Mateo 9 - ŊMALƐ KRƆŊKRƆŊ LƐ

Kuumɔ helatsɛ ko tsamɔ

¹ Yesu bote lɛlɛ mli, ni efo ŋshɔ lɛ, ni eba lɛ diɛŋtsɛ emaŋ lɛ mli.

² Ni naa, akɛ mɔ ko ni yeɔ kuumɔ hela ni kã saa nɔ ba eŋɔɔ. Ni be ni Yesu na amɛhemɔkɛyeli lɛ, ekɛɛ mɔ ni yeɔ kuumɔ hela lɛ akɛ, “Bi, hã otsui anyɔ omli, akɛ ohe eshai lɛ efa bo!”

³ Ni mlatsɔɔlɔi lɛ ateŋ mɛi komɛi kɛɛ yɛ amɛmli akɛ, “Musu mɔ nɛ bɔɔ nɛɛ.”

⁴ Ni be ni Yesu na amɛjwɛŋmɔi lɛ, ekɛɛ, “Mɛɛ hewɔ ni nyɛjwɛŋɔ nii fɔ̃ji yɛ nyɛtsuii amli nɛɛ?

⁵ Te emli nɔ ni kɛɛmɔ jaraaa hu, akɛ aaakɛɛ akɛ, ‘Aŋɔ ohe eshai lɛ afa bo,’ aloo ‘Tee shi ni onyiɛ’ lɛ?

⁶ Shi be ni afee ni nyɛna akɛ Gbɔmɔ Bi lɛ yɛ hegbɛ yɛ shikpɔŋ lɛ nɔ akɛ ekɛ eshai faa lɛ,” — kɛkɛ lɛ ekɛɛ mɔ ni yeɔ kuumɔ hela lɛ akɛ, “Tee shi, wo osaa lɛ ni oya shĩa!”

⁷ Ni ete shi etee shĩa.

⁸ Shi be ni asafo lɛ na lɛ, amɛnaa kpɛ amɛhe, ni amɛwo Nyɔŋmɔ hiɛ nyam akɛ ekɛ nɛkɛ hegbɛ ehã gbɔmɛi.

Mateo tsɛmɔ

⁹ Ni be ni Yesu je jɛi eyaa lɛ ena nuu ko ni atsɛɔ lɛ Mateo ta toohemɔhe lɛ, ni ekɛɛ lɛ akɛ, “Nyiɛmɔ misɛɛ!” Ni ete shi enyiɛ esɛɛ.

¹⁰ Ni eba mli akɛ, be ni eta niyenii ashi yɛ shĩa lɛ, toohelɔi kɛ eshafeelɔi babaoo ba, ni amɛkɛ Yesu kɛ ekaselɔi lɛ batara okplɔ̃ lɛ he.

¹¹ Ni be ni Farisifoi lɛ na lɛ, amɛbi ekaselɔi lɛ akɛ, “Mɛɛ hewɔ nyɛtsɔ̃ɔlɔ lɛ kɛ toohelɔi kɛ eshafeelɔi yeɔ nii nɛɛ?”

¹² Shi be ni Yesu nu lɛ, ekɛɛ amɛ akɛ, “Mɛi ni yɔɔ hewalɛ lɛ, tsofatsɛ he ehiaaa amɛ, shi moŋ mɛi ni he yeɔ lɛ.

¹³ Shi nyɛyaa ni nyɛyakasea nɔ ni ji enɛ shishi. ‘Mɔbɔnalɛ mitaoɔ, ni jeee afɔle!’ Ejaakɛ mibaaa jalɔi atsɛmɔ, shi eshafeelɔi moŋ.”

Ŋmaahilɛ he sane

¹⁴ Kɛkɛ ni Yohane kaselɔi lɛ ba eŋɔɔ ni amɛkɛɛ, “Mɛɛ hewɔ wɔ kɛ Farisifoi lɛ fɔɔ ŋmaahilɛ, shi okaselɔi lɛ ehiii ŋmaa lɛ?”

¹⁵ Ni Yesu kɛɛ amɛ akɛ, “Ani yookpeemɔ he bialɔi lɛ aaanyɛ aye ŋkɔmɔ gbii abɔ ni ayɛmforowu lɛ kɛ amɛ yɔɔ lɛ? Shi gbii aaaba momo ni aaaŋɔ ayɛmforowu lɛ kɛaaje amɛteŋ kɛaatee, ni no dani amɛaahi ŋmaa.

¹⁶ “Shi mɔ ko kɛ mamanaa hee taaa atade momo; ejaakɛ nɔ ni akɛta lɛ yeɔ atade lɛ, ni folɔ lɛ lɛɔ moŋ fe tsutsu lɛ.

¹⁷ Asaŋ akɛ wain hee wooo wolo tɔi memeji amli; no lɛ, wolo tɔi lɛ aaaflɛ, ni wain lɛ aaashwie shi, ni wolo tɔi lɛ aaafite; shi wain hee lɛ, wolo tɔi hei amli moŋ akɛwoɔ, ni enyɔ lɛ fɛɛ feɔ shweshweeshwe.”

Onukpa lɛ biyoo lɛ kɛ yoo ni ta Yesu atade he lɛ

¹⁸ Be ni ekɛ amɛ wieɔ wiemɔi nɛɛ lɛ, onukpa ko ba bakoto lɛ ekɛɛ, “Mibiyoo eje mli amrɔ nɛɛ, shi ba ni okɛ onine abaŋmɛ enɔ, ni ehiɛ aaatsɛ̃.”

¹⁹ Ni Yesu te shi ni ekɛ ekaselɔi lɛ nyiɛ esɛɛ.

²⁰ Ni naa, yoo ko ni eye láfɔsemɔ hela afii nyɔŋma kɛ enyɔ lɛ baje esɛɛgbɛ eta etade naamuu lɛ he.

²¹ Ejaakɛ ekɛɛ yɛ eyiŋ akɛ, “Kɛji mina mita etade lɛ he kɛkɛ lɛ, mihe aaawa mi.”

²² Shi Yesu tsɔ̃ ehe, ni be ni ena lɛ lɛ ekɛɛ, “Biyoo, hã otsui anyɔ omli, ohemɔkɛyeli lɛ ehere oyiwala!” Ni yoo lɛ he wa lɛ nakai ŋmɛlɛtswaa lɛ nɔ nɔŋŋ.

²³ Ni be ni Yesu ba onukpa lɛ we lɛ ni ena blɛkpalɔi kɛ mɛi pii ni feɔ hoo lɛ,

²⁴ ekɛɛ amɛ akɛ, “Nyɛyaa sɛɛ, ejaakɛ oblayoo lɛ gboko, shi wɔ kɛkɛ ewɔɔ.” Ni amɛŋmɔ lɛ.

²⁵ Shi be ni ashwie mɛi lɛ, etee tsu lɛ mli, ni emɔ oblayoo lɛ nineshi, ni ete shi.

²⁶ Ni nɛkɛ sane nɛɛ jije yɛ jɛi shikpɔŋ muu lɛ fɛɛ nɔ.

Shwilafoi enyɔ lɛ atsamɔ

²⁷ Ni be ni Yesu je jɛi ehoɔ lɛ, shwilafoi enyɔ nyiɛ esɛɛ ni amɛmiibolɔ akɛ, “Naa wɔ mɔbɔ, David Bi!”

²⁸ Ni be ni ebote shĩa lɛ, shwilafoi lɛ ba eŋɔɔ; ni Yesu bi amɛ akɛ, “Nyɛheɔ nyɛyeɔ akɛ manyɛ enɛ mafee lo?” Amɛkɛɛ lɛ akɛ, “Hɛɛ, Nuŋtsɔ!”

²⁹ Kɛkɛ ni etara amɛhiŋmɛii lɛ ahe ni ekɛɛ, “Bɔ ni nyɛheɔ nyɛyeɔ lɛ, afee nakai ahã nyɛ.”

³⁰ Ni amɛhiŋmɛii lɛ gbele. Ni Yesu bɔ amɛ kɔkɔ akɛ, “Nyɛkwɛa ni mɔ ko akalea!”

³¹ Shi amɛ lɛ, be ni amɛje jɛi lɛ, amɛyagbɛ ehe sane lɛ amɛshwã yɛ jɛi shikpɔŋ lɛ nɔ fɛɛ.

Mumui ko tsamɔ

³² Shi be ni Yesu kɛ ekaselɔi lɛ jeɔ kpo lɛ, akɛ mumui ko ni mumɔ fɔŋ yɔɔ emli ba eŋɔɔ.

³³ Ni be ni efã mumɔ fɔŋ lɛ, mumui lɛ wie. Ni asafoi lɛ anaa kpɛ amɛhe amɛkɛɛ, “Anako nɛkɛ nɔ ko pɛŋ yɛ Israel!”

³⁴ Shi Farisifoi lɛ kɛɛ, “Mumɔi fɔ̃ji alumɔ lɛ nɔ etsɔ̃ɔ efãa mumɔi fɔ̃ji lɛ!”

Yesu musuŋ tsɔ̃ lɛ

³⁵ Ni Yesu kpa maji lɛ kɛ akrowai lɛ fɛɛ nɔ, ni etsɔ̃ɔ nii yɛ amɛkpeehei lɛ, ni eshiɛ maŋtsɛyeli lɛ he sane kpakpa lɛ, ni etsa hela fɛɛ hela kɛ hejaramɔ fɛɛ hejaramɔ.

³⁶ Shi be ni ena mɛi babaoo lɛ, emusuŋ tsɔ̃ lɛ yɛ amɛhewɔ, ejaakɛ etɔ amɛ ni amɛfee yuuyaa tamɔ toi ni bɛ kwɛlɔ.

³⁷ Kɛkɛ ni ekɛɛ ekaselɔi lɛ akɛ, “Nikpamɔ lɛ fa, shi nitsulɔi lɛ faaa.

³⁸ No hewɔ lɛ, nyɛkpaa nikpamɔ nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli!”