Mateo 6 - ŊMALƐ KRƆŊKRƆŊ LƐ

Ejurɔfeemɔ he nitsɔɔmɔ

¹ “Nyɛkwɛa ni ahĩa ni nyɛkafea nyɛjalɛnii lɛ yɛ gbɔmɛi ahiɛ koni amɛna nyɛ; no lɛ, nyɛbɛ nyɔmɔwoo ko yɛ nyɛTsɛ ni yɔɔ ŋwɛi lɛ dɛŋ.

² No hewɔ lɛ, kɛ oofee ejurɔ lɛ, kaashiɛ otsɔ̃ɔ mɛi, tamɔ osatofoi lɛ feɔ yɛ kpeehei lɛ kɛ blohui lɛ amli koni gbɔmɛi ajie amɛyi. Anɔkwale mikɛɔ nyɛ akɛ amɛnine eshɛ amɛnyɔmɔwoo nɔ momo.

³ Shi bo lɛ, kɛ oofee ejurɔ lɛ, kaahã obɛku le nɔ ni oninejurɔ feɔ,

⁴ koni ojurɔfeemɔ lɛ ahi teemɔ mli, ni oTsɛ lɛ ni naa teemɔ mli nii lɛ aaawo bo nyɔmɔ.”

Sɔlemɔ he nitsɔɔmɔ

⁵ “Ni kɛ nyɛmiisɔle lɛ, nyɛkafea nyɛnii tamɔ osatofoi lɛ; shi amɛsumɔɔ akɛ amɛdamɔ kpeehei lɛ kɛ gbɛjegbɛi lɛ atoi amɛsɔle, koni mɛi ana amɛ. Miikɛɛ nyɛ anɔkwale mli akɛ amɛnine eshɛ amɛnyɔmɔwoo nɔ momo.

⁶ Shi bo lɛ, kɛ oosɔle lɛ, botemɔ opia mli, ni oŋa oshinaa lɛ, ni osɔle otsɛ oTsɛ yɛ teemɔ mli; ni oTsɛ ni naa teemɔ mli nii lɛ aaawo bo nyɔmɔ.

⁷ “Shi kɛji nyɛmiisɔle lɛ, nyɛkawiea trilii tamɔ jeŋmajiaŋbii lɛ; shi amɛsusuɔ akɛ amɛwiemɔ babaoo lɛ hewɔ aaabo amɛ toi.

⁸ No hewɔ lɛ, nyɛkafea nyɛnii tamɔ amɛ; shi nyɛTsɛ lɛ le nii ni hiaa nyɛ dani nyɛbiɔ lɛ.”

Nuŋtsɔ lɛ Sɔlemɔ lɛ

⁹ “No hewɔ lɛ, nyɛsɔlea nɛkɛ, ‘WɔTsɛ ni yɔɔ ŋwɛi, ogbɛi lɛ he atse;

¹⁰ omaŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ, tamɔ afeɔ yɛ ŋwɛi lɛ.

¹¹ Hã wɔ ŋmɛnɛ wɔdaaŋmaa;

¹² ni okɛ wɔnyɔji lɛ ake wɔ, tamɔ bɔ ni wɔ hu wɔkɛkeɔ mɛi ni hiɛ wɔ nyɔji lɛ.

¹³ Ni okɛ wɔ akaya kaa mli; shi jiemɔ wɔ kɛjɛ efɔŋ mli. [Shi onɔ ji maŋtsɛyeli lɛ kɛ hewalɛ lɛ kɛ anunyam lɛ kɛyashiɔ naanɔ. Amen.’]

¹⁴ “Shi kɛji nyɛkɛ mɛi atɔ̃mɔi fa amɛ lɛ, nyɛTsɛ ni yɔɔ ŋwɛi lɛ kɛaafa nyɛ hu.

¹⁵ Shi kɛji nyɛkɛ mɛi atɔ̃mɔi efaaa amɛ lɛ, nyɛTsɛ lɛ hu kɛ nyɛtɔ̃mɔi lɛ efaŋ nyɛ.”

Ŋmaahilɛ

¹⁶ “Shi kɛji nyɛmiihi ŋmaa lɛ nyɛkafea nyɛhiɛ mɔbɔmɔbɔ tamɔ osatofoi lɛ; shi amɛfeɔ amɛhiɛ nyanyaanya, koni mɛi ana akɛ amɛmiihi ŋmaa. Miikɛɛ nyɛ anɔkwale mli akɛ amɛnine eshɛ amɛnyɔmɔwoo nɔ momo.

¹⁷ Shi bo lɛ, kɛ oohi ŋmaa lɛ, kpa oyi mli mu ni ofɔ ohiɛ;

¹⁸ koni mɔ ko akana akɛ oohi ŋmaa, akɛ ja oTsɛ ni anaaa lɛ lɛ; ni oTsɛ ni naa teemɔ mli nii lɛ aaawo bo nyɔmɔ.”

Ŋwɛi jwetri

¹⁹ “Nyɛkabɔa jwetri nyɛhãa nyɛhe yɛ shikpɔŋ lɛ nɔ, he ni omlɛgɛ kɛ ŋkanale fiteɔ nii ni julɔi gbuɔ kɛboteɔ mli kɛbajuɔ yɛ lɛ.

²⁰ Shi nyɛbɔa jwetri nyɛhãa nyɛhe yɛ ŋwɛi, he ni omlɛgɛ kɛ ŋkanale fiteee nii ni julɔi egbuuu kɛboteee mli kɛyajuuu yɛ lɛ.

²¹ Shi he ni ojwetri yɔɔ lɛ jɛi otsui aaahi.”

Gbɔmɔtso lɛ kane

²² “Gbɔmɔtso lɛ kane ji hiŋmɛi. No hewɔ lɛ, kɛji ohiŋmɛi nɔ tse lɛ ogbɔmɔtso muu lɛ aaayi kɛ la.

²³ Shi kɛji ohiŋmɛi nɔ tseee lɛ, ogbɔmɔtso muu lɛ aaawo duŋ. No hewɔ lɛ, kɛji la ni yɔɔ omli lɛ ji duŋ lɛ, te no duŋ lɛ aaafa ahã tɛŋŋ!”

Henaagbamɔ kɛ yeyeeyefeemɔ

²⁴ “Mɔ ko nyɛŋ nuŋtsɔmɛi enyɔ asɔ̃mɔ; ejaakɛ no lɛ eeenyɛ mɔ kome ni eeesumɔ mɔ kroko lɛ; aloo eeekpɛtɛ mɔ kome he, ni eeebu mɔ kroko lɛ akɛ ejeee mɔ ko. Nyɛnyɛŋ Nyɔŋmɔ kɛ mamona (ninamɔ) nyɛsɔ̃mɔ.

²⁵ “No hewɔ lɛ, miikɛɛ nyɛ akɛ, Nyɛkafea yeyeeye yɛ nyɛwala he, yɛ nɔ ni nyɛaanu hewɔ, aloo yɛ nyɛgbɔmɔtso lɛ he, yɛ nɔ ni nyɛaawo hewɔ. Ani wala efeee ŋmaa, ni gbɔmɔtso efeee atade?

²⁶ Nyɛkwɛa ŋwɛi loofɔji lɛ: amɛduuu nii, asaŋ amɛkpaaa nii, asaŋ amɛbuaaa naa amɛwooo aboŋoi amli; shi nyɛTsɛ ni yɔɔ ŋwɛi lɛ lɛɔ amɛ kɛ̃. Ani nyɛhiii aahu fe amɛ?

²⁷ Shi nyɛteŋ namɔ kɛ yeyeeyefeemɔ aaanyɛ atsa ekwɔlɛ nɔ ninetalɔ kome?

²⁸ Ni mɛɛ hewɔ nyɛfeɔ yeyeeye yɛ atade hewɔ? Nyɛjwɛŋa ŋa nɔ fɔfɔii lɛ ahe, bɔ ni amɛdaraa; amɛgbooo deŋme, asaŋ amɛtsɛ̃ɛɛ kpãa.

²⁹ Shi miikɛɛ nyɛ akɛ, Solomon kɛ enunyam lɛ fɛɛ tete ewulaaa tamɔ enɛɛmɛi ateŋ ekome.

³⁰ Shi kɛji ŋa nɔ jwɛi ni ŋmɛnɛ eyɛ ni wɔ ni ashɛ afɔ̃ flɔnɔɔ mli lɛ ni Nyɔŋmɔ wulaa nɛkɛ lɛ, ani efeŋ nɔ ni fe enɛ ehaŋ nyɛ, nyɛ ni nyɛhemɔkɛyeli faaa lɛ lo?

³¹ No hewɔ lɛ, nyɛkahaoa nyɛhe nyɛkɛa akɛ, ‘Mɛni wɔɔye, aloo mɛni wɔɔnu, mɛni hu wɔkɛ aha wɔhe?’

³² Ejaakɛ nii nɛɛ fɛɛ sɛɛ jeŋmajiaŋbii lɛ diɔ. Shi nyɛTsɛ lɛ ni yɔɔ ŋwɛi lɛ le akɛ nii nɛɛ fɛɛ he miihia nyɛ.

³³ Shi nyɛtaoa Nyɔŋmɔ Maŋtsɛyeli lɛ kɛ ejalɛ lɛ tsutsu ni akɛ nii nɛɛ fɛɛ aaafata he ahã nyɛ.

³⁴ No hewɔ lɛ, nyɛkahaoa nyɛhe nyɛtoa wɔ; ejaakɛ wɔ aaahao yɛ lɛ diɛŋtsɛ ehe. Gbi fɛɛ gbi nɔ efɔŋ lɛ fa hã lɛ.”