Mika 1 - ŊMALƐ KRƆŊKRƆŊ LƐ

¹ Maŋtsɛ Yotam kɛ Maŋtsɛ Ahaz kɛ Maŋtsɛ Hezekia ni ji Yuda maŋtsɛmɛi lɛ, ayinɔ lɛ, Yehowa kɛ shɛɛ wiemɔ nɛɛ hã Mika ni jɛ maŋ ni atsɛɔ lɛ Moreshet lɛ mli lɛ. Yehowa jie nibii ni kɔɔ Samaria kɛ Yerusalɛm he nɛɛ fɛɛ kpo etsɔ̃ɔ Mika.

Samaria kɛ Yerusalɛm he ŋkɔmɔ

² Nyɛ majimaji fɛɛ kwa, nyɛboa toi; shikpɔŋ kɛ enɔ bii fɛɛ, nyɛfea toi! Nyɔŋmɔ, Yehowa, aaajɛ eSɔlemɔtsu krɔŋkrɔŋ lɛ mli eye odase eshi nyɛ.

³ Naa, Yehowa miije kpo kɛjɛ ehe krɔŋkrɔŋ lɛ, ni eeeyi shi ni ebanyiɛ shikpɔŋ lɛ nɔ gɔji lɛ anɔ.

⁴ Gɔji lɛ aaasere yɛ enaneshi tamɔ wo-agbaku sereɔ yɛ la hiɛ lɛ; gɔji lɛ aaayiridi awo jɔi lɛ amli ni jɔi lɛ aaagbalagbalai tamɔ nu ni jɛ gɔŋ yiteŋ eebote jɔɔ mli.

⁵ Enɛɛmɛi fɛɛ baaba yɛ esha ni Israelbii efee eshi Nyɔŋmɔ kɛ ehiɛ atua ni amɛtse lɛ hewɔ. Israelbii atuatsemɔ lɛ, namɔ ejɛ? Ani jeee Samaria, maŋtsɛmaŋ lɛ? Wɔŋjamɔ ni yɔɔ Yuda lɛ, namɔ ejɛ? Ani jeee Yerusalɛm?

⁶ No hewɔ lɛ, Yehowa kɛɛ, “Mahã Samaria akumɔ abua shi yɛ ŋa kplanaa lɛ nɔ tamɔ he ko ni atɛoɔ waintsei yɛ. Matsi egbogbo koi lɛ mawo jɔɔ lɛ mli, ni mahã tɛi ni akɛto maŋ lɛ gbogboi lɛ ashishi lɛ ahe akã.

⁷ Aaajwara emãgãi lɛ fɛɛ wɔtsɔwɔtsɔ, ni nii ni akɛbawoɔ Sɔlemɔ we lɛ ajwamãŋi anyɔmɔ lɛ, aaashã fɛɛ. Makumɔ ewɔji lɛ fɛɛ mabua shi ni etsɔ̃ tamɔ gɔŋ. Ajwamãŋi anyɔmɔwo mli Samaria bua nii nɛɛ anaa kɛjɛ, ni agbɛnɛ Samaria henyɛlɔi aaaloo fɛɛ kɛaatee amɛjamɔhei yɛ hei krokomɛi.”

⁸ Kɛkɛ ni Mika kɛɛ, “Enɛ hewɔ lɛ, maye ŋkɔmɔ ni mawo yara; manyiɛ pasaa kɛ mihe yayai. Mawo yara tamɔ ŋaŋgbei, ni maye ŋkɔmɔ tamɔ okpɔŋɔ loofɔlɔ,

⁹ ejaakɛ Samaria pilamɔi lɛ ni ehiii tsamɔ lɛ eko miiba Yuda nɔ. Hiɛkpãtãmɔ eshɛ Yerusalɛm agboi anaa tɔ̃ɔ; eshɛ he ni mimaŋ lɛ yɔɔ lɛ.”

Henyɛlɔi lɛ ebɛŋkɛ Yerusalɛm

¹⁰ Nyɛkagbaa yɛ Gat; nyɛkahãa amɛnaa nyɛ ni nyɛmiifo. Bet-Leafrabii, nyɛkokloa mlu mli.

¹¹ Nyɛ Shafirbii, nyɛjea kpo kɛhoa kɛ hiɛgbele kɛ nyɛhe yayai. Zaananbii lɛ nyɛɛɛ kpo aje. Kɛji nyɛnu ni Bet-Ezelbii miiye ŋkɔmɔ lɛ, nyɛaana nyɛle akɛ abobaahe bɛ jɛi.

¹² Marotbii lɛ miishwe heremɔ, ejaakɛ Yehowa ehã efɔŋ eshɛ Yerusalɛm agbo lɛ naa etã.

¹³ Nyɛ Lakishbii, nyɛfimɔa shwiilii nyɛkpɛtɛa okpɔŋɔi ni he yɔɔ oya ahe. Israel eshai lɛ nyɛkase feemɔ, ni nyɛkɛhã Yerusalɛm efee esha.

¹⁴ Belɛ agbɛnɛ, nyɛ Yudabii, nyɛkɛ Moreshet-Gat maŋ lɛ ayea shɛɛ. Israel maŋtsɛmɛi lɛ naŋ yelikɛbuamɔ kɛjɛŋ Akzib maŋ lɛ mli shĩai adɛŋ.

¹⁵ Mareshabi, Yehowa baajie mɔ ehã ni ebaye nyɛnɔ kunim. Ebaaŋɔ nyɛmaŋ lɛ, ni Israel hiɛnaanɔbii lɛ aaajo foi ayatee yɛ Abdulam tɛkplo lɛ mli.

¹⁶ Yudabii, nyɛshɛa nyɛyi kɛyea ŋkɔmɔ yɛ nyɛbii ni nyɛsumɔ lɛ ahewɔ. Nyɛkpɔa nyɛyi kuekue tamɔ akpaŋa yiteŋ, ejaakɛ abaaŋɔ nyɛbii lɛ anom kɛaaje nyɛhe kɛya.