Mateo 10 - ŊMALƐ KRƆŊKRƆŊ LƐ

Yesu tsu kaselɔi nyɔŋma kɛ enyɔ lɛ

¹ Ni Yesu tsɛ ekaselɔi nyɔŋma kɛ enyɔ lɛ kɛba, ni ehã amɛ mumɔi fɔ̃ji lɛ anɔ hewalɛ ni amɛfamɔ amɛ ni amɛtsa hela fɛɛ hela kɛ hejaramɔ fɛɛ hejaramɔ.

² Shi bɔfoi nyɔŋma kɛ enyɔ lɛ agbɛii nɛ: Klɛŋklɛŋ mɔ ji Simon ni atsɛɔ lɛ Petro hu lɛ, kɛ enyɛmi Andrea; Yakobo, Zebedeo bi lɛ, kɛ enyɛmi Yohane;

³ Filipo kɛ Bartolomeo, Toma kɛ Mateo, tóohelɔ lɛ, Yakobo, Alfeo bi lɛ, kɛ Tadeo;

⁴ Simon, maŋhedɔlɔ lɛ, kɛ Yuda Iskariot, mɔ ni tsɔ̃ɔ esɛɛgbɛ lɛ.

⁵ Nɛkɛ mɛi nyɔŋma kɛ enyɔ nɛɛ Yesu tsu, ni efã amɛ akɛ, “Nyɛkagbalea jeŋmajiaŋbii lɛ aŋɔɔ, ni nyɛkabotea Samariabii amaŋ ko mli hu;

⁶ shi moŋ nyɛyaa Israel we toi ni elaaje lɛ aŋɔɔ.

⁷ Shi ni nyɛyaa nɛɛ, nyɛshiɛa nyɛkɛa akɛ, ‘Ŋwɛi maŋtsɛyeli lɛ eshɛ shi etã.’

⁸ Nyɛtsaa helatsɛmɛi, nyɛtea gbohii ashi, nyɛhãa kpitiyelɔi ahe atsea, nyɛfamɔa mumɔi fɔ̃ji; yaka nyɛna, yaka nyɛkɛhãa.

⁹ Nyɛkataoa shika loo jwiɛtɛi loo akɔɔble nyɛwoa nyɛhɛfiinii amli;

¹⁰ asaŋ nyɛkataoa gbɛfãa kotoku, loo flakai enyɔ, loo tokotai loo tso; shi nitsulɔ lɛ eŋmaa sa lɛ.

¹¹ “Shi maŋ fɛɛ maŋ loo akrowa fɛɛ akrowa mli ni nyɛaabote lɛ, nyɛbia mɔ ni sa shi yɛ jɛi, ni nyɛto jɛi kɛyashi beyinɔ ni nyɛaatee.

¹² Shi kɛ nyɛmiibote shĩa lɛ, nyɛŋaa shĩa lɛ.

¹³ Ni kɛji shĩa lɛ sa lɛ, nyɛhãa nyɛhejɔlɛ lɛ abaa enɔ; shi kɛji esaaa lɛ, no lɛ nyɛhejɔlɛ lɛ akpale aba nyɛŋɔɔ ekoŋŋ.

¹⁴ Ni kɛji mɔ ko hereee nyɛ, ni ebooo nyɛwiemɔi lɛ atoi lɛ, kɛ nyɛmiije nakai shĩa lɛ loo nakai maŋ lɛ mli lɛ, nyɛkpokpoa nyɛnajiashi mlu lɛ.

¹⁵ Miikɛɛ nyɛ anɔkwale mli akɛ, ejaraŋ haŋ Sodom kɛ Gomora shikpɔŋ lɛ yɛ kojomɔ gbi lɛ nɔ, tamɔ nakai maŋ lɛ.”

Kaselɔi lɛ ayiwaa

¹⁶ “Naa miitsu nyɛ tamɔ too Gwantɛŋi yɛ klãji ateŋ; no hewɔ lɛ, nyɛhiɛ atɛ̃a tamɔ onufui, ni nyɛfea kpoo tamɔ okpoi.

¹⁷ “Shi nyɛhĩɛ ahia nyɛhe nɔ yɛ gbɔmɛi ahewɔ; ejaakɛ amɛaaŋɔ nyɛ kɛaatee kojomɔhei, ni amɛaayi nyɛ yɛ amɛkpeehei lɛ.

¹⁸ Ni amɛkɛ nyɛ aaatee maŋtsɛmɛi kɛ lumɛi ahiɛ yɛ mihewɔ, koni no afee odase ahã amɛ kɛ jeŋmaji lɛ.

¹⁹ Shi kɛji amɛŋɔ nyɛ kɛtee lɛ nyɛkahaoa nyɛhe yɛ bɔ ni nyɛaawie aloo nɔ ni nyɛakɛɛ hewɔ; shi akɛ nɔ ni nyɛawie aahã nyɛ yɛ nakai ŋmɛlɛtswaa lɛ nɔ nɔŋŋ.

²⁰ Ejaakɛ jeee nyɛ ji mɛi ni wieɔ lɛ, shi moŋ nyɛTsɛ lɛ Mumɔ lɛ ji mɔ ni wieɔ yɛ nyɛmli lɛ.

²¹ “Shi nyɛmi kɛ nyɛmi aaahã gbele, ni tsɛ kɛ bi aaahã, ni bii aaate shi awo amɛfɔlɔi, ni amɛaahã agbe amɛ.

²² Ni mɛi fɛɛ aaanyɛ nyɛ yɛ migbɛi lɛ hewɔ; shi mɔ ni hiɛɔ mli kɛyawulaa shi lɛ, aaahere eyiwala.

²³ Shi kɛ amɛmiiwa nyɛ yi yɛ maŋ ko mli lɛ, nyɛjoa foi nyɛyaa ekroko mli; shi miikɛɛ nyɛ anɔkwale mli akɛ nyɛgbeŋ Israel maji lɛ fɛɛ naa dani Gbɔmɔ Bi lɛ aaaba.

²⁴ Kaselɔ efeee etsɔ̃ɔlɔ, ni asaŋ nyɔŋ efeee enuŋtsɔ.

²⁵ Efa hã kaselɔ akɛ eeetamɔ enuŋtsɔ. Kɛji shĩatsɛ lɛ amɛtsɛ Beelzebul lɛ, ewebii lɛ shii enyiɛ amɛtsɛŋ amɛ nakai?”

Mɔ gbeyei ni sa akɛ ashe

²⁶ “Hewɔ lɛ nyɛkashea amɛ gbeyei; ejaakɛ nɔ ko nɔ ko bɛ ni abu nɔ, ni agbeleŋ nɔ; ni nɔ ko nɔ ko bɛ ni atee nɔ ni aleŋ.

²⁷ Nɔ ni mikɛɔ nyɛ yɛ duŋ mli lɛ, nyɛwiea yɛ la hiɛ; ni nɔ ni miwoɔ nyɛtoiŋ mikɛɔ nyɛ lɛ, nyɛshiɛa yɛ tsui ayiteiaŋ.

²⁸ Ni nyɛkashea mɛi ni gbeɔ gbɔmɔtso lɛ ni amɛnyɛɛɛ susuma lɛ amɛgbe lɛ gbeyei; shi moŋ nyɛshea mɔ ni nyɛɔ susuma kɛ gbɔmɔtso fɛɛ hiɛ ekpãtãa yɛ abonsamiiaje lɛ gbeyei.

²⁹ Ani aflimatai enyɔ lɛ jeee pesewa ahɔ̃ɔ aheɔ? Shi amɛteŋ ekome flo enyɔŋ shikpɔŋ, ja ejɛ nyɛTsɛ lɛ dɛŋ.

³⁰ Shi nyɛyiteŋtsɔ̃i po lɛ akane fɛɛ.

³¹ No hewɔ lɛ, nyɛkashea gbeyei; nyɛjara wa aahu fe aflimatai babaoo.”

Kristo he odaseyeli yɛ gbɔmɛi ahiɛ

³² “Hewɔ lɛ mɔ fɛɛ mɔ ni gbaa mli tsiɔ mitã yɛ gbɔmɛi ahiɛ lɛ, mi hu magba mli matsi etã yɛ miTsɛ ni yɔɔ ŋwɛi lɛ hiɛ.

³³ Shi mɔ fɛɛ mɔ ni kwaa mi yɛ gbɔmɛi ahiɛ lɛ, mi hu makwa lɛ yɛ miTsɛ ni yɔɔ ŋwɛi lɛ hiɛ.”

Jeee hejɔlɛ, shi klante

³⁴ “Nyɛkasusua akɛ miba ni mabahã hejɔlɛ aba shikpɔŋ lɛ nɔ; jeee hejɔlɛ hamɔ miba shi klante moŋ.

³⁵ Ejaakɛ miba ni mabahã mɔ ate shi ashi etsɛ, biyoo ate shi ashi enyɛ, shaayoo ate shi ashi eshaayoo.

³⁶ Ni mɔ diɛŋtsɛ shĩateŋbii aaatsɔ̃mɔ ehenyɛlɔi.

³⁷ Mɔ ni dɔɔ tsɛ loo nyɛ he fe mi lɛ, esaaa mi; ni mɔ ni dɔɔ binuu loo biyoo he fe mi lɛ, esaaa mi.

³⁸ Ni mɔ ni wooo esɛŋmɔtso kɛnyiɛɛɛ misɛɛ lɛ, esaaa mi.

³⁹ Mɔ ni baa esusuma yi lɛ, eeelaaje lɛ; shi mɔ ni laajeɔ esusuma yɛ mihewɔ lɛ, enine aaashɛ nɔ.”

Mɛi ni hereɔ Yesu kaselɔi anyɔmɔwo

⁴⁰ “Mɔ ni hereɔ nyɛ lɛ, ehereɔ mi; ni mɔ ni hereɔ mi lɛ, ehereɔ mɔ ni tsu mi lɛ.

⁴¹ Mɔ ni hereɔ gbalɔ yɛ gbalɔ gbɛi mli lɛ, gbalɔ nyɔmɔwoo eeena; ni mɔ ni hereɔ jalɔ yɛ jalɔ gbɛi mli lɛ, jalɔ nyɔmɔwoo eeena.

⁴² Ni mɔ fɛɛ mɔ ni aaahã mɛi bibii nɛɛ ateŋ mɔ kome nuhɔ̃ɔ kpulu kome pɛ enu yɛ kaselɔ gbɛi mli lɛ, miikɛɛ nyɛ anɔkwale mli akɛ enyɔmɔwoo eŋmɛŋ lɛ kɔkɔɔkɔ.”