Mateo 7 - ŊMALƐ KRƆŊKRƆŊ LƐ

Kojomɔ

¹ “Nyɛkakojoa, koni akakojo nyɛ.

² Shi nɔ kojomɔ ni nyɛkɛkojoɔ lɛ, akɛaakojo nyɛ; ni nɔ susumɔnɔ ni nyɛkɛsusuɔ lɛ, akɛasusu ahã nyɛ.

³ Shi mɛɛba onaa kuli ni yɔɔ onyɛmi hiŋmɛi mli lɛ, shi bo diɛŋtsɛ ohiŋmɛi mli mplaŋ lɛ oyooo lɛ?

⁴ Aloo te aaafee tɛŋŋ ni oookɛɛ onyɛmi akɛ, ‘Hã majie kuli lɛ yɛ ohiŋmɛi mli,’ be mli ni mplaŋ lɛ yɛ bo diɛŋtsɛ ohiŋmɛi mli lɛ?

⁵ Osatofo, jiemɔ mplaŋ lɛ yɛ bo diɛŋtsɛ ohiŋmɛi mli tsutsu, ni no dani ooona nii faŋŋ ni ojie kuli lɛ yɛ onyɛmi lɛ hiŋmɛi mli.

⁶ Nyɛkɛ nɔ ni yɔɔ krɔŋkrɔŋ lɛ akahãa shifɔji; asaŋ nyɛkashɛrɛa nyɛdiagbai nyɛshwiea kplotoi ahiɛ, ni amɛbanaana nɔ yɛ amɛnajiashi, ni amɛtsɔ̃mɔ amɛhe amɛbatserɛ nyɛ.”

Bimɔ, taomɔ kɛ shimɔ

⁷ “Nyɛbia, ni aaahã nyɛ; nyɛtaoa, ni nyɛaana; nyɛshia, ni aaagbele ahã nyɛ.

⁸ Shi mɔ fɛɛ mɔ ni biɔ lɛ, enine shɛɔ nɔ; ni mɔ ni taoɔ lɛ, enaa; ni mɔ ni shiɔ lɛ aaagbele ahã lɛ.

⁹ Aloo nyɛteŋ namɔ ni kɛji ebi bi lɛ aboloo, ni eeehã lɛ tɛ?

¹⁰ Aloo kɛji ebi lɛ ŋshɔŋloo, ni eeehã lɛ onufu?

¹¹ Belɛ kɛji nyɛ ni nyɛ ji mɛi fɔ̃ji lɛ nyɛle bɔ ni nyɛfeɔ nyɛkɛ nikpakpai hãa nyɛbii lɛ, enyiɛ nɔŋŋ nyɛTsɛ ni yɔɔ ŋwɛi lɛ eŋɔŋ nikpakpai ehaŋ mɛi ni biɔ lɛ lɛ?

Mla ni jara wa lɛ

¹² “No hewɔ lɛ, nɔ fɛɛ nɔ ni nyɛtaoɔ akɛ mɛi afee nyɛ lɛ, nyɛ hu nyɛfea amɛ nakai nɔŋŋ; ejaakɛ enɛ ji Mla lɛ kɛ gbalɔi lɛ.”

Agbo fintɔŋŋ lɛ

¹³ “Nyɛbotea agbo fintɔŋŋ lɛ mli! Ejaakɛ agbo ni lɛɛ kɛ gbɛ tɛtɛrɛɛ ji nɔ ni kɛ mɔ yaa hiɛkpãtãmɔ mli, ni mɛi ni boteɔ mli lɛ fa.

¹⁴ Shi agbo fintɔŋŋ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.”

Amɛyibii lɛ nyɛkɛaale amɛ

¹⁵ “Shi nyɛhiɛ ahia nyɛhe nɔ yɛ amale gbalɔi lɛ ahe; amɛkɛ too wolo haa amɛhe kɛbaa nyɛŋɔɔ, shi amɛmligbɛ lɛ klãji fulɔi ji amɛ.

¹⁶ Amɛyibii lɛ nyɛkɛaale amɛ. Ani atseɔ wainyibii yɛ ŋmeitsei anɔ, aloo atseɔ agbãmii yɛ aŋlɛŋlɛi anɔ?

¹⁷ Nakai nɔŋŋ tso fɛɛ tso ni ji ekpakpa lɛ woɔ yibii kpakpai; shi tso gbonyo woɔ yibii gbohii.

¹⁸ Tso kpakpa nyɛɛɛ awo yibii gbohii, ni asaŋ tso gbonyo nyɛɛɛ awo yibii kpakpai.

¹⁹ Tso fɛɛ tso ni wooo yibii kpakpai lɛ, atoɔ lɛ ni ashɛɔ lɛ afɔ̃ɔ la mli.

²⁰ No hewɔ lɛ, amɛyibii lɛ nyɛkɛale amɛ.”

Mileee nyɛ kwraa

²¹ “Jeee mɔ fɛɛ mɔ ni kɛɔ mi akɛ, ‘Nuŋtsɔ, Nuŋtsɔ!’ lɛ, aaabote ŋwɛi maŋtsɛyeli lɛ mli; shi moŋ mɔ ni feɔ miTsɛ ni yɔɔ ŋwɛi lɛ suɔmɔnaanii lɛ.

²² Mɛi pii aaakɛɛ mi nakai gbi lɛ akɛ, ‘Nuŋtsɔ, Nuŋtsɔ! Ani jeee bo ogbɛi lɛ mli wɔfee hewalɛnii pii yɛ lo?’

²³ Ni no lɛ magba mli makɛɛ amɛ akɛ, ‘Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!’ ”

Tsumalɔi enyɔ lɛ

²⁴ “No hewɔ lɛ, mɔ fɛɛ mɔ ni nuɔ miwiemɔi nɛɛ ni eyeɔ nɔ lɛ, akɛ lɛ aaato nilelɔ ni ma etsu yɛ tɛsaa nɔ lɛ he.

²⁵ Ni nyɔŋmɔ tue, ni fai ba, ni kɔɔyɔi tswa, ni amɛshimɔ tsu lɛ, shi ewuleee; ejaakɛ ato shishi yɛ tɛsaa nɔ.

²⁶ Shi mɔ fɛɛ mɔ ni nuɔ miwiemɔi nɛɛ ni eyeee nɔ lɛ, akɛ lɛ aaato nuu kwashia ni ma etsu yɛ shia nɔ lɛ he.

²⁷ Ni nyɔŋmɔ tue, ni fai ba, ni kɔɔyɔi tswa, ni amɛshimɔ tsu lɛ, ni ewule, ni ewulemɔ lɛ da!”

²⁸ Ni be ni Yesu egbe wiemɔi nɛɛ anaa lɛ, asafoi lɛ ahe jɔ̃ amɛhe yɛ enitsɔ̃ɔmɔ lɛ he;

²⁹ ejaakɛ etsɔ̃ɔ amɛ nii akɛ mɔ ko ni yɔɔ hegbɛ, shi jeee tamɔ mlatsɔɔlɔi lɛ.