Mateo 24 - ŊMALƐ KRƆŊKRƆŊ LƐ

Sɔlemɔ we lɛ fitemɔ he gbalɛ

¹ Ni Yesu je kpo yɛ Sɔlemɔ we lɛ ni be ni eyaa lɛ, ekaselɔi lɛ ba eŋɔɔ ni amɛkɛ Sɔlemɔ we lɛ tsui lɛ tsɔ̃ɔ lɛ.

² Shi Yesu kɛɛ amɛ akɛ, “Te nyɛmiina nii nɛɛ fɛɛ? Anɔkwale mikɛɔ nyɛ akɛ, ashiŋ tɛ kome yɛ eko nɔ yɛ biɛ ni akpãŋ aluŋ shi.”

Amanehului ashishijee

³ Shi be ni eta shi yɛ Mugɔŋ lɛ nɔ lɛ, ekaselɔi lɛ ba eŋɔɔ yɛ afã amɛbakɛɛ lɛ akɛ, “Tsɔ̃ɔmɔ wɔ beyinɔ ni aaafee nii nɛɛ, ni mɛni ji obaa lɛ kɛ je nɛɛŋ naagbee lɛ he okadi?”

⁴ Ni Yesu here nɔ ekɛɛ amɛ akɛ, “Nyɛkwɛa ni ahia koni mɔ ko akabalaka nyɛ.

⁵ Ejaakɛ mɛi pii kɛ migbɛi aaabakɛɛ akɛ, ‘Mi ji Kristo lɛ!’ Ni amɛaalaka mɛi pii.

⁶ Shi nyɛaanu tai kɛ tai atatsĩĩ ahe; nyɛkwɛa ni nyɛtsui akafãa; ejaakɛ esa akɛ nii nɛɛ fɛɛ aba mli, shi kɛ̃lɛ naagbee lɛ shɛko.

⁷ Shi maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔ̃ji kɛ shikpɔŋ hosomɔi aaaba hei srɔtoi.

⁸ Shi enɛɛmɛi fɛɛ lɛ kɔ̃ɔmɔi lɛ ashishijee ni.

⁹ Nakai be lɛ mli lɛ amɛaaŋɔ nyɛ amɛwo amanehulu mli, ni amɛaagbe nyɛ; ni migbɛi lɛ hewɔ lɛ jeŋmaji fɛɛ aaanyɛ nyɛ.

¹⁰ Ni nakai be lɛ mli lɛ mɛi pii anane aaatɔ̃tɔ̃ ni amɛaatsɔ̃ɔtsɔ̃ɔ amɛnanemɛi asɛɛgbɛ, ni amɛaanyɛnyɛɛ amɛhe.

¹¹ Ni amale gbalɔi pii aaate shi, ni amɛaalaka mɛi pii.

¹² Ni akɛni mlakwamɔ baafa hewɔ lɛ, mɛi pii asuɔmɔ lɛ he aaajɔ.

¹³ Shi mɔ ni hiɛɔ mli kɛyawulaa shi lɛ, lɛ eyiwala aaahere.

¹⁴ Ni aaashiɛ maŋtsɛyeli lɛ he sane kpakpa nɛɛ atsɔ̃ɔ yɛ je lɛ mli fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”

Amanehulu kpeteŋkple lɛ

¹⁵ “No hewɔ lɛ, kɛ nyɛna ‘Amaŋfɔ̃ nihiinii lɛ’ ni gbalɔ Daniel wie he lɛ akɛ ema he krɔŋkrɔŋ lɛ (mɔ ni kaneɔ lɛ eyoo sɛɛ!)

¹⁶ No lɛ mɛi ni yɔɔ Yudea lɛ ajo foi amɛya gɔji lɛ anɔ;

¹⁷ mɔ ni yɔɔ tsu yiteŋ lɛ, ekakpeleke shi eyakɔ nɔ ko kɛjɛ eshĩa;

¹⁸ ni mɔ ni yɔɔ ŋmɔshi lɛ, ekaaku esɛɛ eyakɔ etade.

¹⁹ Shi kpoo hã yei ni hiɛ musu kɛ yei ni hãa fufɔ yɛ nakai bei lɛ amli lɛ!

²⁰ Shi nyɛsɔlea, koni nyɛfoijee lɛ akaba yɛ fɛ̃i be lɛ mli aloo yɛ hejɔɔmɔ gbi lɛ nɔ.

²¹ Ejaakɛ nakai be lɛ mli lɛ amanehulu kpele aaaba ni anako enɔ dã kɛjɛ je lɛ shishijee mli kɛbashi ŋmɛnɛ, ni asaŋ anaŋ enɔ gbi ko gbi ko dɔŋŋ.

²² Ni kɛ afooo nakai gbii lɛ anɔ lɛ, ahereŋ heloo ko heloo ko yiwala; shi mɛi ni ahala lɛ ahewɔ lɛ aaafo nɔ.

²³ No mli lɛ, kɛji mɔ ko kɛɛ nyɛ akɛ, ‘Naa, Kristo lɛ yɛ biɛ loo biɛ lɛ’, nyɛkahea nyɛyea.

²⁴ Ejaakɛ amale kristoi kɛ amale gbalɔi aaate shi ni amɛaafee okadii wuji kɛ ashwãi amɛtsɔ̃ɔ, bɔ ni kɛ aaaho lɛ amɛaalaka halamɔbii lɛ tete.

²⁵ Naa, mikɛɛ nyɛ mito.

²⁶ No hewɔ lɛ, kɛji amɛkɛɛ nyɛ akɛ, ‘Naa, eyɛ ŋa lɛ nɔ lɛ’, nyɛkayaa; aloo, ‘naa, eyɛ piai lɛ amli lɛ;’ nyɛkahea nyɛyea.

²⁷ Ejaakɛ bɔ ni srawa gbaa kɛjɛɔ bokã kɛyaa anai lɛ, nakai nɔŋŋ Gbɔmɔ Bi lɛ baa lɛ aaatamɔ.

²⁸ Ejaakɛ he fɛɛ he ni gbonyo kã lɛ, jɛi akpaŋai buaa amɛhe naa yɛ.”

Gbɔmɔ Bi lɛ baa

²⁹ “Shi nakai gbii lɛ amli amanehului lɛ asɛɛ nɔŋŋ lɛ, hulu aaawo duŋ, ni nyɔɔŋtsere kpɛŋ dɔŋŋ, ni ŋulamii aaatserɛ kɛaajɛ ŋwɛi atswia shi, ni ŋwɛi hewalɛi lɛ aaahoso.

³⁰ Kɛkɛ lɛ Gbɔmɔ Bi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana Gbɔmɔ Bi lɛ ni eeba yɛ ŋwɛi atatui lɛ anɔ kɛ hewalɛ kɛ anunyam babaoo.

³¹ Ni eeetsu ebɔfoi lɛ kɛ tɛtɛrɛmantɛrɛ ni gbee wa, ni amɛaabua ehalamɔbii lɛ anaa kɛaajɛ kɔɔyɔi ejwɛ lɛ anɔ, kɛajɛ ŋwɛi naagbeehe kome kɛaaya naagbeehe kroko lɛ.”

Agbãmitso he nikasemɔ

³² “Shi nyɛkasea agbãmitso abɛ ni ebuɔ lɛ, be ni eniji lɛ efrɔke ni eefu baa lɛ, nyɛle akɛ latsaa be lɛ eshɛ etã.

³³ Nakai nɔŋŋ nyɛ hu, kɛ nyɛna nii nɛɛ fɛɛ lɛ, nyɛlea akɛ eshɛ agboi lɛ anaa etã.

³⁴ Anɔkwale mikɛɔ nyɛ akɛ, nɛkɛ yinɔ nɛɛ hoŋ, ja nii nɛɛ fɛɛ eba mli dã.

³⁵ Ŋwɛi kɛ shikpɔŋ baaho aya, shi miwiemɔi lɛ hoŋ eyaŋ.”

Mɔ ko leee gbi lɛ kɛ ŋmɛlɛtswaa lɛ

³⁶ “Shi nakai gbi lɛ kɛ nakai ŋmɛlɛtswaa lɛ mɔ ko mɔ ko leee nɔ ko yɛ he, bɔfoi ni yɔɔ ŋwɛi lɛ tete leee, ni Bi lɛ leee, ja Tsɛ lɛ kome kɛkɛ.

³⁷ Shi bɔ ni Noa gbii lɛ fee lɛ, nakai Gbɔmɔ Bi lɛ baa lɛ hu aaatamɔ.

³⁸ Ejaakɛ bɔ ni eyɔɔ yɛ gbii ni nyiɛ nu afua lɛ hiɛ lɛ amli, ni mɛi lɛ hiɛ niyeli kɛ ninumɔ kɛ yooŋɔɔ kɛ gbãlãhamɔ mli aahu kɛyashi gbi ni Noa yabote adeka lɛ mli,

³⁹ ni amɛleee kɛyashi nu afua lɛ baloo amɛ fɛɛ kɛtee lɛ, nakai nɔŋŋ Gbɔmɔ Bi lɛ baa lɛ aaatamɔ.

⁴⁰ No mli lɛ mɛi enyɔ aaahi ŋmɔshi; aaaŋɔ mɔ kome, ni aaashi mɔ kome lɛ.

⁴¹ Yei enyɔ aaawiɛ yɛ wiɛ sɛɛ; aaaŋɔ mɔ kome, ni aaashi mɔ kome lɛ.

⁴² No hewɔ lɛ, nyɛsaraa, ejaakɛ nyɛleee nɔ gbi nɔ ni nyɛnuŋtsɔ lɛ baa.

⁴³ Shi nyɛkaia akɛ, kɛ shĩatsɛ ko le nɔ ŋmɛlɛtswaa nɔ ni julɔ baa lɛ, kulɛ eeesra ni eŋmɛŋ gbɛ ni agbu ewe lɛ awoŋ.

⁴⁴ No hewɔ lɛ, nyɛ hu nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛsusuuu lɛ nɔ Gbɔmɔ Bi lɛ baa.”

Tsuji anɔkwafoi

⁴⁵ “Belɛ namɔ ji tsulɔ anɔkwafo kɛ nilelɔ mɔ ni enuŋtsɔ kɛ lɛ eto ewebii lɛ anɔ, koni ehã amɛ amɛŋmaa yɛ be ni sa mli lɛ?

⁴⁶ Ajɔɔ nakai tsulɔ lɛ, mɔ ni be ni enuŋtsɔ lɛ baa lɛ ni eeebana lɛ ni eefee nakai lɛ.

⁴⁷ Anɔkwale mikɛɔ nyɛ akɛ ekɛ lɛ aaato enii fɛɛ kwa nɔ.

⁴⁸ “Shi kɛji nakai tsulɔ fɔŋ lɛ aaakɛɛ yɛ etsui mli akɛ, ‘Minuŋtsɔ lɛ miitsi ebaabe lɛ eeto;’

⁴⁹ ni eeebɔ̃i enanemɛi tsuji lɛ yii, ni ekɛ dãatɔlɔi lɛ aaaye, ni ekɛ amɛ aaanu lɛ,

⁵⁰ nakai tsulɔ lɛ nuŋtsɔ lɛ aaaba yɛ gbi nɔ ni ekwɛɛɛ lɛ gbɛ kɛ ŋmɛlɛtswaa nɔ ni eleee,

⁵¹ ni eeefo emli enyɔ ni eeehã lɛ egbɛfaŋnɔ yɛ osatofoi lɛ ateŋ. Jɛi yaafo kɛ nyanyɔji ashishikpemɔ aaahi.”