Mateo 16 - ŊMALƐ KRƆŊKRƆŊ LƐ

Farisifoi kɛ Sadukifoi lɛ bi Yesu okadi

¹ Ni Farisifoi kɛ Sadukifoi lɛ baka Yesu, amɛbi lɛ akɛ etsɔ̃ɔ amɛ ŋwɛi okadi ko.

² Shi ehere nɔ ekɛɛ amɛ akɛ, “Gbɛkɛ mli lɛ nyɛkɛɔ akɛ, ‘Jeŋ baatse, ejaakɛ ŋwɛi etsu.’

³ Ni leebi lɛ nyɛkɛɔ akɛ, ‘Ŋmɛnɛ nyɔŋmɔ baanɛ’, ejaakɛ ŋwɛi etsu ni ehiɛ eha. Osatofoi, nyɛle ŋwɛi atatuiaŋ nibii ashishitsɔ̃ɔmɔ, shi bei lɛ ahe okadii lɛ nyɛnyɛɛɛ shishi nyɛtsɔ̃ɔ!

⁴ Yinɔbii fɔ̃ji kɛ gbãlãfitelɔi miitao okadi, shi ahaŋ amɛ okadi ko, akɛ ja gbalɔ Yona okadi lɛ.” Ni eshi amɛ eyiŋ etee.

Farisifoi kɛ Sadukifoi amãsha lɛ

⁵ Ni be ni ekaselɔi lɛ yaa ŋshɔ lɛ sɛɛ lɛ, amɛhiɛ kpa nɔ ni amɛŋɔ aboloo amɛhiɛ amɛdɛ.

⁶ Shi Yesu kɛɛ amɛ akɛ, “Nyɛkwɛa jogbaŋŋ ni nyɛhiɛ ahia nyɛhe nɔ yɛ Farisifoi kɛ Sadukifoi lɛ amasha lɛ he!”

⁷ Shi amɛwiewie he yɛ amɛteŋ amɛkɛɛ, “Aboloo ni wɔhiɛɛɛ lɛ hewɔŋ!”

⁸ Shi be ni Yesu nu lɛ, ekɛɛ, “Nyɛ ni nyɛhemɔkɛyeli faaa! Mɛni hewɔ nyɛwiewieɔ yɛ nyɛteŋ akɛ aboloo ni nyɛhiɛɛɛ lɛ hewɔŋ?

⁹ Nyɛnako nii anaa lolo? Ni nyɛsaa nyɛkaiii mɛi akpei enumɔ lɛ aboloi enumɔ lɛ kɛ kafui abɔ ni nyɛkɔlɔ lɛ,

¹⁰ aloo mɛi akpei ejwɛ lɛ aboloi kpawo lɛ kɛ flɔtɔi abɔ ni nyɛkɔlɔ lɛ?

¹¹ Te tɛŋŋ ni nyɛnaaa naa akɛ jeee aboloo he mikɛ nyɛ wie lɛ? Nyɛhiɛ ahĩa nyɛhe nɔ yɛ Farisifoi kɛ Sadukifoi lɛ amasha lɛ he!”

¹² Agbɛnɛ amɛyoo akɛ jeee aboloo masha hewɔ ekɛɛ amɛhiɛ ahi amɛhe nɔ lɛ, shi moŋ Farisifoi kɛ Sadukifoi lɛ atsɔ̃ɔmɔ lɛ hewɔŋ.

Petro odase ni eye yɛ Yesu he

¹³ Shi be ni Yesu ba Kaisarea Filipi niiaŋ lɛ, ebi ekaselɔi lɛ akɛ, “Namɔ mɛi kɛɔ akɛ Gbɔmɔ Bi lɛ ji?”

¹⁴ Amɛkɛɛ akɛ, “Mɛi komɛi kɛɔ akɛ Yohane Baptisilɔ lɛ ni; ni mɛi komɛi kɛɔ akɛ Elia ni; ni mɛi krokomɛi hu kɛɔ akɛ Yeremia loo gbalɔi lɛ ateŋ mɔ kome ni.”

¹⁵ Ebi amɛ akɛ, “Shi nyɛ lɛ, namɔ nyɛkɛɔ akɛ mi ji?”

¹⁶ Simon Petro here nɔ ekɛɛ, “Bo ji Kristo lɛ, Nyɔŋmɔ hiɛkãalɔ lɛ Bi lɛ!”

¹⁷ Ni Yesu here nɔ ekɛɛ lɛ akɛ, “Ajɔɔ bo, Simon, Yona bi; ejaakɛ jeee heloo kɛ lá jie enɛ tsɔ̃ɔ bo, shi moŋ miTsɛ ni yɔɔ ŋwɛi lɛ.

¹⁸ Ni mi hu miikɛɛ bo akɛ, bo ji Petro lɛ, ni nɛkɛ tɛsaa nɛɛ nɔ matswa misafo lɛ mama, ni gbohiiaje agboi lɛ nyɛŋ enɔ aye.

¹⁹ Ni maŋɔ ŋwɛi maŋtsɛyeli lɛ naa samfei lɛ mahã bo; nɔ fɛɛ nɔ ni ooofi yɛ shikpɔŋ lɛ nɔ lɛ, aaafi yɛ ŋwɛi; ni nɔ fɛɛ nɔ ni ooofɛne yɛ shikpɔŋ lɛ nɔ lɛ, aaafɛne yɛ ŋwɛi.

²⁰ Kɛkɛ ni etswa ekaselɔi lɛ anaa mã akɛ amɛkakɛɛ mɔ ko akɛ lɛ ji Kristo lɛ.”

Yesu wie egbele kɛ eshitee he

²¹ Kɛjɛ nakai be lɛ nɔ lɛ Yesu bɔ̃i ekaselɔi lɛ tsɔ̃ɔmɔ akɛ ja etee Yerusalɛm ni eyana amanehulu pii yɛ onukpai lɛ kɛ osɔfonukpai lɛ kɛ mlatsɔɔlɔi lɛ adɛŋ, ni agbe lɛ, ni gbi ni ji etɛ̃ lɛ nɔ lɛ ete shi.

²² Ni Petro ŋɔ lɛ kɛtee afa, ebɔ̃i lɛ kɔkɔbɔɔ ekɛɛ, “Nyɔŋmɔ akahã enɛ ba mli, Nuŋtsɔ; enɛ akagbale bo fɔ̃ŋfɔ̃!”

²³ Shi etsɔ̃ ehe ekɛɛ Petro akɛ, “Jee mihiɛ, Satan! Ootɔ̃tɔ̃ minane; ejaakɛ ojwɛŋŋ Nyɔŋmɔ nii ahe, shi gbɔmɛi anii ahe moŋ ojwɛŋɔ.”

Hekwamɔ

²⁴ Kɛkɛ ni Yesu kɛɛ ekaselɔi lɛ akɛ, “Kɛji mɔ ko miisumɔ akɛ enyiɛ misɛɛ lɛ, ekwa ehe ni ewo esɛŋmɔtso lɛ ni enyiɛ misɛɛ.

²⁵ Ejaakɛ mɔ fɛɛ mɔ ni taoɔ akɛ ebaa esusuma yi lɛ, eeelaaje lɛ; shi mɔ fɛɛ mɔ ni laajeɔ esusuma yɛ mihewɔ lɛ, enine aaashɛ nɔ.

²⁶ Ejaakɛ mɛɛ sɛɛ gbɔmɔ baana, kɛji enine shɛ jeŋ muu lɛ fɛɛ nɔ, shi elaaje esusuma lɛ? Aloo mɛni gbɔmɔ kɛaahã ni ekɛkpɔ̃ esusuma lɛ?

²⁷ Ejaakɛ Gbɔmɔ Bi lɛ baaba yɛ eTsɛ anunyam lɛ mli kɛ ebɔfoi lɛ; ni no mli lɛ eeewo mɔ fɛɛ mɔ nyɔmɔ yɛ enitsumɔ naa.

²⁸ Anɔkwale mikɛɔ nyɛ akɛ, mɛi komɛi yɛ mɛi ni damɔ biɛ nɛɛ ateŋ ni amɛsaŋ amɛnaa gbele kɛyashi beyinɔ ni amɛaana Gbɔmɔ Bi lɛ miiba yɛ emaŋtsɛyeli lɛ mli.”