Mateo 28 - ŊMALƐ KRƆŊKRƆŊ LƐ

Yesu shitee

¹ Shi hejɔɔmɔ gbi lɛ naagbee, be ni je bɔ̃i tsɛremɔ kɛbaa otsi lɛ klɛŋklɛŋ gbi lɛ nɔ lɛ, Maria Magdalena kɛ Maria mɔ kome lɛ ba bu lɛ saramɔ.

² Ni naa, shikpɔŋ ehoso waa, ejaakɛ Nuŋtsɔ lɛ bɔfo jɛ ŋwɛi kpeleke shi, ni ebakoklo tɛ lɛ kɛtee sɛɛ, ni eho eta nɔ.

³ Ni ehiɛ kpɛɔ tamɔ srawa, ni etade lɛ hu yɛɔ futafuta.

⁴ Shi ehe gbeyei hã bulɔi lɛ ahe kpokpo ni amɛtsɔ̃mɔ tamɔ gbohii.

⁵ Shi bɔfo lɛ kɛɛ yei lɛ akɛ, “Nyɛkashea gbeyei, ejaakɛ mile akɛ nyɛmiitao Yesu mɔ ni asɛŋ lɛ lɛ;

⁶ ebɛ biɛ, ejaakɛ ete shi, tamɔ bɔ ni ekɛɛ lɛ. Nyɛbaa nyɛbakwɛa hegbɛ ni akɛ lɛ ŋmɛ lɛ.

⁷ Ni nyɛyaa mramra nyɛyakɛa ekaselɔi lɛ akɛ ete shi kɛjɛ gbohii ateŋ; ni eetsɔ̃ nyɛhiɛ kɛya Galilea; jɛi nyɛaana lɛ yɛ; naa, mikɛɛ nyɛ.”

⁸ Ni amɛyiŋ kɛjɛ bu lɛ he mramra kɛ gbeyei kɛ nyamɔ babaoo, ni amɛhiɛ foi koni amɛyagba ekaselɔi lɛ.

⁹ Ni Yesu kɛ amɛ bakpe ni ekɛɛ, “Hejɔlɛ ahã nyɛ!” Ni amɛbamɔmɔ enaji amli; ni amɛkula shi amɛja lɛ.

¹⁰ Kɛkɛ ni Yesu kɛɛ amɛ akɛ, “Nyɛkashea gbeyei; nyɛyaa ni nyɛyakɛa minyɛmimɛi lɛ, koni amɛya Galilea; ni jɛi amɛaana mi yɛ.”

Onukpai lɛ hã bulɔi lɛ nyɔɔŋnii koni amɛmale

¹¹ Shi be ni amɛyaa lɛ, bulɔi lɛ ateŋ mɛi komɛi eba maŋ lɛ mli, ni amɛbagba nii ni afee lɛ fɛɛ amɛtsɔ̃ɔ osɔfonukpai lɛ.

¹² Ni osɔfonukpai lɛ kɛ onukpai lɛ bɔ gwa ni amɛtee ajina, ni amɛhã asraafoi lɛ jwiɛtɛi pii,

¹³ amɛkɛɛ, “Nyɛkɛa akɛ, nyɔɔŋ, be ni wɔwɔ lɛ, ni ekaselɔi lɛ ba baju lɛ kɛtee.

¹⁴ Ni kɛji enɛ bashɛ Amralo lɛ toiŋ lɛ, wɔ diɛŋtsɛ wɔkɛ lɛ baawie ni wɔkwɛ ni akahao nyɛ.”

¹⁵ Kɛkɛ ni amɛhe jwiɛtɛi lɛ, ni amɛfee bɔ ni atsɔ̃ɔ amɛ lɛ. Ni nɛkɛ sane nɛɛ gbɛ shwã yɛ Yudafoi lɛ ateŋ kɛbashi ŋmɛnɛ.

Yesu tu sane kpakpa lɛ shiɛmɔ ewo kaselɔi lɛ adɛŋ

¹⁶ Shi kaselɔi nyɔŋma kɛ ekome lɛ yiŋ amɛtee Galilea gɔŋ lɛ nɔ, he ni Yesu etsɔ̃ɔ akɛ amɛkɛ lɛ akpe yɛ lɛ,

¹⁷ ni be ni amɛna lɛ lɛ, amɛkula shi amɛja lɛ; shi mɛi komɛi je ŋwane.

¹⁸ Ni Yesu ba ekɛ amɛ bawie ekɛɛ, “Aŋɔ hegbɛ fɛɛ ahã mi yɛ ŋwɛi kɛ shikpɔŋ nɔ.

¹⁹ No hewɔ lɛ, nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ Krɔŋkrɔŋ lɛ gbɛi mli,

²⁰ ni nyɛtsɔ̃ɔ amɛ ni amɛye nii fiaa ni mikɛɛ nyɛ lɛ nɔ. Ni naa, mi lɛ mikɛ nyɛ yɛ daa kɛyaashi jeŋ naagbee lɛ.”