Mateo 23 - ŊMALƐ KRƆŊKRƆŊ LƐ

Yesu wie shi mlatsɔɔlɔi lɛ kɛ Farisifoi lɛ

¹ Kɛkɛ ni Yesu kɛ asafoi lɛ kɛ ekaselɔi lɛ wie ekɛɛ,

² “Mlatsɔɔlɔi lɛ kɛ Farisifoi lɛ, Mose sɛ̃i lɛ nɔ amɛtara lɛ.

³ No hewɔ lɛ, nɔ fɛɛ nɔ ni amɛaakɛɛ nyɛ akɛ nyɛye nɔ lɛ nyɛyea nɔ ni nyɛfea; shi nyɛkafea nibii ni amɛfeɔ lɛ; ejaakɛ amɛkɛɔ moŋ shi amɛfeee.

⁴ Shi amɛfimɔɔ jatsui kɛ tsiimɔ amɛŋmɛlɛɔ mɛi akɔ̃ji anɔ; shi amɛ diɛŋtsɛ lɛ, amɛsumɔ̃ɔɔ akɛ amɛkɛ amɛwao saa he.

⁵ Shi amɛnii fɛɛ lɛ amɛfeɔ koni mɛi ana. Ejaakɛ amɛhãa amɛsɔlemɔkaimɔ kotokui kɛ amɛtadei anaamui lɛ lɛɔ.

⁶ Amɛsumɔɔ yitsotamɔ kɛji atsɛ okplɔ̃, kɛ onukpai asɛii yɛ kpeehei lɛ,

⁷ kɛ jaanɔ ŋamɔi, ni amɛsumɔɔ akɛ mɛi atsɛ amɛ ‘Tsɔɔlɔ!’

⁸ Shi nyɛ lɛ, akatsɛ nyɛ ‘Tsɔɔlɔ’; ejaakɛ mɔ kome ji nyɛ-Tsɔɔlɔ; shi nyɛ fɛɛ lɛ, nyɛmimɛi ji nyɛ.

⁹ Ni nyɛkatsɛa mɔ ko nyɛTsɛ yɛ shikpɔŋ lɛ nɔ; ejaakɛ mɔ kome pɛ ji nyɛTsɛ, mɔ ni yɔɔ ŋwɛi lɛ.

¹⁰ Asaŋ akatsɛ nyɛ ‘Nuŋtsɔ’; ejaakɛ mɔ kome pɛ ji nyɛNuŋtsɔ, lɛ ji Kristo.

¹¹ Shi mɔ ni ji agbo yɛ nyɛteŋ lɛ, etsɔ̃ nyɛtsulɔ.

¹² Mɔ fɛɛ mɔ ni aaawo ehe nɔ lɛ, aaaba lɛ shi; ni mɔ fɛɛ mɔ ni aaaba ehe shi lɛ, aaawo enɔ.

¹³ “Kpoo hã nyɛ, mlatsɔɔlɔi kɛ Farisifoi, osatofoi! Nyɛŋaa ŋwɛi maŋtsɛyeli lɛ naa nyɛwoɔ gbɔmɛi; nyɛ diɛŋtsɛ lɛ nyɛboteee mli, ni mɛi ni taoɔ mli abote lɛ hu, nyɛŋmɛɛɛ amɛ gbɛ ni amɛbote mli.” [

¹⁴ “Kpoo hã nyɛ, mlatsɔɔlɔi kɛ Farisifoi, osatofoi! Nyɛyeɔ okulafoi agboshinii yɛ amɛdɛŋ, ni nyɛkɛ ablatoo sɔleɔ sɔlemɔi kakadaji. No hewɔ lɛ, nyɛkojomɔ aaafe nine.”]

¹⁵ “Kpoo hã nyɛ, mlatsɔɔlɔi kɛ Farisifoi, osatofoi! Nyɛbɔleɔ ŋshɔ kɛ shikpɔŋ kpula, koni nyɛfee mɔ kome Yudafonyo; ni be ni mɔ lɛ etsɔ̃ nakai lɛ, nyɛfeɔ lɛ abonsamiiaje bi toi enyɔ fe nyɛ diɛŋtsɛ nyɛhe.

¹⁶ “Kpoo hã nyɛ, gbɛtsɔ̃ɔlɔi shwilafoi! Nyɛ ni nyɛkɛɔ akɛ, ‘Mɔ ni aaakã Sɔlemɔtsu lɛ kitã lɛ, no jeee nɔ ko; shi mɔ ni aaakã Sɔlemɔtsu lɛ he shika ŋmiiŋmi lɛ kitã lɛ, efiɔ lɛ.’

¹⁷ Shwilafoi kwashiai! Te nɔ ni feŋ, shika ŋmiiŋmi lɛ, loo Sɔlemɔtsu lɛ ni hãa shika ŋmiiŋmi lɛ feɔ krɔŋkrɔŋ lɛ?

¹⁸ Ni asaŋ, ‘Mɔ ni aaakã afɔleshãa latɛ lɛ kitã lɛ, no jeee nɔ ko; shi mɔ ni aaakã enɔ afɔle lɛ kitã lɛ, efiɔ lɛ.’

¹⁹ Shwilafoi kwashiai! Te nɔ ni feŋ, afɔle lɛ, loo afɔleshãa latɛ lɛ ni hãa afɔle lɛ feɔ krɔŋkrɔŋ lɛ?

²⁰ No hewɔ lɛ, mɔ ni aaakã afɔleshãa latɛ lɛ kitã lɛ, ekã no kɛ nii ni yɔɔ nɔ lɛ fɛɛ kitã.

²¹ Ni mɔ ni kãa Sɔlemɔtsu lɛ kitã lɛ, ekã no kɛ mɔ ni hiɔ mli lɛ kitã.

²² Ni mɔ ni kãa ŋwɛi kitã lɛ, ekã Nyɔŋmɔ sɛ̃i lɛ kɛ mɔ ni ta nɔ lɛ hu kitã.

²³ “Kpoo hã nyɛ, mlatsɔɔlɔi kɛ Farisifoi, osatofoi! Nyɛhãa kowɛ kɛ anisi kɛ kumino mlijaa nyɔŋmanyɔŋma, shi Mla lɛ mli nii ni he jaraa ni ji jalɛ saneyeli kɛ mɔbɔnalɛ kɛ hemɔkɛyeli lɛ nyɛshiɔ; enɛɛmɛi sa akɛ nyɛfeɔ kɛshiɔ ekrokomɛi lɛ anɔ.

²⁴ Gbɛtsɔ̃ɔlɔi shwilafoi nyɛtsereɔ nɔ nɔ adɔ̃dɔ̃ŋ, shi nyɛmiɔ yooma!

²⁵ “Kpoo hã nyɛ, mlatsɔɔlɔi kɛ Farisifoi, osatofoi! Nyɛtsumɔɔ kpulu he kɛ kã sɛɛ; shi amɛmligbɛ eyimɔ obɔ̃bɔ̃ kɛ ojotswaa kɛ adufudeyeli.

²⁶ “Farisifonyo shwilafo, sha kpulu lɛ kɛ kã lɛ mli ni aje tsutsu, kɛkɛ lɛ esɛɛ hu aaaje!

²⁷ “Kpoo hã nyɛ, mlatsɔɔlɔi kɛ Farisifoi, osatofoi! Nyɛtamɔ gbohii asaŋi ni asha he ni amɛhewɔ efee fɛo moŋ, shi amɛmligbɛ lɛ eyimɔ obɔ̃bɔ̃ kɛ gbohii awui kɛ muji nibii srɔtoi fɛɛ.

²⁸ Nakai nɔŋŋ nyɛ hu, yɛ kpo nɔ gbɛ lɛ, nyɛpueɔ akɛ jalɔi yɛ gbɔmɛi ahiɛ, shi yɛ mligbɛ lɛ nyɛyimɔ obɔ̃bɔ̃ kɛ osato kɛ mlatɔ̃mɔ̃.

²⁹ “Kpoo hã nyɛ, mlatsɔɔlɔi kɛ Farisifoi, osatofoi! Nyɛmãmɔɔ gbalɔi lɛ atoohei, ni nyɛwulaa jalɔi lɛ asaŋi lɛ,

³⁰ ni nyɛkɛɔ akɛ, ‘Eji wɔtsɛmɛi ayinɔ lɛ wɔyɛ jeŋ kulɛ, wɔfataŋ amɛhe kɛshwieŋ gbalɔi lɛ alá shi.’

³¹ Belɛ nyɛ diɛŋtsɛ nyɛmiiye nyɛhe odase akɛ mɛi ni gbe gbalɔi lɛ abii ji nyɛ.

³² Nyɛ hu nyɛwoa nyɛtsɛmɛi lɛ asusumɔ tsene lɛ obɔ̃ mɔ!

³³ Onufui, shikpãi ashwiei! Te nyɛaafee tɛŋŋ nyɛjo abonsamiiaje fɔbuu lɛ naa foiŋ?

³⁴ No hewɔ lɛ, naa, miitsu gbalɔi kɛ nilelɔi kɛ mlatsɔɔlɔi kɛba nyɛŋɔɔ, ni nyɛaagbe amɛteŋ mɛi komɛi ni nyɛaasɛŋ mɛi komɛi, ni mɛi krokomɛi lɛ nyɛaayi amɛ kpelebii yɛ nyɛkpeehei lɛ, ni nyɛaawa amɛ yi kɛaajɛ maŋ kome mli kɛaatee ekroko mli.

³⁵ Bɔ ni afee ni jalɔi alá fɛɛ ni ashwie shi yɛ shikpɔŋ lɛ nɔ kɛjɛ Abel, jalɔ lɛ, lá lɛ nɔ kɛbashi Zakaria, Barakia bi lɛ, ni nyɛgbe lɛ yɛ Sɔlemɔtsu lɛ kɛ afɔleshãa latɛ lɛ teŋ lɛ lá lɛ nɔ lɛ aba nyɛnɔ.

³⁶ Anɔkwale mikɛɔ nyɛ akɛ, enɛɛmɛi fɛɛ aaaba yinɔbii nɛɛ anɔ.”

Yesu ye Yerusalɛm he jaramɔ

³⁷ “Yerusalɛm, Yerusalɛm, bo ni ogbeɔ gbalɔi lɛ ni otswiaa mɛi ni atsuɔ amɛ oŋɔɔ lɛ atɛi; shii enyiɛ mitao akɛ kulɛ mabua obii anaa tamɔ bɔ ni wuɔ buaa ebii anaa ewoɔ efiji ashishi lɛ, ni nyɛkpɛlɛ̃ɛɛ!

³⁸ Naa, ashi nyɛwe lɛ amaŋfɔ̃ ahã nyɛ!

³⁹ Ejaakɛ miikɛɛ nyɛ akɛ, kɛjɛ be nɛɛ nɔ kɛyaa nɛɛ nyɛnaŋ mi dɔŋŋ kɛyashi beyinɔ ni nyɛaakɛɛ akɛ, ‘Ajɔɔ mɔ ni baa yɛ Nuŋtsɔ lɛ gbɛi mli lɛ.’ ”