Mateo 20 - ŊMALƐ KRƆŊKRƆŊ LƐ

Waintrom mli nitsulɔi lɛ

¹ “Ejaakɛ ŋwɛi maŋtsɛyeli lɛ tamɔ nuu shĩatsɛ ko ni je kpo maŋkɛ mra ni eyabɔ nitsulɔi apaa kɛya ewaintrom mli.

² Ni be ni ekɛ nitsulɔi lɛ eye naa denario kome jenamɔ lɛ, ewo amɛ gbɛ kɛtee ewaintrom lɛ mli.

³ Ni kɛbaa ŋmɛlɛ nɛɛhu mli lɛ, eje kpo ekoŋŋ ni eyana mɛi krokomɛi damɔ shi efolo yɛ jaa lɛ nɔ;

⁴ ni ekɛɛ mɛnɛɛmɛi hu akɛ, ‘Nyɛ hu nyɛyaa waintrom lɛ mli, ni nɔ ni sa lɛ, mahã nyɛ,’ ni amɛtee.

⁵ Asaŋ kɛbaa ŋmɛlɛ nyɔŋma kɛ enyɔ mli kɛ ŋmɛji etɛ̃ mli lɛ eje kpo, ni eyafee nakai nɔŋŋ.

⁶ Ni kɛbaa gbɛkɛ ŋmɛji enumɔ mli lɛ eje kpo ni eyana mɛi krokomɛi hu damɔ shi efolo, ni ebi amɛ akɛ, ‘Mɛɛba ni nyɛdamɔ shi efolo yɛ biɛ jenamɔ nɛɛ fɛɛ nɛɛ?’

⁷ Amɛkɛɛ lɛ akɛ, ‘Akɛni mɔ ko ebɔko wɔ apaa lɛ hewɔŋ.’ Ekɛɛ amɛ akɛ, ‘Nyɛ hu nyɛyaa waintrom lɛ mli.’

⁸ “Agbɛnɛ be ni shɛ gbɛkɛ lɛ, waintromtsɛ lɛ kɛɛ etsulɔ nukpa lɛ akɛ, ‘Tsɛ nitsulɔi lɛ ni owo amɛ nyɔmɔ, ni obɔ̃i kɛjɛ sɛɛkpee bii lɛ anɔ kɛyashi klɛŋklɛŋ bii lɛ anɔ.’

⁹ Ni be ni gbɛkɛ ŋmɛji enumɔ bii lɛ ba lɛ, amɛ fɛɛ amɛna denario komekome.

¹⁰ Ni be ni klɛŋklɛŋ bii lɛ ba lɛ, amɛsusu akɛ amɛaana fe nakai; shi amɛ hu amɛna denario komekome.

¹¹ Shi be ni eshɛ amɛdɛŋ lɛ, amɛshɛ tɔkemɔ kɛ shĩatsɛ lɛ woo

¹² akɛ, ‘Sɛɛkpee bii nɛɛ; ŋmɛlɛtswaa kome kɛkɛ amɛtsu nii, ni ohã amɛ kɛ wɔ ni wɔtsu nii jenamɔ ni etɔ wɔ ni latsaa etsa wɔ lɛ fɛɛ pɛ!’

¹³ Shi ehere nɔ ekɛɛ amɛteŋ mɔ kome akɛ, ‘Naanyo, mifeko bo efɔŋ ko; ani jeee denario okɛ mi ye naa?

¹⁴ Ŋɔɔ nɔ ni ji onɔ lɛ ni oya. Shi miisumɔ akɛ mahã sɛɛkpee mɔ nɛɛ tamɔ bɔ ni mihã bo lɛ nɔŋŋ.

¹⁵ Aloo mibɛ hegbɛ akɛ mikɛ mi diɛŋtsɛ minii feɔ nɔ ni misumɔɔ? Ani mimlihilɛ lɛ hewɔ ohiŋmɛi etsu nɛɛ?’

¹⁶ Nɛkɛ ni sɛɛkpeebii aaatsɔ̃mɔ klɛŋklɛŋbii, ni klɛŋklɛŋbii aaatsɔ̃mɔ sɛɛkpeebii; [ejaakɛ atsɛ mɛi pii, shi mɛi fioo ahala.]”

Yesu wie egbele kɛ eshitee he nɔ ni ji shii etɛ̃

¹⁷ Ni be ni Yesu yaa Yerusalɛm lɛ, ekɛ ekaselɔi nyɔŋma kɛ enyɔ lɛ tee afã yɛ gbɛteŋ lɛ mli, ni ekɛɛ amɛ nigii akɛ,

¹⁸ “Naa, wɔmiiya Yerusalɛm, ni akɛ Gbɔmɔ Bi lɛ aaawo osɔfonukpai kɛ mlatsɔɔlɔi lɛ adɛŋ, ni amɛaabu lɛ gbele fɔ.

¹⁹ Ni amɛkɛ lɛ aaahã jeŋmajiaŋbii lɛ ni amɛye ehe fɛo ni amɛkɛ kpelebii ayi lɛ ni amɛsɛŋ lɛ, ni gbi ni ji etɛ̃ lɛ aaatee lɛ shi.”

Yakobo kɛ Yohane nibimɔ lɛ

²⁰ Kɛkɛ ni Zebedeo bii lɛ anyɛ kɛ ebihii lɛ ba eŋɔɔ ebakula shi ni eba lɛ nɔ ko.

²¹ Ni Yesu bi lɛ akɛ, “Mɛni otaoɔ?” Ehere lɛ nɔ akɛ, “Kɛɛmɔ ni mibii enyɔ nɛɛ ateŋ mɔ kome ata oninejurɔ nɔ, ni mɔ kome hu ata obɛku nɔ yɛ omaŋtsɛyeli lɛ mli.”

²² Shi Yesu here nɔ ekɛɛ bii lɛ akɛ, “Nyɛleee nɔ ni nyɛbiɔ lɛ. Ani nyɛaanyɛ kpulu ni mibanu lɛ nyɛnu?” Amɛkɛɛ lɛ akɛ, “Wɔɔnyɛ.”

²³ Ni ekɛɛ amɛ akɛ, “Mikpulu lɛ nyɛaanu moŋ shi mininejurɔ kɛ mibɛku nɔ tamɔ lɛ, ejeee minɔ ni mikɛhãa, shi moŋ mɛi ni miTsɛ esaa eto amɛ lɛ anɔŋ.”

²⁴ Ni be ni mɛi nyɔŋma lɛ nu lɛ, amɛmli wo nyɛmimɛi enyɔ lɛ la.

²⁵ No hewɔ lɛ, Yesu tsɛ amɛ kɛba eŋɔɔ, ni ekɛɛ amɛ akɛ, “Nyɛle akɛ jeŋmaji lɛ anɔ lumɛi lɛ yeɔ amɛnɔ akɛ nuŋtsɔmɛi, ni amɛteŋ gbɔmɛi agboi lɛ hu yɛ amɛnɔ hewalɛ.

²⁶ Shi nyɛ lɛ ebɛ nyɛ nakai; shi mɔ fɛɛ mɔ ni taoɔ agbo atsɔ̃ yɛ nyɛteŋ lɛ, efee ehe nyɛsɔ̃ɔlɔ;

²⁷ ni mɔ ni taoɔ nyɛteŋ onukpa atsɔ̃ lɛ, efee ehe nyɛtsulɔ.

²⁸ Tamɔ bɔ ni Gbɔmɔ Bi lɛ baaa ni asɔmɔ lɛ, shi eba sɔ̃ɔmɔ moŋ ni ekɛ esusuma lɛ ahã yɛ mɛi pii akpɔ̃mɔ hewɔ lɛ.”

Yesu tsa shwilafoi enyɔ

²⁹ Ni be ni amɛjɛ Yeriko amɛyaa lɛ, asafo babaoo nyiɛ esɛɛ.

³⁰ Ni hii shwilafoi enyɔ tara gbɛ lɛ toi, ni be ni amɛnu akɛ Yesu miiho lɛ, amɛbolɔ amɛkɛɛ, “Nuŋtsɔ David Bi, naa wɔ mɔbɔ!”

³¹ Shi asafo lɛ famɔ amɛyi akɛ amɛmua amɛnaa; shi amɛbolɔ moŋ fe tsutsu lɛ akɛ, “Nuŋtsɔ David Bi, naa wɔ mɔbɔ!”

³² Ni Yesu wa damɔ shi ni etsɛ amɛ, ni ebi amɛ akɛ, “Mɛni nyɛtaoɔ akɛ mifee mihã nyɛ?”

³³ Amɛkɛɛ lɛ akɛ, “Nuŋtsɔ, akɛ agbele wɔhiŋmɛii lɛ.”

³⁴ Ni Yesu musuŋ tsɔ̃ lɛ, ni etara amɛhiŋmɛii lɛ ahe, ni amrɔ lɛ amɛna nii, ni amɛnyiɛ esɛɛ.