Marko 5 - ŊMALƐ KRƆŊKRƆŊ LƐ

Yesu tsa nuu ni mumɔi fɔ̃ji yɔɔ emli lɛ

¹ Ni amɛba Galilea Ŋshɔ lɛ sɛɛ yɛ Gerasebii ashikpɔŋ lɛ nɔ.

² Be ni Yesu je lɛlɛ lɛ mli pɛ kɛkɛ ni nuu ko ni mumɔ fɔŋ yɔɔ emli jɛ gbohii abui lɛ amli kɛ lɛ bakpe.

³ Nɛkɛ nuu nɛɛ, gbohii abui amli ehiɔ, ni mɔ ko mɔ ko nyɛɛɛ lɛ kɔsɔŋkɔsɔ awo dɔŋŋ;

⁴ ejaakɛ awo lɛ gboklɛi kɛ kɔsɔŋkɔsɔi shii abɔ, shi be fɛɛ be ni aaawo lɛ lɛ, etserɛɔ kɔsɔŋkɔsɔi lɛ ni ekumɔɔ gboklɛi lɛ, ni mɔ ko mɔ ko nyɛɛɛ ehe ajɔɔ.

⁵ Nyɔɔŋ kɛ shwane fɛɛ lɛ, gbohii abui kɛ gɔji lɛ amli eyɔɔ, ni ebolɔɔ ni ekɛ tɛi folɔɔ ehe.

⁶ Shi be ni ena Yesu yɛ shɔŋŋ lɛ, ejo foi kɛba eŋɔɔ, ni ebakula shi yɛ ehiɛ;

⁷ ni ebo kɛ gbee ni wa ekɛɛ, “Yesu, Nyɔŋmɔ ni yɔɔ ŋwɛi shɔŋŋ lɛ Bi, mɛni sane mikɛ bo yɔɔ? Mina Nyɔŋmɔ akɛ kaapiŋ mi!”

⁸ Ekɛɛ enɛ ejaakɛ Yesu kɛɛ lɛ akɛ, “Jee gbɔmɔ nɛɛ mli, bo mumɔ fɔŋ!”

⁹ Kɛkɛ ni Yesu bi lɛ akɛ, “Te ogbɛiŋ?” Nuu lɛ here nɔ ekɛɛ, “Migbɛi ji Asafo, ejaakɛ wɔyi fa!”

¹⁰ Ni ekpa Yesu fai waa akɛ ekashwie amɛ kɛmiije jɛi niiaŋ.

¹¹ Kplotoo ku kpele ko yɛ jɛi amɛmiiye nii yɛ gɔŋ lɛ he.

¹² Ni mumɔi fɔ̃ji lɛ kpa Yesu fai amɛkɛɛ, “Hã wɔya kplotoi lɛ ateŋ ni wɔyabote amɛmli.”

¹³ Ni eŋmɛ amɛ gbɛ. Mumɔi fɔ̃ji lɛ je nuu lɛ mli, ni amɛyabote kplotoi lɛ amli. Ni kuu muu lɛ fɛɛ — aaafee akpei enyɔ — wo foi kɛjɛ gɔŋ lɛ nɔ kɛkpeleke shi kɛyashwie ŋshɔ lɛ mli, ni amɛgboi yɛ jɛi.

¹⁴ Kɛkɛ ni kplotookwɛlɔi lɛ jo foi, ni amɛyagba yɛ maŋ lɛ kɛ ŋmɔji lɛ amli, ni mɛi lɛ je kpo amɛbakwɛ nɔ ni eba lɛ.

¹⁵ Amɛba Yesu ŋɔɔ, ni amɛbana nuu ni mumɔi fɔ̃ji asafo hi emli lɛ ta shi ni ewo atade ni ehiɛ etserɛ lɛ; ni efee amɛ gbeyei.

¹⁶ Mɛi ni na lɛ gba amɛ nɔ ni ba nuu ni mumɔi fɔ̃ji hi emli lɛ nɔ kɛ kplotoi lɛ ahe sane lɛ.

¹⁷ Ni amɛbɔ̃i Yesu faikpamɔ akɛ eje amɛkpokpai lɛ anɔ eya.

¹⁸ Be ni Yesu boteɔ lɛlɛ lɛ mli lɛ, nuu ni mumɔi fɔ̃ji hi emli lɛ kpa lɛ fai ni ehã ekɛ lɛ ahi shi.

¹⁹ Shi Yesu ekpɛlɛ̃ɛɛ lɛ; moŋ ekɛɛ lɛ akɛ, “Yaa owe kɛ owekumɛi aŋɔɔ ni oyagba amɛ nii ni Nuŋtsɔ lɛ efee ehã bo, kɛ mɔbɔ ni ena bo lɛ!”

²⁰ Ni nuu lɛ yiŋ etee, ni eyabɔ̃i nii ni Yesu efee ehã lɛ lɛ shiɛmɔ yɛ Dekapoli; ni efee amɛ fɛɛ naakpɛɛ.

Yairo biyoo lɛ kɛ yoo ni ta Yesu atade he lɛ

²¹ Be ni Yesu kɛ lɛlɛ lɛ fo ŋshɔ lɛ ekoŋŋ kɛba esɛɛgbɛ lɛ, mɛi pii babua ehe yɛ ŋshɔ lɛ naa.

²² Kɛkɛ ni kpeehe lɛ onukpai lɛ ateŋ mɔ kome ni atsɛɔ lɛ Yairo lɛ ba, ni be ni ena Yesu lɛ, eho egbee enaji anaa,

²³ ni ekpa lɛ fai pii ekɛɛ, “Gbo mibiyoo fioo heɔ agbo nɛɛ, hewɔ lɛ ba ni okɛ oniji abashwie enɔ koni ehe awa lɛ ni eyi ana wala!”

²⁴ Ni Yesu kɛ lɛ tee. Mɛi pii nyiɛ esɛɛ, ni amɛmiififia lɛ.

²⁵ Ni yoo ko ni eye láhoo hela afii nyɔŋma kɛ enyɔ,

²⁶ ni ena nɔ babaoo yɛ tsofatsɛmɛi pii adɛŋ; efite edɛŋ nii fɛ̃ɛ, ni kɛ̃lɛ enaaa he sɛɛ ko kwraa shi wu kɛkɛ moŋ hela lɛ woɔ lɛ,

²⁷ be ni enu Yesu he lɛ, ebaje esɛɛgbɛ yɛ mɛi pii lɛ ateŋ, ni eta etade lɛ he;

²⁸ ejaakɛ ekɛɛ yɛ eyiŋ akɛ, “Kɛji mita etade lɛ po he kɛkɛ lɛ mihe aaawa mi.”

²⁹ Ni amrɔ lɛ elá ni hoɔ lɛ naa mɔ, ni enu he yɛ ehewojiaŋ akɛ atsa ehela lɛ.

³⁰ Ni amrɔ lɛ Yesu yoo akɛ hewalɛ ko eje emli, ni etsɔ̃ ehe yɛ mɛi lɛ ateŋ ni ebi akɛ, “Namɔ ta mitade lɛ he lɛ?”

³¹ Ni ekaselɔi lɛ kɛɛ lɛ akɛ, “Oona akɛ asafo lɛ miififia bo, ni osaa obiɔ akɛ, ‘Namɔ ta mihe lɛ?’ ”

³² Shi Yesu kwɛ ehe koni ena mɔ ni fee nakai lɛ.

³³ Shi akɛni yoo lɛ le nɔ ni afee ahã lɛ lɛ hewɔ lɛ, ekɛ gbeyeishemɔ kɛ hekpokpomɔ bagbee ehiɛ, ni egba lɛ anɔkwale lɛ fɛ̃ɛ.

³⁴ Yesu kɛɛ lɛ akɛ, “Biyoo, ohemɔkɛyeli ehã ohe ewa bo; yaa yɛ hejɔlɛ mli, ni ohela lɛ ajɔ.”

³⁵ Be ni Yesu wieɔ lolo lɛ, kpeehe onukpa lɛ webii lɛ ekomɛi ba bakɛɛ lɛ akɛ, “Obiyoo lɛ egbo; mɛɛba ogbaa Tsɔɔlɔ lɛ naa lolo?”

³⁶ Shi be ni Yesu nu wiemɔ ni awie lɛ, ekɛɛ Yairo akɛ, “Kaashe gbeyei; he oye kɛkɛ!”

³⁷ Ni ehãaa mɔ ko mɔ ko anyiɛ esɛɛ akɛ ja Petro kɛ Yakobo kɛ Yohane, Yakobo nyɛmi lɛ, kɛkɛ.

³⁸ Amɛba kpeehe onukpa lɛ we lɛ, ni Yesu bana hoofeemɔ kɛ mɛi ni foɔ ni amɛyeɔ ŋkɔmɔ babaoo lɛ.

³⁹ Ni ebote shĩa lɛ, ni ekɛɛ amɛ akɛ, “Mɛɛba nyɛfeɔ hoo ni nyɛfoɔ nɛkɛ? Gbekɛ lɛ gboko; wɔ ewɔɔ!”

⁴⁰ Ni amɛŋmɔ lɛ. Shi lɛ lɛ eshwie mɛi lɛ fɛ̃ɛ kɛje kpo, ni eŋɔ gbekɛ lɛ tsɛ kɛ enyɛ kɛ mɛi ni fata lɛ Yesu lɛ he lɛ kɛtee he ni gbekɛ lɛ kã lɛ.

⁴¹ Ni emɔ enine shi ni ekɛɛ lɛ akɛ, “Talita, kuumi!” Eshishi ji, “Gbekɛyoo, miikɛɛ bo akɛ, tee shi!”

⁴² Ni amrɔ lɛ, gbekɛ lɛ te shi ni ebɔ̃i shisharamɔ; eye afii nyɔŋma kɛ enyɔ. Ni mɛi lɛ anaa kpɛ amɛhe naakpa;

⁴³ shi Yesu tswa amɛnaa ma veveeve akɛ amɛkahã mɔ ko le enɛ; ni efã akɛ ahã gbekɛ lɛ nɔ ko ni eye.