Mateo 17 - ŊMALƐ KRƆŊKRƆŊ LƐ

Yesu gbɔmɔtso su tsake

¹ Gbii ekpaa sɛɛ lɛ, Yesu ŋɔ Petro kɛ Yakobo kɛ enyɛmi Yohane, ni ekɛ amɛ tee gɔŋ ni kwɔ ko nɔ, ekɛ amɛ pɛ.

² Ni egbɔmɔtso su tsake yɛ amɛhiɛ, ni ehiɛ kpɛ tamɔ hulu, ni etadei lɛ yɛ tamɔ la.

³ Ni naa, Mose kɛ Elia bajie amɛhe kpo amɛtsɔ̃ɔ amɛ ni amɛkɛ lɛ miiwie.

⁴ Ni Petro here nɔ ni ekɛɛ Yesu akɛ, “Nuŋtsɔ, ehi akɛ wɔyɛ biɛ! Kɛji oosumɔ lɛ, mafee bui etɛ̃ yɛ biɛ, onɔ ekome, kɛ Mose nɔ ekome, kɛ Elia nɔ ekome.”

⁵ Be ni ewieɔ lolo lɛ, naa, atatu halaŋŋ ko bakete amɛnɔ, ni gbee ko jɛ atatu lɛ mli kɛɛ, “Mɔ nɛ ji misuɔmɔ Bi ni minaa ehe tsui lɛ; nyɛboa lɛ toi!”

⁶ Ni be ni kaselɔi lɛ nu lɛ, amɛkɛ amɛhiɛ bumɔ shi, ni amɛshe gbeyei naakpa.

⁷ Ni Yesu ba ni ebatara amɛhe ekɛɛ, “Nyɛtea shi, nyɛkashea gbeyei!”

⁸ Shi be ni amɛwo amɛhiɛ nɔ lɛ, amɛnaaa mɔ ko akɛ ja Yesu kome pɛ.

⁹ Ni be ni amɛkpelekeɔ gɔŋ lɛ, Yesu tswa amɛnaa mã ekɛɛ, “Nyɛkagbaa ninaa nɛɛ nyɛtsɔ̃a mɔ ko, akɛ ja Gbɔmɔ Bi lɛ ete shi kɛjɛ gbohii ateŋ dã.”

¹⁰ Ni ekaselɔi lɛ bi lɛ akɛ, “Mɛɛ hewɔ mɔ ni mlatsɔɔlɔi lɛ kɛɔ akɛ, ja Elia eba dã lɛ?”

¹¹ Yesu here nɔ ekɛɛ amɛ akɛ, “Eyɛ mli lɛɛlɛŋ akɛ Elia miiba, ni ebaato nibii fɛɛ gbɛjianɔ ekoŋŋ;

¹² shi miikɛɛ nyɛ akɛ, Elia eba momo, ni amɛyooo lɛ, shi moŋ amɛfee lɛ nɔ fɛɛ nɔ ni amɛsumɔɔ. Nakai nɔŋŋ Gbɔmɔ Bi lɛ hu baana amanehulu yɛ amɛdɛŋ.”

¹³ Kɛkɛ ni kaselɔi lɛ kɔ sɛɛ akɛ Yohane Baptisilɔ lɛ he ekɛ amɛ wieɔ lɛ.

Yesu tsa gbekɛ nuu ko ni mumɔ fɔŋ yɔɔ emli

¹⁴ Be ni amɛshɛ asafo lɛ ŋɔɔ lɛ, nuu ko ba eŋɔɔ, ni ebakula shi yɛ ehiɛ,

¹⁵ ni ekɛɛ, “Nuŋtsɔ, naa mibi nuu lɛ mɔbɔ, shi eeye gbligbli ni eena nɔ po ni ehiii, ejaakɛ bianɛ bianɛ eyagbee la mli, ni bianɛ bianɛ eyagbee nu mli.

¹⁶ Ni mikɛ lɛ ba okaselɔi lɛ aŋɔɔ, shi amɛnyɛɛɛ lɛ amɛtsa.”

¹⁷ Shi Yesu here nɔ ni ekɛɛ, “Ao yinɔbii ni heee yeee ni bɛ amɛŋlɛnɔ! Mɛɛ beyinɔ mikɛ nyɛ aaahi shi kɛyashi? Mɛɛ beyinɔ nɔŋŋ mato mitsui shi mahã nyɛ kɛyashi? Nyɛkɛ lɛ abaa biɛ nyɛbahãa mi!”

¹⁸ Ni Yesu fã mumɔ fɔŋ lɛ yi, ni mumɔ fɔŋ lɛ jɛ emli je kpo, ni gbekɛ lɛ he wa lɛ yɛ nakai ŋmɛlɛtswaa lɛ nɔ nɔŋŋ.

¹⁹ Kɛkɛ ni Yesu kaselɔi lɛ ba eŋɔɔ yɛ afã, ni amɛkɛɛ, “Mɛɛba wɔ lɛ wɔnyɛɛɛ lɛ wɔfã lɛ?”

²⁰ Shi ekɛɛ amɛ akɛ, “Nyɛhemɔkɛyeli ni faaa lɛ hewɔŋ. Ejaakɛ anɔkwale mikɛɔ nyɛ akɛ kɛji nyɛyɛ hemɔkɛyeli ni tamɔ sinapi wu lɛ, nyɛaakɛɛ gɔŋ nɛɛ akɛ, ‘Fãa yɛ biɛ kɛya jɛi!’ Ni eeefã; ni nɔ ko bɛ ni nyɛnyɛŋ nyɛfee. [

²¹ Shi nɛkɛ henɔ nɛɛ, anyɛɛɛ lɛ afã akɛ ja sɔlemɔ kɛ ŋmaahilɛ naa kɛkɛ.]”

Yesu wie egbele kɛ eshitee he ekoŋŋ

²² Shi be ni amɛkpaa Galilea lɛ, Yesu kɛɛ amɛ akɛ, “Abaaŋɔ Gbɔmɔ Bi lɛ awo gbɔmɛi adɛŋ,

²³ ni amɛaagbe lɛ, ni gbi ni ji etɛ̃ lɛ nɔ lɛ aaatee lɛ shi.” Ni amɛwerɛ ho amɛhe tsɔ̃.

Sɔlemɔtsu onia

²⁴ Be ni amɛba Kapernaum lɛ, oniatsulɔi lɛ ba Petro ŋɔɔ babi akɛ, “Ani nyɛtsɔ̃ɔlɔ lɛ wooo Sɔlemɔtsu onia lɛ?”

²⁵ Ekɛɛ, “Ewoɔ.” Ni be ni eba shĩa lɛ, Yesu tsɔ̃ hiɛ ekɛɛ, “Te osusuɔ tɛŋŋ, Simon? Shikpɔŋ lɛ nɔ maŋtsɛmɛi lɛ, namɛi adɛŋ amɛheɔ too loo onia yɛ? Yɛ amɛ diɛŋtsɛ amɛbii adɛŋ loo mɛi kpɔ̃ji adɛŋ?”

²⁶ Petro kɛɛ lɛ akɛ, “Yɛ mɛi kpɔ̃ji adɛŋ.” Yesu kɛɛ lɛ akɛ, “Belɛ bii lɛ yeɔ amɛhe mɔ.

²⁷ Shi bɔ ni afee ni wɔkato amɛ pampi lɛ, yaa ŋshɔ lɛ naa oyafɔ̃ kpoŋ, ni loo klɛŋklɛŋ ni aaabakɔ kpoŋ lɛ, sha lɛ, ni kɛ ogbɛ edaaŋ lɛ, ooona shika ni naa shiɔ yii enyɔ; kɔ ni okɛhã amɛ, ohã mi kɛ bo fɛɛ.”