Mateo 26 - ŊMALƐ KRƆŊKRƆŊ LƐ

Atee Yesu yinɔ apam

¹ Ni eba mli akɛ, be ni Yesu egbe wiemɔi nɛɛ fɛɛ anaa lɛ, ekɛɛ ekaselɔi lɛ akɛ,

² “Nyɛle akɛ eshwɛ gbii enyɔ ni ayeɔ Hehoo lɛ, ni aaajie Gbɔmɔ Bi lɛ ahã ni asɛŋ lɛ.”

³ No mli lɛ osɔfonukpai lɛ kɛ mlatsɔɔlɔi lɛ kɛ maŋ onukpai lɛ eyabua amɛhe naa yɛ osɔfonukpa ni atsɛɔ lɛ Kaiafa lɛ mɔɔ lɛ mli.

⁴ Ni amɛtee apam, bɔ ni amɛaafee ni amɛmɔ Yesu ŋaa mli ni agbe lɛ;

⁵ shi amɛkɛɛ, “Jeee gbijurɔ lɛ nɔ, koni maŋ lɛ mli akabafee hirihiri.”

Afɔ Yesu mu yɛ Betania

⁶ Be ni Yesu yɔɔ Betania yɛ Simon, kpitiyelɔ lɛ, we lɛ,

⁷ yoo ko hiɛ alabastro tɔ kɛ emli mukɛŋma ni jara wa kɛba eŋɔɔ, ni be ni eta niyenii ashi lɛ, efɔse eshwie eyiteŋ.

⁸ Shi be ni ekaselɔi lɛ na lɛ; amɛmli wo la amɛkɛɛ, “Te yaka nifitemɔ nɛɛ shishiŋ?

⁹ Ejaakɛ mukɛŋma nɛɛ kulɛ aaanyɛ ahɔ̃ɔ ahe shika pii ni akɛhã ohiafoi.”

¹⁰ Shi be ni Yesu na enɛ lɛ, ekɛɛ amɛ akɛ, “Mɛɛba nyɛgbaa yoo lɛ naa? Etsu nitsumɔ fɛɛfɛo ehã mi.

¹¹ Ejaakɛ ohiafoi lɛ, nyɛkɛ amɛ yɛ daa, shi mi lɛ, jeee daa mikɛ nyɛ aaahi shi.

¹² Ejaakɛ mukɛŋma nɛɛ ni efɔse eshwie migbɔmɔtso lɛ nɔ nɛɛ, efee eto mifuu lɛ.

¹³ Anɔkwale mikɛɔ nyɛ akɛ, he fɛɛ he ni aajaje sane kpakpa nɛɛ yɛ, yɛ jeŋ fɛɛ lɛ, aaagba nɔ ni yoo nɛɛ fee nɛɛ hu akɛkai lɛ.”

Yuda kpɛlɛ̃ nɔ akɛ eeetsɔ̃ɔ Yesu sɛɛgbɛ

¹⁴ Kɛkɛ ni mɛi nyɔŋma kɛ enyɔ lɛ ateŋ mɔ kome ni atsɛɔ lɛ Yuda Iskariot lɛ yiŋ etee osɔfonukpai lɛ aŋɔɔ

¹⁵ ni eyabi akɛ, “Mɛni nyɛaahã mi ni majie lɛ mawo nyɛdɛŋ?” Ni amɛkane jwiɛtɛi kukuji nyɔŋmai etɛ̃ amɛhã lɛ.

¹⁶ Ni kɛjɛ no be lɛ nɔ lɛ etao ehe gbɛ ni eŋɔ lɛ ewo amɛdɛŋ.

Yesu kɛ ekaselɔi lɛ anaagbee niyenii

¹⁷ Shi akpiti gbii juji lɛ amli klɛŋklɛŋ gbi lɛ nɔ lɛ kaselɔi lɛ ba Yesu ŋɔɔ amɛbabi lɛ akɛ, “Nɛgbɛ osumɔɔ akɛ wɔyasaa wɔhã bo ni oyaye Hehoo lɛ yɛ jɛi?”

¹⁸ Ni ekɛɛ, “Nyɛyaa maŋ lɛ mli ni nyɛyakɛa ashimashi akɛ, ‘Tsɔɔlɔ lɛ kɛɛ, mibe lɛ eshɛ etã; owe lɛ mikɛ mikaselɔi lɛ baaye Hehoo lɛ yɛ!’ ”

¹⁹ Ni ekaselɔi lɛ yafee bɔ ni Yesu kɛɛ amɛ lɛ, ni amɛsaa Hehoo niyenii lɛ amɛto.

²⁰ Be ni shɛ gbɛkɛ lɛ, ekɛ mɛi nyɔŋma kɛ enyɔ lɛ yatara niyenii lɛ ahe.

²¹ Ni be ni amɛyeɔ nii lɛ, ekɛɛ, “Anɔkwale mikɛɔ nyɛ akɛ, nyɛteŋ mɔ kome baatsɔ̃ɔ misɛɛgbɛ.”

²² Ni edɔ amɛ naakpa, ni amɛbɔ̃i lɛ bimɔ ekomekome yɛ amɛteŋ akɛ, “Nuŋtsɔ, miŋ lo?”

²³ Shi ehere nɔ ekɛɛ, “Mɔ nine ni kɛ minine kpeɔ yɛ kã lɛ mli lɛ, lɛ ebaatsɔ̃ɔ misɛɛgbɛ lɛ.

²⁴ Gbɔmɔ Bi lɛ miiya tamɔ bɔ ni aŋma yɛ ehe lɛ moŋ; shi kpoo hã mɔ ni tsɔ̃ɔ Gbɔmɔ Bi lɛ sɛɛgbɛ lɛ; faŋ nɔ ni anaaa afɔ nakai gbɔmɔ lɛ.”

²⁵ Ni Yuda, esɛɛgbɛtsɔ̃ɔlɔ lɛ, here nɔ ekɛɛ, “Ani miŋ, Tsɔɔlɔ?” Yesu kɛɛ lɛ akɛ, “Okɛɛ!”

Nuŋtsɔ niyenii lɛ shishitoo

²⁶ Shi be ni amɛyeɔ nii lɛ, Yesu kɔ aboloo, ni ejɔɔ nɔ ni ekumɔ mli, ni ekɛhã ekaselɔi lɛ, ni ekɛɛ, “Nyɛhea, nyɛyea! Enɛ ji migbɔmɔtso lɛ.”

²⁷ Ni ewo kpulu lɛ, ni eda shi ni ekɛhã amɛ ni ekɛɛ, “Nyɛ fɛɛ nyɛnua eko!

²⁸ Ejaakɛ enɛ ji mila ni ji kpãŋmɔ hee lɛ nɔ lɛ, ni afɔse ashwie shi yɛ mɛi pii ahewɔ hã eshaifaa lɛ.

²⁹ Shi miikɛɛ nyɛ akɛ, kɛjɛ benɛ kɛyaa nɛɛ minuŋ waintso yibii nɛɛ eko dɔŋŋ, kɛyashi gbi nɔ ni mikɛ nyɛ aaanu lɛ ehee yɛ miTsɛ maŋtsɛyeli lɛ mli.”

³⁰ Ni be ni amɛla yijiemɔ lala ko lɛ, amɛje kpo amɛtee Mu gɔŋ lɛ nɔ.

Yesu gba bɔ ni Petro baakwa lɛ eto

³¹ Kɛkɛ ni Yesu kɛɛ amɛ akɛ, “Nyɔɔŋ nɛɛŋ lɛ nyɛ fɛɛ nyɛnane aaatɔ̃tɔ̃ yɛ mihewɔ; ejaakɛ aŋma akɛ, ‘Matswa tookwɛlɔ lɛ nɔ, ni tooku lɛ aaagbɛ ashwã.’

³² Shi mishitee sɛɛ lɛ matsɔ̃ nyɛhiɛ kɛya Galilea.”

³³ Shi Petro here nɔ ekɛɛ lɛ akɛ, “Kɛji mɛi lɛ fɛɛ nane aaatɔ̃tɔ̃ yɛ ohewɔ lɛ, mi lɛ minane etɔ̃tɔ̃ŋ gbi ko gbi ko.”

³⁴ Yesu kɛɛ lɛ akɛ, “Anɔkwale mikɛɔ bo akɛ, nyɔɔŋ nɛɛŋ nɔŋŋ, dani wuɔ aaagbɛɛ lɛ, oookpa yɛ misɛɛ shii etɛ̃.”

³⁵ Petro kɛɛ lɛ akɛ, “Kɛji gbo mikɛ bo aaagbo tete lɛ mikpãŋ yɛ osɛɛ.” Nakai nɔŋŋ kaselɔi lɛ fɛɛ hu kɛɛ.

Yesu yɛ Getsemane

³⁶ Agbɛnɛ Yesu kɛ ekaselɔi lɛ ba he ko ni atsɛɔ jɛi Getsemane; ni ekɛɛ amɛ akɛ, “Nyɛtaraa shi yɛ biɛ, koni maya ni mayasɔle yɛ jɛi.”

³⁷ Ni eŋɔ Petro kɛ Zebedeo bihii enyɔ lɛ efata ehe ni ewerɛ bɔ̃i ehe hoo ni ehao.

³⁸ Kɛkɛ lɛ ekɛɛ amɛ akɛ, “Misusuma were eho ehe kɛyaashi gbele mli tɔ̃ɔ, nyɛhia shi yɛ biɛ ni nyɛkɛ mi ashia kpe!”

³⁹ Ni etee hiɛ fioo, ni ekɛ ehiɛ bu shi, ni esɔle ekɛɛ, “MiTsɛ, kɛji aaaho lɛ, hã ni kpulu nɛɛ aho mihe aya; shi kɛ̃lɛ jeee bɔ ni mi misumɔɔ, shi moŋ bɔ ni bo osumɔɔ.”

⁴⁰ Ni eba kaselɔi lɛ aŋɔɔ, ni ena akɛ amɛwɔ, ni ekɛɛ Petro akɛ, “No hewɔ lɛ, nyɛnyɛɛɛ nyɛkɛ mi ashi kpe ŋmɛlɛtswaa kome pɛ?

⁴¹ Nyɛshia kpe ni nyɛsɔlea, koni nyɛkabote kaa mli; mumɔ lɛ miikpɛ̃lɛ̃ moŋ, shi heloo lɛ egbede.”

⁴² Eyiŋ etee ekoŋŋ nɔ ni ji shii enyɔ, ni eyasɔle ekɛɛ, “MiTsɛ, kɛji kpulu nɛɛ nyɛŋ mihe aho aya akɛ ja minu lɛ, afee bɔ ni bo osumɔɔ.”

⁴³ Ni be ni eba ekoŋŋ lɛ, ena akɛ amɛwɔ; ejaakɛ amɛhiŋmɛii etsii.

⁴⁴ Ni esaa eshi amɛ etee ekoŋŋ, ni eyasɔle nɔ ni ji shii etɛ̃, ni ewie nakai wiemɔ lɛ nɔŋŋ.

⁴⁵ Kɛkɛ ni eba ekaselɔi lɛ aŋɔɔ, ni ekɛɛ amɛ akɛ, “Nyɛ lɛ nyɛhe ejɔ nyɛ ni nyɛwɔɔ nɛɛ? Naa; ŋmɛlɛtswaa lɛ eshɛ etã, ni aaŋɔ Gbɔmɔ Bi lɛ awo eshafeelɔi adɛŋ.

⁴⁶ Nyɛtea shi, nyɛhãa wɔyaa; naa, mɔ ni baatsɔ̃ɔ misɛɛgbɛ lɛ eshɛ shi etã.”

Yesu sɛɛgbɛtsɔ̃ɔmɔ kɛ emɔmɔ

⁴⁷ Ni be ni ewieɔ lolo lɛ, naa, Yuda, mɛi nyɔŋma kɛ enyɔ lɛ ateŋ mɔ kome lɛ ba, ni asafo pii ni jɛ osɔfonukpai lɛ kɛ maŋ onukpai lɛ aŋɔɔ, kɛ lɛ nyiɛ, ni amɛhiɛ klantei kɛ kpotii.

⁴⁸ Shi esɛɛgbɛtsɔ̃ɔlɔ lɛ eto amɛ okadi akɛ, “Mɔ naa ni mashwɔ lɛ, lɛ ni; nyɛmɔa lɛ!”

⁴⁹ Ni amrɔ lɛ eba Yesu ŋɔɔ ebakɛɛ, “Oshwiee, Rabi! Ni eshwɔ enaa.”

⁵⁰ Shi Yesu bi lɛ akɛ, “Naanyo, mɛni feemɔ oba yɛ biɛ?” Kɛkɛ ni mɛi lɛ batua Yesu ni amɛmɔ lɛ.

⁵¹ Ni naa, mɛi ni kɛ Yesu yɔɔ lɛ ateŋ mɔ kome kpã enine mli egbala eklante, ni ekɛbã osɔfonukpa lɛ tsulɔ, ni efo etoi.

⁵² Kɛkɛ lɛ Yesu kɛɛ lɛ akɛ, “Kɛ oklante lɛ ato etoohe; ejaakɛ mɛi fɛɛ ni kɔlɔɔ klante lɛ, klante naa amɛhiɛ aaakpãtã yɛ.

⁵³ Aloo osusuɔ akɛ minyɛŋ miTsɛ fai makpa ni amrɔ nɛɛ nɔŋŋ eeehã mi ŋwɛi bɔfoi fe asafoi nyɔŋma kɛ enyɔ?

⁵⁴ Shi no lɛ te aaafee tɛŋŋ ni nɔ ni ŋmalɛi lɛ ni kɛɔ akɛ ja eba lɛ nɛkɛ lɛ aaaba mliŋ?”

⁵⁵ No ŋmɛlɛtswaa lɛ nɔ nɔŋŋ lɛ Yesu kɛɛ asafoi lɛ akɛ, “Mimɔmɔ nyɛba kɛ klante kɛ kpotii, tamɔ amɔɔ ojotswalɔ ko nɛɛ? Mitaa Sɔlemɔ we lɛ daa mitsɔ̃ɔ nii, ni nyɛmɔɔɔ mi.

⁵⁶ Shi afee enɛ fɛɛ koni nii ni gbalɔi lɛ ŋmala lɛ aba mli.” Kɛkɛ ni kaselɔi lɛ fɛɛ jo foi shi lɛ.

Yesu yɛ Gwabɔɔ wulu lɛ hiɛ

⁵⁷ Agbɛnɛ mɛi ni mɔ Yesu lɛ kpala lɛ kɛtee Kaiafa, osɔfonukpa lɛ; ŋɔɔ, yɛ he ni mlatsɔɔlɔi lɛ kɛ onukpai lɛ ebua amɛhe naa yɛ lɛ.

⁵⁸ Shi Petro nyiɛ esɛɛ yɛ shɔŋŋ kɛtee osɔfonukpa lɛ mɔɔ lɛ mli, ni ebote jɛi ekɛ tsuji lɛ yata shi, koni ekwɛ bɔ ni naagbee aaatamɔ ahã.

⁵⁹ Shi osɔfonukpai lɛ kɛ gwabɔɔ lɛ fɛɛ tao amale odase yɛ Yesu he, koni amɛgbe lɛ;

⁶⁰ shi amɛnaaa eko; tsɛbelɛ amale odasefoi pii ba. Fee sɛɛ lɛ amale odasefoi enyɔ ba

⁶¹ amɛbakɛɛ, “Mɔ nɛ kɛɛ akɛ, ‘Manyɛ makumɔ Nyɔŋmɔ Sɔlemɔ we lɛ, ni mama lɛ gbii etɛ̃.’ ”

⁶² Ni osɔfonukpa lɛ te shi ebi lɛ akɛ, “Otooo he eko? Mɛɛ odase mɛnɛɛmɛi yeɔ shiɔ bo nɛɛ?”

⁶³ Shi Yesu etswaaa esɛŋ. Ni osɔfonukpa lɛ kɛɛ lɛ akɛ, “Mina Nyɔŋmɔ, hiɛkãalɔ lɛ, akɛ kɛji bo ji Kristo, Nyɔŋmɔ Bi lɛ, kɛɛmɔ wɔ!”

⁶⁴ Yesu kɛɛ lɛ akɛ, “Okɛɛ. Shi miikɛɛ nyɛ akɛ, kɛjɛ be nɛ nɔ kɛyaa nɛɛ, nyɛaana Gbɔmɔ Bi lɛ akɛ eta Hewalɛ lɛ ninejurɔ nɔ, ni eeba yɛ ŋwɛi atatui lɛ amli.”

⁶⁵ Kɛkɛ ni osɔfonukpa lɛ gbala etadei ni ekɛɛ, “Ebɔ musu! Mɛni wɔsaa wɔtaoɔ odasefoi wɔfee dɔŋŋ? Naa, agbɛnɛ nyɛnu emusubɔɔ lɛ!

⁶⁶ Te nyɛsusuɔ tɛŋŋ?” Amɛhere nɔ amɛkɛɛ, “Esa gbele!”

⁶⁷ Kɛkɛ ni amɛfɛ̃ lajɔ̃ amɛshwie ehiɛ, ni amɛgbala lɛ mai; ni mɛi komɛi hu tswia lɛ nii

⁶⁸ amɛkɛɛ, “Kristo, gbaa otsɔ̃ɔ wɔ, namɔ ji mɔ ni yi bo lɛ?”

Petro kwa Yesu

⁶⁹ Shi Petro ta sɛɛ flɛŋŋ yɛ kpo te lɛ mli; ni oblayoo ko ba eŋɔɔ bakɛɛ, “Bo hu te okɛ Yesu, Galileanyo lɛ, yɔɔ!”

⁷⁰ Shi etso yɛ amɛ fɛɛ amɛhiɛ, ni ekɛɛ, “Mileee nɔ ni okɛɔ nɛɛ.”

⁷¹ Shi be ni Petro te shi etee koi lɛ shi lɛ, mɔ kroko hu na lɛ, ni ekɛɛ mɛi ni yɔɔ jɛi lɛ akɛ, “Mɔ nɛ hu kɛ Yesu, Nazarenyo lɛ, yɔɔ.”

⁷² Ni etso ekoŋŋ kɛ kitãkãmɔ ekɛɛ, “Mileee gbɔmɔ lɛ.”

⁷³ Ni fee sɛɛ fioo lɛ, mɛi ni damɔ jɛi lɛ bakɛɛ Petro akɛ, “Anɔkwale ji akɛ, amɛteŋ mɔ kome ji bo; ejaakɛ owiemɔ tete jieɔ bo shi!”

⁷⁴ Kɛkɛ ni ebɔ̃i loomɔ kɛ kitãkãmɔ akɛ, “Mileee gbɔmɔ lɛ!” Ni amrɔ lɛ wuɔ gbɛɛ.

⁷⁵ Ni Petro kai Yesu wiemɔ ni ekɛɛ lɛ akɛ, “Dani wuɔ aaagbɛ lɛ, oookpa yɛ misɛɛ shii etɛ̃” lɛ. Ni eje kpo eyafo blobloblo.