Mateo 3 - ŊMALƐ KRƆŊKRƆŊ LƐ

Yohane Baptisilɔ lɛ shiɛmɔ

¹ Nakai bei lɛ amli lɛ Yohane Baptisilɔ lɛ ba ebashiɛ yɛ Yudea ŋa lɛ nɔ,

² ni ekɛɛ akɛ, “Nyɛtsakea nyɛtsui; shi ŋwɛi maŋtsɛyeli lɛ ebɛŋkɛ.”

³ Shi mɔ nɛ ji mɔ he ni gbalɔ Yesaia wie akɛ, “Mɔ ko gbee miibo yɛ ŋa lɛ nɔ akɛ, ‘Nyɛsaa Nuŋtsɔ lɛ gbɛ lɛ! Ni nyɛfea etɛmpɔŋi lɛ trɔmɔɔ!’ ”

⁴ Shi lɛ Yohane lɛ, yooma hetsɔi akɛlo etade, ni wolo kpãa fĩ emliteŋ, ni eniyenii ji baalabii kɛ ŋa nɔ wo.

⁵ Ni mɛi ni yɔɔ Yerusalɛm kɛ Yudea fɛɛ kɛ Yordan niiaŋ fɛɛ ba eŋɔɔ;

⁶ ni ebaptisi amɛ yɛ Yordan faa lɛ mli, be ni amɛjajeɔ emɛhe eshai lɛ.

⁷ Shi be ni ena Farisifoi kɛ Sadukifoi lɛ ateŋ mɛi pii baa ebaptisimɔ lɛ he lɛ, ekɛɛ amɛ akɛ “Shinɔi ashwiei, namɔ tsɔ̃ɔ nyɛ akɛ nyɛjo mlifu ni baaba lɛ naa foi?

⁸ Belɛ nyɛwoa yibii ni sa tsuitsakemɔ mɔ!

⁹ Ni nyɛkasusua ni nyɛkɛɛ yɛ nyɛmli akɛ, ‘Wɔ lɛ wɔtsɛ ji Abraham;’ shi miikɛɛ nyɛ akɛ, Nyɔŋmɔ aaanyɛ etee bii ashi kɛjɛ tɛi nɛɛ amli ehã Abraham.

¹⁰ Shi lema lɛ kã tsei lɛ ashishifã lɛ nɔ momo; hewɔ lɛ tso fɛɛ tso ni wooo yibii kpakpai lɛ atoɔ afɔɔ shi, ni ashɛɔ afɔɔ la mli.

¹¹ Mi lɛ, nu mikɛbaptisiɔ nyɛ hã tsuitsakemɔ; shi mɔ ni baa yɛ misɛɛ lɛ, ehe wa fe mi; etokotai tete misaaa mɔ ni hiɛɔ. Lɛ eeebaptisi nyɛ kɛ Mumɔ Krɔŋkrɔŋ kɛ la.

¹² Ehiɛ eshaatsene yɛ edɛŋ, ni ebaabɛɛ eshikpɔŋ lɛ fitsofitso, ni ebaabua eŋmaa lɛ naa eto eboŋo mli; shi tutuu lɛ, ekɛ la ni gbooo baashã.”

Yesu baptisimɔ

¹³ Kɛkɛ ni Yesu jɛ Galilea eba Yohane ŋɔɔ yɛ Yordan naa, koni ebaptisi lɛ.

¹⁴ Shi Yohane tsi lɛ gbɛ ekɛɛ, “Mi moŋ ni ehia mi akɛ bo obaptisiɔ mi lɛ, ni bo obaa miŋɔɔ nɛɛ?”

¹⁵ Shi Yesu here nɔ ekɛɛ lɛ akɛ, “Kpɛlɛ̃mɔ kɛkɛ, ejaakɛ nɛkɛ sa akɛ wɔgbeɔ jalɛ fɛɛ naa.” Kɛkɛ ni ekpɛlɛ̃.

¹⁶ Ni be ni abaptisi Yesu lɛ, ejɛ nu lɛ mli amrɔ eje kpo; ni naa, agbele ŋwɛi naa ahã lɛ, ni ena Nyɔŋmɔ Mumɔ lɛ miikpeleke shi tamɔ okpo kɛmiiba enɔ.

¹⁷ Ni naa, gbee ko jɛ ŋwɛi kɛɛ, “Mɔ nɛ ji misuɔmɔ Bi ni mina ehe tsui lɛ.”