Mateo 4 - ŊMALƐ KRƆŊKRƆŊ LƐ

Yesu kaa

¹ Kɛkɛ ni Mumɔ lɛ ŋɔ Yesu kɛtee ŋa nɔ, koni abonsam ayaka lɛ.

² Ni be ni ehi ŋmaa shwaneshwane kɛ nyɔɔŋnyɔɔŋ gbii nyɔŋmai ejwɛ sɛɛ lɛ, hɔ̃mɔ ye lɛ.

³ Ni abonsam lɛ ba eŋɔɔ ebakɛɛ lɛ akɛ, “Kɛji Nyɔŋmɔ Bi ji bo lɛ, fã koni tɛi nɛɛ atsɔ̃mɔ aboloo.”

⁴ Shi Yesu here nɔ ekɛɛ, “Aŋma akɛ, ‘Jeee aboloo kɛkɛ hãa gbɔmɔ yi naa wala; shi mɔŋ wiemɔ fɛɛ wiemɔ ni jɛɔ Nyɔŋmɔ daaŋ lɛ.’ ”

⁵ Kɛkɛ ni abonsam lɛ ŋɔ lɛ kɛtee maŋ krɔŋkrɔŋ lɛ mli, ni ekɛ lɛ yadamɔ Sɔlemɔ we lɛ yiteŋ he ni yɔɔ shɔ̃shɔ̃ɔshɔ̃ lɛ,

⁶ ni abonsam kɛɛ lɛ akɛ, “Kɛji Nyɔŋmɔ Bi ji bo lɛ, kɛ ohe atswa shi; ejaakɛ aŋma akɛ, ‘Ohewɔ lɛ eeefã ebɔfoi lɛ ni amɛaahiɛ bo yɛ amɛdɛŋ, koni okɛ onane akashi tɛ ko.’ ”

⁷ Yesu kɛɛ lɛ akɛ, “Aŋma ekoŋŋ akɛ, ‘Kaaka Nuŋtsɔ, bo Nyɔŋmɔ lɛ.’ ”

⁸ Asaŋ abonsam lɛ ŋɔ lɛ kɛtee gɔŋ ni kwɔ somromoo ko nɔ, ni ekɛ jeŋ maŋtsɛyelii fɛɛ kɛ amɛnunyam lɛ tsɔ̃ɔ lɛ;

⁹ ni ekɛɛ lɛ akɛ, “Mikɛ enɛɛmɛi fɛɛ baahã bo, kɛji okula shi oja mi lɛ.”

¹⁰ Kɛkɛ ni Yesu kɛɛ lɛ akɛ, “Jee mihiɛ, Satan! Ejaakɛ aŋma akɛ, ‘Nuŋtsɔ oNyɔŋmɔ lɛ oja, ni lɛ kɛkɛ osɔ̃mɔ!’ ”

¹¹ Kɛkɛ ni abonsam lɛ shi lɛ, ni ŋwɛi bɔfoi ba ni amɛbasɔmɔ lɛ.

Galilea nitsumɔ lɛ shishijee

¹² Shi be ni Yesu nu akɛ amɔ Yohane lɛ, eyiŋ etee Galilea.

¹³ Ehiii shi yɛ Nazaret shi moŋ ebahi Kapernaum maŋ ko ni kã ŋshɔ naa, yɛ Zebulon kɛ Naftali niiaŋ,

¹⁴ koni gbalɔ Yesaia wiemɔ lɛ aba mli akɛ,

¹⁵ “Zebulon shikpɔŋ kɛ Naftali shikpɔŋ, Ŋshɔnaagbɛ lɛ, yɛ Yordan sɛɛ lɛ, Galilea, jeŋmaji ashikpɔŋ lɛ,

¹⁶ Maŋ ni ta duŋ mli lɛ, ena la kpeteŋkple, ni mɛi ni tara gbele shikpɔŋ, kɛ ehɔ̃ɔŋ mli lɛ, la ete shi ehã amɛ!”

¹⁷ Kɛjɛ no nɔ lɛ Yesu bɔ̃i shiɛmɔ ni ekɛɛ, “Nyɛtsakea nyɛtsui; shi ŋwɛi maŋtsɛyeli lɛ ebɛŋkɛ!”

Wolɛi ejwɛ atsɛmɔ

¹⁸ Be ni Yesu kpaa shi yɛ Galilea Ŋshɔ lɛ naa lɛ, ena nyɛmimɛi enyɔ, Simon ni atsɛɔ lɛ Petro, kɛ enyɛmi Andrea, ni amɛmiihɛ yɛ ŋshɔ lɛ mli, ejaakɛ wolɛi ji amɛ.

¹⁹ Ni etsɛ amɛ akɛ, “Nyɛbanyiɛa misɛɛ, ni mafee nyɛ wolɛi ni baahɛ gbɔmɛi.”

²⁰ Ni amrɔ lɛ amɛshi amɛyai lɛ, ni amɛbanyiɛ esɛɛ.

²¹ Ni be ni eje jɛi eyaa lɛ, ena nyɛmimɛi krokomɛi enyɔ, Zebedeo bi Yakobo kɛ enyɛmi Yohane, ni amɛkɛ amɛtsɛ Zebedeo yɛ lɛlɛ mli amɛmiikpɛ amɛyai lɛ; ni etsɛ amɛ.

²² Ni amrɔ lɛ amɛshi lɛlɛ lɛ kɛ amɛtsɛ lɛ ni amɛbanyiɛ esɛɛ.

Yesu tsɔ̃ɔ nii, eshiɛ ni etsa helai

²³ Ni Yesu kpa Galilea muu lɛ fɛɛ, etsɔ̃ɔ nii yɛ amɛkpeehei lɛ, ni eshiɛɔ maŋtsɛyeli lɛ he sanekpakpa lɛ etsɔ̃ɔ, ni etsaa hela fɛɛ hela kɛ hejaramɔ fɛɛ hejaramɔ yɛ maŋ lɛ mli.

²⁴ Ni ehe sane gbɛ shwã Siria fɛɛ, ni akɛ mɛi fɛɛ ni bɛ hewalɛ ni helai kɛ piŋmɔi srɔtoi hiɛ amɛ kɛ mɛi ni mumɔi fɔ̃ji yɔɔ amɛmli kɛ mɛi ni yeɔ gbligbli kɛ mɛi ni yeɔ kuumɔhela ba eŋɔɔ, ni etsa amɛ.

²⁵ Ni asafoi pii jɛ Galilea kɛ Dekapoli kɛ Yerusalɛm kɛ Yudea kɛ Yordan sɛɛ nyiɛ esɛɛ.