Mateo 2 - ŊMALƐ KRƆŊKRƆŊ LƐ

Nilelɔi ni jɛ bokã lɛ

¹ Be ni afɔ Yesu yɛ Betlehem yɛ Yudea, yɛ Maŋtsɛ Herode yinɔ lɛ, nilelɔi jɛ bokã ba Yerusalɛm babi akɛ,

² “Nɛgbɛ Yudafoi amaŋtsɛ ni afɔ lɛ yɔɔ? Wɔna eŋulami lɛ yɛ bokã ni wɔba ni wɔbaja lɛ.”

³ Shi be ni Maŋtsɛ Herode nu enɛ lɛ, ekɛ Yerusalɛm fɛɛ yoyoro;

⁴ ni ebua maŋ lɛ osɔfonukpai lɛ kɛ mlatsɔɔlɔi lɛ fɛɛ anaa, ni ebi amɛ he ni aaafɔ Kristo lɛ yɛ.

⁵ Ni amɛkɛɛ lɛ akɛ, “Yɛ Betlehem yɛ Yudea; shi bɔ ni gbalɔ lɛ ŋma nɛ,

⁶ ‘Ni bo, Betlehem ni oyɔɔ Yuda shikpɔŋ lɛ nɔ lɛ, jeee bo ji bibioo fe fɛɛ yɛ Yuda lumɛi lɛ ateŋ kwraa, shi omli lumɔ ni aaakwɛ mimaŋ Israel lɛ aaajɛ!’ ”

⁷ Kɛkɛ ni Herode tsɛ nilelɔi lɛ nigii, ni ebi amɛ fitsofitso beyinɔ ni ŋulami lɛ pue.

⁸ Ni ehã amɛtee Betlehem ni ekɛɛ, “Nyɛyaa ni nyɛyataoa abifao lɛ fitsofitso; ni kɛ nyɛna lɛ lɛ, nyɛbakɛa mi, koni mi hu maya ni mayaja lɛ.”

⁹ Be ni amɛnu maŋtsɛ lɛ wiemɔ lɛ, amɛyiŋ amɛtee. Ni ŋulami lɛ ni amɛna yɛ bokã lɛ nyiɛ amɛhiɛ aahu, kɛyashi ebadamɔ he ni abifao lɛ yɔɔ lɛ yiteŋ.

¹⁰ Ni be ni amɛna ŋulami lɛ, amɛna miishɛɛ babaoo diɛŋtsɛ.

¹¹ Ni amɛtee shĩa lɛ, ni amɛna abifao lɛ kɛ enyɛ Maria lɛ; ni amɛkula shi amɛja lɛ. Amɛfɛne amɛkotokui anaa, ni amɛkekee lɛ nii: shika kɛ krɔbɔo kɛ mire.

¹² Ni akɛni ajie atsɔ̃ɔ amɛ yɛ wɔlamɔ mli akɛ amɛkaku amɛsɛɛ amɛtee Herode ŋɔɔ dɔŋŋ lɛ amɛtsɔ̃ gbɛ kroko nɔ kɛtee amɛshikpɔŋ nɔ.

Foijee kɛ Ijipt yaa

¹³ Ni be ni amɛtee lɛ, Nuŋtsɔ lɛ bɔfo jie ehe kpo etsɔ̃ɔ Yosef yɛ wɔlamɔ mli ni ekɛɛ, “Tee shi; ŋɔɔ abifao lɛ kɛ enyɛ lɛ, ni ojo foi oya Ijipt, ni ohi jɛi kɛyashi beyinɔ ni makɛɛ bo nɔ ko; shi Herode baatao abifao lɛ ni egbe lɛ,”

¹⁴ Ni ete shi eŋɔ abifao lɛ kɛ enyɛ lɛ nyɔɔŋ, ni eyiŋ etee Ijipt.

¹⁵ Ni ehi shi yɛ jɛi kɛyashi Herode gbo; koni nɔ ni Nuŋtsɔ lɛ wie yɛ gbalɔ lɛ naa lɛ aba mli akɛ, “Ijipt mitsɛ mibi lɛ kɛjɛ.”

Betlehem abifabii lɛ ahiɛkpãtãmɔ

¹⁶ Agbɛnɛ be ni Herode na akɛ nilelɔi lɛ yeee lɛ anɔkwa lɛ, emli fu waa, ni etsu ayagbe gbekɛbii hii fɛɛ ni yɔɔ Betlehem kɛ jɛi niiaŋ fɛɛ, mɛi ni eye afii enyɔ kɛ mɛi ni yeko nakai lɛ, kɛji abu kɛjɛ be ni ebi nilelɔi lɛ sane lɛ fitsofitso lɛ.

¹⁷ No ni nɔ ni gbalɔ Yeremia kɛɛ lɛ ba mli akɛ,

¹⁸ “Anu gbee ko yɛ Rama, yaafo kɛ ŋkɔmɔyeli babaoo; Rahel miifo ebii, ni ekpɛlɛ̃ɛɛ miishɛjemɔ, ejaakɛ amɛbɛ.”

Sɛɛkuu kɛ Ijipt jɛɛ

¹⁹ Shi be ni Herode egbo lɛ, Nuŋtsɔ lɛ bɔfo jie ehe kpo etsɔ̃ɔ Yosef yɛ wɔlamɔ mli yɛ Ijipt,

²⁰ ni ekɛɛ, “Tee shi ni oŋɔ abifao lɛ kɛ enyɛ lɛ ni oya Israel shikpɔŋ lɛ nɔ; shi mɛi ni taoɔ abifao lɛ amɛgbe lɛ amɛgboi.”

²¹ Ni Yosef te shi ni eŋɔ abifao lɛ kɛ enyɛ lɛ, ni eba Israel shikpɔŋ lɛ nɔ.

²² Shi be ni enu akɛ Arkelao miiye maŋtsɛ yɛ Yudea yɛ etsɛ Herode sɛɛ lɛ, eshe jɛiyaa gbeyei; ni akɛni ajie atsɔ̃ɔ lɛ yɛ wɔlamɔ mli lɛ, edɔ eyi kɛtee Galilea niiaŋ.

²³ Ni eba ebahi maŋ ko ni atsɛɔ lɛ Nazaret lɛ mli, koni nɔ ni gbalɔi lɛ wie lɛ aba mli akɛ, “Aaatsɛ lɛ Nazarenyo.”