Mateo 12 - ŊMALƐ KRƆŊKRƆŊ LƐ

Hejɔɔmɔ gbi lɛ nuŋtsɔ ji Gbɔmɔ Bi lɛ

¹ Nakai be lɛ mli lɛ Yesu tsɔ̃ abele ŋmɔji amli yɛ hejɔɔmɔ gbi lɛ nɔ; ni hɔ̃mɔ miiye ekaselɔi lɛ, ni amɛbɔ̃i abele lɛ kuumɔ kɛ kpemɔ.

² Shi be ni Farisifoi lɛ na lɛ, amɛkɛɛ lɛ akɛ, “Naa, okaselɔi lɛ miifee nɔ ni aŋmɛɛɛ gbɛ akɛ afee yɛ hejɔɔmɔ gbi lɛ nɔ.”

³ Shi ekɛɛ amɛ akɛ, “Ani nyɛkaneko nɔ ni David fee be ni hɔ̃mɔ ye lɛ kɛ mɛi ni fata ehe lɛ:

⁴ bɔ ni ebote Nyɔŋmɔ We lɛ, ni eyaye aboloi ni akɛmãa Nyɔŋmɔ hiɛ ni aŋmɛɛɛ lɛ gbɛ loo mɛi ni fata ehe lɛ yeɔ, akɛ ja osɔfoi lɛ kɛkɛ lɛ?

⁵ Aloo nyɛkaneko yɛ Mla lɛ mli akɛ, hejɔɔmɔ gbi lɛ nɔ lɛ osɔfoi buleɔ hejɔɔmɔ gbi lɛ yɛ Sɔlemɔ we lɛ ni amɛyeee fɔ.

⁶ Shi miikɛɛ nyɛ akɛ, nɔ ko ni fe Sɔlemɔ we lɛ yɛ biɛ.

⁷ Shi eji nyɛle wiemɔ ni kɛɔ akɛ, ‘Mɔbɔnalɛ mitaoɔ shi jeee afɔle’ lɛ shishi kulɛ, nyɛbuŋ mɛi ni yeee fɔ lɛ afɔ.

⁸ Ejaakɛ hejɔɔmɔ gbi lɛ nuŋtsɔ ji Gbɔmɔ Bi lɛ.”

Nuu ni nine kome egbo lɛ

⁹ Ni eje jɛi eyabote amɛkpeehe lɛ.

¹⁰ Ni naa, nuu ko yɛ jɛi ni enine kome egbo. Ni amɛbi lɛ akɛ, “Ani eja gbɛ akɛ atsaa mɔ yɛ hejɔɔmɔ gbi lɛ nɔ?” Bɔ ni afee ni amɛwo enaa folɔmɔ.

¹¹ Shi ekɛɛ amɛ akɛ, “Nyɛteŋ namɔ ni kɛji eyɛ too kome, ni too lɛ yagbee bu mli yɛ hejɔɔmɔ gbi lɛ nɔ lɛ, ni emɔŋ emli ni ejie lɛ?

¹² Ani gbɔmɔ jara waaa babaoo fe too? No hewɔ ni eja gbɛ akɛ afeɔ ejurɔ yɛ hejɔɔmɔ gbi lɛ nɔ lɛ.”

¹³ Kɛkɛ ni ekɛɛ nuu lɛ akɛ, “Kpã onine lɛ mli!” Ni ekpã mli ni eye emuu tamɔ ekome lɛ.

¹⁴ Shi Farisifoi lɛ je kpo tee eyi nɔ apam, bɔ ni amɛaafee ni amɛkpãtã ehiɛ.

Nyɔŋmɔ Tsulɔ ni ehala lɛ

¹⁵ Shi be ni Yesu kpa enɛ shi lɛ, egbala ehe shi kɛje jɛi. Ni mɛi babaoo nyiɛ esɛɛ, ni etsa amɛ fɛɛ,

¹⁶ ni ebɔ amɛ kɔkɔ akɛ amɛkahã anu ehe;

¹⁷ bɔ ni afee ni nɔ ni gbalɔ Yesaia wie lɛ aba mli akɛ,

¹⁸ “Naa, mitsulɔ ni mihala lɛ, misuɔlɔ ni misusuma naa ehe tsui lɛ; mikɛ miMumɔ lɛ aaaŋmɛ enɔ, ni eeejaje kojomɔ etsɔ̃ɔ jeŋmaji lɛ.

¹⁹ Ebeŋ, ni ebolɔŋ hu, ni mɔ ko nuŋ egbee yɛ blohuiaŋ.

²⁰ Glã ni amia lɛ, ekuŋ, ni kane mli tako ni tsoɔ sulii lɛ, egbeŋ, Kɛyashi beyinɔ ni eeehã jalɛ aye kunim.

²¹ Ni egbɛi lɛ nɔ jeŋmaji lɛ aaaŋɔ amɛhiɛ amɛfɔ̃.”

Yesu kɛ Beelzebul

²² Kɛkɛ ni akɛ mɔ ko ni mumɔ fɔŋ yɔɔ emli ni ji shwilafo kɛ mumui fɛɛ ba eŋɔɔ; ni etsa lɛ ni shwilafo ni ji mumui hu lɛ wie ni ena nii.

²³ Ni asafo lɛ fɛɛ naa kpɛ amɛhe ni amɛkɛɛ, “Ani jeee David Bi lɛ nɛ?”

²⁴ Shi be ni Farisifoi lɛ nu lɛ, amɛkɛɛ, “Mumɔi fɔ̃ji alumɔ Beelzebul hewalɛ kɛkɛ mɔ nɛ kɛfãa mumɔi fɔ̃ji lɛ.”

²⁵ Shi akɛni Yesu yoo amɛjwɛŋmɔi lɛ, ekɛɛ amɛ akɛ, “Maŋtsɛyeli fɛɛ maŋtsɛyeli ni gbaa woɔ lɛ diɛŋtsɛ ehe lɛ, ejwaa; ni maŋ fɛɛ maŋ loo shĩa fɛɛ shĩa ni gbaa woɔ lɛ diɛŋtsɛ ehe lɛ edamɔɔɔ shi.

²⁶ Ni kɛji Satan fã Satan lɛ, egba ewo lɛ diɛŋtsɛ ehe; belɛ te emaŋtsɛyeli lɛ aaafee tɛŋŋ adamɔ shiŋ?

²⁷ Ni kɛji mi lɛ Beelzebul hewalɛ naa mifãa mumɔi fɔ̃ji yɛ lɛ, nyɛbihii lɛ, namɔ hewalɛ naa amɛfamɔ amɛ yɛ? No hewɔ lɛ, amɛ amɛaakojo nyɛ.

²⁸ Shi kɛji mi lɛ, Nyɔŋmɔ Mumɔ lɛ naa mifãa mumɔi fɔ̃ji lɛ yɛ lɛ, no lɛ ninamɔ Nyɔŋmɔ Maŋtsɛyeli lɛ enina nyɛ lɛ.

²⁹ Shi kulɛ te aaafee tɛŋŋ ni mɔ ko aaanyɛ hewalɔ we abote ni eyaha enibiiŋ, akɛ ja efi hewalɔ lɛ dani eeewo ewe lɛ haa?

³⁰ Mɔ ni bɛ migbɛfaŋ lɛ, shi ete ewo mi; ni mɔ ni kɛ mi buaaa naa lɛ, gbɛ egbɛɔ eshwãa.

³¹ No hewɔ lɛ, miikɛɛ nyɛ akɛ, akɛ esha kɛ musubɔɔ fɛɛ aaafa gbɔmɛi; shi Mumɔ lɛ he musubɔɔ lɛ akɛfaŋ.

³² Ni mɔ fɛɛ mɔ ni aaawie wiemɔ ko ashi Gbɔmɔ Bi lɛ, akɛaafa lɛ, shi mɔ fɛɛ mɔ ni aaawie ashi Mumɔ Krɔŋkrɔŋ lɛ, akɛfaŋ lɛ yɛ je nɛɛŋ loo jeŋ ni baaba lɛ mli.”

Tso kɛ eyibii

³³ “Nyɛhãa tso lɛ afea tso kpakpa, ni ewo yibii kpakpai; aloo nyɛhãa afea tso gbonyo, ni ewo yibii gbohii; ejaakɛ tso yibii akɛleɔ tso.

³⁴ Nyɛ shinɔi ashwiei! Te aaafee tɛŋŋ ni nyɛ mɛi ni nyɛ ji mɛi fɔ̃ji lɛ, ni nyɛaanyɛ ekpakpa nyɛwieŋ? Ejaakɛ nɔ ni eyi tsui obɔ kɛteke nɔ lɛ, no nɔŋŋ naabu wieɔ.

³⁵ Gbɔmɔ kpakpa jieɔ nikpakpai kɛjɛɔ etsuiŋ jwetri kpakpa lɛ mli; ni gbɔmɔ fɔŋ hu jieɔ nifɔɔji kɛjɛɔ etsuiŋ jwetri fɔŋ lɛ mli.

³⁶ Shi miikɛɛ nyɛ akɛ, yaka wiemɔ fɛɛ yaka wiemɔ ni gbɔmɛi wieɔ lɛ, amɛbaabu he akɔntaa yɛ kojomɔ gbi lɛ nɔ.

³⁷ Shi owiemɔi lɛ amli aaajɛ abu bo bem, ni owiemɔi lɛ amli aaajɛ abu bo fɔ.”

Farisifoi lɛ bi Yesu okadi

³⁸ Kɛkɛ ni mlatsɔɔlɔi kɛ Farisifoi lɛ ateŋ mɛi komɛi here nɔ ni amɛkɛɛ, “Tsɔɔlɔ, wɔmiitao onine naa okadi ko wɔkwɛ.”

³⁹ Shi ehere nɔ ekɛɛ amɛ akɛ, “Yinɔbii fɔ̃ji kɛ gbãlãfitelɔi miitao okadi; shi ahaŋ amɛ okadi ko, akɛ ja gbalɔ Yona okadi lɛ.

⁴⁰ Ejaakɛ bɔ ni Yona ye shwaneshwane kɛ nyɔɔŋnyɔɔŋ gbii etɛ̃ yɛ ŋshɔŋ loo kpeteŋkple lɛ musuŋ lɛ, nakai Gbɔmɔ Bi lɛ aaaye shwaneshwane kɛ nyɔɔŋnyɔɔŋ gbii etɛ̃ yɛ shikpɔŋ mli tɔ̃ɔ.

⁴¹ Nineve hii lɛ kɛ nɛkɛ yinɔbii nɛɛ aaate shi yɛ kojomɔ lɛ mli, ni amɛaabu amɛ fɔ; ejaakɛ amɛtsake amɛtsui yɛ Yona shiɛmɔ lɛ naa; ni naa, nɔ ko ni fe Yona shiɛmɔ lɛ yɛ biɛ.

⁴² Wuoyigbɛ maŋnyɛ lɛ kɛ nɛkɛ yinɔbii nɛɛ aaate shi yɛ kojomɔ lɛ mli, ni eeebu amɛ fɔ; ejaakɛ ejɛ shikpɔŋ lɛ naagbeehe ebabo Solomon nilee lɛ toi; ni naa, nɔ ko ni fe Solomon nilee lɛ yɛ biɛ.”

Mumɔ fɔŋ sɛɛkuu kɛ gbɔmɔ mli botemɔ

⁴³ “Shi mumɔ fɔŋ lɛ, kɛ eje gbɔmɔ mli lɛ, eyanyiɛɔ hei ni nu bɛ etaoɔ hejɔɔmɔ, shi enaaa eko.

⁴⁴ Ni ekɛɔ akɛ, ‘Maku misɛɛ matee miwe he ni mijɛ lɛ.’ Ni kɛ eba lɛ, enaa akɛ ekã shi efolo, ni abɛɛ mli, ni awula mli.

⁴⁵ Kɛkɛ lɛ eyaa ni eyaŋɔɔ mumɔi krokomɛi kpawo ni ji mɛi fɔ̃ji fe lɛ ekɛfataa ehe, ni amɛbaa amɛbahiɔ jɛi; ni nakai gbɔmɔ lɛ naagbee shihilɛ lɛ tsɔ̃ɔ efɔŋ fe klɛŋklɛŋ nɔ lɛ. Nakai nɔŋŋ ebaaba mli yɛ yinɔ fɔŋ nɛɛ hu gbɛfaŋ.”

Yesu nyɛ kɛ enyɛmimɛi

⁴⁶ Shi be ni ekɛ asafoi lɛ wieɔ lolo lɛ, enyɛ kɛ enyɛmimɛi lɛ badamɔ agbo lɛ naa amɛmiitao amɛkɛ lɛ awie. [

⁴⁷ Ni mɔ ko bakɛɛ lɛ akɛ, “Naa, onyɛ kɛ onyɛmimɛi lɛ damɔ agbo lɛ naa amɛmiitao amɛkɛ bo awie.”]

⁴⁸ Shi ehere nɔ ekɛɛ mɔ ni bakɛɛ lɛ lɛ akɛ, “Namɔ ji minyɛ, ni namɛi ji minyɛmimɛi?”

⁴⁹ Ni ekpã enine mli etsɔ̃ɔ ekaselɔi lɛ ekɛɛ, “Naa, minyɛ kɛ minyɛmimɛi nɛ!

⁵⁰ Ejaakɛ mɔ fɛɛ mɔ ni feɔ miTsɛ ni yɔɔ ŋwɛi lɛ suɔmɔnaanii lɛ, lɛ ji minyɛmi nuu kɛ minyɛmi yoo kɛ minyɛ.”