Marko 6 - ŊMALƐ KRƆŊKRƆŊ LƐ

Akwa Yesu yɛ Nazaret

¹ Yesu je jɛi eyiŋ etee emaŋ lɛ mli, ni ekaselɔi lɛ nyiɛ esɛɛ.

² Ni be ni shɛ hejɔɔmɔ gbi lɛ ebɔ̃i nitsɔɔmɔ yɛ kpeehe lɛ; ni mɛi pii ni nu lɛ ahe jɔ̃ amɛhe ni amɛbi akɛ, “Nɛgbɛ mɔ nɛ yana nii nɛɛ kɛjɛ? Mɛɛ nilee akɛhã lɛ ni atsɔ̃ɔ enine nɔ atsuɔ nɛkɛ hewalɛ nitsumɔi nɛɛ?

³ Ani jeee ŋaalɔ lɛ nɛ, Maria bi lɛ, kɛ Yakobo kɛ Yose kɛ Yuda kɛ Simon nyɛmi nuu lɛ, ni jeee enyɛmimɛi yei hu kɛ wɔ yɔɔ biɛ lɛ?” Ni ehe sane lɛ hã amɛnane tɔ̃tɔ̃.

⁴ Ni Yesu kɛɛ amɛ akɛ, “Akpaaa gbalɔ woo akɛ ja yɛ emaŋ kɛ ewekumɛi ateŋ kɛ ewe kɛkɛ.”

⁵ Ni enyɛɛɛ hewalɛ nitsumɔ ko etsu yɛ Nazaret, fe akɛ ekɛ eniji ŋmɛlɛ helatsɛmɛi fioo ko nɔ, ni etsa amɛ.

⁶ Ehiɛ fee lɛ yaa yɛ he ni amɛheee amɛyeee lɛ hewɔ. Ni eyakpa akrowai lɛ amli, ni etsɔ̃ɔ nii.

Yesu tsu kaselɔi nyɔŋma kɛ enyɔ lɛ

⁷ Ni Yesu tsɛ kaselɔi nyɔŋma kɛ enyɔ lɛ kɛba eŋɔɔ ni ebɔ̃i amɛ tsumɔ enyɔnyɔɔnyɔ ni ehã amɛ hewalɛ yɛ mumɔi fɔ̃ji lɛ anɔ.

⁸ Ni ewo amɛ akpɔ akɛ amɛkahiɛ nɔ ko yɛ gbɛ lɛ nɔ, akɛ ja tso kɛkɛ; amɛkahiɛ aboloo loo kotoku loo shika yɛ amɛhɛfiinii amli;

⁹ shi amɛwo tokotai, ni amɛkawo flakai enyɔ.

¹⁰ Esaa ekɛɛ amɛ akɛ, “He fɛɛ he ni nyɛaabote shĩa ko yɛ lɛ, nyɛhia jɛi kɛyashi beyinɔ ni nyɛaaje jɛi.

¹¹ He fɛɛ he ni mɛi lɛ hereee nyɛ ni amɛbooo nyɛ toi yɛ lɛ, kɛ nyɛmiije jɛi lɛ, nyɛkpokpoa nyɛnane shi mlu nyɛshwiea shi nyɛkɛyea odase nyɛshia amɛ.”

¹² Ni amɛyiŋ amɛtee, ni amɛyashiɛ amɛtsɔ̃ɔ mɛi akɛ amɛtsake amɛtsui.

¹³ Ni amɛfãmɔ mumɔi fɔ̃ji pii ni amɛfɔfɔɔ helatsɛmɛi pii amu ni amɛtsa amɛ.

Yohane Baptisilɔ lɛ gbele

¹⁴ Ni maŋtsɛ Herode nu he, ejaakɛ Yesu gbɛi ehehee shi, Mɛi komɛi kɛɛ akɛ, “Yohane Baptisilɔ lɛ ete shi kɛjɛ gbohii ateŋ, no hewɔ ni hewalɛ nɛɛ tsuɔ nii yɛ emli nɛɛ.”

¹⁵ Mɛi komɛi hu kɛɛ, “Elia ni;” shi mɛi krokomɛi hu kɛɛ, “Gbalɔ ni, tamɔ blema gbalɔi lɛ eko.”

¹⁶ Be ni Herode nu lɛ, ekɛɛ, “Yohane ni mifo eyi lɛ, lɛ ete shi ekoŋŋ kɛjɛ gbohii ateŋ nɛɛ!”

¹⁷ Ekɛɛ enɛ ejaakɛ lɛ Herode lɛ etsu ayamɔ Yohane, ni efi lɛ ni ekɛ lɛ ewo tsuŋ. Efee enɛ ejaakɛ ekɛ Herodia, enyɛmi Filipo ŋa lɛ, efee eŋa;

¹⁸ ni Yohane kɛɔ lɛ akɛ, “Ejaaa gbɛ akɛ okɛ onyɛmi lɛ ŋa lɛ feɔ oŋa.”

¹⁹ Hewɔ lɛ Herodia bɛ Yohane wo emli, ni eetao lɛ egbe; shi enyɛɛɛ,

²⁰ ejaakɛ Herode miishe Yohane gbeyei, akɛni ele akɛ jalɔ kɛ mɔ krɔŋkrɔŋ ji lɛ lɛ, ni eto lɛ shweshweeshwe. Kɛ ebo ewiemɔ toi lɛ, ehe jaraa lɛ pii, shi kɛ̃lɛ esumɔɔ akɛ ebo lɛ toi.

²¹ Ni gbi ni sa lɛ bashɛ, be ni Herode yeɔ efɔmɔ gbijurɔ ni eŋmɛ ebladei kɛ esafoiatsɛmɛi kɛ Galilea onukpai lɛ okplɔ̃ lɛ:

²² Herodia biyoo ba ebajo, ni esa Herode kɛ mɛi ni kɛ lɛ tara okplɔ̃ lɛ he lɛ ahiɛ. Ni maŋtsɛ lɛ kɛɛ gbekɛ yoo lɛ akɛ, “Bi mi nɔ fɛɛ nɔ ni otaoɔ, ni mahã bo!”

²³ Ni ekã lɛ kitã akɛ, “Nɔ fɛɛ nɔ ni ooobi mi lɛ mahã bo, kɛji mimaŋtsɛyeli lɛ fã tete po lɛ!”

²⁴ Ni gbekɛ yoo lɛ je kpo yabi enyɛ akɛ, “Mɛni mibi?” Ni ekɛɛ, “Yohane Baptisilɔ lɛ yitso.”

²⁵ Ni amrɔ lɛ eba maŋtsɛ lɛ ŋɔɔ oya ni ebakɛɛ lɛ akɛ, “Miitao ni okɛ Yohane Baptisilɔ lɛ yitso ahã mi amrɔ nɛɛ nɔŋŋ yɛ kã mli.”

²⁶ Edɔ maŋtsɛ lɛ naakpa; shi ekitã lɛ kɛ mɛi ni kɛ lɛ tara niyenii lɛ ashi lɛ ahewɔ lɛ, esumɔɔɔ akɛ ekãmaa lɛ.

²⁷ Ni amrɔ lɛ maŋtsɛ lɛ tsu oblafo, ni efã lɛ akɛ ekɛ Yohane yitso aba.

²⁸ Ni etee eyafo eyi yɛ tsu lɛ mli, ni ekɛŋmɛ kã mli kɛba ekɛbahã gbekɛ yoo lɛ, ni lɛ hu ekɛyahã enyɛ.

²⁹ Ni be ni Yohane kaselɔi lɛ nu lɛ, amɛba amɛbawo egbonyo lɛ amɛyafu.

Bɔfoi lɛ asɛɛkuu

³⁰ Bɔfoi lɛ bua amɛhe naa kɛba Yesu ŋɔɔ, ni amɛbagba lɛ nii ni amɛyafee kɛ nii ni amɛyatsɔ̃ɔ lɛ fɛɛ.

³¹ Ni ekɛɛ amɛ akɛ, “Nyɛ sɔŋŋ nyɛbaa ni wɔtea ŋa lɛ nɔ he ko banee ni nyɛyajɔa nyɛhe fioo.” Ejaakɛ mɛi ni baa yaa lɛ fa tsɔ̃ ni amɛnaaa dekã kɛye nii tete.

Yesu hã mɛi akpei enumɔ niyenii

³² Ni amɛtsɔ̃ lɛlɛ mli kɛtee ŋa lɛ nɔ he ko banee.

³³ Ni asafoi lɛ na amɛ ni amɛmiiya, ni mɛi pii yoo amɛ; ni amɛjɛ maji lɛ fɛɛ amli amɛjo foi kɛtsɔ̃ shikpɔŋ kɛtee jɛi, ni amɛho amɛnaa.

³⁴ Be ni Yesu kpeleke lɛ, ena asafo kpele, ni emusuŋ tsɔ̃ lɛ yɛ amɛhe, ejaakɛ amɛtamɔ toi ni bɛ kwɛlɔ; ni ebɔ̃i amɛ nibii pii tsɔ̃ɔmɔ.

³⁵ Ni be ni je bɔ̃i namɔ lɛ, ekaselɔi lɛ ba eŋɔɔ amɛbakɛɛ lɛ akɛ, “Ŋa nɔ ji biɛ, ni je hu miina;

³⁶ wo mɛi lɛ agbɛ koni amɛya akrowai kɛ maji ni jwere wɔhewɔ nɛɛ amli ni amɛyahe nii amɛye.”

³⁷ Shi ehere nɔ ekɛɛ amɛ akɛ, “Nyɛ diɛŋtsɛ nyɛhãa amɛ nɔ ko amɛyea.” Amɛbi lɛ akɛ, “Ani wɔya wɔyahe aboloo denarioi ohai enyɔ wɔkɛhã amɛ amɛye?”

³⁸ Ni ebi amɛ akɛ, “Aboloi enyiɛ nyɛyɔɔ? Nyɛyaa ni nyɛyakwɛa.” Be ni amɛyakwɛ lɛ, amɛkɛɛ, “Aboloi enumɔ kɛ loi enyɔ.”

³⁹ Ni efã amɛ akɛ amɛhã mɛi lɛ fɛɛ atara shi kuikui yɛ jwɛifɔ lɛ nɔ.

⁴⁰ Ni amɛtara shi kuikui, ohahai kɛ nyɔŋmai enumɔenumɔi.

⁴¹ Ni Yesu kɔlɔ aboloi enumɔ lɛ kɛ loi enyɔ lɛ ni ekwɛ ŋwɛi ni ejɔɔ nɔ. Ekumɔ aboloi lɛ, ni ekɛhã ekaselɔi lɛ koni amɛkɛmamɔ mɛi lɛ ahiɛ. Eja loi enyɔ lɛ hu ehã amɛ fɛɛ.

⁴² Amɛ fɛɛ amɛye ni amɛtɔrɔ.

⁴³ Ni amɛhala aboloo fufuji kɛ loo fufuji lɛ amɛwo kafui nyɔŋma kɛ enyɔ mli obɔ̃bɔ̃.

⁴⁴ Ni mɛi ni ye aboloo lɛ ayibɔ ji hii akpei enumɔ.

Yesu yasɔle

⁴⁵ Ni amrɔ lɛ Yesu tsirɛ ekaselɔi lɛ ayisɛɛ ni amɛbote lɛlɛ mli koni amɛtsɔ̃ ehiɛ kɛya ŋshɔ lɛ sɛɛ ni amɛya Betsaida, kɛyashi beyinɔ ni eeewo asafo lɛ gbɛ.

⁴⁶ Ni be ni ewo amɛ gbɛ lɛ, eyiŋ etee gɔŋ lɛ nɔ ni eyasɔle.

Yesu nyiɛ ŋshɔ hiɛ

⁴⁷ Be ni je na lɛ, lɛlɛ lɛ eshɛ ŋshɔ lɛ teŋ, ni Yesu kome yɛ shikpɔŋ.

⁴⁸ Ena akɛ wirimɔ lɛ miitɔ kaselɔi lɛ ejaakɛ amɛmiikpee kɔɔyɔɔ; ni maŋkɛ hima aaafee ŋmɛji etɛ̃ loo nɔ mli lɛ, enyiɛ ŋshɔ lɛ nɔ kɛmiiba amɛŋɔɔ, ni eetao eho amɛhe.

⁴⁹ Be ni amɛna lɛ ni enyiɛ ŋshɔ lɛ nɔ lɛ, amɛsusu akɛ sisa ni, ni amɛbolɔ

⁵⁰ ejaakɛ amɛ fɛɛ amɛna lɛ, ni amɛtsui fa. Ni amrɔ lɛ ekɛ amɛ wie, ni ekɛɛ amɛ akɛ, “Nyɛtsui anyɔa nyɛmli; mi ni; nyɛkashea gbeyei!”

⁵¹ Ni eba amɛŋɔɔ yɛ lɛlɛ lɛ mli, ni kɔɔyɔɔ lɛ fɔ̃ɔ tswaa. Ni amɛnaa kpɛ amɛhe naakpa diɛŋtsɛ, ni amɛhiɛ fee amɛ yaa.

⁵² Ejaakɛ amɛyooko nɔ ni aboloo sane lɛ tsɔ̃ɔ lɛ sɛɛ; amɛjwɛŋmɔ kpleee he.

Yesu tsa helatsɛmɛi yɛ Genesaret

⁵³ Ni be ni amɛfo ŋshɔ lɛ, amɛba Genesaret shikpɔŋ lɛ nɔ, ni amɛbakpeleke.

⁵⁴ Ni be ni amɛje lɛlɛ lɛ mli lɛ, amrɔ lɛ mɛi lɛ yoo Yesu,

⁵⁵ ni amɛsha foi kɛyakpa jɛi niiaŋ fɛɛ, ni amɛbɔ̃i mɛi ni he yeɔ lɛ aholemɔ yɛ sai anɔ kɛ eŋɔɔbaa yɛ he fɛɛ he ni amɛnu akɛ eyɔɔ.

⁵⁶ Ni he fɛɛ he ni ebote akrowai loo maji loo ŋmɔji amli yɛ lɛ, amɛkɛ helatsɛmɛi bashwieɔ blohuiaŋ, ni amɛkpaa lɛ fai koni ehã amɛna etade naamuu lɛ kɛkɛ he amɛtara; ni mɛi abɔ ni tara he lɛ, amɛhe wa amɛ.