Marko 9 - ŊMALƐ KRƆŊKRƆŊ LƐ

¹ Ni ekɛɛ amɛ akɛ, “Miikɛɛ nyɛ yɛ anɔkwale mli akɛ mɛi komɛi yɛ mɛi ni damɔ biɛ nɛɛ ateŋ ni amɛsaŋ amɛnaa gbele kɛyashi beyinɔ ni amɛaana Nyɔŋmɔ Maŋtsɛyeli lɛ akɛ eeba yɛ hewalɛ mli.”

Yesu gbɔmɔtso su tsake

² Gbii ekpaa sɛɛ lɛ, Yesu ŋɔ Petro kɛ Yakobo kɛ Yohane, ni ekɛ amɛ kɛkɛ tee gɔŋ ni kwɔ ko nɔ yɛ afã banee. Ni egbɔmɔtso su tsake yɛ amɛhiɛ.

³ Ni etade lɛ kpɛ ni eyɛ futafuta bɔ ni niiahefɔlɔ ko bɛ shikpɔŋ nɛɛ nɔ ni aaanyɛ ahã eyɛ nakai.

⁴ Ni Elia kɛ Mose jie amɛhe kpo amɛtsɔ̃ɔ amɛ ni amɛkɛ Yesu miiwie.

⁵ Ni Petro here nɔ ni ekɛɛ Yesu akɛ, “Tsɔɔlɔ, ehi akɛ wɔhi biɛ! Hã wɔfee bui etɛ̃, onɔ ekome, kɛ Mose nɔ ekome, kɛ Elia nɔ ekome.”

⁶ Shi eleee nɔ ni ekɛɔ lɛ ejaakɛ amɛ jijaa.

⁷ Ni atatu ko bakete amɛnɔ, ni gbee ko jɛ atatu lɛ mli kɛɛ, “Mɔ nɛ ji misuɔmɔ Bi lɛ, nyɛboa lɛ toi!”

⁸ Ni amrɔ lɛ, be ni amɛkwɛkwɛɛ amɛhe kɛkpe lɛ, amɛnaaa mɔ ko mɔ ko dɔŋŋ akɛ ja Yesu pɛ kɛ amɛ kɛkɛ.

⁹ Ni be ni amɛkpelekeɔ gɔŋ lɛ, Yesu tswa amɛnaa ma ekɛɛ, “Nyɛkagbaa mɔ ko nii ni nyɛna lɛ, ja Gbɔmɔ Bi lɛ ete shi kɛjɛ gbohii ateŋ dã.”

¹⁰ Amɛkɛ wiemɔ nɛɛ to amɛyiŋ, shi amɛbibii amɛhe akɛ, “Te shitee kɛ gbohii ateŋjɛɛ nɛɛ shishiŋ?”

¹¹ Ni amɛbi lɛ akɛ, “Te tɛŋŋ ni mlatsɔɔlɔi lɛ kɛɔ akɛ ja Elia eba dã lɛ?”

¹² Eto he ekɛɛ amɛ akɛ, “Elia baaba dã lɛɛlɛŋ ni ebato nibii fɛɛ gbɛjianɔ ekoŋŋ. Shi mɛɛba mɔ ni aŋma yɛ Gbɔmɔ Bi lɛ he akɛ eeena amanehulu pii, ni aaaŋɔ lɛ akɛ mɔ ko ni abuuu lɛ lɛ?

¹³ Shi miikɛɛ nyɛ akɛ Elia eba momo, ni amɛfee lɛ nɔ fɛɛ nɔ ni amɛsumɔɔ, tamɔ bɔ ni aŋma yɛ ehe lɛ.”

Yesu tsa gbekɛ nuu ko ni mumɔ fɔŋ yɔɔ emli

¹⁴ Be ni amɛbashɛ kaselɔi lɛ aŋɔɔ lɛ, amɛna mɛi pii ni bua amɛhe kɛ mlatsɔɔlɔi lɛ ni amɛmiibibii amɛhe nii.

¹⁵ Amrɔ ni asafo lɛ fɛɛ na Yesu lɛ, efee amɛ naakpɛɛ, ni amɛsha foi kɛba eŋɔɔ amɛbafala lɛ.

¹⁶ Ni ebi amɛ akɛ, “Mɛni nyɛbibiɔ amɛ lɛ?”

¹⁷ Ni mɛi lɛ ateŋ mɔ kome here lɛ nɔ ekɛɛ, “Tsɔɔlɔ, mikɛ mibinuu ni mumɔ ni ewieee yɔɔ emli ba oŋɔɔ.

¹⁸ He fɛɛ he ni eeemɔ lɛ yɛ lɛ, etsiɔ lɛ etswaa shi ni enaa kwɛ̃ɔ afui, ni ekpeɔ enyanyɔji ashishi ni eetã loo. Mikɛɛ okaselɔi lɛ ni amɛfã lɛ lɛ, amɛnyɛ̃ɛɛ.”

¹⁹ Yesu to he ekɛɛ amɛ akɛ, “Ao, yinɔbii ni heee yeee! Mɛɛ beyinɔ nɔŋŋ mi kɛ nyɛ aaahi shi kɛyashi? Mɛɛ beyinɔ mato mitsui shi mahã nyɛ kɛyashi? Nyɛkɛ gbekɛ nuu lɛ abaa miŋɔɔ.”

²⁰ Ni amɛkɛ lɛ ba eŋɔɔ. Ni be ni mumɔ lɛ na Yesu lɛ, amrɔ lɛ ehã gbekɛ lɛ shɔ̃ kwekweekwe, ni egbee shi, ni ekoklo shi, ni enaa kwɛ̃ afui.

²¹ Yesu bi etsɛ lɛ akɛ, “Mɛɛ beyinɔ enɛ bɔ̃i lɛ feemɔ?” Ni eto he ekɛɛ, “Kɛjɛ egbekɛbiiashi.

²² Kpitiokpitio eshɛɔ lɛ efɔ̃ɔ la mli kɛ nui amli koni ekpãtã ehiɛ. Shi kɛji ooonyɛ he nɔ ko ofee lɛ, omusuŋ atsɔ̃ bo yɛ wɔhe ni ofee he eko ohã wɔ!”

²³ Yesu kɛɛ lɛ akɛ, “Okɛɛ, ‘Kɛ ooonyɛ?’ Aaanyɛ afee nii fiaa ahã mɔ ni heɔ yeɔ lɛ!”

²⁴ Ni amrɔ lɛ gbekɛ lɛ tsɛ lɛ bo ekɛɛ, “Miihe miiye; ye obua mihemɔkɛyeli ni mibɛ lɛ!”

²⁵ Shi be ni Yesu na akɛ asafo lɛ hiɛ foi kɛmiiba eŋɔɔ lɛ, efã mumɔ fɔŋ lɛ yi ni ekɛɛ lɛ akɛ, “Bo mumɔ mumui kɛ toimulɔ, miifã bo akɛ, ‘Jee emli, ni kaabote emli dɔŋŋ.’ ”

²⁶ Ni mumɔ lɛ bolɔ, ni ehã gbekɛ lɛ shɔ̃ kwekweekwe, ni eje emli; ni gbekɛ lɛ tsɔ̃ tamɔ gbonyo bɔ ni mɛi pii kɛɛ akɛ egbo.

²⁷ Shi Yesu mɔ enineshi, ni ewo enɔ, ni ete shi edamɔ shi.

²⁸ Be ni Yesu ba shĩa lɛ, ekaselɔi lɛ bi lɛ yɛ afã akɛ, “Mɛɛba wɔ lɛ wɔnyɛɛɛ mumɔ lɛ wɔfã lɛ?”

²⁹ Ni ekɛɛ amɛ akɛ, “Nɛkɛ henɔ nɛɛ, anyɛɛɛ lɛ afã yɛ nɔ ko nɔ ko naa, akɛ ja yɛ sɔlemɔ kɛ ŋmaahilɛ naa pɛ kɛkɛ.”

Yesu wie egbele kɛ eshitee he ekoŋŋ

³⁰ Yesu kɛ ekaselɔi lɛ je jɛi ni amɛyatsɔ̃ Galilea, ni esumɔ̃ɔɔ akɛ mɔ ko ale;

³¹ ejaakɛ eetsɔ̃ɔ ekaselɔi lɛ anii; ekɛɛ amɛ akɛ, “Aaaŋɔ Gbɔmɔ Bi lɛ awo gbɔmɛi adɛŋ ni amɛaagbe lɛ, ni kɛ agbe lɛ lɛ, eeete shi yɛ gbi ni ji etɛ̃ lɛ nɔ.”

³² Shi amɛnaaa nakai wiemɔ lɛ naa, ni amɛmiishe gbeyei hu akɛ amɛaabi lɛ.

Namɔ ji agbo fe fɛɛ?

³³ Ni amɛba Kapernaum. Ni be ni eyɔɔ shĩa lɛ, ebi ekaselɔi lɛ akɛ, “Mɛni he nyɛwieɔ yɛ gbɛ lɛ nɔ lɛ?”

³⁴ Shi amɛtswaaa amɛsɛŋ; ejaakɛ be ni amɛnyiɛ gbɛ lɛ nɔ lɛ, amɛtaa naa yɛ amɛteŋ akɛ namɔ ji agbo fe fɛɛ.

³⁵ Yesu ho eta shi ni etsɛ mɛi nyɔŋma kɛ enyɔ lɛ ni ekɛɛ amɛ akɛ, “Kɛji mɔ ko miitao klɛŋklɛŋ mɔ atsɔ̃ lɛ, efee ehe mɛi fɛɛ sɛɛkpelɔ kɛ mɛi fɛɛ sɔ̃ɔlɔ.”

³⁶ Ni eŋɔ gbekɛ bibioo ko ni ekɛ lɛ damɔ amɛteŋ, ni eloo lɛ atuu, ni ekɛɛ amɛ akɛ,

³⁷ “Mɔ fɛɛ mɔ ni hereɔ gbekɛbii ni tamɔ mɛnɛɛmɛi ateŋ mɔ kome yɛ migbɛi mli lɛ, ehereɔ mi; ni mɔ ni hereɔ mi lɛ, jeee mi ehereɔ, shi moŋ mɔ ni tsu mi lɛ!”

Mɔ ni eteee shi ewooo wɔ lɛ eyɛ wɔgbɛfaŋ

³⁸ Yohane kɛɛ lɛ akɛ, “Tsɔɔlɔ, wɔna mɔ ko ni kɛ ogbɛi miifã mumɔi fɔ̃ji, ni wɔtsi lɛ gbɛ, ejaakɛ ekɛ wɔ enyiɛɛɛ osɛɛ”

³⁹ Shi Yesu kɛɛ, “Nyɛkatsia lɛ gbɛ, ejaakɛ mɔ ko bɛ ni ekɛ migbɛi aaatsu hewalɛ nitsumɔ ko ni eeenyɛ mihe efɔŋ ewie oya.

⁴⁰ Ejaakɛ mɔ ni eteee shi ewooo wɔ lɛ, eyɛ wɔgbɛfaŋ.

⁴¹ Mɔ fɛɛ mɔ ni aaahã nyɛ nu kpulu kome nyɛnu yɛ migbɛi mli akɛ Kristo webii lɛ, miikɛɛ nyɛ anɔkwale mli akɛ enyɔmɔwo eŋmɛŋ lɛ.”

Nanetɔ̃tɔ̃mɔ he kɔkɔbɔɔ

⁴² “Mɔ fɛɛ mɔ ni aaatɔ̃tɔ̃ mɛi bibii nɛɛ ni heɔ minɔ yeɔ lɛ ateŋ mɔ kome nane lɛ, faŋ nɔ ni akɛ teji wiɛ ŋmɔ ekuɛ ni ayashɛ lɛ afɔ̃ ŋshɔŋ.

⁴³ Kɛ onine miitɔ̃tɔ̃ onane lɛ, foo; faŋ nɔ ni okɛ nine kome bote wala mli fe nɔ ni okɛ niji enyɔ aaatee gehena (Abonsamiiaje) yɛ la ni gbooo lɛ mli, [

⁴⁴ he ni amɛgɔ̃gɔ̃mi lɛ gbooo, ni amɛla lɛ hu gbooo yɛ lɛ.]

⁴⁵ Ni kɛ onane miitɔ̃tɔ̃ onane lɛ, foo; faŋ nɔ ni okɛ nane kome bote wala mli fe nɔ ni ohiɛ naji enyɔ ni aaashɛ bo afɔ̃ abonsamiiaje yɛ la ni gbooo lɛ mli, [

⁴⁶ he ni amɛgɔ̃gɔ̃mi lɛ gbooo, ni amɛla hu gbooo yɛ lɛ.]

⁴⁷ Ni kɛ ohiŋmɛi miitɔ̃tɔ̃ onane lɛ, fãa oshɛ ofɔ̃; faŋ nɔ ni okɛ hiŋmɛi kome bote Nyɔŋmɔ Maŋtsɛyeli lɛ mli fe nɔ ni ohiɛ hiŋmɛii enyɔ ni aaashɛ bo afɔ̃ abonsamiiaje la lɛ mli,

⁴⁸ he ni amɛgɔ̃gɔ̃mi lɛ gbooo ni amɛla lɛ hu gbooo yɛ lɛ.

⁴⁹ “Ejaakɛ mɔ fɛɛ mɔ lɛ akɛ la aaawo lɛ ŋoo.

⁵⁰ Nɔ kpakpa ji ŋoo; shi kɛji ŋoo naanu gbo lɛ, mɛni nyɛkɛaawo lɛ ŋoo dɔŋŋ? Nyɛhãa ŋoo ahĩa nyɛmli, ni nyɛhia shi yɛ hejɔlɛ mli yɛ nyɛteŋ.”