Mateo 27 - ŊMALƐ KRƆŊKRƆŊ LƐ

Akɛ Yesu ba Pilato hiɛ

¹ Be ni je tsɛre lɛ, osɔfonukpai lɛ kɛ maŋ onukpai lɛ fɛɛ tee Yesu yinɔ apam, koni amɛgbe lɛ.

² Ni amɛfi lɛ ni amɛkpala lɛ kɛtee amɛyahã Amralo Pontio Pilato.

Yuda Iskariot gbele

³ Agbɛnɛ be ni Yuda, mɔ ni tsɔ̃ɔ Yesu sɛɛgbɛ lɛ, na akɛ abu lɛ fɔ lɛ, eshwa ehe, ni ekpale jwiɛtɛi kukuji nyɔŋmai etɛ̃ lɛ eyahã osɔfonukpai lɛ kɛ onukpai lɛ,

⁴ ni ekɛɛ, “Mifee esha akɛ mitsɔ̃ɔ lá ni efɔŋ ko bɛ ehe lɛ sɛɛgbɛ.” Shi amɛ lɛ amɛkɛɛ, “No jeee wɔhe sane ko; bo diɛŋtsɛ kwɛmɔ nɔ!”

⁵ Ni eyashɛrɛ jwiɛtɛi lɛ eshwie Sɔlemɔ we lɛ, ni eyiŋ etee eyawo esɛ̃ kpãa.

⁶ Shi osɔfonukpai lɛ yaloo jwiɛtɛi lɛ amɛkɛɛ, “Ejaaa akɛ akɛtoɔ (Sɔlemɔ we lɛ) nitoohe lɛ mli ejaakɛ lá yinii ni.”

⁷ Ni amɛtee ajina, ni amɛkɛhe gbɛshɔ̃lɔ lɛ abɔɔ lɛ, koni afu gbɔi yɛ jɛi.

⁸ No hewɔ lɛ, atsɛɔ nakai abɔɔ lɛ ‘Lá Abɔɔ’ kɛ ŋmɛnɛ.

⁹ No ni gbalɔ Yeremia wiemɔ lɛ ba mli akɛ, “Ni amɛŋɔ jwiɛtɛi kukuji nyɔŋmai etɛ̃ lɛ, ni ji mɔ ni aye enaa ni Israelbii lɛ ateŋ mɛi komɛi wo eyi jara lɛ yinii lɛ;

¹⁰ ni amɛkɛhe gbɛshɔ̃lɔ lɛ abɔɔ lɛ, tamɔ bɔ ni Nuŋtsɔ lɛ fã mi lɛ.”

Pilato bi Yesu nii

¹¹ Shi akɛ Yesu badamɔ Amralo lɛ hiɛ, ni Amralo lɛ bi lɛ akɛ, “Ani bo ji Yudafoi lɛ amaŋtsɛ lɛ?” Ni Yesu kɛɛ lɛ akɛ, “Okɛɛ.”

¹² Shi be ni osɔfonukpai lɛ kɛ onukpai lɛ folɔɔ enaa lɛ, ejieee naa.

¹³ Kɛkɛ ni Pilato bi lɛ akɛ, “Ani onuuu saji sɔŋŋ ni amɛkɛshwieɔ onɔ nɛɛ?”

¹⁴ Shi Yesu efooo edaaŋ kwraa; ni Amralo lɛ naa kpɛ ehe diɛŋtsɛ.

Abu Yesu gbele fɔ

¹⁵ Shi daa kɛ shɛ gbijurɔ lɛ, Amralo lɛ ŋmɛɔ gboklɛfonyo kome ni asafo lɛ sumɔɔ he ehãa amɛ.

¹⁶ No mli lɛ amɛyɛ gboklɛfonyo kpanaku ko ni atsɛɔ lɛ Baraba.

¹⁷ No hewɔ lɛ, be ni amɛbabua amɛhe naa lɛ, Pilato bi amɛ akɛ, “Namɔ he nyɛsumɔɔ akɛ miŋmɛɛ mihã nyɛ, Baraba, aloo Yesu ni atsɛɔ lɛ Kristo lɛ?”

¹⁸ Ejaakɛ ele akɛ hetsɛ̃ naa amɛkɛ lɛ hã.

¹⁹ Shi be ni eta kojomɔ sɛi lɛ nɔ lɛ, eŋa tsu aba eŋɔɔ abakɛɛ lɛ akɛ, “Okɛ jalɔ nɛɛ akaye sane ko; ejaakɛ ehewɔ lɛ mihe ejara mi babaoo yɛ wɔlamɔ mli ŋmɛnɛ.”

²⁰ Shi osɔfonukpai lɛ kɛ onukpai lɛ wo asafoi lɛ ayiŋ akɛ, amɛbi Baraba moŋ, koni agbe Yesu.

²¹ Shi Amralo lɛ bi amɛ akɛ, “Amɛyi enyɔ lɛ, amɛteŋ namɔ he nyɛsumɔɔ akɛ miŋmɛɛ mihã nyɛ?” Ni amɛkɛɛ, “Baraba.”

²² Pilato bi amɛ akɛ, “Belɛ mɛni mifee Yesu ni atsɛɔ lɛ Kristo lɛ he mɔ?” Amɛ fɛɛ amɛkɛɛ, “Hã ni asɛŋ lɛ!”

²³ Ni Amralo lɛ kɛɛ, “Mɛɛ efɔŋ efee?” Shi amɛbolɔ waa moŋ fe tsutsu lɛ amɛkɛɛ, “Hã ni asɛŋ lɛ!”

²⁴ Be ni Pilato na akɛ enyɛɛɛ he nɔ ko efee; shi moŋ basabasa feemɔ miiba lɛ, ekɛ nu fɔ edɛ̃ yɛ asafo lɛ hiɛ, ni ekɛɛ, “Mi lɛ miyeee jalɔ nɛɛ lá yi sɔ̃; nyɛ, nyɛkwɛa nɔ!”

²⁵ Ni maŋ lɛ fɛɛ here nɔ amɛkɛɛ, “Elá aba wɔ kɛ wɔbii anɔ!”

²⁶ Kɛkɛ ni eŋmɛɛ Baraba he ehã amɛ; shi Yesu lɛ, ekɛ kpelebii yi lɛ ni ekɛ lɛ hã ni ayasɛŋ lɛ.

Asraafoi lɛ ye Yesu he fɛo

²⁷ Kɛkɛ ni Amralo lɛ asraafoi lɛ ŋɔ Yesu kɛtee kojomɔhe lɛ, ni amɛyabua asraafoi aku lɛ fɛɛ naa kɛbabɔle lɛ;

²⁸ ni amɛ jie ehe atadei lɛ, ni amɛkɛ atade tsuru yuu ko wo lɛ;

²⁹ ni amɛfee ŋmei akekre amɛkɛfi eyitso, ni amɛkɛ tso hã lɛ ehiɛ yɛ eninejurɔ, ni amɛkula shi yɛ ehiɛ amɛye ehe fɛo amɛkɛɛ, “Oshwiee, Yudafoi amaŋtsɛ!”

³⁰ Ni amɛfɛ̃ lajɔ̃ amɛshwie ehe, ni amɛhe tso lɛ yɛ edɛ̃ ni amɛkɛtswia eyiteŋ.

³¹ Ni be ni amɛye ehe fɛo lɛ, amɛ jie atade yuu lɛ yɛ ehe, ni amɛkɛ lɛ diɛŋtsɛ etadei lɛ wo lɛ, ni amɛkpala lɛ kɛtee koni amɛyasɛŋ lɛ.

Yesu sɛŋmɔ kɛ egbele

³² Be ni amɛyaa lɛ; amɛna nuu Kirenenyo ko ni atsɛɔ lɛ Simon, ni amɛnyɛ enɔ ni ewo Yesu sɛŋmɔtso lɛ.

³³ Ni be ni amɛshɛ he ni atsɛɔ jɛi Golgota ni eshishi ji “Yitsoŋoŋohe” lɛ,

³⁴ amɛkɛ wain ni akɛ drɔ efutu mli hã Yesu ni enu; shi be ni esa enaa lɛ, esumɔɔɔ akɛ enuɔ.

³⁵ Be ni amɛsɛŋ lɛ lɛ, amɛfɔ̃ oshiki amɛkɛja etadei lɛ.

³⁶ Ni amɛho amɛtara jɛi, ni amɛbu ehe.

³⁷ Ni amɛŋma sane ni akɛfɔ̃ enɔ lɛ amɛkpɛtɛ eyiteŋ akɛ, “Yesu, Yudafoi lɛ aMaŋtsɛ lɛ nɛ!”

³⁸ No mli lɛ asɛŋ ojotswalɔi enyɔ afata ehe; mɔ kome yɛ eninejurɔ nɔ, ni mɔ kome hu yɛ ebɛku nɔ.

³⁹ Shi mɛi ni hoɔ lɛ wie musubɔɔ wiemɔ amɛshi lɛ, ni amɛhoso amɛyitsei,

⁴⁰ ni amɛkɛɛ, “Bo ni okumɔɔ Sɔlemɔ we lɛ ni osaa omãa gbii etɛ̃ lɛ, heremɔ bo diɛŋtsɛ oyiwala! Kɛji Nyɔŋmɔ Bi ji bo lɛ, jee sɛŋmɔtso lɛ nɔ okpeleke shi koo!”

⁴¹ Nakai nɔŋŋ osɔfonukpai lɛ hu kɛ mlatsɔɔlɔi lɛ kɛ onukpai lɛ ye ehe fɛo amɛkɛɛ,

⁴² “Mɛi krokomɛi ayiwala ehere, shi lɛ diɛŋtsɛ enɔ lɛ enyɛɛɛ ehere. Israel maŋtsɛ lɛ ji lɛ! Eje sɛŋmɔtso lɛ nɔ agbɛnɛ ekpeleke shi, ni wɔɔhe lɛ wɔye.

⁴³ Ekɛ ehe fɔ̃ Nyɔŋmɔ nɔ; ejie lɛ amrɔ nɛɛ koo, kɛji eyɛ ehe tsui lɛ; ejaakɛ ekɛɛ, ‘Nyɔŋmɔ Bi ji mi.’ ”

⁴⁴ Nakai nɔŋŋ ojotswalɔi lɛ ni asɛŋ afata ehe lɛ hu bɔ lɛ ahora.

⁴⁵ Shi kɛjɛ shwane ŋmɛlɛ nyɔŋma kɛ enyɔ kɛyashi ŋmɛji etɛ̃ lɛ duŋ wo yɛ shikpɔŋ lɛ nɔ fɛɛ.

⁴⁶ Shi ŋmɛji etɛ̃ mli lɛ Yesu bo kɛ gbee ni wa ekɛɛ, “Eli, Eli, lama sabaktani?” Eshishi ji, “MiNyɔŋmɔ, miNyɔŋmɔ, mɛɛba okwa mi?”

⁴⁷ Shi be ni mɛi ni damɔ jɛi lɛ ateŋ mɛi komɛi nu lɛ, amɛkɛɛ, “Elia mɔ nɛ tsɛɔ nɛɛ.”

⁴⁸ Ni amrɔ lɛ amɛteŋ mɔ kome sha foi eyakɔ ŋshɔŋ kotsa, ni ekɛtsɔ̃ ashiŋ mli, ni ekɛma tso naa ehã lɛ akɛ enu.

⁴⁹ Shi mɛi ni eshwɛ lɛ kɛɛ lɛ akɛ, “Ahi shi! Hã wɔkwɛ akɛ Elia aaaba abajie lɛ lo?”

⁵⁰ Shi Yesu bo ekoŋŋ kɛ gbee ni wa, ni ebu enaa.

⁵¹ Ni naa, Sɔlemɔtsu lɛ mli muhɔɔ lɛ mli gba enyɔ kɛjɛ ŋwɛi kɛbayi shi, ni shikpɔŋ hoso, ni tɛsai gbala;

⁵² ni gbohii abui anaa gbelegblei, ni krɔŋkrɔŋbii ni ewɔ lɛ agbɔmɔtsei pii te shi;

⁵³ ni eshitee lɛ sɛɛ lɛ amɛje kpo kɛjɛ amɛbui lɛ amli, ni amɛtee maŋ krɔŋkrɔŋ lɛ mli amɛyajie amɛhe kpo amɛtsɔ̃ɔ mɛi pii.

⁵⁴ Shi be ni asraafoiohaatsɛ lɛ kɛ mɛi ni kɛ lɛ buɔ Yesu he lɛ na shikpɔŋ hosomɔ lɛ kɛ nii ni afee lɛ, amɛshe gbeyei tsɔ̃, ni amɛkɛɛ, “Lɛɛlɛŋ, Nyɔŋmɔ Bi nɛ!”

⁵⁵ Shi yei pii yɛ jɛi ni damɔ shɔŋŋ amɛmiikwɛ; amɛ ji mɛi ni nyiɛ Yesu sɛɛ kɛjɛ Galilea ni amɛsɔ̃mɔɔ lɛ lɛ;

⁵⁶ amɛteŋ mɛi komɛi ji Maria Magdalena kɛ Maria ni ji Yakobo kɛ Yose nyɛ lɛ, kɛ Zebedeo bii lɛ anyɛ lɛ.

Yesu fuu

⁵⁷ Shi be ni shɛ gbɛkɛ lɛ, niiatsɛ ko ni jɛ Arimatia ni atsɛɔ lɛ Yosef lɛ ba; lɛ hu Yesu kaselɔ ji lɛ.

⁵⁸ Lɛ etee Pilato ŋɔɔ eyatutɔ lɛ ni ekɛ Yesu gbonyo lɛ ahã lɛ. Kɛkɛ ni Pilato fã akɛ akɛ Yesu gbonyo lɛ ahã lɛ.

⁵⁹ Ni Yosef ŋɔ gbonyo lɛ, ni ekɛ klala farefare bla lɛ,

⁶⁰ ni ekɛ lɛ yaŋmɛ lɛ diɛŋtsɛ egbonyobu hee ni ekpɛ yɛ tɛsaa mli lɛ mli, ni ekoklo tɛ kpeteŋkple ekɛtsi gbonyobu lɛ naa, ni eyiŋ etee.

⁶¹ Shi Maria Magdalena kɛ Maria mɔ kome lɛ yɛ jɛi, amɛtara gbonyobu lɛ hiɛgbɛ.

Ahã ayabu bu lɛ he

⁶² Shi Hesaamɔ-kɛ-too-Gbi lɛ nɔ jetsɛremɔ lɛ, osɔfonukpai lɛ kɛ Farisifoi lɛ anaa bakpe shi yɛ Pilato ŋɔɔ,

⁶³ amɛkɛɛ, “Nuŋtsɔ, wɔkai akɛ, be ni shishiulɔ nɛɛ hiɛ kã lɛ ekɛɛ, ‘Gbii etɛ̃ sɛɛ lɛ mate shi ekoŋŋ.’

⁶⁴ No hewɔ lɛ, fã ni ayabu bu lɛ he jogbaŋŋ kɛyashi gbi ni ji etɛ̃ lɛ, koni ekaselɔi lɛ akabaju lɛ kɛtee, ni amɛyakɛɛ maŋ lɛ akɛ, ‘Ete shi kɛjɛ gbohii ateŋ’; ni sɛɛkpee shishiumɔ lɛ bafee efɔŋ fe klɛŋklɛŋ nɔ lɛ.”

⁶⁵ Pilato kɛɛ amɛ akɛ, “Naa, asraafoi nɛ, nyɛyaa ni nyɛyabua bɔ ni nyɛaanyɛ.”

⁶⁶ Kɛkɛ ni amɛyiŋ amɛtee; amɛsɔo tɛ lɛ amɛkpɛtɛ gbonyobu lɛ naa kpɛŋŋ, ni amɛhã asraafoi lɛ bu he.