Mateo 15 - ŊMALƐ KRƆŊKRƆŊ LƐ

Onukpai lɛ ablema tsɔ̃ɔmɔi

¹ Kɛkɛ ni mlatsɔɔlɔi kɛ Farisifoi ni jɛ Yerusalɛm lɛ ba Yesu ŋɔɔ amɛbakɛɛ,

² “Mɛɛ hewɔ ni okaselɔi lɛ tɔ̃ɔ onukpai lɛ ablema tsɔ̃ɔmɔi lɛ anɔ lɛ? Ejaakɛ amɛfɔɔɔ amɛdɛ̃ dani amɛyeɔ nii.”

³ Shi ehere nɔ ekɛɛ amɛ akɛ, “Mɛɛ hewɔ ni nyɛ hu nyɛkɛ nyɛblema tsɔ̃ɔmɔi lɛ tɔ̃ɔ Nyɔŋmɔ kitã lɛ nɔ lɛ?

⁴ Ejaakɛ Nyɔŋmɔ kɛɛ, ‘Wo otsɛ kɛ onyɛ!’ Kɛ ‘Mɔ ni lomɔɔ etsɛ loo enyɛ lɛ, gbe aaagbe lɛ!’

⁵ Shi nyɛ lɛ nyɛkɛɔ akɛ, ‘Mɔ fɛɛ mɔ ni aaakɛɛ etsɛ loo enyɛ akɛ, nɔ ni kulɛ ooona yɛ midɛŋ lɛ, mikɛke Nyɔŋmɔ’ lɛ, tsɔ̃ɔ akɛ ekawo etsɛ loo enyɛ dɔŋŋ.

⁶ Ni nyɛblema tsɔ̃ɔmɔi lɛ ahewɔ lɛ nyɛgu Nyɔŋmɔ kitã lɛ.

⁷ Osatofoi! Gbɛ naa pɛ Yesaia gba yɛ nyɛhe akɛ,

⁸ ‘Maŋ nɛɛ kɛ amɛnaabu woɔ mi; shi amɛtsui etsi ehe kɛjɛ mihe kɛtee shɔŋŋ.

⁹ Shi yakatswaa amɛjaa mi lɛ, Ejaakɛ amɛtsɔ̃ɔ tsɔ̃ɔmɔi ni ji gbɔmɛi akitãi.’ ”

Nibii ni buleɔ mɔ

¹⁰ Ni etsɛ asafo lɛ kɛba, ni ekɛɛ amɛ akɛ, “Nyɛboa toi ni nyɛna shishi!

¹¹ Jeee nɔ ni boteɔ mɔ daaŋ lɛ buleɔ gbɔmɔ; shi moŋ nɔ ni jeɔ mɔ daaŋ lɛ, no buleɔ gbɔmɔ.”

¹² Kɛkɛ ni ekaselɔi lɛ ba eŋɔɔ amɛbakɛɛ lɛ akɛ, “Ole akɛ be ni Farisifoi lɛ nu nɛkɛ wiemɔi nɛɛ, ewo amɛ mlila waa?”

¹³ Shi ehere nɔ ekɛɛ, “Tso fɛɛ tso ni jeee miŋwɛi-Tsɛ lɛ tɛoɔ lɛ, fã aaafã.

¹⁴ Nyɛkadia amɛsɛɛ! Shwilafoi ni tsɔ̃ɔ shwilafoi agbɛ ji amɛ; ni kɛ shwilafo miitsɔ̃ɔ shwilafo gbɛ lɛ, amɛyi enyɔ lɛ fɛɛ amɛaagbee bu mli.”

¹⁵ Ni Petro here nɔ ekɛɛ lɛ akɛ, “Tsɔ̃ɔmɔ wɔ abɛ nɛɛ shishi!”

¹⁶ Ni Yesu kɛɛ, “Ani nyɛ hu nyɛnako nii ashishi lolo?

¹⁷ Ani nyɛkpako shi akɛ, nɔ fɛɛ nɔ ni boteɔ mɔ daaŋ lɛ, musuŋ eyaa ni ajieɔ awoɔ tiafi mli?

¹⁸ Shi nii ni jɛɔ daaŋ jeɔ kpo lɛ, tsui mli ejɛɔ, ni nomɛi buleɔ mɔ lɛ.

¹⁹ Ejaakɛ tsui mli ni susumɔi fɔ̃ji, gbɔmɔgbee, gbãlãfitemɔ, ajwamãŋbɔɔ, juu, amale odaseyeli kɛ oshekuyeli jɛɔ.

²⁰ Enɛɛmɛi ji nii ni buleɔ gbɔmɔ; shi dɛ̃ ni afɔɔɔ dani ayeɔ nii lɛ, no buleee mɔ.”

Kanaanyoo ko hemɔkɛyeli

²¹ Kɛkɛ ni Yesu je jɛi eyiŋ etee Tiro kɛ Sidon niiaŋ.

²² Ni naa, Kanaanyoo ko jɛ jɛi niiaŋ nɔŋŋ babolɔ ekɛɛ, “Naa mi mɔbɔ, Nuŋtsɔ, David Bi; mibiyoo miina nɔ kɛ mumɔ fɔŋ.”

²³ Shi efooo edaaŋ. Ni ekaselɔi lɛ ba bakpa lɛ fai akɛ, “Wo lɛ gbɛ ni eya, shi eebolɔ kɛnyiɛ wɔsɛɛ!”

²⁴ Shi ehere nɔ ekɛɛ, “Israel we toi ni elaaje lɛ aŋɔɔ kɛkɛ atsu mi.”

²⁵ Shi yoo lɛ ba bakulã shi yɛ ehiɛ ekɛɛ, “Nuŋtsɔ, feemɔ he eko ohã mi!”

²⁶ Shi ekɛɛ, “Ejaaa akɛ aŋɔɔ bii aboloo lɛ ashɛrɛɔ ashwieɔ shifɔji abii.”

²⁷ Shi ekɛɛ, “Nuŋtsɔ, eyɛ mli moŋ; shi bɛ shifɔji abii lɛ hu yeɔ fufuji ni shwieɔ amɛnuŋtsɔmɛi okplɔ̃ lɛ shishi lɛ eko!”

²⁸ Kɛkɛ ni Yesu here nɔ ekɛɛ lɛ akɛ, “O yoo, ohemɔkɛyeli da! Afee ahã bo tamɔ bɔ ni otaoɔ lɛ!” Ni atsa ebiyoo lɛ yɛ nakai ŋmɛlɛtswaa lɛ nɔ nɔŋŋ.

Yesu tsa mɛi pii

²⁹ Ni Yesu je jɛi eba Galilea Ŋshɔ lɛ naa. Ni ekwɔ etee gɔŋ lɛ nɔ ni eyata shi yɛ jɛi.

³⁰ Ni asafoi pii ba eŋɔɔ; amɛhiɛ akpaketsɛmɛi kɛ obubuafoi kɛ shwilafoi kɛ mumuii kɛ mɛi krokomɛi pii, ni amɛkɛ amɛ bashwie enaji anaa; ni etsa amɛ.

³¹ Ni asafoi lɛ anaa kpɛ amɛhe, be ni amɛna akɛ mumuii miiwie, ni obubuafoi ahe ewa amɛ, ni akpaketsɛmɛi miinyiɛ, ni shwilafoi miina nii lɛ; ni amɛwo Israel Nyɔŋmɔ lɛ hiɛ nyam.

Yesu hã mɛi akpei ejwɛ niyenii

³² Shi Yesu tsɛ ekaselɔi lɛ kɛba ni ekɛɛ, “Mimusuŋ miitsɔ̃ mi yɛ asafoi lɛ ahe, akɛ amɛkɛ mi ehi shi gbii etɛ̃ sɔŋŋ, ni amɛbɛ nɔ ko ni amɛyeɔ; ni misumɔ̃ɔɔ akɛ miwoɔ amɛ gbɛ kɛ musuŋ hɔ̃mɔ, ni ekolɛ amɛyatɔ biti yɛ gbɛ lɛ nɔ.”

³³ Ni ekaselɔi lɛ kɛɛ lɛ akɛ, “Nɛgbɛ wɔbaana aboloi ni fa pii yɛ, yɛ ŋa nɛɛ nɔ, bɔ ni aaashɛ asafo babaoo nɛɛ naa?”

³⁴ Ni Yesu bi amɛ akɛ, “Aboloi enyiɛ nyɛyɔɔ?” Amɛkɛɛ lɛ akɛ, “Kpawo, kɛ loi bibii fioo ko.”

³⁵ Ni efã asafoi lɛ akɛ amɛtara shi yɛ shikpɔŋ.

³⁶ Ni ekɔlɔ aboloi kpawo lɛ kɛ loi lɛ, ni eda shi, ni ekumɔ mli ni ekɛhã ekaselɔi lɛ, ni amɛ hu amɛkɛhã asafoi lɛ.

³⁷ Ni amɛ fɛɛ amɛye ni amɛtɔrɔ; ni amɛkɔlɔ fufuji ni shwɛ lɛ flɔtɔi kpawo obɔ̃bɔ̃.

³⁸ Mɛi ni ye lɛ ayibɔ ji hii akpei ejwɛ, soro yei kɛ gbekɛbii.

³⁹ Ni ewo asafoi lɛ agbɛ, ni ebote lɛlɛ mli, ni eba Magadan niiaŋ.