Mateo 19 - ŊMALƐ KRƆŊKRƆŊ LƐ

Gbãlãtsemɔ he nitsɔɔmɔ

¹ Ni eba mli akɛ, be ni Yesu egbe wiemɔi nɛɛ anaa lɛ, eje Galilea eba Yudea kpokpai lɛ anɔ yɛ Yordan sɛɛ;

² ni mɛi pii nyiɛ esɛɛ ni etsatsaa amɛ yɛ jɛi.

³ Ni Farisifoi lɛ ba eŋɔɔ ni amɛbatsɔ̃ lɛ amɛbi lɛ akɛ, “Ani eja akɛ nuu shwieɔ eŋa yɛ sane fɛɛ sane hewɔ?”

⁴ Ni ehere nɔ ekɛɛ amɛ akɛ, “Ani nyɛkaneko akɛ, mɔ ni bɔ gbɔmɔ yɛ shishijee lɛ mli lɛ, nuu kɛ yoo ebɔ amɛ?

⁵ Ni ekɛɛ, ‘Enɛ hewɔ ni nuu aaashi etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ̃ heloo kome lɛ.’

⁶ Belɛ agbɛnɛ amɛjeee mɛi enyɔ dɔŋŋ, shi moŋ heloo kome; no hewɔ lɛ, nɔ ni Nyɔŋmɔ kɛtsa lɛ, akahã gbɔmɔ miigbala mli.”

⁷ Amɛbi lɛ akɛ, “Mɛɛ hewɔ mɔ ni Mose wo kitã akɛ ahã shwiemɔ wolo ni ashwie lɛ lɛ?”

⁸ Ekɛɛ amɛ akɛ, “Nyɛtsuiwalɛ hewɔ ni Mose hã nyɛ hegbɛ akɛ nyɛshwie nyɛŋamɛi lɛ; shi shishijee lɛ mli lɛ ebɛ nakai.

⁹ Shi miikɛɛ nyɛ akɛ, mɔ fɛɛ mɔ ni jeee ajwamãŋbɔɔ hewɔ jɛ ni eeeshwie eŋa ni eyaŋɔ yoo kroko lɛ efite gbãlã; [ni mɔ fɛɛ mɔ ni ŋɔɔ yoo ni ashwie lɛ lɛ, lɛ hu efiteɔ gbãlã.”]

¹⁰ Ekaselɔi lɛ kɛɛ lɛ akɛ, “Kɛji nɛkɛ nuu kɛ eŋa sane yɔɔ lɛ, belɛ ehiii akɛ aŋɔɔ yoo mɔ.”

¹¹ Shi ekɛɛ amɛ akɛ, “Jeee mɛi fɛɛ aaanyɛ wiemɔ nɛɛ mli amɔ, ja mɛi ni akɛhã lɛ kɛkɛ.

¹² Ejaakɛ osaii komɛi yɛ ni afɔ amɛ nakai kɛjɛ amɛnyɛmɛi amusu mli; ni osaii komɛi yɛ ni gbɔmɛi sa amɛ; ni osaii lɛ ekrokomɛi hu yɛ ni ŋwɛi maŋtsɛyeli lɛ hewɔ amɛ diɛŋtsɛ amɛsa amɛhe. Mɔ ni aaanyɛ mli amɔ lɛ, emɔ mli!”

Yesu jɔɔ gbekɛbii

¹³ Kɛkɛ ni akɛ gbekɛbii bibii ba eŋɔɔ, koni ekɛ eniji ashwie amɛnɔ ni esɔle ehã amɛ. Shi ekaselɔi lɛ fãmɔ amɛ.

¹⁴ Shi Yesu kɛɛ, “Nyɛhãa gbekɛbii lɛ abaa miŋɔɔ, ni nyɛkatsia amɛ gbɛ; ejaakɛ mɛi ni tamɔ mɛnɛɛmɛi anɔ ji ŋwɛi maŋtsɛyeli lɛ.”

¹⁵ Ni ekɛ eniji shwie amɛnɔ; ni eje jɛi.

Oblanyo niiatsɛ lɛ

¹⁶ Ni mɔ ko ba eŋɔɔ ni ebabi lɛ akɛ, “Tsɔɔlɔ, mɛɛ nɔ kpakpa po mafee ni mana naanɔ wala?”

¹⁷ Ni ekɛɛ lɛ akɛ, “Mɛɛba obiɔ mi nɔ kpakpa he sane? Mɔ kome yɔɔ ni ji mɔ kpakpa [lɛ ji Nyɔŋmɔ]. Shi kɛji ootao akɛ obote wala mli lɛ, ye kitãi lɛ anɔ.”

¹⁸ Ebi lɛ akɛ, “Te nii ni jiŋ?” Ni Yesu kɛɛ, “Kaagbe gbɔmɔ; kaafite gbãlã; kaaju; kaaye amale odase;

¹⁹ wo otsɛ kɛ onyɛ; kɛ suɔmɔ onaanyo gbɔmɔ tamɔ bɔ ni osumɔɔ bo diɛŋtsɛ ohe lɛ.”

²⁰ Oblanyo lɛ kɛɛ lɛ akɛ, “Enɛɛmɛi fɛɛ lɛ miye nɔ kɛjɛ migbekɛbiiashi. Mɛni shwɛɔ mi lolo?”

²¹ Yesu kɛɛ lɛ akɛ, “Kɛji ootao akɛ ohi kɛwula shi lɛ, yaa ni oyahɔ̃ɔ nii ni oyɔɔ lɛ, ni okɛhã ohiafoi, ni ooona jwetri yɛ ŋwɛi; ni oba obanyiɛ misɛɛ.”

²² Shi be ni oblanyo lɛ nu wiemɔ nɛɛ lɛ, eyiŋ etee kɛ dɔlɛ; ejaakɛ eyɛ nii babaoo.

²³ Ni Yesu kɛɛ ekaselɔi lɛ akɛ, “Anɔkwale mikɛɔ nyɛ akɛ ewa hã niiatsɛ akɛ eeebote ŋwɛi maŋtsɛyeli lɛ mli.

²⁴ Shi asaŋ miikɛɛ nyɛ akɛ ejaraaa hãaa yooma akɛ eeetsɔ̃ abui hiŋmɛi mli, tamɔ bɔ ni ejaraa hãa niiatsɛ akɛ eeebote Nyɔŋmɔ Maŋtsɛyeli lɛ mli lɛ.”

²⁵ Ni be ni ekaselɔi lɛ nu lɛ, amɛhe jɔ̃ amɛhe tsɔ̃ ni amɛkɛɛ, “Belɛ namɔ yiwala aaanyɛ ahere mɔ?”

²⁶ Shi Yesu kwɛ amɛ, ni ekɛɛ amɛ akɛ, “Gbɔmɛi agbɛfaŋ lɛ anyɛŋ enɛ afee; shi Nyɔŋmɔ gbɛfaŋ lɛ aaanyɛ nii fɛɛ afee.”

Yesu sɛɛnyiɛmɔ mli nyɔmɔwoo

²⁷ Kɛkɛ ni Petro here nɔ ni ekɛɛ, “Naa, wɔ lɛ wɔshi nii fɛɛ, ni wɔbanyiɛ osɛɛ; belɛ mɛni wɔbaana?”

²⁸ Shi Yesu kɛɛ amɛ akɛ, “Anɔkwale mikɛɔ nyɛ akɛ, nyɛ mɛi ni nyɛnyiɛ misɛɛ nɛɛ, be ni Gbɔmɔ Bi lɛ aaata enunyam sɛ̃i lɛ nɔ yɛ jeŋ hee lɛ mli lɛ, nyɛ hu nyɛaatara sɛ̃ii nyɔŋma kɛ enyɔ nɔ, ni nyɛaakojo Israel akutsei nyɔŋma kɛ enyɔ lɛ.

²⁹ Ni mɔ fɛɛ mɔ ni eshi shĩai loo nyɛmimɛi hii loo nyɛmimɛi yei loo tsɛ loo nyɛ loo ŋa loo bii loo shikpɔji yɛ migbɛi lɛ hewɔ lɛ, aaato lɛ najiaŋ toi oha, ni eeena naanɔ wala.

³⁰ Shi klɛŋklɛŋ bii pii aaatsɔ̃mɔ sɛɛkpee bii, ni sɛɛkpee bii aaatsɔ̃mɔ klɛŋklɛŋ bii.”