Mateo 13 - ŊMALƐ KRƆŊKRƆŊ LƐ

Nidulɔ lɛ he abɛ lɛ

¹ Nakai gbi lɛ nɔ nɔŋŋ lɛ Yesu je shĩa lɛ eyata ŋshɔ lɛ naa.

² Ni asafo babaoo babua amɛhe naa yɛ eŋɔɔ, ni no hewɔ lɛ, etee lɛlɛ ko mli eyata shi, ni asafo lɛ fɛɛ damɔ ŋshɔ lɛ naa.

³ Ni ewie wiemɔi pii etsɔ̃ɔ amɛ yɛ abɛbuai amli ekɛɛ, “Nidulɔ yiŋ etee nidumɔ.

⁴ Ni be ni eduɔ lɛ, wui lɛ ekomɛi yashwie gbɛ he, ni loofɔji ba bakɔlɔ.

⁵ Ni ekomɛi hu yashwie tesai anɔ, he ni amɛnaaa su pii yɛ; ni amrɔ lɛ, akɛni amɛbɛ sũ ni mli kwɔ hewɔ lɛ amɛkwɛ̃ oya;

⁶ shi be ni hulu te shi lɛ, amɛshã: ni akɛni amɛbɛ fã ko hewɔ lɛ amɛŋalã.

⁷ Ni ekomɛi hu yashwie ŋmei ateŋ ni ŋmei lɛ kwɛ, ni amɛgbe amɛ.

⁸ Shi ekomɛi hu yashwie shikpɔŋ kpakpa nɔ, ni ewo yibii: eko oha, eko nyɔŋmai ekpaa, kɛ eko nyɔŋmai etɛ̃.

⁹ Mɔ ni yɔɔ toi ni akɛ nuɔ nii lɛ, enu!”

Nɔ̃ hewɔ ni Yesu wie yɛ abɛbuai amli

¹⁰ Ni ekaselɔi lɛ ba eŋɔɔ babi lɛ akɛ, “Mɛni hewɔ okɛ amɛ wieɔ yɛ abɛbuai amli lɛ?”

¹¹ Shi ehere nɔ ekɛɛ amɛ akɛ, “Ejaakɛ nyɛ lɛ akɛhã nyɛ akɛ nyɛle ŋwɛi maŋtsɛyeli lɛ mli teemɔ saji lɛ, shi amɛ lɛ akɛ hãko amɛ.

¹² Ejaakɛ mɔ fɛɛ mɔ ni yɔɔ nɔ ko lɛ aaahã lɛ ni ena kɛteke nɔ; shi mɔ fɛɛ mɔ ni bɛ nɔ ko lɛ, nɔ ni eyɔɔ tete lɛ, aaashɔ̃ yɛ edɛŋ.

¹³ Enɛ hewɔ mikɛ amɛ wieɔ yɛ abɛbuai amli lɛ, ejaakɛ amɛmiina nɛ shi amɛnaaa, ni amɛmiinu nɛ shi amɛnuuu, ni amɛnaaa shishi hu.

¹⁴ Ni Yesaia gbalɛ lɛ eba mli yɛ amɛhe akɛ, ‘Nu lɛ nyɛbaanu nɛ, shi nyɛnaŋ shishi; ni na lɛ nyɛbaana nɛ, shi nyɛyoŋ sɛɛ.

¹⁵ Ejaakɛ nɛkɛ maŋ nɛɛ tsui ekpliŋ, ni amɛtoii ewa, ni amɛŋamɔ amɛhiŋmɛii; koni amɛkana kɛ amɛhiŋmɛii, ni amɛkanu kɛ amɛtoii, ni amɛtsui hu akana shishi, ni amɛkpale ni mitsa amɛ.’

¹⁶ “Shi nyɛ lɛ, ajɔɔ nyɛhiŋmɛii lɛ, akɛ amɛmiina nii, kɛ nyɛtoii lɛ, akɛ amɛmiinu nii.

¹⁷ Ejaakɛ anɔkwale mikɛɔ nyɛ akɛ, gbalɔi kɛ jalɔi pii shwe ni amɛna nii ni nyɛnaa nɛɛ, shi amɛyanaaa, aloo ni amɛnu nii ni nyɛnuɔ nɛɛ, ni amɛyanuuu.”

Yesu tsɔ̃ɔ nidulɔ lɛ he abɛ lɛ shishi

¹⁸ “Agbɛnɛ nyɛ lɛ nyɛboa nidulɔ lɛ he abɛ lɛ shishi toi.

¹⁹ Mɔ fɛɛ mɔ ni nuɔ maŋtsɛyeli lɛ he wiemɔ lɛ ni eyooo sɛɛ lɛ, mɔ fɔŋ lɛ baa bashaa nɔ ni adu yɛ etsui mli lɛ. Mɔ nɛ ji gbɛ he he ni adu wu lɛ yɛ lɛ.

²⁰ Shi tɛsaa ni adu wu lɛ yɛ nɔ lɛ damɔ shi hã mɔ ni nuɔ wiemɔ lɛ ni ehereɔ amrɔ kɛ miishɛɛ;

²¹ shi akɛni ebɛ shishifã lɛ, ehiɔ shi fioo kɛkɛ; ni kɛji haomɔ loo yiwaa ba yɛ wiemɔ lɛ hewɔ lɛ, etsɛɛɛ kɛkɛ lɛ enane etɔ̃tɔ̃.

²² Ni ŋmei ateŋ he ni adu wu lɛ yɛ lɛ ji mɔ ni nuɔ wiemɔ lɛ, ni je nɛɛŋ henaagbamɔ kɛ nii pii ahe lakamɔ lɛ gbeɔ wiemɔ lɛ, ni ewooo yibii.

²³ Shi shikpɔŋ kpakpa ni adu wu lɛ yɛ nɔ lɛ ji mɔ ni nuɔ wiemɔ lɛ ni eyoɔ sɛɛ, ni esaa ewoɔ yibii hu, eko oha, eko nyɔŋmai ekpaa, kɛ eko nyɔŋmai etɛ̃.”

Jwɛi kɛ ŋmaa ni efutu lɛ

²⁴ Ebu amɛ abɛ kroko hu ekɛɛ, “Ŋwɛi maŋtsɛyeli lɛ tamɔ nuu ko ni duɔ wui kpakpai yɛ eŋmɔ mli.

²⁵ Shi be ni mɛi wɔ lɛ, ehenyɛlɔ ko ba ebadu jwɛi efutu ŋmaa lɛ, ni eyiŋ etee.

²⁶ Shi be ni ŋmaa lɛ kwɛ ni ewo yibii lɛ, kɛkɛ ni jwɛi lɛ hu pue.

²⁷ Ni shĩatsɛ lɛ tsuji lɛ ba eŋɔɔ babi lɛ akɛ, ‘Nuŋtsɔ, ani jeee wui kpakpai odu yɛ oŋmɔ lɛ mli lɛ? Nɛgbɛ ekɛ jwɛi nɛɛ jɛ mɔ?’

²⁸ Shi ekɛɛ amɛ akɛ, ‘Henyɛlɔ ko bafee enɛ nɛɛ. Ni etsuji lɛ kɛɛ lɛ akɛ, Be lɛ ooosumɔ akɛ wɔya ni wɔyafãmɔ lo?’

²⁹ Shi ekɛɛ, ‘Dabi, ekolɛ aleenɔ jwɛi lɛ fãamɔ mli lɛ, nyɛaafãmɔ ŋmaa lɛ hu nyɛfutuŋ.

³⁰ Nyɛŋmɛa enyɔ lɛ fɛɛ gbɛ ni amɛdara kɛyashi ŋmaakpamɔbe lɛ, ni ŋmaakpamɔbe lɛ makɛɛ nikpalɔi lɛ akɛ, nyɛbuaa jwɛi lɛ anaa tsutsu, ni nyɛfimɔa amɛ keikei, koni ashã; shi ŋmaa lɛ nyɛbuaa naa nyɛyawoa miboŋo lɛ mli.’ ”

Sinapi wu kɛ mãsha lɛ

³¹ Yesu bu amɛ abɛ kroko ekɛɛ, “Ŋwɛi maŋtsɛyeli lɛ tamɔ sinapi wu ni mɔ ko kɔ ni eyadu yɛ eŋmɔ mli;

³² eji wui ateŋ bibioo fe fɛɛ, shi kɛ ekwɛ̃ lɛ, edaa fe shwie bai fɛɛ; ni efeɔ tso, ni ŋwɛi loofɔji baa bafeɔ tsui yɛ eniji ateŋ.”

³³ Ebu amɛ abɛ kroko akɛ, “Ŋwɛi maŋtsɛyeli lɛ tamɔ mãsha ni yoo ko kɔ ni ekɛhɔ mã tsesei etɛ̃ mli kɛyashi beyinɔ ni fɛɛ sha.”

³⁴ Abɛbuai amli Yesu kɛ asafoi lɛ wie nii nɛɛ fɛɛ yɛ, ni ekɛ amɛ ewieee nɔ ko akɛ ja yɛ abɛbuai amli kɛkɛ;

³⁵ koni nɔ ni gbalɔ lɛ wie lɛ aba mli akɛ, “Magbele minaa yɛ abɛbuai amli; magba nii ni akɛtee kɛjɛ jeŋ shishijee lɛ.”

Jwɛi kɛ ŋmaa ni efutu abɛ lɛ shishitsɔɔmɔ

³⁶ Kɛkɛ ni Yesu jie asafoi lɛ agbɛ ni etee shĩa lɛ. Ni ekaselɔi lɛ ba eŋɔɔ bakɛɛ lɛ akɛ, “Tsɔ̃ɔmɔ wɔ ŋmɔ lɛ mli jwɛi lɛ he abɛ lɛ shishi.”

³⁷ Ni ehere nɔ ekɛɛ amɛ akɛ, “Wui kpakpai adulɔ lɛ ji Gbɔmɔ Bi lɛ;

³⁸ ŋmɔ lɛ ji je lɛ; wui kpakpai lɛ ji maŋtsɛyeli lɛ mli bii lɛ; jwɛi lɛ ji mɔ fɔŋ lɛ bii lɛ;

³⁹ henyɛlɔ ni du amɛ lɛ ji abonsam; ŋmaakpamɔbe lɛ ji je nɛɛŋ naagbee lɛ; ni ŋmaakpalɔi lɛ ji ŋwɛi bɔfoi.

⁴⁰ Agbɛnɛ bɔ ni abuaa jwɛi anaa ni akɛ la shãa lɛ, nakai nɔŋŋ aaafee yɛ je nɛɛŋ naagbee lɛ.

⁴¹ Gbɔmɔ Bi lɛ aaatsu ebɔfoi lɛ, ni amɛaabua nanetɔ̃tɔ̃mɔnii fɛɛ kɛ mɛi ni tsuɔ nii ni shiɔ mla lɛ anaa kɛaaje emaŋtsɛyeli lɛ mli,

⁴² ni amɛkɛ amɛaawo la flɔnɔɔ lɛ mli; jɛi yaafo kɛ nyanyɔji ashishikpemɔ aaahi.

⁴³ No ni jalɔi lɛ aaakpɛ tamɔ hulu yɛ amɛ-Tsɛ maŋtsɛyeli lɛ mli. Mɔ ni yɔɔ toi ni akɛnuɔ nii lɛ, enu!”

Ŋwɛi maŋtsɛyeli lɛ he abɛi etɛ̃

⁴⁴ “Ŋwɛi maŋtsɛyeli lɛ tamɔ jwetri ni akɛtee yɛ abɔɔ mli, ni be ni mɔ ko yana lɛ, ekɛtee, ni no he miishɛɛ ni ena hewɔ lɛ etee ni eyahɔ̃ɔ nii fɛɛ ni eyɔɔ lɛ, ni ekɛhe nakai abɔɔ lɛ.

⁴⁵ “Asaŋ ŋwɛi maŋtsɛyeli lɛ tamɔ guɔyelɔ ko ni taoɔ adiagbai fɛɛfɛji,

⁴⁶ ni be ni eyana adiagba kome ni jara wa lɛ, etee ni eyahɔ̃ɔ nii fɛɛ ni eyɔɔ lɛ, ni ekɛhe.

⁴⁷ “Asaŋ ŋwɛi maŋtsɛyeli lɛ tamɔ yaa ni afɔ̃ yɛ ŋshɔ mli ni edu loi srɔtoi fɛɛ eko;

⁴⁸ ni be ni eyi lɛ, wolɛi lɛ gbala kɛba shia nɔ, ni amɛtara shi amɛbua ekpakpai lɛ anaa amɛwo kpaii amli; shi nii ni ehiii lɛ amɛshɛrɛ amɛshwie.

⁴⁹ Nakai nɔŋŋ abaafee yɛ je lɛ naagbee lɛ. Ŋwɛi bɔfoi lɛ aaaje kpo aba ni amɛbaahala mɛi fɔ̃ji lɛ yɛ jalɔi lɛ ateŋ;

⁵⁰ ni amɛkɛ amɛ aaawo la flɔnɔɔ lɛ mli. Jɛi yaafo kɛ nyanyɔji ashishikpemɔ aaahi.”

⁵¹ Yesu bi amɛ akɛ, “Nyɛna nii nɛɛ fɛɛ ashishi lo?” Amɛkɛɛ lɛ akɛ, “Hɛɛ, Nuŋtsɔ!”

⁵² Ni ekɛɛ amɛ akɛ, “No hewɔ lɛ, mlatsɔɔlɔ fɛɛ mlatsɔɔlɔ ni afee lɛ kaselɔ, ahã ŋwɛi maŋtsɛyeli lɛ, etamɔ shĩatsɛ ko ni jieɔ nii hei kɛ nii memeji kɛjeɔ ejwetri lɛ mli.”

Akwa Yesu yɛ Nazaret

⁵³ Ni eba mli akɛ, be ni Yesu egbe abɛbuai nɛɛ anaa lɛ, eje jɛi;

⁵⁴ ni be ni eba lɛ diɛŋtsɛ emaŋ lɛ mli lɛ, etsɔ̃ɔ amɛ nii yɛ amɛkpeehe lɛ, ni ehã amɛhe jɔ̃ amɛhe, ni amɛkɛɛ. “Nɛgbɛ mɔ nɛ yana nilee kɛ hewalɛnii nɛɛ kɛjɛ?

⁵⁵ Ani jeee ŋaalɔ lɛ bi lɛ nɛ? Ani jeee enyɛ atsɛɔ lɛ Maria lɛ, kɛ enyɛmimɛi hii ni ji Yakobo kɛ Yose kɛ Simon kɛ Yuda lɛ?

⁵⁶ Ni enyɛmimɛi hii lɛ, ani jeee amɛ fɛɛ amɛkɛ wɔ yɔɔ? Nɛgbɛ mɔ nɛ yana nii nɛɛ fɛɛ kɛjɛ mɔ?”

⁵⁷ Ni etsɔ̃ pampi ehã amɛ. Shi Yesu kɛɛ amɛ akɛ, “Abuɔ gbalɔ yɛ he fɛɛ he, ja lɛ diɛŋtsɛ emaŋ kɛ lɛ diɛŋtsɛ ewe kɛkɛ.”

⁵⁸ Ni akɛni amɛheee amɛyeee hewɔ lɛ etsuuu hewalɛnii pii ko yɛ jɛi.