Marko 3 - ŊMALƐ KRƆŊKRƆŊ LƐ

Nuu ni nine egbo lɛ

¹ Ni Yesu tee kpeehe lɛ ekoŋŋ. Nuu ko yɛ jɛi ni enine kome egbo;

² ni amɛsra lɛ akɛ eeetsa lɛ yɛ hejɔɔmɔ gbi lɛ nɔ lo, koni amɛyafolɔ enaa.

³ Yesu kɛɛ mɔ ni nine egbo lɛ akɛ, “Tee shi ni obadamɔ wɔteŋ!”

⁴ Ni ebi mɛi lɛ akɛ, “Ani hejɔɔmɔ gbi lɛ nɔ lɛ eja akɛ afeɔ ekpakpa aloo afeɔ efɔŋ, akɛ ahereɔ gbɔmɔ yiwala aloo agbeɔ lɛ?” Shi amɛ lɛ amɛtswaaa amɛsɛŋ.

⁵ Ni ekwɛ amɛhiɛiaŋ kɛkpe kɛ mlifu, ejaakɛ edɔ lɛ akɛ amɛtsui wa nɛkɛ; ni ekɛɛ nuu lɛ akɛ, “Kpã onine lɛ mli!” Ekpã mli, ni atsa enine lɛ ni eye emuu.

⁶ Farisifoi lɛ je kpo, ni amrɔ lɛ amɛkɛ Herodebii lɛ to eyinɔ apam bɔ ni amɛaafee ni amɛkpãtã ehiɛ.

Asafo yuu lɛ yɛ ŋshɔ lɛ naa

⁷ Kɛkɛ ni Yesu kɛ ekaselɔi lɛ gbala amɛhe shi kɛtee ŋshɔ lɛ naa. Mɛi pii ni jɛ Galilea kɛ Yudea

⁸ kɛ Yerusalɛm kɛ Idumea shikpɔŋ lɛ nɔ kɛ Yordan sɛɛ kɛ Tiro kɛ Sidon niiaŋ fɛɛ nyiɛ esɛɛ. Nɛkɛ asafo yuu nɛɛ ba Yesu ŋɔɔ ejaakɛ amɛnu nibii ni efeɔ lɛ ahe.

⁹ Mɛi lɛ ayifalɛ hewɔ lɛ, Yesu kɛɛ ekaselɔi lɛ ni amɛsaa lɛlɛ bibioo ko amɛhã lɛ koni asafo lɛ akamia lɛ.

¹⁰ Etsa mɛi pii hewɔ lɛ mɛi ni helai hiɛhiɛ amɛ fɛɛ bu kɛba eŋɔɔ koni amɛbatara ehe.

¹¹ Ni be fɛɛ be ni mumɔi fɔ̃ji lɛ aaana lɛ lɛ, amɛhoɔ amɛgbeɔ shi yɛ ehiɛ ni amɛbolɔɔ akɛ, “Bo ji Nyɔŋmɔ Bi lɛ.”

¹² Ni etswa amɛnaa ma veveeve akɛ amɛkajie lɛ shi amɛtsɔ̃ɔ.

Yesu hala kaselɔi nyɔŋma kɛ enyɔ

¹³ Ni Yesu tee gɔŋ lɛ nɔ, ni etsɛ mɛi ni lɛ diɛŋtsɛ etaoɔ lɛ, ni amɛba eŋɔɔ.

¹⁴ Ni ehala mɛi nyɔŋma kɛ enyɔ koni amɛkɛ lɛ abahi shi ni etsu amɛ shiɛmɔ,

¹⁵ koni amɛna hewalɛ ni amɛkɛfamɔ mumɔi fɔ̃ji.

¹⁶ Mɛi nyɔŋma kɛ enyɔ ni ehala lɛ agbɛii nɛ: Simon, mɔ ni ewo lɛ Petro lɛ,

¹⁷ kɛ Yakobo, Zebedeo bi lɛ, kɛ Yohane, enyɛmi lɛ, ni ewo amɛ gbɛi akɛ Boanerges (eshishi ji nyɔŋmɔshimɔ bii);

¹⁸ kɛ Andrea kɛ Filipo kɛ Bartolomeo kɛ Mateo kɛ Toma kɛ Yakobo, Alfeo bi lɛ, kɛ Tadeo kɛ Simon, maŋhedɔlɔ lɛ,

¹⁹ kɛ Yuda Iskariot, mɔ ni tsɔ̃ɔ esɛɛgbɛ lɛ.

Yesu kɛ Beelzebul

²⁰ Ni Yesu ba shĩa. Mɛi babaoo naa bakpe shi ekoŋŋ bɔ ni lɛ kɛ ekaselɔi lɛ wooo niyeli po.

²¹ Be ni ewekumɛi nu he lɛ, amɛtee ni amɛyamɔ lɛ, ejaakɛ mɛi miikɛɛ akɛ eyiŋ miikã lɛ.

²² Mlatsɔɔlɔi lɛ ni jɛ Yerusalɛm ba lɛ kɛɛ akɛ, “Beelzebul yɛ emli, mumɔi fɔ̃ji alumɔ lɛ hewalɛ naa efãmɔɔ mumɔi fɔ̃ji lɛ.”

²³ No hewɔ lɛ, Yesu tsɛ amɛ kɛba eŋɔɔ, ni ekɛɛ amɛ yɛ abɛbuai amli akɛ, “Te Satan aaafee tɛŋŋ afã Satan hu?

²⁴ Kɛji maŋtsɛyeli ko gba wo lɛ diɛŋtsɛ ehe lɛ, nakai maŋtsɛyeli lɛ nyɛŋ shi adamɔ.

²⁵ Ni kɛji shĩa ko gba wo lɛ diɛŋtsɛ ehe lɛ, nakai shĩa lɛ nyɛŋ shi adamɔ.

²⁶ Ni kɛji Satan te shi wo lɛ diɛŋtsɛ ehe ni egba emli lɛ, enyɛŋ shi edamɔ, shi moŋ enaagbee ji no.

²⁷ “Mɔ ko nyɛŋ hewalɔ ko we abote ni eyaha enii, akɛ ja efi hewalɔ lɛ dã kɛkɛ lɛ eeenyɛ ewe lɛ nii eha.

²⁸ Miikɛɛ nyɛ faŋŋ akɛ, akɛ gbɔmɛi ahe eshai fɛɛ aaafa amɛ kɛ musubɔɔ wiemɔi fɛɛ ni amɛaawie hu;

²⁹ shi mɔ ni bɔɔ musu eshiɔ Mumɔ Krɔŋkrɔŋ lɛ, akɛfaŋ lɛ gbi ko gbi ko kɛyashi naanɔ, shi moŋ eye fɔ kɛmiiya naanɔ.”

³⁰ Yesu wie enɛ ejaakɛ amɛkɛɛ, “Mumɔ fɔŋ yɛ emli.”

Yesu nyɛ kɛ enyɛmimɛi lɛ

³¹ Kɛkɛ ni Yesu nyɛ kɛ enyɛmimɛi lɛ ba, ni amɛbadamɔ agbo lɛ naa, ni amɛtsu aba eŋɔɔ ni abatsɛ lɛ.

³² Asafo lɛ tara shi yɛ ehe, ni amɛkɛɛ lɛ akɛ, “Naa, onyɛ kɛ onyɛmimɛi lɛ damɔ agbo lɛ naa amɛmiitao bo.”

³³ Yesu here nɔ ekɛɛ amɛ akɛ, “Namɔ ji minyɛ ni namɛi ji minyɛmimɛi lɛ?”

³⁴ Ekwɛ mɛi ni tara ehe lɛ kɛkpe, ni ekɛɛ, “Naa, minyɛ kɛ minyɛmimɛi nɛ!

³⁵ Ejaakɛ mɔ fɛɛ mɔ ni feɔ Nyɔŋmɔ suɔmɔnaanii lɛ, lɛ ji minyɛmi nuu kɛ minyɛmi yoo kɛ minyɛ.”