛ bɔ ni fee lɛ, mabua nyɛnaa, nyɛ Israelbii fɛɛ ni eshwɛ. Mabua nyɛnaa tamɔ too gwantɛŋ ku kome; mabua nyɛnaa tamɔ too ku yɛ amɛniyelihe yɛ ŋa nɔ; nyɛshikpɔŋ lɛ nɔ baashi hoo ekoŋŋ kɛ gbɔmɛi.”

¹³ Nyɔŋmɔ mɔ ni gbeleɔ gbɛ baagbele gbɛ ahã amɛ, ni eeenyiɛ amɛhiɛ kɛjɛ nomŋɔɔ mli kɛba. Amɛaajwa maŋ lɛ agboi lɛ kɛje kpo kɛya heyeli mli. Amɛmaŋtsɛ ni ji Yehowa diɛŋtsɛ aaanyiɛ amɛhiɛ kɛje kpo.