Mateo 25 - ŊMALƐ KRƆŊKRƆŊ LƐ

Oblayei nyɔŋma lɛ he abɛ lɛ

¹ “No mli lɛ ŋwɛi maŋtsɛyeli lɛ aaatãmɔ oblayei nyɔŋma ni hole amɛkanei ni amɛtee amɛkɛ ayɛmforowu ayakpe.

² Shi amɛteŋ mɛi enumɔ lɛ kwashiai ji amɛ, ni mɛi enumɔ lɛ nilelɔi ni.

³ Kwashiai lɛ hole amɛkanei lɛ shi amɛŋɔɔɔ mu amɛhiɛɛɛ amɛdɛ̃.

⁴ Shi nilelɔi lɛ kɛ mu wo amɛtɔi amli amɛfata amɛkanei lɛ ahe.

⁵ Ni akɛni ayɛmforowu lɛ tsɛ hewɔ lɛ, wɔ ye amɛ fɛɛ ni amɛwɔwɔi.

⁶ Shi nyɔɔŋ teŋ lɛ anu blɔmɔ akɛ, ‘Naa, ayɛmforowu lɛ miiba ee! Nyɛjea kpo, nyɛkɛ lɛ ayakpea!’

⁷ Kɛkɛ ni oblayei lɛ fɛɛ te shi ni amɛsaa amɛkanei lɛ.

⁸ Ni kwashiai lɛ kɛɛ nilelɔi lɛ akɛ, ‘Nyɛhãa wɔ nyɛmu lɛ eko, ejaakɛ wɔkanei lɛ miigboi.’

⁹ Shi nilelɔi lɛ here nɔ amɛkɛɛ, ‘Ekolɛ ebashɛŋ wɔ kɛ nyɛ fɛɛ; shi moŋ nyɛyaa mɛi ni hɔ̃ɔ lɛ aŋɔɔ nyɛyahea eko nyɛhãa nyɛhe,’

¹⁰ Shi be ni amɛtee hemɔ lɛ, ayɛmforowu lɛ ba, ni mɛi ni esaa amɛhe eto lɛ kɛ lɛ tee yookpeemɔ lɛ, ni aŋa shinaa lɛ.

¹¹ No sɛɛ lɛ, oblayei krokomɛi lɛ hu ba ni amɛbakɛɛ, ‘Nuŋtsɔ, Nuŋtsɔ, gbelemɔ wɔ!’

¹² Shi ehere nɔ ekɛɛ, ‘Anɔkwale mikɛɔ nyɛ akɛ mileee nyɛ.’

¹³ No hewɔ lɛ, nyɛsaraa, ejaakɛ nyɛleee gbi lɛ loo ŋmɛlɛtswaa lɛ.”

Tsuji etɛ̃ lɛ ahe abɛ lɛ

¹⁴ “Shi etamɔ nuu ko ni be ni ebaadom lɛ, etsɛ etsuji, ni etu enibii ewo amɛdɛŋ;

¹⁵ ni ehã mɔ kome talentai enumɔ, mɔ kome hu enyɔ, ni mɔ kome hu ekome, mɔ fɛɛ mɔ lɛ bɔ ni eeenyɛ he nii etsu; ni edom.

¹⁶ Ni amrɔ lɛ nɔŋŋ lɛ mɔ ni na talentai enumɔ lɛ tee ni eyatsɔ̃mɔ he, ni ena talentai enumɔ ebɔ he.

¹⁷ Nakai nɔŋŋ mɔ ni na enyɔ lɛ hu yana enyɔ ebɔ he.

¹⁸ Shi mɔ ni na ekome lɛ tee eyatsa shi, ni ekɛ enuŋtsɔ lɛ shika lɛ tee.

¹⁹ “Shi yɛ mli aahu lɛ, tsuji nɛɛ anuŋtsɔ lɛ ba, ni ekɛ amɛ babu akɔntaa.

²⁰ Ni mɔ ni na talentai enumɔ lɛ ba, ni ekɛ talentai enumɔ kroko hu babɔ he ekɛɛ, ‘Nuŋtsɔ, okɛ talentai enumɔ hã mi, naa, mina enumɔ hu mifata he.’

²¹ Enuŋtsɔ lɛ kɛɛ lɛ akɛ, ‘Aekoo, tsulɔ kpakpa kɛ anɔkwafo, oye anɔkwa yɛ nii fioo he, mato bo nii pii anɔkwɛlɔ; botemɔ onuŋtsɔ miishɛɛ lɛ mli.’

²² Ni mɔ ni na talentai enyɔ lɛ hu ba ni ebakɛɛ, ‘Nuŋtsɔ, okɛ talentai enyɔ hã mi, naa, mina talentai enyɔ hu mifata he.’

²³ Enuŋtsɔ lɛ kɛɛ lɛ akɛ, ‘Aekoo, tsulɔ kpakpa kɛ anɔkwafo, oye anɔkwa yɛ nii fioo he, mato bo nii pii anɔkwɛlɔ; botemɔ onuŋtsɔ miishɛɛ lɛ mli.’

²⁴ Shi mɔ ni na talenta kome lɛ hu ba bakɛɛ, ‘Nuŋtsɔ, mile bo akɛ yiwalɔ ji bo; okpaa nii yɛ he ni oduko nɔ ko yɛ, ni obuaa nii anaa yɛ he ni oshwãko nɔ ko yɛ;

²⁵ ni no hã mishe gbeyei, ni miyafu otalenta lɛ. Naa onii.’

²⁶ Shi enuŋtsɔ lɛ here nɔ ni ekɛɛ lɛ akɛ, ‘Tsulɔ fɔŋ kɛ anihaolɔ! Ni ole akɛ mikpaa nii yɛ he ni miduko nɔ ko yɛ ni mibuaa nii anaa yɛ he ni mishwãko nɔ ko yɛ lɛ,

²⁷ kulɛ ogbɛnaa ji akɛ oŋɔɔ mishika lɛ owoɔ tsakelɔi adɛŋ, ni kɛ miba lɛ ni mibahe minii kɛ ehekpa.

²⁸ No hewɔ lɛ, nyɛhea talenta lɛ yɛ edɛŋ, ni nyɛkɛhãa mɔ ni yɔɔ talentai nyɔŋma lɛ.

²⁹ Ejaakɛ mɔ fɛɛ mɔ ni yɔɔ nɔ ko lɛ aaahã lɛ, koni ena ni ateke nɔ; shi mɔ ni bɛ nɔ ko lɛ, aaahe nɔ ni eyɔɔ lɛ tete yɛ edɛŋ.

³⁰ Ni tsulɔ ni he bɛ sɛɛnamɔ ko nɛɛ, nyɛtsia lɛ nyɛwoa gbɛsɛɛ duŋ lɛ mli; jɛi yaafo kɛ nyanyɔji ashishikpemɔ aaahi!’ ”

Jeŋmaji lɛ akojomɔ

³¹ “Shi be ni Gbɔmɔ Bi lɛ aaaba yɛ enunyam lɛ mli, ni bɔfoi lɛ fɛɛ aaafata ehe lɛ, no mli lɛ eeeta enunyam sɛ̃i lɛ nɔ;

³² ni aaabua jeŋmaji lɛ fɛɛ anaa yɛ ehiɛ, ni eeegbala amɛmli tamɔ bɔ ni tookwɛlɔ gbalaa gwantɛŋi kɛ abotiai amli lɛ.

³³ Ni ekɛ gwantɛŋi lɛ aaadamɔ eninejurɔ nɔ, shi abotiai lɛ ekɛ amɛ aaadamɔ ebɛku nɔ.

³⁴ Kɛkɛ lɛ Maŋtsɛ lɛ aaakɛɛ mɛi ni yɔɔ eninejurɔ nɔ lɛ akɛ, ‘Nyɛbaa, nyɛ mɛi ni miTsɛ ejɔɔ nyɛ, nyɛbaŋɔa maŋtsɛyeli lɛ ni asaa ato nyɛ kɛjɛ jeŋ shishijee lɛ!

³⁵ Ejaakɛ hɔ̃mɔ ye mi, ni nyɛhã mi nii miye; kumai ye mi, ni nyɛhã mi nu minu; gbɔ ji mi, ni nyɛhã mibato nyɛŋɔɔ;

³⁶ minyiɛ yayai, ni nyɛwo mi atade; mihe ye, ni nyɛbasara mi; awo mi tsuŋ, ni nyɛba miŋɔɔ.’

³⁷ Kɛkɛ lɛ jalɔi lɛ aaahere lɛ nɔ amɛaakɛɛ akɛ, ‘Nuŋtsɔ, te gbi ni wɔna bo akɛ hɔ̃mɔ miiye bo, ni wɔhã bo nii oyeŋ, aloo akɛ kumai miiye bo, ni wɔhã bo nɔ ko onuŋ?

³⁸ Ni te gbi ni wɔna bo akɛ gbɔ ji bo, ni wɔhã obato wɔŋɔɔŋ; aloo akɛ onyiɛ yayai ni wɔwo bo atade?

³⁹ Asaŋ te gbi ni wɔna bo akɛ ohe miiye aloo awo bo tsuŋ, ni wɔba oŋɔɔŋ?’

⁴⁰ Ni maŋtsɛ lɛ aaahere nɔ ekɛɛ amɛ akɛ, ‘Anɔkwale mikɛɔ nyɛ akɛ, gbii abɔ kɛ̃ ni nyɛfee nyɛhã minyɛmimɛi nɛɛ ateŋ bibioo kome lɛ, mi nɔŋŋ nyɛfee nyɛhã lɛ.’

⁴¹ “Kɛkɛ lɛ eeekɛɛ mɛi ni yɔɔ ebɛku nɔ lɛ hu akɛ, ‘Nyɛjea minɔ, nyɛ mɛi ni alomɔ nyɛ, nyɛyaa naanɔ la lɛ ni asaa ato abonsam kɛ ebɔfoi lɛ mli!

⁴² Ejaakɛ hɔ̃mɔ ye mi, ni nyɛhãaa mi nii maye; kumai ye mi, ni nyɛhãaa mi nu manu;

⁴³ gbɔ ji mi, ni nyɛhãaa mabato nyɛŋɔɔ; minyiɛ yayai, ni nyɛwooo mi atade; mihe ye ni asaŋ awo mi tsuŋ, ni nyɛbasaraaa mi.’

⁴⁴ Kɛkɛ lɛ amɛ hu amɛaahere lɛ nɔ amɛaakɛɛ akɛ, ‘Nuŋtsɔ, te gbi ni wɔna bo akɛ hɔmɔ miiye bo aloo kumai miiye bo aloo akɛ gbɔ ji bo aloo onyiɛ yayai aloo ohe miiye aloo awo bo tsuŋ, ni wɔbasɔmɔɔɔ bo lɛ?’

⁴⁵ Kɛkɛ lɛ eeehere amɛ nɔ eeekɛɛ akɛ, ‘Anɔkwale mikɛɔ nyɛ akɛ, gbii abɔ ni nyɛfeee nyɛhãaa mɛi bibii kwraa nɛɛ ateŋ mɔ kome lɛ, nyɛfeee nyɛhãaa mi hu!’

⁴⁶ Ni mɛnɛɛmɛi lɛ, amɛaatee naanɔ hejaramɔ mli; shi jalɔi lɛ aaatee naanɔ wala mli.”